ᐆᒪᔪᓂ ᐊᐅᓚᑦᑎᓂᕐᒥ ᒪᓕᒐᕋᓛᕐᒥ ᐊᓂᒍᖅᐳᖅ, ᐃᓱᒪᒋᓇᒍ ᐃᓚᖏᓐᓂ ᐊᑲᐅᒃᓴᙱᓐᓂᐅᔪᓂ

For English version, see Iqalummiut fill city hall to oppose changes to animal control bylaw

ᐃᖃᓗᖕᓂ ᒪᐃᔭᖓ ᓵᓚᒪᓐ ᐊᕙ ᐅᖃᖅᐳᖅ ᑕᑯᓚᐅᖅᓯᒪᙱᑦᑎᐊᖅᐳᖅ ᓄᓇᓕᐸᐅᔭᐅᑉ ᑲᑎᒪᕝᕕᖓ ᑕᐃᒪᓐᓇᑎᒋ ᑕᑕᓐᓂᖓᓂ ᐱᓇᓱᐊᕈᓯᐅᓚᐅᖅᑐᒥ ᑲᑎᒪᓂᖓᓂ ᑲᑎᒪᔨᐅᔪᑦ ᓂᕈᐊᓚᐅᖅᑎᓪᓗᒋᑦ ᐊᖏᖃᑎᒋᔭᐅᙱᑦᑐᒥ ᐃᓚᒋᐊᕈᑕᐅᔪᓂ ᓄᓇᓕᐸᐅᔭᐅᑉ ᐆᒪᔪᓂ ᐊᐅᓚᑦᑎᓂᕐᒥ ᒪᓕᒐᕋᓛᕐᒥ.

“ᐅᕙᓃᑉᐳᖓ ᑐᓴᒐᒃᓴᖅᑖᒃᑲᓐᓂᕋᓱᐊᑐᐃᓐᓇᕐᓂᐅᙱᑦᑐᒥ, ᑭᓯᐊᓂ ᐅᖃᓪᓚᖕᓂᕐᒧᑦ ᕿᒡᒐᖅᑐᐃᓗᖓ ᑕᐃᒃᑯᓄᖓ ᐃᒻᒥᓄᑦ ᐅᖃᓪᓚᒍᓐᓇᙱᑦᑐᓄᑦ,” ᐅᖃᓚᐅᖅᐳᖅ ᑯᕆᔅᑕᕙ ᒎᕐᓛᒃ, ᓇᖕᒥᓂᖃᖅᑎᐅᔪᖅ German shepherd−ᒥ.

ᒎᕐᓛᒃ ᐊᑕᐅᓯᐅᓚᐅᖅᐳᖅ ᐅᓄᕐᓂᖅᓴᐅᔪᓂ 50−ᓂ ᓄᓇᖃᖅᑎᐅᔪᓂ ᓴᖅᑭᓚᐅᖅᑐᓂ ᔫᓂ 10−ᒥ ᓂᓪᓕᕆᐊᖅᑐᖅᖢᑎᒃ ᐃᓱᒪᒋᔭᒥᓂ ᐊᓯᔾᔨᕐᓂᐅᔪᓂ ᓄᓇᓕᐸᐅᔭᐅᑉ ᐆᒪᔪᓂ ᐊᐅᓚᑦᑎᓂᕐᒥ ᒪᓕᒐᕋᓛᖓᓂ, ᓇᐃᒡᓕᒋᐊᖅᑎᑦᑎᔪᒥ ᑎᒍᒥᐊᖅᑕᐅᓂᖏᓐᓂ ᐊᑯᓂᐅᓂᖓᓂ ᐱᔭᐅᔪᓂ ᐆᒪᔪᓂ ᐅᓪᓗᓂ 7−ᓂ ᐃᑲᕐᕋᓗᑦ 24−ᓄᑦ ᑐᖁᑕᐅᓚᐅᙱᓐᓂᖏᓐᓂ.

ᑕᐃᒃᑯᐊ ᓴᖅᑭᓚᐅᖅᑐᑦ ᐱᕕᒃᓴᖃᖅᑎᑕᐅᓚᐅᙱᓚᑦ ᐅᖃᓪᓚᖕᓂᕐᒧᑦ ᑲᑎᒪᔨᓄᑦ. ᐃᓱᒪᒋᓇᒍ ᐃᓄᒋᐊᖕᓂᐅᔪᓂ ᓴᖅᑭᑦᑐᓂ, ᑲᑎᒪᔨᑦ ᐊᔾᔨᒌᒃᑐᒥ ᓂᕈᐊᖅᑐᓂ ᐊᖏᖅᓯᓚᐅᖅᐳᑦ ᒪᓕᒐᕋᓛᕐᒥ ᐃᓚᒋᐊᕈᑕᐅᔪᓂ ᐅᕘᓴ ᐱᖓᔪᖓᓐᓂ ᐅᖃᓕᒫᖅᑕᐅᓂᖓᓂ ᑭᐅᓗᒍᑎᖃᙱᖦᖢᓂ.

ᐅᖃᐅᓯᐅᓪᓗᓂ ᐃᓚᒋᐊᖅᑕᐅᓂᐅᔪᓂ, ᓄᓇᓕᐸᐅᔭᕐᒥ ᐃᖅᑲᓇᐃᔭᖅᑎᖏᑦ “ᓈᒻᒪᒃᑐᒥ ᖃᐅᔨᒋᐊᖅᑎᑦᑎᓇᓱᐊᖃᑦᑕᕐᓂᐊᖅᐳᑦ ᓇᖕᒥᓂᖃᖅᑐᒥ” ᐆᒪᔪᒥ ᐱᔭᐅᔪᒥ ᓄᓇᓕᐸᐅᔭᒥ-ᑐᓂᔭᐅᔪᒥ  ᓇᓗᓇᐃᒃᑯᑕᖓᓐᓂ ