ᐃᖃᓗᐃᑦ ᐱᓇᓱᐊᖃᑕᐅᕗᑦ ᑲᒪᒋᔭᖃᕐᓂᕐᒥ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᕐᒥ

For English version, see Iqaluit to bid on hosting Inuit Nunangat University

ᐃᖃᓗᐃᑦ “ᐃᓂᑦᑎᐊᕕᒡᔪᐊᖑᓇᔭᖅᐳᖅ”ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖓᓄᑦ, ᐅᖃᖅᐳᖅ ᒪᐃᔭ ᓵᓚᒪᓐ ᐊᕙ.

ᐊᕙ ᐅᖃᐅᓯᒃᓴᓕᐅᓚᐅᖅᐳᖅ ᐅᒃᑐᐱᕆ 28−ᒥ ᓄᓇᓕᐸᐅᔭᒥ ᑲᑎᒪᔨᐅᔪᑦ ᓂᕈᐊᓚᐅᖅᑎᓪᓗᒋᑦ ᑐᕌᖅᑎᑦᑎᓂᕐᒥ ᐃᖅᑲᓇᐃᔭᖅᑎᓂ ᐸᕐᓇᒃᐸᓪᓕᐊᓂᖏᓐᓂ ᑐᒃᓯᕋᐅᒻᒥ ᐃᓄᐃᑦ ᑕᐱᕇᑦ ᑲᓇᑕᒥ ᖃᓄᐃᒻᒪᑦ ᓄᓇᕗᒻᒥ ᐊᖓᔪᖅᑳᖃᕐᕕᖓ ᐸᕐᓇᒃᑕᐅᔪᒥ ᓯᓚᑦᑐᖅᓴᕐᕕᒡᔪᐊᑉ ᐊᖏᕐᕋᕆᓪᓗᐊᕐᓂᖓᓂ.

“[ᐃᖃᓗᐃᑦ] ᓈᒻᒪᒃᖢᓂ ᐊᖏᕐᕋᒃᓴᐅᕗᖅ ᓯᓚᑦᑐᖅᓴᕐᕕᒡᔪᐊᕐᒧᑦ,” ᐊᕙ ᐅᖃᓚᐅᖅᐳᖅ.

ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᑯᓂᐅᔪᒥ-ᐃᖏᕐᕋᔪᒥ ᐸᕐᓇᐅᑎᐅᕗᖅ ᓴᓇᓂᕐᒥ ᖁᑦᑎᖕᓂᖅᓴᒥ−ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᕕᐅᔪᒥ ᓇᒥᑭᐊᖅ ᐃᓄᐃᑦ ᐊᖏᕐᕋᖓᓂ ᓄᓇᖓᓐᓂ.

ᓯᑎᐱᕆᒥ, ᐃᓄᐃᑦ ᑕᐱᕇᑦ ᑲᓇᑕᒥ ᐊᑦᑎᖅᓯᓚᐅᖅᐳᑦ ᐃᖃᓗᖕᓂ ᐊᑕᐅᓯᐅᓪᓗᓂ 8−ᖑᔪᓂ ᓇᐃᒡᓕᒋᐊᖅᑕᐅᓯᒪᔪᓂ ᓄᓇᓕᐅᔪᓂ ᐃᓕᓐᓂᐊᕐᕕᐅᑉ ᑲᒪᒋᔭᖃᑐᐃᓐᓇᕆᐊᓕᖏᓐᓂ. ᐊᓯᖏᑦ ᐅᑯᐊᖑᕗᑦ ᐃᓅᕕᒃ ᐃᓄᕕᐊᓗᐃᑦ ᓄᓇᑖᖅᓯᒪᓂᐅᔪᒥ ᐊᕕᒃᑐᖅᓯᒪᓂᐅᔪᒥ;, ᓇᐃᓐ ᓄᓇᑦᓯᐊᕗᒻᒥ; ᐳᕕᕐᓂᑐᖅ ᐊᒻᒪ ᑰᔾᔪᐊᖅ ᓄᓇᕕᖕᒥ; ᐊᒻᒪ ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ ᐊᒻᒪ ᐊᕐᕕᐊᑦ ᓄᓇᕗᒻᒥ.

