ᑐᒃᓯᐊᕐᕕᒋᔭᐅᔪᑦ ᐃᓂᖏᓐᓄᑦ ᐊᑭᓕᕐᓱᐃᔾᔮᙱᑦᑐᑦ 2026-ᒥ

For English version, see Iqaluit places of worship won’t pay property taxes in 2026

ᐃᖃᓗᖕᓂ ᑐᒃᓯᐊᕐᕖᑦ ᐅᒃᐱᕐᓂᕐᒧᑦ ᐅᐸᕝᕖᑦ ᐃᓂᒋᔭᖏᓐᓄᑦ ᐊᑭᓕᕐᓱᐃᔾᔮᙱᑦᑐᑦ ᐊᕐᕌᒍ.

ᐅᓇ ᑕᐃᒪᐃᓐᓂᐊᓕᕐᑐᖅ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᑭᓕᐅᑎᒃᓴᐃᑦ ᐊᕐᕋᒍᒧᑦ ᐊᖏᕈᑎᐅᑎᓪᓗᒋᑦ 2026-ᒧᑦ ᑎᓯᐱᕆ 9-ᒥ ᑲᑎᒪᑎᓪᓗᒋᑦ. ᐊᑭᓕᐅᑎᒃᓴᑦ ᐋᖅᑭᒃᑕᐅᕙᒃᑐᑦ ᓄᓇᖁᑎᒋᔭᐅᔪᖅ ᑖᒃᓰᔭᕈᑎᐅᑎᓪᓗᒍ ᐊᑭᓪᓗᐊᒐᒍᑦ.

ᐃᖃᓗᖕᓂ ᓄᓇᓄᑦ ᐊᑭᓕᐅᑎᒃᓴᐃᑦ 2026-ᒥ ᐊᔾᔨᑐᐃᓐᓇᕆᔭᖏᑦ 2025-ᒥ ᐊᑭᓕᐅᑎᓄᑦ ᐊᖏᕐᕋᕆᔭᐅᔪᓄᑦ, ᐊᔾᔨᒌᙱᑦᑐᓄᑦ ᐃᓂᖃᕐᕕᒋᔭᐅᔪᑦ, ᑮᓇᐅᔭᓕᐅᕋᓱᖕᓂᕐᒧᑦ, ᐱᓕᕆᕝᕕᖕᓄᑦ ᐊᒻᒪ ᓴᓇᕝᕕᒋᔭᐅᕙᒃᑐᓄᑦ ᓄᓇᓄᑦ.

ᑐᒃᓯᐊᕐᕕᐅᔪᑦ ᓇᖕᒥᓂᕆᔭᐅᔪᒃᑯᑦ ᐃᓚᐅᑎᑕᐅᓕᑕᐃᓐᓇᕐᑐᑦ ᐅᕙᓂ 2026-ᒧᑦ ᒪᓕᒐᕋᓛᑎᒍᑦ. ᒫᓐᓇ ᑖᒃᓰᔭᕈᑎᒃᓴᖏᑦ ᔨᕈᒦᖢᑎᒃ.

ᒪᓕᒐᕋᓛᖅ ᐱᖓᓱᐃᖅᑕᐅᓪᓗᓂ ᐅᖃᓕᒫᕐᑕᐅᓂᖓ ᑎᓯᐱᕆ 9-ᒥ ᐊᓂᒍᖅᑎᑕᐅᓚᐅᕐᑐᖅ. ᑕᒪᕐᒥ 8 ᑲᑎᒪᔩᑦ ᐃᓚᒋᔭᐅᓪᓗᓂ ᒪᐃᔭ ᓱᓗᒨᓂ ᐊᕙ, ᐊᖏᑐᐃᓐᓇᐅᓚᐅᕐᑐᖅ ᑭᖑᓪᓕᖅᐹᒥ ᐊᖏᖅᑕᐅᔭᕆᐊᖃᕐᑎᓪᓗᒍ ᑕᕝᕙᓂᑦᑕᐃᓐᓇᖅ ᑲᑎᒪᓂᕐᒥ.

