ᐊᖑᑎ ᓇᓂᔭᐅᕗᖅ ᐸᓯᔭᒃᓴᐅᙱᓐᓂᖓᓂ ᑐᖂᑦᑎᓇᓱᐊᕐᓂᐅᔪᒥ ᓯᑭᑑᒃᑯᑦ ᐱᒋᐊᕐᓂᐅᔪᒧᑦ

ᐃᖃᓗᖕᒥᐅᑕᒥ ᐊᖑᒻᒥ ᐃᖕᓂᖅᑐᐃᑲᑕᓚᐅᖅᑐᒥ ᐊᓯᐊᓂ ᐊᖑᒻᒥ ᐊᕿᓚᐅᖅᖢᓂᐅᒃ ᓂᐊᖁᖓᒍᑦ ᑭᖑᓂᐊᒍᑦ 2019−ᒥ ᓇᓂᔭᐅᓯᒪᕗᖅ ᐸᓯᔭᒃᓴᐅᙱᓐᓂᖓᓂ ᑐᖂᑦᑎᓇᓱᐊᕐᓂᐅᔪᒥ.

ᐃᖅᑲᖅᑐᐃᔨ ᓲᓴᓐ ᓵᕈᔅᐅᐊᑦ ᑐᓂᓯᓚᐅᖅᐳᖅ ᖃᐅᔨᒃᑲᐃᓂᕐᒥ ᐃᓱᒪᓕᐅᕈᑎᒋᔭᖓᓂ ᐃᖅᑲᖅᑐᖅᑕᐅᓂᐅᔪᒥ ᔪᐊᑕᓐ ᖁᕕᕐᒥ ᐃᖃᓗᖕᓂ ᐃᖅᑲᖅᑐᐃᕕᖕᒥ ᓄᕕᐱᕆ 24−ᒥ.

ᖁᕕᖅ 19−ᓂ ᐅᑭᐅᖃᓚᐅᖅᐳᖅ ᐃᖅᑲᖅᑐᒐᒃᓴᐅᑎᓪᓗᒍ ᑐᖂᑦᑎᓇᓱᐊᕐᓂᐅᔪᒥ 2019−ᒥ ᐃᖕᓂᖅᑐᐃᓚᐅᖅᑎᓪᓗᒍ 28-ᓂ-ᐅᑭᐅᓕᖕᒥ ᐊᖑᒻᒥ ᓯᑭᑑᒧᑦ ᐊᒻᒪ ᓂᐊᖁᖓᒍᑦ ᐊᕿᓪᓗᓂᐅᒃ. ᖁᕕᖅ ᐋᓐᓂᖅᓯᕆᓚᐅᕆᕗᖅ ᐊᓯᐊᓂ ᐊᖑᒻᒥ ᑕᐃᑲᓂ ᐅᓐᓄᐊᖑᔪᒥ, ᐃᖅᑲᖅᑐᐃᕕᒃ ᑐᓴᓚᐅᖅᐳᑦ.

ᖃᓄᐃᓐᓂᐅᔪᖅ, ᐱᓚᐅᖅᑐᒥ ᐅᓐᓄᖓᓂ ᑎᓯᐱᕆ. 27, 2019−ᒥ, ᐊᔾᔨᓕᐅᕆᔭᐅᓚᐅᖅᐳᖅ ᓇᐅᑦᑎᖅᓱᕈᑎᒥ ᐊᔾᔨᓕᐅᕈᑎᒥᒃ.

ᖁᕕᖅ ᐸᓯᔭᒃᓴᐅᓂᕌᓂᖕᓂᕋᓚᐅᖅᐳᖅ ᐱᖓᓱᓄᑦ ᐊᓯᖏᓐᓂ ᐃᖅᑲᖅᑐᒐᒃᓴᐅᔪᓂ ᐅᕙᙶᖅᑐᒥ ᖃᓄᐃᓐᓂᐅᔪᒥ: ᐱᒋᐊᖅᓯᓂᕐᒥ ᓱᒋᐅᒻᒧᑦ, ᒪᓕᙱᓐᓂᐅᔪᒥ ᐃᖅᑲᖅᑐᐃᕕᖕᒥ ᓴᖅᑭᑦᑕᕆᐊᖃᕐᓂᐅᔪᒥ ᐅᖃᐅᔾᔨᓂᐅᔪᒥ ᐃᖅᑲᖅᑐᕐᕕᖕᒧᑦ ᖃᐃᖁᔨᔾᔪᑎᒥᒃ, ᐊᒻᒪ ᐊᑕᐅᓯᐅᔪᒥ ᐱᒋᐊᖅᓯᓂᕐᒥ ᑭᓕᖅᖢᒍᒥ.