ᐅᒃᑐᐱᕆ 6−ᒥ ᑎᑎᖅᑲᒥ ᐊᕙᒧᑦ ᐊᒻᒪ ᑲᑎᒪᔨᐅᔪᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᖃᐃᖁᔨᓂᖃᓚᐅᖅᐳᖅ ᓄᓇᓕᐸᐅᔭᒥ ᓇᓗᓇᐃᖅᓯᓂᕐᒥ ᐅᒃᑐᐱᕆ 30−ᒥ ᐱᔪᒪᓂᖃᕐᓂᖏᓐᓂ ᑐᓂᓯᓗᑎᒃ ᑐᒃᓯᕋᐅᒻᒥ.

“ᐅᓇ ᐱᒋᐊᖅᑎᑦᑎᓂᐊᖅᐳᖅ ᐅᖃᓪᓚᖃᑎᖃᕐᓂᐅᔪᓂ [ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ] ᑲᑎᙵᓂᐅᔪᓂ ᐃᓄᐃᑦ ᑕᐱᕇᑦ ᑲᓇᑕᒥ ᓄᓇᓕᖅᐱᑦ ᐱᔭᕆᐊᓕᖏᓐᓂ ᐊᒻᒪ ᐱᔪᓐᓇᕐᓂᕆᓇᔭᖅᑕᖏᓐᓂ,” ᐆᐱᑦ ᑎᑎᕋᓚᐅᖅᐳᖅ.

“ᑭᖑᓂᐊᒍᑦ ᐊᔪᕆᖅᓱᖅᑕᐅᓂᐊᖅᐳᓯ ᐸᕐᓇᒃᐸᓪᓕᐊᓂᕐᒧᑦ ᑕᒪᒃᑭᐅᒪᔪᒥ ᑐᒃᓯᕋᐅᒻᒥ ᐃᓕᓐᓂᐊᕐᕕᓪᓗᐊᑕᐅᔪᒧᑦ. ᓄᓇᓖᑦ ᓂᕈᐊᖅᑕᐅᙱᑦᑐᑦ ᓱᓕ ᐃᓱᒪᒋᔭᐅᔪᓐᓇᖅᐳᑦ ᐊᑕᐅᓯᐅᔪᒥ ᐱᖓᓱᓂ [ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᕐᒥ] ᖃᐅᔨᒪᓂᕐᒧᑦ ᐱᓕᕆᕝᕕᓂᑦ ᐊᑐᕐᓗᑎᒃ ᐱᑕᖃᖅᐸᒌᖅᑐᓂ ᐃᒡᓗᕐᔪᐊᓂᑦ.”

ᐅᒃᑐᐱᕆ 28 ᑲᑎᒪᓂᐅᔪᒥ, ᐃᖃᓗᖕᓂ ᐊᖓᔪᖅᑳᖅ ᐊᓪᓚᕝᕕᓕᕆᔨᐅᔪᒥ ᓯᑏᕝ ᐃᖕᓚᓐ ᕿᓂᓚᐅᖅᐳᖅ ᑐᕌᖅᑎᑦᑎᓂᐅᔪᒥ ᑲᑎᒪᔨᓂᑦ ᖃᓄᖅ ᓄᓇᓕᐸᐅᔭᖅ ᑭᐅᓪᓗᐊᕐᓂᖓᓂ.

