ᐃᓕᓐᓂᐊᖅᑐᓕᕆᔨᒃᑯᑦ ᓈᒻᒪᒃᓴᙱᒻᒪᕆᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓂᒃ ᓄᖃᖅᑎᑦᑎᓚᐅᕐᓂᖏᓐᓂᒃ ᖃᓄᐃᓕᐅᕈᑎᓂᒃ ᐃᓕᓐᓂᐊᖅᑎᓄᑦ ᐃᓕᖅᑯᓯᖅᓱᑦᑎᐊᙱᑦᑐᓄᑦ

ᓄᓇᕗᒥᑦ ᒐᕙᒪᒃᑯᑦ ᓄᖅᑲᖅᑎᑦᑎᓚᐅᕐᒪᑕ ᐊᑭᓕᖅᓱᖅᑕᐅᔾᔪᑎᒥᒃ ᐱᓕᕆᐊᒃᓴᒥᒃ ᐃᑲᔪᕈᑎ ᐃᓕᓐᓂᐊᖅᑎᓂᒃ ᐃᓕᖁᓯᖅᓱᓗᐊᙱᑦᑐᓂᒃ, ᑖᔅᓱᒥᖓ ᐃᑲᔪᖅᑐᐃᓯᒪᓚᐅᖅᖢᑎᒃ ᐊᕐᕌᒍᒐᓴᐅᓕᖅᑐᓂᒃ, ᐅᖃᓚᐅᕐᑐᖅ ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ.

ᐃᓕᓐᓂᐊᖅᑐᓕᕆᔨᒃᑯᑦ ᐃᑲᔫᑎᑕᖃᓚᐅᕐᓯᒪᖕᒪᑕ ᒐᕙᒪᑐᖃᒃᑯᓐᓂ ᓯᑎᐱᕆᐅᑎᓪᓗᒍ ᐃᖅᑲᓇᐃᔭᖅᑎᑖᕐᓂᐊᕐᒪᑕ ᖃᐅᔨᓴᕐᓂᐊᖅᑐᓂᒃ 28ᓂ ᐃᓕᓐᓂᐊᖅᑎᓂᒃ ᐃᓕᖁᓯᖅᓱᑦᑎᐊᖏᑦᑐᓂᒃ ᐊᒻᒪᓗ ᐋᖅᑭᒃᓱᐃᓂᐊᕐᓗᑎᒃ ᐃᑲᔫᑎᒃᓴᓄᑦ ᐸᕐᓇᐅᑎᓂᒃ ᑖᒃᑯᓄᖓ. ᑕᐃᔭᐅᓪᓗᓂ ᐃᓄᐃᑦ ᓱᕈᓯᖏᓐᓄᑦ ᐱᓕᕆᐊᒃᓴᐃᑦ.

ᑭᓯᐊᓂᓕ ᔭᓄᐊᕆᒥ — ᑕᕿᕐᒥ ᑭᖑᓪᓕᕐᒥ ᐱᓕᕆᐊᒃᓴᖅ ᐱᒋᐊᕐᓂᐊᖅᑎᓪᓗᒍ — ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᖅᑎᓂᒃ ᐱᕙᓪᓕᐊᓂᕐᒧᑦ ᐱᓕᕆᔨᐅᔪᑦ ᑎᑎᕋᓚᐅᕐᓯᒪᔪᑦ ᐃᖃᓗᐃᑦ ᐃᓕᓐᓂᐊᕐᕕᖏᓐᓄᑦ ᐅᖃᕐᓯᒪᔪᓂᒃ ᑖᒃᑯᓂᖓ ᐱᓕᕆᑎᑕᐅᔪᓂᒃ ᐃᓕᓐᓂᐊᕐᕕᖕᒧ ᐃᓯᖅᑎᖁᔭᐅᔪᓐᓃᖅᖢᑎᒃ, ᐅᖃᓚᐅᕐᑐᖅ ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᐃᒃᓯᕙᐅᑕᖓ ᓂᑰᓪ ᒋᓕᔅ.

“ᖃᐅᔨᒪᙱᑦᑎᐊᕐᑐᖓ. ᑐᑭᖃᙱᑦᑐᖅ. ᖃᔨᐅᒪᔪᖃᙱᑦᑐᖅ ᑕᒪᓐᓇ ᓇᑭᙶᕐᒪᖔᑦ. ᐱᓕᕆᔪᓐᓇᕐᓂᕋᖅᑕᐅᑦᑎᐊᓚᐅᕋᑦᑕ,” ᒋᓕᔅ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑖᓐᓇ ᐱᓕᕆᐊᒃᓴᖅ ᓄᖅᑲᖅᑎᑕᐅᓚᐅᕐᓂᕋᖅᖢᓂᐅᒃ ᐊᒻᒪᓗ ᑮᓇᐅᔭᐃᑦ ᐅᑎᖅᑎᑕᐅᔭᕆᐊᖃᓕᖅᖢᑎᒃ.

ᒋᓕᔅ ᐅᖃᓚᐅᕐᑐᖅ ᐃᖃᓗᐃᑦ ᐃᓕᓐᓂᐊᖅᑐᓕᕆᔨᖏᑦ ᐱᑖᓚᐅᕐᓯᒪᓂᖏᓐᓂᒃ $110,000 ᓯᕗᓪᓕᖅᐹᒧᑦ ᐱᓕᕆᓂᒃᓴᒧᑦ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕐᓱᕈᒪᑎᓪᓗᒋᑦ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅᒥ ᐊᖏᕐᑕᐅᓚᐅᙱᒻᒪᑕ ᐊᒻᒪᓗ ᐅᖃᐅᔾᔭᐅᙱᖢᑎᒃ ᖃᓄᐃᒻᒪ ᐊᐱᕐᓱᕈᓐᓇᙱᑦᑕᕆᐊᒃᓴᖏᓐᓂᒃ. ᑭᓯᐊᓂᓕ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᑎᓕᐅᕐᓯᒪᙱᑦᑐᒥᒃ ᖃᕋᓴᐅᔭᒃᑯᑦ ᑎᑎᕋᕐᕕᐅᓚᐅᕐᒪᑕ ᐃᓕᓐᓂᐊᕐᓂᓕᕆᔨᒃᑯᓐᓂᙶᖅᑐᓂᒃ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᑭᐅᔭᐅᓚᐅᙱᑦᑐᑦ ᓇᓕᐊᓐᓂ ᐊᐱᖅᑯᑎᒋᓚᐅᖅᑕᖏᓐᓂᒃ.

ᐅᖃᐅᓯᓕᐊᕆᔭᐅᔪᖅ ᐅᖃᕐᓯᒪᓚᐅᕐᑐᖅ ᐱᓕᕆᑎᑦᑎᔨᒃᓴᖃᓕᕐᓂᖏᓐᓂᒃ ᐊᒻᒪᓗ ᐊᑎᓕᐅᕐᓯᒪᓕᖅᖢᑎᒃ ᐊᖏᕈᑎᓂᒃ ᐊᒻᒪ ᑕᒪᐅᖓᑦᑕᐃᓐᓇᖅ ᐱᔨᑦᑎᕋᐅᑎᓂᒃ, ᒪᑯᑎᑐᓇᖅ ᐅᖃᓪᓚᒍᓐᓇᕐᓂᕐᒥᒃ, ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔪᕈᑎᓂᒃ ᐊᒻᒪ ᐊᓯᖏᓐᓂᒃ.

ᐃᓕᓐᓂᐊᕐᓂᓕᕆᔨᒃᑯᑦ ᐅᖃᓚᐅᕐᑐᑦ ᑕᒪᕐᒥ ᐃᓕᓐᓂᐊᖅᑏᑦ ᐃᖃᓗᖕᓂ ᐃᑲᔪᖅᑕᐅᒃᑲᓐᓂᕆᐊᓖᑦ ᐃᑲᔪᖅᑕᐅᖃᑦᑕᓚᐅᕐᑐᑦ.

“ᖁᔭᒋᕙᕗᑦ ᐃᖃᓗᐃᑦ ᐃᓕᓐᓂᐊᖅᑐᓕᕆᔨᖏᑦ ᐱᓇᓱᓚᐅᕐᓂᖏᓐᓂᒃ ᐃᑲᔪᕋᓱᒃᑎᓪᓗᒋᑦ ᐃᓕᓐᓂᐊᖅᑎᓂᒃ, ᑭᓯᐊᓂᓕ, ᖃᓄᐃᓕᐅᕈᑎᒃᓴᐃᑦ ᐋᖅᑭᒃᓯᒪᔭᕗᑦ ᐃᖅᑲᓇᐃᔭᖅᑎᑦᑎᓂᕐᒥᒃ ᐃᓕᓐᓂᐊᕐᕕᐅᑉ ᐊᓯᐊᓂᙶᖅᑐᓂ ᐱᓕᕆᐊᖃᕐᓇᓪᓚᕆᖕᒪᑦ ᑕᒪᓐᓇ ᐃᖏᕐᕋᑦᑎᐊᖅᑎᓐᓇᓱᒃᖢᒍ ᐅᓗᕆᐊᓇᙱᑦᑐᒃᑯ ᐃᑲᔪᕋᓱᖕᓂᕐᒥᒃ ᐃᓕᓐᓂᐊᖅᑎᒋᔭᑦᑎᓐᓂᒃ,” ᐅᖃᐅᓯᑦ ᐅᖃᕐᓯᒪᓚᐅᕐᑐᑦ.

