ᐃᖃᓗᖕᓂ ᐊᖑᑎ 2021-ᒥ ᑐᖂᑦᑎᓂᖓ ᐸᓯᔭᒃᓴᐅᔾᔪᑎᒋᙱᓐᓂᖓ ᑕᐃᒪᐃᑎᑕᐅᕗᖅ, ᐃᖅᑲᖅᑐᐃᕕᒡᔪᐊᒃᑯᑦ ᑕᐃᒪᐃᑎᑦᑎᔪᑦ
ᑖᓂᐅᓪ ᕼᐋᔾᓴᓐ ᐸᓯᔭᒃᓴᐅᙱᓐᓂᕋᖅᑕᐅᔪᖅ ᐃᓅᔪᓐᓃᖅᑐᕕᓂᕐᒧᑦ ᓂᐊᖁᙴᒥ ᐃᒥᕈᓘᔭᖅᑐᓂᒃ
ᑖᓂᐅᓪ ᕼᐋᔾᓴᓐ 2021-ᒥ ᐸᓯᔭᒃᓴᐅᙱᓐᓂᕋᖅᑕᐅᓂᖓ ᐆᒧᐊ ᐃᓅᔪᓐᓃᖅᑐᕕᓂᕐᒧ ᐃᖃᓗᖕᓂ 2017-ᐅᑎᓪᓗᒍ ᑕᐃᒪᐃᑎᑕᐅᒃᑲᓐᓂᕐᓂᐊᕐᑐᖅ, ᐅᖃᓚᐅᕐᑐᖅ ᐃᖅᑲᖅᑐᐃᔨᕐᔪᐊᒃᑯᑦ ᑲᓇᑕᒥ ᕕᕝᕗᐊᕆ 15-ᒥ. (ᐊᔾᔨᙳᐊᖁᑎᖓ ᑕᐃᕕᑦ ᕕᐊᓐ)
For English version, see Iqaluit man’s 2021 murder acquittal stands, Supreme Court rules
ᐃᖅᑲᖅᑐᐃᔨᕐᔪᐊᒃᑯᑦ ᑲᓇᑕᒥ ᐅᖃᓚᐅᕐᑐᑦ ᕕᕝᕗᐊᕆ 15-ᒥ ᐃᖃᓗᖕᓂ ᐊᖑᑎ ᐃᖅᑲᖅᑐᖅᑕᐅᒃᑲᓐᓂᕐᓂᐊᓚᐅᕐᑐᖅ ᑐᖂᑦᑎᓂᕐᒧᑦ ᐃᖅᑲᖅᑐᖅᑕᐅᒃᑲᓐᓂᔮᙱᓐᓂᕋᖅᑕᐅᓪᓗᓂ.
ᐅᓇ ᐅᖃᖅᑕᐅᓯᒪᔪᖅ ᓴᖅᑭᑎᑦᑎᒃᑲᓐᓂᕐᑐᖅ 2021-ᒥ ᐸᓯᔭᒃᓴᐅᙱᓐᓂᕋᖅᑕᐅᓂᖓ ᐅᓇ ᑖᓂᐅᓪ ᕼᐋᔾᔭᓐ ᐸᓯᔭᒃᓴᐅᓚᐅᕐᓯᒪᓂᖓᓂ 2017 ᐃᓅᔪᓐᓃᖅᑐᕕᓂᕐᒧᑦ ᐳᕌᑦᓕ ᕗᐃᓐᓱ ᐃᒡᓗᒋᔭᐅᔪᒥ ᐃᒥᒐᓚᒃᑎᓪᓗᒋ ᓂᐊᖁᙴᒥ.
