Chrono-ᑯᑦ ᓄᖅᑲᖅᑎᑦᑎᕗᑦ ᐃᖃᓗᐃᑦ- ᒪᓐᑐᕌᒃᑯᑦ ᐊᖅᑯᑎᒋᕙᒃᑕᖏᓐᓂᒃ

For the English version of this story, please see Iqaluit-Montreal direct flights cancelled after nearly 4 months of operation.

ᓱᕉᕈ ᖃᖓᑕᓲᓕᕆᔩᑦ ᓄᖅᑲᖅᑎᑦᑎᕗᑦ ᐃᖃᓗᐃᑦ-ᒪᓐᑐᕆᐊᓪ ᐊᖅᑯᑖᓂ ᐱᒋᐊᓚᐅᖅᓯᒪᓪᓗᓂ ᐋᒡᒌᓯᒥ.

ᑲᒻᐸᓂᐅᔪᖅ ᖃᖓᑕᓲᖅᑖᕈᓐᓇᓚᐅᙱᑦᑐᖅ ᐃᒃᓯᕙᐅᑕᖃᕐᓂᖅᓴᐅᓗᓂ ᐊᖅᑯᑎᒃᑰᖏᓐᓇᕈᓐᓇᖅᑎᑦᑎᓇᔭᓚᐅᖅᑐᓂᒃ, ᑎᓯᐱᕆ 1-ᒥ, ᑕᐃᕕᑦ ᓴᐃᑦ, ᑲᒻᐸᓂᐅᑉ ᐊᖓᔪᖅᑳᑉ ᑐᒡᓕᐊ ᐊᐅᓚᓂᕐᓄᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᓚᐅᖅᑐᖅ.

ᑕᐃᒃᑯᐊ ᐃᑭᒪᔪᓕᒫᑦ ᒃᕉᓄ ᖃᖓᑕᓲᒧᑦ ᑎᓯᐱᕆᒥ ᐅᑎᖅᑎᑕᐅᑦᑎᐊᓚᐅᖅᑐᑦ, ᐅᖃᖅᑐᓂ.

Chrono ᖃᖓᑕᓲᓕᕆᔩᑦ ᐊᖅᑯᑎᖓ ᐱᒋᐊᓚᐅᖅᑐᖅ ᐊᐅᒍᔅᑦ 6−ᒥ ᐃᓂᒃᓴᓕᐅᖅᐸᓪᓕᐊᓪᓗᑎᒃ ᒪᐃ ᕿᑎᐊᓂ. ᖃᖓᑕᓲᒃᑯᑦ ᖃᖓᑕᖃᑦᑕᖅᑐᑦ ᐃᖃᓗᖕᓂ ᐊᒻᒪ ᒪᓐᑐᕆᐊ ᒥᑐᐴᓕᑕᓐ ᒥᑦᑕᕐᕕᐊᓂ ᐅᓪᓗᓄᑦ ᑎᓴᒪᓄᑦ ᖃᖓᑕᖃᑦᑕᖅᐳᑦ ᐱᓇᓱᐊᕈᓯᕐᒥ. ᑲᒻᐸᓂᐅᔪᖅ ᐊᑭᓖᑎᑦᑎᓚᐅᖅᑐᖅ $699-ᒥᒃ ᐊᑕᐅᓯᕐᒧᑦ.

ᑲᒻᐸᓂᐅᔪᖅ ᐊᑐᓚᐅᖅᑐᑦ ᐊᖅᑯᑎᒥᒃ ᖃᖓᑕᑎᑦᑎᓪᓗᑎᒃ ᓴᓇᔨᓂᒃ ᓄᓘᔮᖕᓄᑦ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖕᒧᑦ, ᖃᓂᒋᔭᖓᓂ ᒥᑦᑎᒪᑕᓕᐅᑉ, ᐃᒃᓯᕙᐅᑕᒃᑲᓐᓂᕐᓂᒃ ᓂᐅᕐᕈᑎᖃᖅᑐᖃᖅᖢᓂ ᐃᓄᖕᓄᑦ.