ᑭᓯᐊᓂᓕ ᒋᓕᔅ ᐅᖃᓚᐅᕐᑐᖅ ᑕᒪᒃᑯᐊ ᐃᓕᓐᓂᐊᕐᓂᓕᕆᔨᒃᑯᑦ ᐱᔨᑦᑎᕋᐅᑎᒋᑎᑕᖏᑦ ᓈᒻᒪᙱᓗᐊᕐᒪᑕ.

“ᓯᕗᓪᓕᖅᐹᒥ, ᐱᔨᑦᑎᕋᐅᑎᑕᖃᙱᒻᒪᓐ ᒫᓐᓇ, ᑖᓐᓇᓗ ᓈᒻᒪᙱᓕᐅᕈᑎᐅᓪᓗᓂ,” ᐅᖃᕐᑐᖅ.

ᐃᓕᓐᓂᐊᕐᓂᓕᕆᔨᒃᑯᑦ ᐃᖅᑲᓇᐃᔭᖅᑎᑕᖓᓂᒃ ᓄᓇᓕᖕᓄᐊᖅᑎᑦᑎᕙᒃᑐᑦ ᐊᑕᐅᓰᖅᑎᑕᐅᓪᓗᓂ ᐊᕐᕌᒍᒥ ᐱᓕᕆᖃᑎᖃᕐᓂᐊᕐᓗᓂ ᐃᓕᓐᓂᐊᖅᑎᓂᒃ ᐃᓕᖅᑯᓯᕐᓱᙱᔾᔪᑎᖃᖅᑐᓂᒃ, ᒋᓕᔅ ᐅᖃᕐᑐᖅ, ᐊᒻᒪᓗ ᐃᓕᓐᓂᐊᖅᑎ ᐊᑕᐅᓯᑐᐊᖑᙱᑦᑐᒥᒃ ᓈᒻᒪᙱᓕᐅᕈᑎᖃᕈᓂ, ᐊᑕᐅᓯᑐᐊᕐᒥ ᓈᒻᒪᙱᓕᐅᕈᑎᖓᓂ ᐱᓕᕆᐊᖃᕋᔭᓯᖢᓂ.

ᒪᐅᓇᓕ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᑎᒍᑦ ᐃᓕᓐᓂᐊᕐᓂᓕᕆᔨᒃᑯᑦ ᐊᑐᖅᑕᐅᑎᑕᖓᓂᒃ, ᒋᓕᔅ ᐅᖃᓚᐅᕐᑐᖅ ᓈᒻᒪᖕᓂᕋᖅᑕᐅᒐᓗᐊᖅᑎᓪᓗᒋᑦ ᑖᔅᓱᒧᖓᓕ ᓈᒻᒪᙱᓗᐊᕐᓂᕋᖅᑕᖏᑦ.

ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᖃᑎᖃᕈᒪᓚᐅᕐᓯᒪᔪᑦ ᒍᕉᔅᒥ ᐊᒻᒪ ᐅᖃᖅᖢᑎᒃ ᕿᓂᕋᓱᖕᓂᐊᕐᓂᕋᖅᖢᑎᒃ ᐱᓕᕆᐊᒃᓴᖓᓂᒃ ᑲᔪᓯᑎᑦᑎᓇᓱᖕᓂᕐᒥᒃ.

“ᑕᒪᑐᒥᖓ ᐱᓕᕆᐊᖃᐃᓐᓇᕐᓂᐊᖅᑐᒍᑦ,” ᐅᖃᕐᑐᖅ. “ᐱᒻᒪᕆᐊᓘᒻᒪ, ᐅᓄᓗᐊᕐᒪᑕ ᐃᓄᐃᑦ ᑕᒪᑐᒥᖓ ᐃᑲᔫᑎᖃᕆᐊᖃᖅᑐᑦ.”