ᑲᑎᒪᔨ ᑲᐃᔪᓪ ᓴᐳᑦ ᑕᐃᓯᓚᐅᖅᐳᖅ ᐃᖃᓗᖕᓂ “ᐃᓱᒪᓂᒃᑯᑦ ᐊᖏᕐᕋᕆᔭᐅᓪᓗᐊᕐᓂᖓᓂ” ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖓᓄᑦ, ᐅᖃᐅᓯᖃᖅᖢᓂ ᓄᓇᓕᐸᐅᔭᐅᑉ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ. ᐱᒋᐊᖅᑎᑦᑎᓚᐅᖅᐳᖅ ᑐᕌᖅᑎᑦᑎᓂᕐᒥ ᐃᖅᑲᓇᐃᔭᒻᑎᓂ ᑭᐅᓂᖏᓐᓂ ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᐅᓯᖃᕐᓂᐅᔪᒥ ᐱᔪᒪᓂᕐᒧᑦ.

ᐊᕙ ᐊᖏᖃᑎᖃᓚᐅᖅᐳᖅ ᓴᐳᑦᒥ, ᐅᖃᖅᖢᓂ ᓄᓇᓕᐸᐅᔭᖅ ᕿᑎᖅᐸᓯᐊᓃᓕᕐᓂᖓᓂ ᐊᑯᓂᐅᔪᒃᑯᑦ ᐃᒪᖃᖅᑎᑦᑎᓂᕐᒥ ᐊᒻᒪ ᑐᓂᓯᓂᐅᔪᒥ ᓄᑖᙳᕆᐊᖅᑎᑕᐅᓂᐅᔪᓂ.

ᐅᖃᓚᐅᕆᕗᖅ ᓯᓚᑦᑐᖅᓴᕐᕕᒡᔪᐊᖅ ᐱᐅᑦᑎᐊᕐᓗᓂ ᐃᓚᒋᐊᕈᑕᐅᓇᔭᖅᐳᖅ ᓄᓇᓕᐸᐅᔭᐅᑉ ᐃᓕᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᐅᔪᓂᑦ, ᐃᓚᖃᖅᑐᒥ ᓄᓇᕗᒻᒥ ᓯᓚᑦᑐᖅᓴᕐᕕᖓᓂ ᐊᒻᒪ 6-ᖑᔪᓂ ᐱᒋᐊᓕᓵᖅᑐᓄᑦ-ᑕᐃᑯᖓ-ᖁᑦᑎᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕕᐅᔪᓂ.

“ᒪᓂᓴᕆᐊᖃᖅᐳᒍᑦ ᐃᖃᓗᖕᓂ, ‘ᑕᑯᒋᑦ, ᒪᐅᙵᓚᐅᕆᑦ,’ ᐊᒻᒪ ‘ᐅᓇ ᐃᓂᑦᑎᐊᕚᓗᒃ,’” ᐊᕙ ᐅᖃᓚᐅᖅᐳᖅ.

ᑭᓯᐊᓂ, ᐃᓱᒪᓕᐅᕆᓂᖅ ᐱᓕᕆᐊᖑᓂᐊᖅᐳᖅ ᐃᓄᐃᑦ ᑕᐱᕇᑦ ᑲᓇᑕᒥ.

ᐃᓄᐃᑦ ᑲᑐᔾᔨᖃᑎᒌᖑᔪᖅ ᐸᕐᓇᒃᐳᑦ ᓂᕈᐊᖅᓯᓂᖏᓐᓂ ᐃᓕᓐᓂᐊᕐᕕᓪᓗᐊᑕᖓᓐᓂ ᑭᖑᓂᒃᑲᓐᓂᐊᒍᑦ ᑕᒪᑐᒪᓂ ᐊᕐᕌᒎᔪᒥ, ᐊᒻᒪ ᑐᕌᒐᒃᓴᖃᕐᓗᓂ ᒪᑐᐃᓛᕐᓂᖓᓂ 2030−ᒥ.

ᐃᓕᓐᓂᐊᕐᕕᒃ ᓂᕆᐅᒋᔭᐅᕗᖅ ᐃᓄᖃᕈᓐᓇᕐᓂᖓᓂ ᑲᒪᒋᔭᖃᕐᓂᕐᒥ 100−ᓂ ᐃᓕᓐᓂᐊᖅᑎᓂᑦ ᐊᒻᒪ 80−ᓂ ᐃᖅᑲᓇᐃᔭᖅᑎᓂᑦ.