ᓄᓇᓕᖕᓄᑦ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᐸᕐᓇᐅᑎ ᐅᖃᐅᓯᖃᓗᐊᖅᑐᖅ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥ

For the English version of this story, please see City of Iqaluit’s proposed safety plan focuses on mental health, access to food.

ᓄᑖᖅ ᑭᒃᑯᓕᒫᓂ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᐸᕐᓇᐅᑎᑦ ᐃᖃᓗᖕᓄᑦ ᓯᕗᓪᓕᐅᑎᑦᑎᓯᒪᔪᖅ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪᓗ ᐊᑐᓗᐊᕐᓂᕐᒧᑦ ᐋᖓᔮᕐᓇᖅᑐᓂᒃ ᐊᒻᒪᓗ ᐱᐅᓯᕚᓪᓕᖅᑎᑦᑎᔪᒪᓂᕐᒥ ᓂᕿᖃᖅᑎᑦᑎᖃᑦᑕᕐᓂᕐᒥᒃ ᐊᓯᖏᓐᓂᓪᓗ.

ᓄᓇᓕᐸᐅᔭᐃᑦ ᐃᖅᑲᓇᐃᔮᒃᓴᓕᕆᓂᕐᒧᑦ ᑐᑭᒧᐊᖅᑎᑦᑎᔨᖓ ᐅᕌᑦ ᒪᒡᕗᑦ ᑐᓂᓯᓚᐅᕐᒪᑦ ᐃᖃᓗᖕᓂ ᓄᓇᓕᖕᓂ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᐸᕐᓇᐅᑎᓂ ᓄᓇᓕᐸᐅᔭᐃᑦᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᓄ ᑲᑎᒪᑎᓪᓗᒋᑦ ᐊᐃᕆᓕ 11ᒥ, ᑲᑎᒪᔭᕆᐅᖅᖢᑎᒡᓗ ᐊᕐᕌᒎᒃ ᒪᕐᕉᒃ ᐃᓗᐊᓂ.

ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐋᖓᔮᕐᓇᖅᑐᓂ ᐊᑐᓗᐊᖅᑐᓕᕆᓂᕐᒧᑦ, ᐸᕐᓇᐅᑎᑦ ᐅᖃᕐᓯᒪᔪᖅ “ᐱᑕᖃᕆᐊᖃᕐᓂᖓᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᐊᒻᒪ ᐊᑐᖅᑕᐅᖃᑦᑕᐃᓐᓇᕈᓐᓇᖅᑐᒥ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐃᑲᔪᕋᔭᖅᑐᓂᒃ ᐃᓄᖕᓂ ᐋᒃᓱᕈᕐᓇᖅᑐᒦᑦᑐᓂᒃ ᐊᒻᒪ ᐱᓗᐊᖅᑎᑦᑎᑦᑕᐃᓕᓂᕐᒥ ᑕᒪᒃᑯᓂᖓ.”

ᐅᖃᕐᓯᒪᒋᓪᓗᓂ, “ᐊᑐᐃᓐᓇᖃᖅᑎᑦᑎᔪᓐᓇᕐᓂᖅ ᐱᑕᖃᕐᓂᕐᓴᐅᓕᕐᓗᓂ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓂᒃ, ᐃᑲᔫᑎᒃᓴᓂᒃ ᐊᒻᒪ ᐊᔪᕈᓐᓃᖅᓴᕈᑎᒃᓴᓂᒃ, ᐊᒻᒪᓗ ᐱᕙᓪᓕᐊᑎᑦᑎᑦᑕᐃᓕᓂᕐᒧᑦ ᐱᓕᕆᐊᒃᓴᓂᒃ ᐊᒻᒪ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒥᒃ ᓴᖅᑭᔮᖅᑎᑦᑎᒃᑲᓐᓂᕈᑎᒃᓴᓂᒃ ᑕᐃᒪᓐᓇ ᐱᕋᔭᖕᓂᕐᒧᑦ ᐊᑐᖅᑕᐅᙱᓐᓂᕐᓴᐅᔪᓐᓇᕐᓗᑎᒃ.”

ᓄᓇᓕᖕᓂ ᐊᑐᐃᓐᓇᖃᖅᑎᑦᑎᓗᑎᒃ ᐅᓗᕆᐊᓇᙱᑦᑐᓂᒃ ᐊᒻᒪ ᓂᕿᖃᖅᑎᐊᕈᓐᓇᖅᑎᑦᑎᓂᕐᒥᒃ ᐅᖃᐅᓯᐅᓚᐅᕐᑐᖅ ᐱᓕᕆᐊᕆᔭᐅᔪᓐᓇᕐᓂᖓᓂᑦᑕᐅᖅ ᐊᖑᓇᓱᒃᑐᓕᕆᔨᓄᑦ.

ᐱᐅᓯᕚᓪᓕᖅᑎᑦᑎᓇᓱᒡᓗᑎᒃ ᓄᓇᓕᖕᓂ ᐃᓚᐅᑎᑦᑎᓂᕐᓴᐅᓂᕐᒥ ᒪᑯᓂᖓ ᐃᓅᓱᒃᑐᓂᒃ, ᐅᓇ ᐸᕐᓇᐅᑎ ᐅᖃᐅᓯᖃᕐᒥᔪᖅ ᐱᑕᖃᓕᖅᑎᑦᑎᓗᑎᒃ ᐃᓅᓱᒃᑐᓄᑦ “ᐅᓗᕆᐊᓇᙱᑦᑐᒦᕝᕕᒃᓴᖏᓐᓂᒃ, ᐃᓚᐅᖃᑕᐅᔾᔪᑎᒃᓴᖏᓐᓂ ᐊᒻᒪ ᐱᓕᕆᖃᑕᐅᔾᔪᑎᒃᓴᖏᓐᓂᒃ.”

