ᐃᖃᓗᐃᑦ ᖁᕝᕙᕆᐊᖅᓯᕗᑦ ᐃᓐᓇᑐᖃᐃᑦ ᑖᒃᓯᒃᑯᑦ ᐊᑭᓕᐅᑎᒋᕙᒃᑕᖓᓂ ᐅᕗᖓ $7

$2 ᐊᑭᑦᑐᕆᐊᕈᑎ ᐊᒃᓱᕈᑎᐅᔪᖅ ᑮᓇᐅᔭᓕᐅᖅᐸᙱᑦᑐᓄᑦ, ᐊᑕᐃᓯᖅ ᐃᓐᓇᖅ ᐅᖃᕐᑐᖅ

ᐃᖃᓗᖕᓂ ᐃᓐᓇᑐᖃᐃᑦ ᑖᒃᓯᒃᑯᑦ ᐊᑭᓕᐅᑎᒋᕙᒃᑕᖓ ᐅᓄᕐᓯᕚᓪᓕᖅᐳᖅ ᑎᑭᖢᓂ $7 ᐅᕙᙵᑦ $5-ᒥ, ᖃᐅᒃᐸᖓᓂ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᖏᓚᐅᖅᑎᓪᓗᒋ 40 ᐳᓴᓐᑎᒥ ᐊᑭᑦᑐᕆᐊᕈᒪᓂᕐᒥᒃ. (ᐊᔾᔨᙳᐊᖁᑎᖓ ᔨᐊᕝ ᐱᐊᑦᓯᐄ)

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see Iqaluit hikes elders’ taxi fares to $7.

ᐃᖃᓗᖕᓂ ᓄᑖᒃ $7 ᑖᒃᓯᒧ ᐊᑭᓕᐅᑎᐅᓕᕐᑐᖅ ᐃᑭᒪᔪᓄᑦ 65ᓂ ᐅᑭᐅᓕᖕᓄᑦ ᐅᖓᑖᓄᓪᓗ ᓂᕆᐅᒋᔭᐅᓚᐅᙱᑦᑐᖅ ᐱᓇᓱᐊᕈᓯᐅᓵᖅᑐᑦ ᐱᒋᐊᖅᑎᓪᓗᒍ, ᐄᓕ ᐊᑕᐅᓯᕐᒧᑦ ᐃᓐᓇᑐᖃᕐᒧᑦ, ᐅᖃᖅᖢᓂ ᐅᓇ ᐃᓚᒋᐊᕈᑎ $2 ᐃᑭᒪᓗᓂ ᐊᖏᔪᕈᓘᓂᕋᖅᖢᓂᐅᒃ.

ᐃᖃᓗᐃᑦ ᓄᓇᓕᐸᖑᔭᖓ ᑐᓴᖅᑎᑦᑎᓚᐅᕐᑐᖅ ᕕᕝᕗᐊᕆ 14ᒥ ᐅᓇ ᓄᑖᖅ ᐃᓐᓇᑐᖃᕐᓄᑦ ᑖᒃᓯᒃᑯᑦ ᐊᑭᓕᐅᑎᒋᓕᖅᑕᖓ $7 — 40 ᐳᓴᓐᑎᒥ ᖁᕝᕙᕆᐊᕈᑎ ᐅᕙᙵᑦ $5 ᐊᑭᓕᐅᑎᐅᖃᑦᑕᓚᐅᖅᑐᒥᒃ — ᐊᑐᓯᑲᐅᑎᒋᓂᐊᖅᑕᖓᑦ.

“ᐱᐅᒋᙱᑦᑎᐊᖅᑕᕋ,” ᐅᖃᕐᑐᖅ ᐳᑦ ᓲ, ᐅᐸᖃᑦᑕᖅᑐᖅ ᐃᓐᓇᑐᖃᐃᑦ ᖃᒻᒪᖓᓄᑦ.

“ᐃᓱᒪᔪᖓᓕ ᐊᑭᓖᖃᑦᑕᕆᐊᖃᕋᓱᒋᙱᖢᒋᑦ $7-ᒥ ᓲᖃᐃᒻᒪ ᐃᓐᓇᑐᖃᐃᑦ ᑮᓇᐅᔭᓕᐅᖃᑦᑕᙱᒻᒪᑕ.”

ᐅᓇ ᓄᑖᖅ ᐊᑭᓕᐅᑎᐅᓕᕐᑐᖅ ᐃᓱᒪᓕᐊᕆᔭᐅᓚᐅᕐᓯᒪᔪᖅ ᕕᕝᕗᐊᕆ 1ᒥ ᑖᒃᓯᓂ ᕿᒥᕐᕈᐊᖅᑎᓄᑦ ᑲᑎᒪᔨᕋᓛᑦ ᑲᑎᒪᑎᓪᓗᒋᑦ.