ᐊᐃᕐᕆᓕᒥ, ᓱᕉᓅ ᑐᓴᖅᑎᑦᑎᓚᐅᖅᐳᖅ ᐃᓚᓯᓂᐊᕐᓂᕋᖅᖢᓂ 189-ᓂᒃ ᓯᓇᑦ ᐴᖓᓂ 737-800 ᖃᖓᑕᓲᒥᒃ ᖃᖓᑕᓗᑎᒃ ᐃᖃᓗᐃᑦ−ᒪᓐᑐᕆᐊᓪ ᐊᖅᑯᑎᖓᓂ ᓄᑕᐅᙱᓐᓂᖅᓴᑦ ᐊᒻᒪ ᒥᑭᓐᓂᖅᓴᑦ 120-ᓂᒃ ᓯᓇᕐᔪᓕᒃ 737-200.

ᓄᑖᖅ ᖃᖓᑕᓲᖅ ᐱᕕᖃᖅᑎᑦᑎᓚᐅᖅᑐᖅ ᑖᒃᑯᓂᖓ ᖃᖓᑕᔪᓐᓇᖅᑐᓂᒃ ᐃᓄᖕᓄᑦ, ᓴᐃᑦ ᐅᖃᕐᖢᓂ

ᑭᓯᐊᓂᓕ, ᖃᖓᑕᓲᑉ ᓴᓇᔭᐅᔭᕆᐊᖃᕐᓂᖓᓄᑦ ᖃᐅᔨᓴᖅᑕᐅᑎᓪᓗᒍ ᖃᐅᔨᔭᐅᓚᐅᕐᒪᑦ ᐊᐅᓚᐅᑎᖏᑦ ᐊᓯᔾᔨᖅᑕᐅᔭᕆᐊᖃᕐᒪᑕ, ᐅᖃᖅᑐᓂ, ᐃᓚᓯᓪᓗᓂ ᐊᐅᓚᐅᑎᓂᒃ ᐊᒥᒐᕐᓂᖏᓐᓄᑦ ᑭᖑᕝᕕᖅᑕᐅᓂᖓ ᑭᖑᕙᕆᐊᖅᑕᐅᖃᑦᑕᓚᐅᕐᒪᑦ ᐊᒥᓱᐊᖅᑎᑲᓪᓚᒃ.

“ᐊᓕᐊᓇᐃᒍᓱᖁᙱᖦᖢᒋᑦ ᐱᔨᑦᑎᕋᖅᐸᒃᑕᕗᑦ ᐃᑭᒪᔪᓪᓗ ᑕᒪᓐᓇ ᐊᑐᖅᑎᓪᓗᒍ, ᑲᔪᓯᑎᑦᑎᕙᒃᐳᒍᑦ ᖃᖓᑕᓂᕆᔭᐅᔪᓂᒃ ᐊᓯᑦᑎᓐᓂᒃ ᑎᖕᒥᓲᓂᒃ ᑲᔪᓯᑎᑦᑎᔪᒪᓪᓗᑕ ᐱᔨᑦᑎᕋᕐᕕᖃᐃᓐᓇᕐᓂᕐᒥᒃ,” ᑕᐃᒪᓐᓇ ᐅᖃᖅᖢᓂ.

ᓯᕿᓐᓂᖅᑎᓪᓗᒍ ᐊᒻᒪ ᓴᐃᒻᒪᑎᖓ ᐃᖏᕐᕋᓚᐅᖅᑐᑦ ᐊᖅᑯᑎᒃᑯᑦ ᑭᒡᒐᖅᑐᖅᖢᒍ Chrono ᖃᖓᑕᓲᓕᕆᔩᑦ  ᑭᓯᐊᓂ ᑕᐃᒪᐃᓕᐅᖃᑦᑕᔾᔮᔪᓐᓃᖅᑐᑦ “ᓇᖕᒥᓂᖅ ᖃᖓᒃᑰᕐᓂᐊᕐᓂᕐᒥᓂᒃ ᐊᖏᕈᑎᖃᕐᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ.