ᑲᑎᒪᓚᐅᕐᑐᑦ ᑲᑎᒪᔩᑦ ᑭᖑᓪᓕᖅᐹᕆᓪᓗᒍ 2025-ᒥ.

“ᐅᓇ ᖁᕕᐊᓇᖅᑐᖅ ᑐᓴᖅᖢᒍ,” ᐅᖃᕐᑐᖅ ᑲᑎᒪᔨ ᓴᐃᒪᓐ ᓇᑖᖅ, ᑲᑎᒪᔨᐅᖃᑎᖏᑦ ᐅᖃᐅᓯᖃᕐᑎᓪᓗᒋᑦ ᒪᓕᒐᕋᓛᒥᑦ.

ᐅᓇ ᐊᓯᙳᕐᑎᑕᐅᔪᖅ ᐃᒡᓗᐊᓅᓪᓚᕆᙱᑦᑐᖅ ᓄᓇᓕᐸᐅᔭᓄᑦ ᑲᑎᒪᔩᑦ 2022-ᒥ ᐅᖃᐅᓯᕆᓚᐅᕐᓯᒪᔭᖏᓐᓂ ᑐᒃᓯᐊᕐᕕᖕᓂ ᑖᒃᓰᔭᖅᑎᑦᑎᖃᑦᑕᓕᖁᔨᓪᓗᑎᒃ.

ᓄᑖᖅ ᒪᓕᒐᕋᓛᒧᑦ ᐊᑭᓕᐅᑎᒃᓴᑦ ᐊᑐᕐᓂᐊᖅᑐᑦ 2026-ᒧᑦ ᑭᓯᐊᓂ. ᐅᓇ ᔨᕈᒥ ᑖᓰᔭᕈᑎᖃᕆᐊᖃᕐᓂᖅ ᐊᓯᙳᖅᑎᑕᐅᕙᒃᑐᖅ ᐊᕐᕌᒍᙳᕌᖓ ᑲᑎᒪᔩᑦ ᖃᐅᔨᓴᓕᕌᖓᒥ ᐊᑭᓕᐅᑎᒃᓴᐅᓇᔭᕐᑐᓂ ᐃᓂᒋᔭᐅᔪᓄᑦ ᐊᕐᕌᒍᓄᑦ ᓯᕗᓂᑦᑎᓐᓂ.

ᑲᑎᒪᔨ ᑲᐃᐅᓪ ᓴᐳᑦ, ᐃᒃᓯᕙᐅᑕᕆᔭᐅᔪᖅ ᓄᓇᓕᐸᐅᔭᐃᑦ ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᓄᑦ, ᐅᖃᓚᐅᕐᑐᖅ “ᓈᒻᒪᒃᓴᑐᐃᓐᓇᓚᐅᕐᓯᒪᓂᖓᓂ” ᑲᑎᒪᔩᑦ ᐊᖏᕈᑎᒋᓚᐅᕐᓯᒪᔭᖏᓐᓂ 2022-ᒥ ᑭᓯᐊᓂᓕ ᐅᔾᔨᕈᓱᑦᑎᐊᖁᔨᔪᖅ.

“ᑕᒻᒪᓚᐅᕐᓯᒪᒐᑦᑕ ᖃᓄᖅ ᐊᑐᓕᕐᑎᑕᐅᓂᐊᕐᓂᖓᓂ ᑕᐃᔅᓱᒪᓂ,” ᑲᑎᒪᔨᓄᑦ ᐅᖃᕐᑐᖅ, ᐅᖃᒃᑲᓐᓂᖅᖢᓂ “ᐊᒃᓱᕈᕈᑎᐅᓕᕐᓂᑰᓂᖓᓂ” ᑐᒃᓯᐊᕐᕕᖕᓄᑦ ᐊᒻᒪᓗ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᓐᓄᑦ ᑖᒃᓰᓕᕆᓂᕐᒧᑦ.