ᐊᖏᖅᑕᐅᓚᐅᕐᓯᒪᖕᒪᑦ ᕕᕝᕗᐊᕆ 13ᒥ ᐱᓇᓱᐊᕈᓯᐅᓚᐅᕐᑐᒥ ᓄᓇᓕᐸᐅᔭᐃᑦ ᑲᑎᒪᑎᓪᓗᒋ ᐅᑯᐊ ᑲᑎᒪᔩᒃ ᓴᐃᒪᓐ ᓇᑖᖅ ᐊᒻᒪ ᓵᒻ ᑕᓕ ᑖᔅᓱᒥᖓ ᓇᒻᒪᒃᓴᙱᓐᓂᕋᖅᖢᑎᒃ ᓂᕈᐊᓚᐅᕐᑑᒃ.

ᑲᑎᒪᔨ ᒥᑐᓴᓕ ᑯᓄᒃ, ᑲᑎᒪᔨᕋᓚᓄᑦ ᑖᒃᓯᓕᕆᓂᕐᒧᑦ ᐃᓚᒋᔭᐅᔪᖅ, ᐅᖃᓚᐅᕐᑐᖅ ᐱᔾᔪᑎᒋᔭᐅᔪᓂᒃ ᐊᑭᑦᑐᕆᐊᖅᑎᑦᑎᓂᕐᒥᒃ. ᑲᑎᒪᔩᑦ ᑲᑎᒪᑎᓪᓗᒋ ᐅᑯᐊ ᑖᒃᓯᖃᖅᑐᑦ ᐅᓂᒃᑲᐅᓯᖃᓚᐅᕐᒪᑕ ᐃᓄᐃᑦ ᐱᕋᔭᒍᑎᖃᔭᓐᓂᖏᓐᓂᒃ ᐃᓐᓇᑐᖃᕐᓄ ᐊᑭᒃᖠᒋᐊᖅᓯᒪᔾᔪᑎᒥ, ᑖᓐᓇᓗ ᐊᑦᑎᖕᓂᕐᓴᐅᓪᓗᓂ $9-ᒥ ᐊᑭᓕᐅᑎᐅᕙᒃᑐᓂ ᑭᒃᑯᓕᒫᓄᑦ.

“ᐃᓚᖏ ᐅᖄᓚᔪᑦ ᐃᓐᓇᕐᓂᙶᖅᐸᙱᒻᒪᑕ,” ᑯᓄᒃ ᐅᖃᕐᑐᖅ, ᐅᖃᓪᓚᒃᖢᓂ ᐃᓄᒃᑎᑐᑦ ᑐᓵᔨᑎᒍᑦ ᑲᑎᒪᔨᓄᑦ.

ᑕᐃᒪᐃᒃᑲᓗᐊᖅᑎᓪᓗᒍ, ᓲ ᐅᖃᒪᐅᕐᑐᖅ ᖁᕕᐊᒋᙱᓐᓂᕋᖅᖢᓂᐅᒃ ᐊᓯᙳᖅᑕᐅᔪᑦ ᐊᒻᒪᓗ ᑕᐃᒪᐃᒋᑉᐸ ᐱᒋᓇᔭᖅᖢᓂᐅᒃ. ᑖᓐᓇ ᐊᓯᖏᓪᓗ ᐃᓐᓇᐃᑦ ᑖᒃᓯᒃᑯᑦ ᑭᓯᐊᓂ ᓇᒧᙵᐅᔾᔪᑎᖃᖃᑦᑕᕐᓂᖏᓐᓂᒃ ᐊᒻᒪᓗ ᐊᑭᑦᑐᕆᐊᕈᑎ ᐅᓄᕐᓯᕙᓪᓕᐊᑐᐃᓐᓇᕐᓂᐊᕐᒥᖕᒪᑦ.

“ᐅᓇ ᐅᐊᑲᓪᓚᐅᓗᐊᕐᓂᐊᖅᑐᖅ ᐃᓐᓇᑐᖃᕐᓄᑦ,” ᐅᖃᕐᑐᖅ.

ᐃᓐᓇᑐᖃᐃᑦ ᐊᑭᓕᐅᑎᒋᕙᒃᑕᖓ ᖁᕝᕙᒃᑐᑐᐊᖑᔾᔮᙱᑦᑐᖅ ᑕᒪᑐᒪᓂ ᐊᕐᕌᒍᒥ.

ᐊᑭᓕᐅᑎᐅᕙᒃᑐ ᖁᕝᕙᕆᐊᖅᐹᓪᓕᖅᑕᐅᒃᑲᓐᓂᕐᓂᐊᖅᑐᖅ $9.25ᒥ ᐊᐃᕆᓕᐅᓕᕐᐸᑦ. ᐅᓇ ᐊᓯᔾᔨᕈᑎ ᐊᑭᓕᐅᑎᒧ ᐃᓚᒋᔭᐅᔪᖅ ᐊᕐᕌᒍ ᒪᕐᕉᖕᓄ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᓄᑦ ᐊᖏᖅᑕᐅᓂᑯᓂᒃ ᑲᑎᒪᔨᓄᑦ ᐊᕐᕌᓂ ᐅᖓᓪᓕᕐᒥ.

Share This Story

(0) Comments