ᐃᖃᓗᖕᒥᐅᑕᑦ ᐱᖓᓱᐃᑦ ᖃᐃᖁᔭᐅᕗᑦ ᐃᔾᔪᐊᖅᓯᓂᖏᓐᓂ ᐱᖅᑯᓯᑐᖃᖅᑎᒍᑦ ᖃᔭᕐᒥ

For English version, see Iqaluit trio invited to replicate traditional kayak shown in Kangiqsujuaq

ᐸᕐᓇᒃᑕᐅᔪᒥ ᑕᖅᑭᓕᒫᒥ ᐱᓕᕆᓂᐅᔪᒥ, ᐱᖓᓲᔪᓂ ᒪᒃᑯᒃᑐᓂ ᐊᖑᑎᓂᑦ ᐃᖃᓗᖕᓂ ᐸᕐᓇᒃᐸᓪᓕᐊᕗᑦ ᐃᔾᔪᐊᖅᓯᓂᕐᒥ ᖃᔭᕐᒥ ᒫᓐᓇᐅᔪᒥ ᑕᑯᒃᓴᐅᑎᑕᐅᔪᒥ ᐱᖑᐊᓗᐃᑦ ᑲᓇᑕᒥ ᒥᕐᙳᐃᖅᓯᕐᕕᖓᓂ ᑐᑭᓕᐅᕐᕕᐅᔪᒥ ᑲᖏᖅᓱᔪᐊᕐᒥ.

ᐊᐃᓴᒃ ᐅᐃᓪᒥᓐ, ᕌᐳᑦ ᑰᒧ ᐊᒻᒪ ᐋᓯᕙᒃ ᐊᕐᓇᖅᑯᖅ ᐳᕆᐅᓪ ᐋᖅᑭᒃᓱᐃᕗᑦ ᖃᔭᒃᑯᑦ ᑲᑐᔾᔨᖃᑎᒌᖑᔪᓂ, ᐱᓕᕆᐊᖑᔪᒥ ᐃᓚᒋᔭᐅᔪᒥ ᐃᓄᐃᑦ ᐱᖁᑎᖏᓐᓂᑦ ᓇᐅᑦᑎᖅᓱᖅᑎᒃᑯᓐᓂᑦ. ᓴᖅᑭᑎᑕᐅᓪᓗᓂ 2016−ᒥ, ᖃᔭᒃᑯᑦ ᑲᑐᔾᔨᖃᑎᒌᖑᔪᑦ ᑐᕌᒐᖃᖅᐳᑦ ᐆᒻᒪᖅᑎᑦᑎᒃᑲᓐᓂᕐᓂᕐᒥ ᓴᓇᓂᕐᒥ ᖃᔭᕐᓂᑦ.

ᖃᐅᔨᒪᕐᔪᐊᕐᓂᖏᓐᓂ ᓴᓇᓂᕐᒥ ᖃᔭᕐᓂ ᖃᐃᖁᔭᐅᓂᖃᓚᐅᖅᐳᑦ ᓄᓇᕕᖕᒥ ᒥᕐᙳᐃᖅᓯᕐᕕᖕᓂ, ᐋᖅᑭᒃᓱᐃᔪᒥ ᖃᓄᐃᓐᓂᐅᔪᒥ ᐃᓚᒋᔭᐅᓂᖓᓂ 20−ᖓᓂ ᓇᓪᓕᐅᓐᓂᖅᓯᐅᕐᓂᖓᓂ ᖁᕕᐊᓱᒍᑕᐅᔪᓄᑦ. ᓄᓇᕕᖕᒥ ᒥᕐᙳᐃᖅᓯᕐᕕᖏᑦ ᖃᐃᖁᔨᓚᐅᕆᕗᑦ ᖃᔭᕐᓂ ᖃᐅᔨᒪᕐᔪᐊᖅᑐᒥ ᐊᒻᒪ ᐃᔾᔪᐊᖅᓯᓂᕐᒥ ᓴᓇᔨᐅᔪᒥ ᕼᐋᕕ ᒎᑕᓐᒥ ᐃᑲᔪᖃᑕᐅᓂᖓᓂ.