ᕼᐋᔾᓴᓐ ᕗᐃᓐᓱᒥ ᐊᕙᑎᑦᑎᓚᐅᕐᓯᒪᖕᒪᑦ ᐊᕐᓇᒥ ᑖᓐᓇ ᐋᓐᓂᕐᓯᓂᐊᕋᓱᒋᓪᓗᓂᐅᒃ. ᕼᐋᔾᓴᓐ ᐸᓯᔭᒃᓴᐅᙱᓐᓂᕋᖅᑕᐅᓚᐅᕐᓯᒪᔪᖅ ᐃᖅᑲᖅᑐᖅᑕᐅᓚᐅᖅᖢᓂ ᐃᖃᓗᖕᓂ ᒪᐃ 2021-ᒥ
ᐃᖅᑲᖅᑐᐃᔨ ᓲᓴᓐ ᓵᔅᕗᐊᑦ ᐃᓱᒪᓕᐊᒥᓂ ᐅᖃᐅᓯᖃᒃᑲᓐᓂᓚᐅᕐᑐᖅ ᐸᓯᔭᒃᓴᐅᙱᓐᓂᕋᐃᓪᓗᓂ ᑕᒪᑐᒧᖓ ᑐᖂᑦᑎᓪᓚᕆᖕᒪᖔ ᓇᓗᓇᐃᕐᓯᔪᓐᓇᙱᓐᓂᖏᓐᓄᑦ ᑐᖂᑦᑎᓇᓱᓪᓚᕆᓚᐅᕆᐊᒃᓴᖓᓂᒃ ᕗᐃᓐᓱᒥ ᐊᕙᑎᑦᑎᑎᓪᓗᒍ.
ᐃᖅᑲᖅᑐᐃᔨᒃᑯᑦ ᑖᔅᓱᒥᖓ ᐃᓱᒪᓕᐊᒥ ᓈᒻᒪᒃᓴᓚᐅᕐᓯᒪᙱᒻᒪᑕ ᐊᒻᒪᓗ ᐃᖅᑲᖅᑐᐃᕕᒃᑯ ᐱᓕᕆᐊᖑᑎᑕᐅᓪᓗᓂ, ᑕᐃᒪᓕ ᐅᒃᑑᐱᕆ 2022-ᒥ ᐃᖅᑲᖅᑐᐃᔨᒐᓚᐃᑦ ᓈᒻᒪᒃᓴᙱᔾᔪᑎᒋᔭᐅᔪᒧᑦ ᐃᖅᑲᖅᑐᖅᑕᐅᒃᑲᓐᓂᖁᔨᓕᓚᐅᕐᓯᒪᖕᒪᑕ ᕼᐋᔾᓴᓐᒥ, ᐅᖃᖅᖢᑎᒃ ᓵᔅᕗᐊᑦ ᖃᐅᔨᓴᓪᓚᕆᓚᐅᕐᓯᒪᙱᓐᓂᖓᓂᒃ ᕼᐋᔾᓴᓐ ᐅᖃᐅᓯᕕᓂᐊᓂᒃ ᐃᒻᒥᓂ ᓴᐳᔾᔨᓯᒪᓂᕐᒨᓚᐅᕐᓯᒪᓂᖓᓂᒃ ᐊᒻᒪᓗ ᐃᓱᒫᓘᑎᖃᙱᓗᐊᖅᖢᑎᒃ ᐊᕙᑎᑦᑎᓂᖅ ᐅᓗᕆᐊᓇᕈᓐᓇᕐᓂᖓᓂᒃ.
ᑕᖅᑮᒃ ᒪᕐᕉᒃ ᐊᓂᒍᖅᑎᓪᓗᒋᑦ ᕼᐋᔾᓴᓐ ᓗᐊᐃᔭᖏᑦ ᓈᒻᒪᒃᓴᙱᓐᓂᕐᒧᑦ ᐃᖅᑲᖅᑐᐃᕕᒃᑰᓕᓚᐅᕐᓯᒪᔪᑦ ᐅᑯᐊ ᐃᖅᑲᖅᑐᐃᔨᑦ ᓈᒻᒪᙱᓕᐅᕈᑎᒋᔭᐅᔪᓂᒃ ᐃᖅᑲᖅᑐᐃᔨᕐᔪᐊᓄᑦ ᐊᒻᒪᓗ ᒪᐃ 2023-ᒥ ᐃᖅᑲᖅᑐᐃᔨᕐᔪᐊᑦ ᐊᖏᓕᓚᐅᕐᓯᒪᔪᑦ ᑕᒪᑐᒥᖓ ᑐᓵᓂᐊᕐᓂᕋᖅᖢᑎᒃ.