“ᓄᓇᓕᐸᐅᔭᓄᑦ ᐊᐅᓚᑦᑎᓂᕐᒧᑦ ᐊᒃᓱᕈᕈᑎᐅᓕᓚᐅᕐᒪᓐ ᐊᒻᒪᓗ ᐊᐅᓚᑦᑎᓂᕐᒧᑦ ᐊᒻᒪ ᑮᓇᐅᔭᓕᕆᔾᔪᓯᕐᒧᑦ ᐱᓕᕆᕝᕕᖕᓄᑦ ᐊᒃᑐᖅᑕᐅᓯᒪᔪᓄᑦ,” ᓴᐳᑦ ᐅᖃᕐᑐᖅ.

“ᐃᓱᒪᔪᖓᓕ ᓈᒻᒪᓛᖑᓇᔭᕐᓂᖓ ᐋᖅᑭᒋᐊᒃᑲᓐᓂᑐᐃᓐᓇᕐᓗᒍ ᒫᓐᓇ ᐃᓂᒋᔭᐅᔪᓄᑦ ᐊᑭᓕᐅᑎᐅᓂᐊᕐᑐᑦ ᐊᒻᒪᓗ ᐃᓱᒪᒋᔭᐅᔪᓐᓃᓚᐅᕐᑲᒡᓗᓂ.”

ᑎᓯᐱᕆ 9-ᒥ ᑐᒃᓯᐊᕐᕕᐅᔪᑦ ᑖᒃᓰᔭᕐᑎᑕᐅᓚᐅᕐᓯᒪᔪᑦ “ᐱᖁᑎᖏᓐᓄᑦ” ᐱᓕᕆᕝᕕᐅᕙᒃᑐᓄᑦ — ᖁᑦᑎᓛᖑᓪᓗᑎᒃ ᑖᒃᓰᔭᕈᑎᑦ ᓄᓇᓕᐸᐅᔭᓂ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐃᒡᓗᖃᕐᕕᖏᑦ.

ᐃᖃᓗᖕᓂ ᐊᔪᕆᕐᓱᐃᔨ ᐊᐃᕙᓚᕼᐋᒻ ᑯᑉᓗ ᐃᓱᒫᓘᑎᖃᕐᓂᕋᓵᓚᐅᕐᒪᑦ ᑖᒃᓰᔭᕈᑎᑦ ᐅᓄᓗᐊᕐᓂᖏᓐᓂ ᐆᒧᖓ ᔭᐃᓐ ᔫᑦ ᐋᖕᓕᑲᓐᑯᑦ ᑐᒃᓯᐊᕐᕕᐊᓄᑦ, ᑕᕝᕙᓂ ᐊᔪᕆᕐᓱᐃᖃᑦᑕᖅᖢᓂ, ᐊᒻᒪᓗ ᒪᑐᔾᔪᑎᐅᓇᔭᕆᐊᒃᓴᖓᓂ ᑐᒃᓯᐊᕐᕕᒃᒥ.

ᐅᓇ ᓄᑖᖅ ᐃᓂᒋᔭᐅᔪᓄᑦ ᑐᒃᓯᐊᕆᐊᕐᕕᐅᕙᒃᑐᓄᑦ ᐊᒃᑐᐃᓂᖃᔾᔮᙱᑦᑐᑦ ᓄᓇᓕᐸᐅᔭᐃᑦ ᐊᐅᓚᑦᑎᔾᔪᑎᒃᓴᖏᓐᓂᑕ 2026-ᒥ, ᑖᒃᑯᐊᓗ ᐃᓱᒪᓪᓗᑎᒃ $28.2 ᒥᓕᐊᓐᓂ ᑖᒃᓰᔭᕈᑎᓄᑦ ᑮᓇᐅᔭᓕᐅᕐᓂᐊᕋᓱᒋᓪᓗᑦ ᐊᒻᒪᓗ ᐊᒥᐊᒃᑯᖃᕐᓗᑎᒃ $2.3 ᒥᓕᐊᓐᓂ.

ᐅᑯᐊ ᓇᐃᓴᐅᑎᑦ ᐊᖏᕐᑕᐅᓚᐅᕐᑐᑦ ᐃᓱᒪᒋᔭᐅᓪᓗᓂ ᐃᓂᒋᔭᐅᔪᓄᑦ ᐊᑭᓕᐅᑎᐅᓇᔭᕐᑐᓂᒃ, ᓴᐳᑦ ᐅᖃᕐᑐᖅ.