ᐃᖃᓗᐃᑦ ᓄᓇᓕᐸᐅᔭᖏᓐᓄᑦ ᐸᕐᓇᐅᑎᓕᐅᖅᑎᑦ ᑲᑎᒪᔨᕋᓛᖏᑦ ᐊᖏᖅᑐᑦ ᐃᒡᓗᓄᑦ ᐃᓂᒃᓴᓂᒃ ᐋᖅᑭᒋᐊᖅᓯᖁᔨᓂᕐᒥᒃ 24ᓄ ᐃᒡᓗᒃᓴᓄᑦ ᐃᓂᒋᔭᐅᓂᐊᖅᑐᓂᒃ
ᐋᖅᑭᒃᓱᐃᕙᓪᓕᐊᔭᕆᐊᓖᑦ ᐅᑯᓄᖓ ᖁᓕᕇᒃᑑᑎᓂ ᓴᓂᓕᕇᒃᑐᓂ ᐃᒡᓗᓕ ᐃᓂᒋᔭᐅᓂᐊᖅᑐᓂᒃ ᓯᒡᔭᐅᑉ ᖃᓂᒋᐸᓗᒃᑕᖓᓂ
ᐃᖃᓗᐃᑦ ᓄᓇᓕᐸᐅᔭᖏᓐᓄᑦ ᐸᕐᓇᐅᑎᓕᐅᖅᑎᑦ ᑲᑎᒪᔨᕋᓛᖏᑦ ᓂᕈᐊᓚᐅᕐᑐᑦ ᔭᓄᐊᕆ 16ᒥ ᓄᓇᓂ ᐋᖅᑭᒃᑕᐅᓯᒪᔪᓂᒃ ᐋᖅᑭᒋᐊᖅᓯᒃᑲᓐᓂᖁᔨᓪᓗᑎᒃ ᓄᐊᑦᒫᑦ ᑕᓕᖅᐱᐊᓂ ᐃᒡᓗᓄᑦ ᐃᓂᒃᓴᕆᔭᐅᔪᓂᒃ ᐅᑯᐊ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑎᓴᒪᓂ ᐱᖓᓱᓂ ᓇᑎᓕᖕᓂ ᐃᒡᓗᓕᐅᕐᕕᒋᔪᒪᔭᖓᓂᒃ. (ᓖᕕᑎ ᐊᑕᒍᔪᒃ)
For English version, see Iqaluit planning committee OKs rezoning for 24 housing units
ᑐᒃᓯᕋᐅᑎ ᐃᒡᓗᓄ ᐃᓂᓕᐅᕐᓯᒪᔪᓂᒃ ᐋᖅᑭᒋᐊᖅᑎᑦᑎᔪᒪᓂᕐᒧ ᐃᖃᓗᐃᑦ ᓗᐊ ᐲᔅᖓᓂ ᓴᓇᕝᕕᐅᔪᒪᔪᓂ 24ᓂ ᐃᒡᓗᓂ ᑕᒪᐃᓐᓄ ᓄᓇᓕᐸᐅᔭᐃᑦ ᐸᕐᓇᐅᑎᓕᐅᖅᑎᑦ ᑲᑎᒪᔨᕋᓛᓄᑦ ᐊᖏᖅᑕᐅᓚᐅᕐᑐᖅ ᔭᓄᐊᕆ 16ᖑᑎᓪᓗᒍ.
ᓄᓇᕗᑦ ᐃᒡᓗᓕᕆᔨᕐᔪᐊᒃᑯᑦ ᑐᒃᓯᕋᐅᑎᖓ ᐃᓚᖃᕐᑐᖅ ᓴᓇᔪᒪᓂᕐᒥ ᑎᓴᒪᓂ ᖁᓕᕇᒃᑐᓂᒃ ᓴᓂᓕᕇᒡᓗᑎ ᐃᒡᓗᒃᓴᓂᒃ, ᑎᓴᒪᒃ ᒪᕐᕉᖕᓂ ᐃᒡᓗᕈᓯᖃᕐᓗᑎᒃ ᐊᒻᒪ ᒪᕐᕉᒃ ᐊᑕᐅᓯᕐᒥ ᐃᒡᓗᕈᓯᖃᕐᓗᑎᒃ, ᐅᓇ ᓴᒫᓐᑕ ᑐᕗᓗ, ᓄᓇᓕᐸᐅᔭᓄᑦ ᐸᕐᓇᐅᑎᓕᐅᕐᓂᕐᒧᑦ ᖃᐅᔨᓇᓱᒃᑎ ᐅᖃᓚᐅᕐᑐᖅ.
ᐃᓂᒋᔭᐅᔪᒪᔪᕐᓕ ᓄᐊᑦᒫᑦ ᓯᒡᔭᒧ ᓵᙵᓪᓗᓂ ᑕᓕᖅᐱᐊᓃᑦᑐᖅ ᒫᓂ ᐃᓄᐃᑦ ᓇᖕᒥᓂᖅ ᓄᓇᖓᑕ ᓯᒡᔭᖓᓂᒃ ᓄᓇᓂ 394ᒥ 399ᒧ.