ᒫᓐᓇᒧᑦ ᑎᑭᖦᖢᒍ, ᑲᒻᐸᓂᐅᔪᖅ ᐅᑎᕐᓂᐊᖅᑐᖅ ᐊᑐᕆᐊᖅᑐᕐᓗᓂ ᒥᑭᓐᓂᖅᓴᒥᒃ ᖃᖓᑕᓲᒥᒃ, ᐊᔪᖅᖢᓂ ᖃᖓᑕᔭᕆᐊᒃᓴᖅ ᑕᒪᒃᑮᓄᑦ ᐅᔭᕋᖕᓂᐊᕐᕕᖕᒥ ᐃᖅᑲᓇᐃᔭᖅᑎᓄᑦ ᐊᒻᒪ ᐃᓄᖕᓄᑦ.

ᐅᑐᐱᕆᒥ, ᑯᕉᓅ ᐱᓕᕆᖃᑎᒌᑦ, ᖃᖓᑕᓲᓕᕆᔩᑦ ᐃᓚᖃᖅᑐᑦ ᑯᕉᓄ ᖃᖓᑕᓲᓕᕆᔩᑦᑯᓐᓂ, ᐊᐅᓚᑕᐅᓕᓚᐅᖅᓯᒪᕗᑦ ᑯᐸᐃᖕᒥ ᐃᖅᑲᖅᑐᐃᕕᒡᔪᐊᕐᒥ ᐅᓂᒃᑳᓕᐅᓚᐅᖅᑎᓪᓗᒋᑦ ᑕᑯᒃᓴᐅᑎᑦᑎᓪᓗᑎᒃ ᑲᒻᐸᓂᒃᑯᑦ $74.2 ᒥᓕᐊᓐ−ᓂᒃ ᐊᑭᓕᒐᒃᓴᖃᕐᓂᖏᓐᓂᒃ.

“ᐃᓱᒪᓕᐅᕈᑕᐅᓚᐅᖅᑐᖅ ᓄᖅᑲᖅᑎᑦᑎᔪᒪᓂᕐᒥᒃ ᑕᒪᒃᑯᓂᖓ ᖃᖓᑕᓂᕆᔭᐅᕙᒃᑐᓂᒃ ᑕᐃᒪᐃᔾᔪᑎᖃᑐᐃᓐᓇᓚᐅᖅᐳᖅ ᐱᔪᓐᓇᙱᓐᓂᑦᑎᓐᓄᑦ Boeing 737-800−ᒥᒃ ᑲᔪᓯᑎᑦᑎᓂᐊᕐᓗᓂ ᐊᐅᓚᓂᕆᔭᐅᕙᒃᑐᓂᒃ ᑕᒪᑐᒪᓂ ᐊᖅᑯᓯᓂᕆᔭᐅᔪᒥ,” ᑕᐃᒪᓐᓇ ᐅᖃᖅᖢᓂ ᑕᒪᒃᑯᐊ ᐊᑭᓕᕆᐊᖃᓕᕋᔭᖅᑐᑦ ᐱᔾᔪᑎᖃᓚᐅᕐᒪᖔᑕ ᓄᖅᑲᖅᑎᑦᑎᓂᕐᒧᑦ.

“ᓂᕆᐅᒋᔭᖃᑦᑎᐊᖏᓐᓇᖅᐳᒍᑦ ᐱᑕᖃᓕᑐᐃᓐᓇᕆᐊᖃᕐᓂᖓᓂᒃ ᖃᐅᔨᒋᐊᕐᕕᖃᒃᑲᓐᓂᑐᐃᓐᓇᕆᐊᖃᕐᓂᕐᒥᒃ ᐅᑎᖅᑎᑦᑎᓂᕐᒥᒡᓗ ᑕᒪᒃᑯᓂᖓ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑕᐃᒪᐃᑦᑕᕆᐊᖃᖅᑎᑕᐅᓕᕌᖓᑕ,” ᑕᐃᒪᓐᓇ ᐅᖃᖅᖢᓂ.