ᕼᐋᔾᓴᓐ ᓗᐊᐃᔭᖓ, ᒪᐃᑯᓪ ᓖᓯ, ᑐᓂᓯᓚᐅᕐᓯᒪᔪᖅ ᐃᖅᑲᖅᑐᐃᔨᕐᔪᐊᓄᑦ ᑖᓐᓇ ᐸᓯᔭᒃᓴᐅᔪᓐᓃᕈᑎᖓ ᐱᒻᒪᕆᐅᓚᐅᕐᓯᒪᓂᖓᓂ ᐊᒻᒪ ᑕᐃᒪᐃᑎᑕᐅᔭᕆᐊᖃᕐᓂᖓᓂᒃ.
ᐃᖅᑲᖅᑐᐃᔨᕐᔪᐊᓄᑦ ᓗᐊᐃᔭ ᔫᓕ ᓚᐳᐊᑦ ᑭᐅᓗᒍᑎᖃᓚᐅᕐᓯᒪᔪᖅ ᓵᔅᕗᐊᑦ ᐅᓂᒃᑳᐅᓯᖄᓂᓚᐅᕐᓯᒪᙱᓐᓂᖓᓂᒃ ᕼᐋᔾᓴᓐ ᖃᓗᐃᓂᐅᕈᑎᖏᓐᓂᒃ ᑖᓐᓇ ᐸᓯᔭᒃᓴᐅᔪᓐᓃᖅᑎᓪᓗᓂᐅᒃ, ᐅᖃᐅᓯᖃᙱᖢᓂ ᖃᓄᐃᙱᑦᑐᖅ ᖃᓄᐃᓕᐅᕋᔭᕆᐊᒃᓴᖓᓂᒃ ᑕᐃᒪᓐᓇᑦᑕᐃᓐᓇ ᐱᓕᕆᐊᖃᕐᓂᕈᓂ.
ᐅᖃᐅᓯᖃᖅᖢᓂ ᕼᐋᔾᓴᓐ ᐃᒻᒥᓂ ᐅᖃᓚᐅᕐᓂᖓᓂᒃ ᖃᓄᑎᒋ ᑎᒍᒥᐊᕐᓂᖓ ᓱᖁᓯᓚᐅᕐᓯᒪᙱᓐᓂᕋᖅᖢᓂᐅᒃ. ᓚᐳᐊᑦ ᐅᖃᓚᐅᕐᑐᖅ ᓵᔅᕗᐊᑦ ᑖᔅᓱᒥᖓ ᐅᖃᐅᓯᐅᔪᒥ ᐃᓱᒪᒋᔭᖃᓚᐅᙱᓐᓂᖓᓂ ᐃᓱᒪᓕᕆᓕᖅᑎᓪᓗᒍ.
ᐃᖅᑲᖅᑐᐃᕕᒡᔪᐊᒃᑯᑦ ᒪᓕᒐᓕᕆᔨᖏᑦ ᑕᒪᑐᒥᖓ ᐅᖃᐅᓯᕐᒥ ᐅᖃᐅᓯᖃᓚᐅᙱᑦᑐ, ᐅᖃᖅᖢᑎᒃ ᐃᖅᑲᖅᑐᐃᔨᑦ ᓇᓗᓇᐃᕐᓯᖁᓪᓗᒋᑦ ᐃᖅᑲᖅᑐᐃᔨᐅᔪᑦ ᓇᐅᒃᑯᑦ ᑕᒻᒪᓚᐅᕐᓯᒪᔭᕆᐊᒃᓴᖓᓂ ᐃᓱᒪᓕᐅᕆᑎᓪᓗᒍ ᑕᒪᑐᒥᖓ ᓈᒻᒪᙱᓕᐅᕈᑎᒋᔭᐅᔪᒧᑦ ᐱᔾᔪᑎᐅᓇᔭᖅᑐᒥᓐ.