“ᐅᕙᑦᑎᓐᓄᑦ ᖃᐅᔨᒋᐊᕐᒪᑕ, ᖁᕕᐊᕐᔪᐊᓚᐅᖅᐳᒍᑦ,” ᐅᖃᓚᐅᖅᐳᖅ ᐊᕐᓇᖅᑯᖅ ᐳᕆᐅᓪ, ᐊᖓᔪᖅᑳᖑᔪᖅ ᖃᔭᒃᑯᓐᓂᑦ, ᐊᐱᖅᓱᖅᑕᐅᓂᐅᔪᒥ ᑲᑎᙵᓂᐅᔪᓄᑦ ᓄᖅᑲᖓᓚᐅᑲᖕᓂᖓᓂ ᑰᔾᔪᐊᕐᒥ.

ᓯᕗᓪᓕᖅ 7-ᒦᑕᓂ ᖃᔭᖅ ᓴᓇᔭᐅᓚᐅᖅᐳᖅ ᒫᓯᐅ ᐃᐳᐊᕌᐱᒃ ᓂᖏᐅᕈᕕᖕᒧᑦ 1950−ᓂ ᓄᙳᐊᓂ ᐊᒻᒪ ᓴᓇᓯᒪᕗᖅ ᐅᒡᔫᑉ ᕿᓯᖓᓐᓂ, ᖃᑯᖅᑕᖅ ᕿᓚᓗᒐᐅᑉ ᓄᑭᖏᓐᓂ, ᕿᔪᖕᒥ ᐊᒻᒪ ᓴᕕᕋᔭᖕᒥ.

ᑲᑎᙵᓂᐅᔪᑦ ᐊᑐᕐᓂᐊᖅᐳᑦ ᕿᔪᖕᒥ ᐊᒻᒪ ᐱᕐᕌᒃᓴᔭᕐᒥ ᓴᓇᓂᕐᒧᑦ ᐃᔾᔪᐊᖅᑕᖓᓂ. ᓴᖅᑭᑎᑦᑎᔪᒪᕗᑦ ᒪᕐᕉᖕᓂ ᖃᔭᕐᓂᑦ: ᐊᑕᐅᓯᖅ ᐅᓕᒃᓯᒪᔪᒥ ᐊᒻᒪ ᐊᐃᑉᐸᖓ ᐊᕙᓗᑐᐊᖓᓐᓂ ᐊᓯᖏᖅ ᖃᐅᔨᓴᕈᓐᓇᕐᓂᐊᕐᒪᑕ ᐃᓗᓪᓕᖓᓂ ᐊᒻᒪ ᓴᓇᒃᑲᓐᓂᕈᓐᓇᕐᓗᑎᒃ ᐱᖅᑯᓯᑐᖃᖅᑎᒍᑦ ᖃᔭᕐᒥ ᐃᒻᒥᖕᓄᑦ.

ᓯᕗᓂᐊᓂ, ᑲᑎᙵᓂᐅᔪᑦ ᓴᓇᓯᒪᕗᑦ ᐱᖅᑯᓯᑐᖃᖅᑎᒍᑦ ᖃᔭᕐᓂ ᐃᖃᓗᖕᓂ, ᐃᖃᓗᒃᑑᑦᑎᐊᕐᒥ ᐊᒻᒪ ᓴᓪᓕᓂᑦ, ᐊᑐᐃᓐᓴᐅᑐᐃᓐᓇᖅᑐᓂ ᖃᐅᔨᒪᓂᐅᔪᒥ ᖃᓄᖅ ᓴᓇᔭᐅᕙᓚᐅᕐᓂᖓᓂ.

ᕌᐳᑦ ᑰᒧ, ᓴᐅᒥᖕᒥ, ᐋᓯᕙᒃ ᐊᕐᓇᖅᑯᖅ ᐳᕆᐅᓪ ᐊᒻᒪ ᐊᐃᓴᒃ ᐅᐃᓪᒥᓐ ᐃᓚᒋᔭᐅᕗᑦ ᖃᔭᒃᑯᑦ ᑲᑐᔾᔨᖃᑎᒌᖑᔪᓂ. ᐅᕙᓂ ᓇᖏᖅᐳᑦ ᓯᒡᔭᒥ ᑰᔾᔪᐊᕐᒥ ᓯᕗᓂᐊᓂ ᑕᖅᑭᓕᒫᒥ ᐊᐅᓪᓛᕐᓂᐅᔪᒧᑦ ᑲᖏᖅᓱᔪᐊᕐᒧᑦ. (ᓴᑐᕆᒃ ᒐᓛᓐᑦ ᐊᔾᔨᓕᐅᖅᑕᖓ)

ᐃᔾᔪᐊᖅᓯᓂᕐᒥ ᓂᖏᐅᕈᕕᐅᑉ ᓴᓇᐅᒐᖓᓂ ᐊᔾᔨᒋᙱᑦᑎᐊᖅᑕᖓᓂ ᐱᓕᕆᓂᐅᕗᖅ, ᐅᖃᓚᐅᖅᐳᖅ ᑰᒧ.

“ᖃᔅᓯᐊᕐᔪᖕᓂ ᐱᔭᕆᑐᕕᒡᔪᐊᖅᑐᓂ ᐃᓱᒪᒋᔭᐅᓂᐊᖅᐳᖅ ᐆᒧᖓ ᓴᓇᐅᒐᐅᔪᒥ,” ᐅᖃᓚᐅᖅᐳᖅ, ᐅᓂᒃᑳᕆᓪᓗᓂ ᑕᐃᒪᐃᑦᑐᒥ ᖃᔭᕐᒥ ᑲᓇᖕᓇᒥ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ ᖃᓄᐃᑦᑑᓂᖓᓂ ᐊᔾᔨᐸᓗᐊᓂ ᑲᑎᙵᓂᐅᔪᑦ ᑕᑯᓯᒪᓂᖏᓐᓂ ᕿᑭᖅᑖᓗᖕᒥ.

ᖃᐅᔨᒪᓂᐅᔪᖅ ᓴᓇᓂᕐᒥ ᑕᐃᒪᐃᑦᑐᒥ ᖃᓄᐃᑦᑑᓂᖓᓂ ᐸᐸᑕᐅᑦᑎᐊᖅᓯᒪᙱᓚᖅ ᐃᓚᖏᓐᓂ ᐊᓯᖏᓐᓂ ᐱᖅᑯᓯᑐᖃᖅᑎᒍᑦ ᖃᔭᕐᓂ ᖃᓄᐃᑦᑑᓂᖏᓐᓂ, ᑕᐃᒫᒃ ᑰᒧ ᐅᖃᓚᐅᖅᐳᖅ ᑲᑎᙵᓂᐅᔪᖅ ᑎᑎᕋᖅᐸᓪᓕᐊᓂᐊᖅᐳᑦ ᐱᔪᓐᓇᕐᓂᓕᒫᖏᓐᓂ ᐱᓕᕆᓂᐅᔪᒥ.

ᐅᐃᓪᒥᓐ ᐃᓚᒋᐊᖅᓯᓚᐅᖅᐳᖅ ᑲᑎᙵᓂᐅᔪᑦ ᑎᑎᕋᖅᐸᓪᓕᐊᔪᓐᓴᖅᐳᑦ ᓇᖕᒥᓂᖅ ᐱᓕᕆᔾᔪᓯᖏᓐᓂ ᐊᒻᒪ ᑭᓱᓂ ᖃᐅᔨᔭᖏᓐᓂ ᐱᓕᕆᕙᓪᓕᐊᑎᓪᓗᒋᑦ.

“ᑐᓂᓯᓲᖑᕗᒍᑦ ᖃᐅᔨᒪᔭᐅᓂᖅᓴᐅᔪᒥ ᐱᓕᕆᔾᔪᓯᐅᔪᒥ ᐊᒻᒪ ᐱᓕᕆᔾᔪᓯᖓᓐᓂ,” ᐅᖃᓚᐅᖅᐳᖅ.

ᐊᕐᓇᖅᑯᖅ ᐳᕆᐅᓪ ᐅᖃᓚᐅᖅᐳᖅ ᐊᑖᑕᑦᑎᐊᖓ ᐊᑕᐅᓯᐅᔪᒥ ᑭᖑᓪᓕᖅᐹᖑᖃᑕᐅᔪᓂ ᐃᓚᖏᓐᓂ ᓴᓇᓂᕐᒥ ᖃᔭᕐᓂ ᐱᖅᑯᓯᑐᖃᖅᑎᒍᑦ.