ᑭᓯᐊᓂ, ᐱᙱᓐᓂᕋᐃᓚᐅᖅᐳᖅ ᑐᖂᑦᑎᔪᒪᓂᐅᔪᒥ ᐊᒻᒪ ᐸᓯᔭᒃᓴᐅᙱᓐᓂᕋᓚᐅᖅᐳᖅ ᑐᖂᑦᑎᓇᓱᐊᕐᓂᐅᔪᒥ ᐃᖅᑲᖅᑐᒐᒃᓴᐅᔪᒥ.

ᓴᖅᑭᑎᑦᑎᓚᐅᖅᑎᓪᓗᒍ ᖃᐅᔨᒃᑲᐃᓂᕐᒥ ᐃᓱᒪᓕᐅᕈᑎᒋᔭᖓᓂ, ᓵᕈᔅᐅᐊᑦ ᐅᖃᓚᐅᖅᐳᖅ ᓇᒻᒪᒍᓱᖕᓂᖓᓂ ᖁᕕᐅᑉ ᐱᓂᖓᓂ ᓱᓐᓂᕈᑕᐅᓲᓂ ᓱᐴᖅᑐᒐᕐᒥ ᐊᒻᒪ ᑰᑲᐃᓐᒥ ᐊᒻᒪ ᐃᒥᐊᓗᒃᖢᓂ ᑕᐃᑲᓂ ᐅᓪᓗᖓᓂ, ᐃᓚᖃᖅᖢᓂ ᐊᒃᑐᐃᓂᐅᔪᓄᑦ ᐃᒥᐊᓗᖕᒧᑦ ᐃᓪᓕᐊᖓᓂ ᐊᒃᑐᖅᑕᐅᓯᒪᓂᖓᓂ, ᐱᓯᖅᓯᔪᒥ “ᖃᔅᓯᒐᓚᖕᓂ ᐱᐅᙱᕐᔪᐊᖅᑐᓂ ᓂᕈᐊᕐᓂᖃᕐᓂᐅᔪᓂ ᒥᔅᑐᕐ ᖁᕕᕐᒧᑦ.”

ᐅᑯᐊ ᓂᕈᐊᕐᓂᕆᔭᖏᑦ ᑭᓯᐊᓂ ᐱᑎᑦᑎᓂᖃᕆᐊᖃᖅᐳᖅ ᓱᐊᒃᑕᐅᓂᐅᔪᒥ, ᐃᓚᒋᐊᖅᓯᓚᐅᖅᐳᖅ.

“ᓈᒻᒪᒍᓱᙱᓚᖓ, ᑭᓯᐊᓂ, ᒥᔅᑐᕐ ᖁᕕᖅ ᑐᖂᑦᑎᓇᓱᐊᓚᐅᕐᓂᖓᓂ” ᐊᐃᑉᐸᖓᓂ ᐊᖑᒻᒥ, ᓵᕈᔅᐅᐊᑦ ᐅᖃᓚᐅᖅᐳᖅ.

ᖁᕕᖅ ᓇᓕᒧᑦᑐᒥ ᐊᕐᕌᒍᑲᓴᖕᓂ ᑕᓪᓕᒪᓂ ᓇᑉᐸᖓᓂᓗ ᐊᓄᓪᓚᒃᓯᖅᖢᓂ, ᓵᕈᔅᐅᐊᑦ ᐃᖅᑲᖅᑐᐃᓚᐅᖅᐳᖅ ᖁᕕᕐᒥ ᐊᕐᕌᒍᓄᑦ ᐱᖓᓱᓄᑦ ᐃᖅᑲᖅᑐᖅᑕᐅᓂᒃᑯᑦ ᐊᑐᕆᐊᖃᖅᑕᓕᐅᕐᓂᐅᔪᒥ ᐱᖓᓱᓄᑦ ᐃᖅᑲᖅᑐᒐᒃᓴᐅᔪᓄᑦ ᐸᓯᔭᒃᓴᐅᓂᕋᓚᐅᖅᑕᖏᓐᓂ.

ᓱᓕᓂᐅᔪᓂ, ᖁᕕᖅ ᐃᖅᑲᖅᑐᖅᑕᐅᓚᐅᖅᐳᖅ ᐅᓪᓗᓂ 1,977−ᓄᑦ ᐱᒋᐊᖅᓯᓂᕐᒥ ᑭᓕᖅᖢᒍᒥ, ᐅᓪᓗᓂ 90−ᓂ ᐱᒋᐊᖅᓯᓂᕐᒥ ᓱᒋᐅᒻᒧᑦ ᐊᒻᒪ ᐅᓪᓗᕐᒥ ᐊᑕᐅᓯᕐᒥ ᒪᓕᙱᓐᓂᐅᔪᒥ ᐃᖅᑲᖅᑐᐃᕕᖕᒧᑦ ᓴᖅᑭᓪᓕᐅᔪᒧᑦ. ᑭᓯᐊᓂ ᐅᑯᐊ ᐃᖅᑲᖅᑐᖅᑕᐅᓂᐅᔪᓂ ᐱᓇᔭᓚᐅᖅᐳᑦ ᐊᑕᐅᑦᑎᒃᑰᖅᑎᑦᑎᑕᐅᓪᓗᓂ, ᐅᕝᕙᓘᓐᓃᑦ ᐊᑕᐅᑦᑎᒃᑯᒥ.

ᐃᖅᑲᖅᑐᖅᑕᐅᓂᒃᑯᑦ ᐊᑐᕆᐊᖃᖅᑕᓕᐅᕐᓂᐅᔪᒥ, ᓵᕈᔅᐅᐊᑦ ᐊᖏᖃᑎᖃᓚᐅᖅᐳᖅ ᐃᖅᑲᖅᑐᐃᑎᑦᑎᓕᒃᑯᑦ ᐅᖃᐅᔾᔪᐃᒋᐊᖅᑎᐊᓂ ᑐᓂᔭᖓᓂ ᖁᕕᖅ ᐃᒥᐊᓗᒋᐊᖃᔾᔮᙱᓐᓂᖓᓂ ᓯᕗᓪᓕᐅᔪᒥ ᐊᕐᕌᒍᒥ ᐃᖅᑲᖅᑐᖅᑕᐅᓂᒃᑯᑦ ᐊᑐᕆᐊᖃᖅᑕᓕᐅᕐᓂᐅᔪᒥ.

“ᐃᓕᖕᓄᑦ ᐱᒻᒪᕆᐅᕐᔪᐊᖅᐳᖅ ᐅᑎᙳᓐᓂᕐᓂ ᐃᒥᐊᓗᒐᔪᖕᓂᕐᒥ ᐊᒻᒪ ᓱᓐᓂᕈᑕᐅᓲᓂ ᓱᐴᖅᑐᒐᐅᔪᓂ,” ᓵᕈᔅᐅᐊᑦ ᐅᖃᐅᔾᔨᓚᐅᖅᐳᖅ ᖁᕕᕐᒥ.

ᐊᒻᒪᓗᑦᑕᐅᖅ, ᖁᕕᖅ ᐅᖃᖃᑎᖃᕋᓱᒋᐊᖃᙱᓚᖅ ᐱᕋᔭᒃᑕᐅᓚᐅᖅᑐᒥ ᐅᕝᕙᓘᓐᓃᑦ ᐊᐃᑉᐸᖓᓂ ᐊᖑᒻᒥ ᐱᒋᐊᓚᐅᖅᑕᖓᓂ.

ᑭᖑᓂᐊᒍᑦ ᓵᕈᔅᐅᐊᑦ ᐃᓱᒪᓕᐊᖓᓂ ᐊᒻᒪ ᓯᕗᓂᐊᓂ ᐃᖅᑲᖅᑐᓚᐅᖅᑳᕋᓂᐅᒃ ᖁᕕᖅ, ᐱᕋᔭᒃᑕᐅᓚᐅᖅᑐᖅ, ᐅᑭᐅᖃᓕᖅᑐᒥ 32−ᒥ, ᐅᓂᒃᑳᕐᓂᖃᓚᐅᖅᐳᖅ ᖃᕋᓴᐅᔭᑎᒍᑦ.

ᐅᖃᓪᓚᓚᐅᖅᐳᖅ ᑲᒧᓰᓐᓇᖅᑐᒥ ᑎᒥᒧᑦ ᐊᒻᒪ ᐃᓱᒪᒧᑦ ᐊᑲᐅᙱᓕᐅᕈᑕᐅᔪᓂ ᒪᓕᒃᑐᒥ ᐱᒋᐊᖅᑕᐅᓂᐅᔪᒥ. ᐊᖑᑎ ᐅᖃᓚᐅᖅᐳᖅ ᓴᙱᓂᖃᕈᓐᓃᕐᓂᖓᓂ ᓴᙱᓂᕆᓚᐅᖅᑕᖓᓂ, ᐊᒻᒪ ᖃᓄᐃᑦᑐᖃᖅᐳᖅ ᖃᕋᓴᖓᓂ.