ᐃᖅᑲᖅᑐᐃᔨ ᒥᓯᐊᓪ ᐅ’ᐹᓐᓴᕗᐃᓐ ᐅᖃᓚᐅᕐᑐᖅ ᐃᓱᒫᓘᑎᖃᕐᓂᖓᓂᒃ ᐃᖅᑲᖅᑐᐃᔨᕐᔪᐊᑦ ᑐᓐᓂᖁᑎᐊ “ᐅᑎᑐᐃᓐᓇᕐᓂᐊᕆᐊᒃᓴᖓᓂ ᐃᖅᑲᖅᑐᐃᔨᐅᓚᐅᕐᑐᒧᑦ ᐸᓯᔭᒃᓴᐅᑎᓪᓗᒍ” ᑖᓐᓇ ᐅᖃᐅᓯᐅᔪᖅ ᕿᒥᕐᕈᐊᒃᑲᓐᓂᕐᓂᐊᕐᓗᓂᐅ ᐃᒪᓐᓇᐅᙱᑦᑐᖅ ᒪᓕᒐᐃᑦ ᑕᒻᒪᕐᓂᖃᓚᐅᕐᓂᕋᖅᑕᐅᓗᑎᒃ.
9 ᐃᖅᑲᖅᑐᐃᔨᐅᔪᑦ ᑐᓵᓚᐅᕐᑐᑦ ᑭᐅᓘᑎᐅᑲᑕᒃᑐᓂᒃ ᐃᑲᕐᕋᓪᓗᐊᓂ ᒪᕐᕉᖕᓂ ᕿᒪᐃᑐᐃᓐᓇᓚᐅᖅᑎᓐᓇᓂ ᑕᒪᑐᒥᖓ ᐅᖃᐅᓯᖃᕆᐊᖅᑐᖅᖢᑎᒃ 25 ᒥᓂᑦᒥ ᑖᒃᑯᐊᑐᐊᖑᓗᑎᒃ.
ᑕᒪᑐᒧᖓ ᐋᖅᑭᒃᓯᑎᓪᓗᒍ, ᐃᖅᑲᖅᑐᐃᔨᓄᑦ ᐊᖓᔪᖅᑳᖅ ᐅᕆᑦᓱᑦ ᕗᐊᒡᓄ ᐅᖃᓚᐅᕐᑐᖅ ᐊᖏᖃᑎᒌᓚᐅᕐᓂᕋᖅᖢᓂᒋᑦ ᑕᒪᐃᓐᓂ ᕼᐋᔾᓴᓐ ᓈᒻᒪᙱᓕᐅᕈᑎᖃᕐᓂᕐᒧᑦ ᐱᓕᕆᐊᖑᑎᑕᖏ ᐊᒻᒪᓗ ᐃᓱᒪᓕᐊᕆᔭᐅᓂᑯ 2021-ᒥ ᐸᓯᔭᒃᓴᐅᓚᐅᙱᓐᓂᖓ ᐅᑎᖅᑎᑕᐅᑐᐃᓐᓇᕐᓂᐊᕐᓗᓂ.
ᑕᒪᑐᒧᖓ ᐃᓱᒪᓕᐅᕆᓂᕐᒧᑦ ᓴᖅᑭᑕᐅᒃᑲᓐᓂᓛᕐᑐᖅ ᖃᖓᒃᑲᓐᓂᖅ ᐅᖃᓚᐅᕐᑐᖅ ᐃᖅᑲᖅᑐᐃᔨᕐᔪᐊᒃᑯᑦ ᑲᓇᑕᒥ.
(0) Comments