“ᐱᐅᔪᒻᒪᕆᐊᓘᕗᑦ ᓴᓇᐅᒐᓕᕆᓂᐅᔪᓂ, ᐊᑑᑎᖃᑦᑎᐊᖅᐳᑦ; ᑎᑎᕋᐅᔭᕐᓂᐅᕗᖅ,” ᐅᖃᓚᐅᖅᐳᖅ. “ᑕᒪᓐᓇ ᐱᔪᕆᑐᓂᐅᔪᖅ ᐊᓯᐅᓚᐅᖅᐳᖅ ᐃᓅᓯᑦᑎᓐᓂ ᐱᓕᕆᓂᐅᔪᒥ ᐊᓯᔾᔨᖅᑕᐅᖕᒪᑦ.”

ᐅᓇ ᑲᑎᙵᓂᐅᔪᓂ ᓯᕗᓪᓕᖅᐹᕆᕙᖓ ᐊᐅᓪᓛᕐᓂᕐᒥ ᓄᓇᕘᑉ ᓯᓚᑖᓄᑦ ᐅᖃᐅᓯᖃᕐᓂᕐᒥ ᖃᐅᔨᒪᕐᔪᐊᕐᓂᖏᓐᓂ. ᑰᒧ ᐅᖃᓚᐅᖅᐳᖅ “ᐱᐊᑦᑎᐊᖅᐳᖅ” ᓇᓗᓇᐃᖅᑕᐅᓂᖏᓐᓂ ᓄᓇᕘᑉ ᓯᓚᑖᓂ ᐊᒻᒪ ᐱᓕᕆᐊᖏᓐᓂ ᐅᖃᓪᓚᒍᔾᔨᓂᕐᒥ ᑖᒃᑯᓄᖓ.

ᐱᖓᓲᔪᑦ ᓴᓇᓂᐊᖅᐳᑦ ᖃᔭᕐᒥ ᓄᓇᕕᖕᒥ ᒥᕐᙳᐃᖅᓯᕐᕕᖓᑕ ᒍᓛᔾᔪᖓᓂ ᑲᖏᖅᓱᔪᐊᕐᒥ. ᓇᑉᐸᓪᓗᐊᖓᓂ ᑎᑭᐅᑎᓂᖓᓂ ᓴᓇᔭᖓᓐᓂ, ᐱᖅᑯᓯᑐᖃᖅᑎᒍᑦ ᑐᐱᕐᓂ ᐋᖅᑭᒃᓱᖅᑕᐅᔪᖃᕐᓂᐊᖅᐳᖅ ᐃᓄᐃᑦ ᐅᐸᒍᓐᓇᕐᓗᑎᒃ ᐊᒻᒪ ᐅᖃᖃᑎᖃᕐᓗᑎᒃ ᖃᔭᒃᑯᓐᓂᑦ ᑏᑐᕐᓗᑎᒃ ᐊᒻᒪ ᐸᓚᐅᒑᖅᑐᕐᓗᑎᒃ.

“ᓴᖑᓂᐅᓂᐊᖅᐳᖅ,” ᐅᖃᓚᐅᖅᐳᖅ ᑰᒧ, “ᓴᙱᒃᑎᒋᐊᖅᓯᓂᐊᕋᑦᑕ ᐱᔪᓐᓇᕐᓂᑦᑎᓐᓂ ᓴᓇᓂᕐᒥ ᓇᖕᒥᓂᖅ ᖃᓄᐃᑦᑑᓂᖓᓂ ᖃᔭᕐᒥ.”

ᑲᑎᙵᓂᐅᔪᑦ ᐃᓂᖃᕐᓂᐊᖅᐳᑦ ᑲᖏᖅᓱᔪᐊᕐᒥ ᑭᓯᐊᓂ ᐅᒃᑐᐱᕆᐅᑉ ᐱᒋᐊᕐᓂᖓᓄᑦ. ᖃᔭᖅ ᓴᓇᔭᐅᕌᓂᒃᑯᓂ, ᓄᓇᓕᑦ ᖃᐃᖁᔭᐅᓂᐊᖅᐳᑦ ᑕᑯᔭᖅᑐᖅᑎᑕᐅᓗᑎᒃ ᖃᓄᐃᓕᖓᓂᖓᓂ ᐊᒃᓱᕈᓚᐅᕐᓂᖏᓐᓂ.