ᐃᖅᑲᓇᐃᔮᖃᕈᓐᓃᖅᖢᓂ ᐃᖅᑲᓇᐃᔮᕆᓚᐅᖅᑕᖓᓂ, ᓱᓕ ᐃᖅᑲᓇᐃᔮᖅᑖᕈᓐᓇᖅᐳᖅ.

ᐃᓱᐊᓂ ᐃᖅᑲᖅᑐᖅᑕᐅᓂᐅᔪᒥ, ᖁᕕᖅ ᓇᖏᖅᓯᓚᐅᖅᐳᖅ ᐅᖃᓕᒫᕐᓂᕐᒧᑦ ᑎᑎᖅᑲᕐᒥ.

“ᐅᖃᐅᓯᒃᓴᖅᑕᖃᙱᓚᖅ ᐅᖃᐅᓯᖃᑦᑎᐊᕈᓐᓇᖅᑐᒥ ᐅᒡᒍᐊᕐᓂᓐᓂ ᐊᒻᒪ ᐃᒃᐱᒍᓱᖕᓂᐅᔪᒥ ᐊᐃᑦᑖᕈᓱᖕᓂᐅᔪᒥ [ᐱᕋᔭᒃᑕᖏᓐᓄᑦ],” ᖁᕕᖅ ᐅᖃᓚᐅᖅᐳᖅ.

“ᓂᕆᐅᒋᓚᐅᙱᓚᕋ, ᑭᓯᐊᓂ ᐊᑯᓂᐊᓗᒃ ᐅᑕᖅᑭᓂᐊᖅᐳᖓ ᐃᓱᒪᒋᔭᐅᔪᓐᓃᕐᓂᐅᔪᒥ ᑕᐃᑯᖓ ᐅᓪᓗᖓᓂ ᑐᖁᒍᒪ.”

ᓴᔪᒃᓱᖅᖢᓂ ᐊᒃᓱᕈᓗᐊᒧᑦ ᐃᓛᓐᓂᒃᑯᑦ, ᖁᕕᖅ ᐅᖃᓪᓚᓚᐅᖅᐳᖅ ᓂᐱᖃᑦᑎᐊᖅᖢᓂ ᐊᒻᒪ ᑐᑭᓯᓇᑦᑎᐊᖅᖢᓂ ᑕᐃᑲᓂᓗᒃᑖᖅ ᐅᖃᓪᓚᖕᓂᖓᓂ.

ᐅᖃᓚᐅᖅᐳᖅ ᐸᕐᓇᖕᓂᖓᓂ ᐃᓕᑦᑎᓂᕐᒥ ᐱᓕᕆᐊᕇᓐᓇᕐᓂᐊᖅᑕᖓᓂ, ᐃᑲᔪᕐᓗᓂ ᓄᓇᓕᖓᓂ, ᐋᖅᑭᒋᐊᕐᓗᓂᐅᒃ ᖃᓄᐃᓕᐅᕐᓂᕆᔭᖓᓂ ᐊᒻᒪ ᐃᑲᔪᕋᓱᖃᑦᑕᕐᓂᐊᖅᖢᓂ ᐊᓯᖏᓐᓂ ᐊᑐᖅᑐᓂ ᑖᖅᑐᒥ ᐊᖅᑯᑕᐅᔪᒥ.

“ᐅᖃᕆᐊᖃᖅᐳᖓ ᐆᒻᒪᑎᓕᒫᓐᓂ ᐊᒻᒪ ᑕᕐᓂᓐᓂ ᖃᓄᐃᓕᐅᕈᓐᓇᕐᓂᓕᒫᓐᓂ ᑕᐃᒃᑯᓄᖓ ᓱᔪᐃᓯᒪᔭᓐᓂ ᐊᒻᒪ ᓄᓇᓕᐅᔪᓂ ᓄᓇᖃᕐᕕᒋᔭᖏᓐᓂ, ᐱᓕᕆᓂᐊᖅᐳᖓ,” ᖁᕕᖅ ᐅᖃᓚᐅᖅᐳᖅ.