ᐅᓇ ᓴᓇᕝᕕᐅᔪᒪᔪᖅ ᑲᔪᓯᓂᐊᕈᓂ ᓄᓇᐃᑦ ᐋᖅᑭᒃᓯᒪᓂᖏᑦ ᐋᖅᑭᒋᐊᖅᑕᐅᒃᑲᓐᓂᕆᐊᖃᕐᑐᖅ ᓲᖃᐃᒻᒪ ᒫᓐᓇ ᒪᓕᒐᕋᓛᕆᔭᐅᔪᖅ ᖁᓕᕇᒃᑐᓂᒃ ᐃᒡᓗᖃᖁᔭᐅᓯᒪᙱᒻᒪᑦ ᑕᒫᓂ ᓄᓇᒥᑦ, ᐅᖃᓚᐅᕐᑐᖅ.
ᖁᓕᕇᒃᑑᑎᑦ ᓴᓂᓕᕇᒃᖢᑎᒃ ᐃᒡᓗᐃᑦ ᐅᕝᕙᓘᓐᓃᑦ ᐊᖏᕐᕋᕆᔭᐅᔪᑦ ᐃᒡᓗᐃᑦ ᑕᐃᔭᐅᔪᑦ ᑕᐅᓐᕼᐊᐅᔅᒥ ᖁᓕᕇᒃᑑᑎᑦ ᐊᑐᓂ ᓯᓚᒥ ᐃᓯᕆᐊᕐᕕᖃᖅᖢᑎᒃ.
ᑐᕗᓗ ᐅᖃᓚᐅᕐᑐᖅ ᐱᓇᓱᒍᑎᐅᔪᖅ ᐅᑎᖅᑎᑕᐅᓚᐅᕐᓯᒪᓂᖓᓂ ᕿᒥᕐᕈᐊᖅᑕᐅᒃᑲᓐᓂᕐᓂᐊᕐᒪᑦ ᓄᕕᐱᕆᒥ ᐃᓱᒫᓘᑎᖃᖅᖢᑎᒃ ᐊᕙᑎᒋᔭᒥ ᐱᐅᔪᓐᓃᖅᑎᑦᑎᓇᔭᕆᐊᒃᓴᖓᓂᒃ. ᑕᐃᒪᙵᓪᓕ ᐊᕙᑎᒋᔭᒥ ᖃᐅᔨᓴᕈᑎᐅᔪᖅ ᖃᐅᔨᔾᔪᑎᐅᓕᓚᐅᕐᑐᖅ ᑕᒪᓐᓇ ᓄᓇ ᐊᖏᕐᕋᕆᔭᐅᔪᒃᓴᓄᑦ ᓴᓇᕝᕕᐅᔪᓐᓇᕐᓂᖓᓂᒃ.
ᐊᐃᑉᐸᖓᓕ ᐃᓱᒫᓘᑎᒋᔭᐅᓚᐅᕐᑐᖅ ᐅᓇ ᓯᒡᔭᒥ ᐊᑐᐃᓐᓇᖃᕋᔭᕐᓂᖅ. ᓄᓇᕗᑦ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᖃᑎᖃᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐋᖅᑭᒋᐊᖅᓯᓇᓱᒃᖢᑎᒃ ᐸᕐᓇᐅᑎᒥ ᓯᒡᔭᒥ ᐊᑐᐃᓐᓇᖃᕈᑎᐅᔪᓐᓇᖅᑐᒥ, ᑐᕗᓗ ᐅᖃᓚᐅᕐᑐᖅ.
ᐅᓇ ᓯᕗᓪᓕᖅᐹᖑᙱᑦᑐᖅ ᐃᒡᓗᓕᕆᔨᕐᔪᐊᒃᑯᑦ ᓄᓇᐅᑉ ᐋᖅᑭᒃᑕᐅᓯᒪᓂᖓᓂᒃ ᐋᖅᑭᒋᐊᖅᓯᖁᔨᓪᓗᑎᒃ ᑕᒪᑐᒥᖓ ᓄᓇᒥ. 2020ᖑᑎᓪᓗᒍ ᓄᓇ ᐋᖅᑭᒋᐊᖅᑕᐅᓚᐅᕐᓯᒪᔪᖅ ᓇᓃᓐᓂᖓ ᑎᓴᒪᓂ ᑎᓴᒪᐅᓕᖓᔪᓂ ᐃᒡᓗᓕᐅᕈᓐᓇᖁᔨᓂᕐᒥ ᑲᑎᖢᑎᒃ 16ᓂ ᐃᒡᓗᒃᓴᓂᒃ. ᐱᓕᕆᐊᒃᓴᐅᔪᒪᔪᖅ ᓄᖃᖅᑎᑕᐅᑐᐃᓐᓇᓚᐅᕐᓯᒪᔪᖅ ᐊᑭᑐᓗᐊᕐᓂᖓᓄᑦ ᐃᒡᓗᓕᐅᕐᓂᖅ, ᑐᒃᓯᕋᐅᑎᒋᔭᐅᔪᑦ ᐅᖃᕐᓯᒪᓚᐅᕐᑐᑦ.
ᐸᕐᓇᐅᑎᓕᐅᖅᑎᒃᑯᑦ ᑲᑎᒪᔨᕋᓛᖏ ᓄᓇᐅᑉ ᐋᖅᑭᒃᓯᒪᓂᖓᓄᑦ ᐃᓱᒪᓕᐊᖏᑦ ᑐᓂᔭᐅᓂᐊᖅᑐᑦ ᐃᖃᓗᐃᑦ ᓄᓇᓕᐸᐅᔭᑦ ᑲᑎᒪᔨᖏᓐᓄᑦ ᐊᖏᖅᑕᐅᔭᕆᐊᖃᕐᓂᖓᓄᑦ.
(0) Comments