“ᐃᓕᖅᑯᓯᑐᖃᒃᑯᑦ ᖃᓄᐃᓕᐅᕈᑎᖃᕐᓂᒃᑯᑦ ᑕᐃᒪᓕ ᐱᕈᖅᐸᓪᓕᐊᑎᑦᑎᔾᔪᑎᐅᔪᓐᓇᖅᑐᖅ, ᐊᔪᕈᓐᓃᖅᓴᕈᑎᐅᓗᓂ ᐊᒻᒪ ᖁᕕᐊᓇᕐᓂᕐᓴᒧᑦ ᑐᕌᖓᒍᑎᐅᓗᓂ,” ᐸᕐᓇᐅᑎ ᐅᖃᕐᓯᒪᔪᖅ.

ᑲᑎᒪᔨ ᐋᒻᐳ ᐊᒡᓘᒃᑲᖅ, ᐃᒃᓯᕙᐅᑕᕆᔭᐅᔪᖅ ᑲᑎᒪᔨᕋᓛᓄᑦ, ᐅᖃᒃᑲᓐᓂᓚᐅᕐᑐᖅ ᓄᓇᓕᖕᓂ ᓄᓇᖃᖅᑐᑦ ᐃᑲᔪᒃᑲᓐᓂᕆᐊᖃᕐᓂᖏᓐᓂᒃ ᐅᓇ ᑐᒃᓯᕋᐅᑎ ᐊᑐᖅᑕᐅᑎᑕᐅᓕᖅᐸᑦ.

ᒪᐃᔭᐅᑉ ᑐᒡᓕᖓ ᑭᒻ ᓯᒥᑦ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᓕᕆᖃᑎᖃᕆᐊᖃᕐᓂᖏᓐᓂᒃ ᐊᓯᖏᓐᓂᒃ ᒐᕙᒪᓕᕆᔨᐅᔪᓂᒃ ᐊᑐᓕᖅᑎᑦᑎᓂᐊᖅᐸᑕ ᐸᕐᓇᐅᑎᓂᒃ. ᐅᖃᒃᑲᓐᓂᖅᖢᓂ ᖃᓄᐃᒻᒪ ᐸᕐᓇᐅᑎᑦ ᐃᓚᖃᙱᑦᑕᕆᐊᒃᓴᖏᓐᓂᒃ ᐊᑦᑕᓇᖅᑐᒦᑦᑕᐃᓕᔾᔪᑎᓂᒃ ᒪᑯᓄᖓ ᐊᒥᓱᓄ ᕿᒻᒥᓄᑦ ᐃᐱᖅᓯᒪᕙᙱᑦᑐᓂᒃ.

ᒪᒡᕗᑦ ᐅᖃᓚᐅᕐᑐᖅ ᐸᕐᓇᐅᑎ “ᐱᒋᐊᕈᑎᐅᕙᓪᓕᐊᓂᐊᕐᓂᖓᓂᒃ” ᐱᓕᕆᐊᖃᕐᓂᐊᖅᑎᓪᓗᒋᑦ ᐊᓯᖏᓐᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧ ᓄᓇᓕᖕᓂ, ᐅᖃᐅᓯᐅᓯᒪᙱᒃᑲᓗᐊᖅᐸᑕ ᐸᕐᓇᐅᑎᓂᒃ.

“ᐸᕐᓇᐅᑎᒃᓴᖃᕋᑦᑕ ᐸᕐᓇᐅᑎᐅᔫᑉ ᐅᖓᑖᒍᑦ,” ᒪᒡᕗᑦ ᐅᖃᕐᑐᖅ. “ᑖᓐᓇᓕ ᐃᓚᒋᔭᐅᒻᒪᕆᖕᓂᐊᖅᑐᖅ ᓄᓇᓕᖕᓂ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᐸᕐᓇᐅᑎᓄᑦ.”

ᐅᑯᐊ 17-ᓂ ᑲᑎᒪᔨᖃᖅᑐᖅ — ᐱᖓᓱᓂᒃ ᓄᓇᓕᐸᐅᔭᓄᑦ ᑲᑎᒪᔨᓂ ᐃᓚᖃᖅᖢᑎᒃ ᐊᒻᒪ ᓄᓇᓕᐸᐅᔭᓄᑦ ᐃᖅᑲᓇᐃᔭᖅᑎᓂᒃ ᐊᒻᒪ ᓄᓇᖃᖅᑐᓂᒃ — ᓂᕈᐊᓚᐅᕐᒪᑕ ᑕᒪᒃᑭᖅᖢᑎᒃ ᑖᓐᓇ ᓄᓇᓕᖕᓂ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᐸᕐᓇᐅᑎ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᐊᖅᑕᐅᓂᐊᕐᓗᓂ ᑲᑎᒪᒃᑲᓐᓂᓕᖅᐸᑕ.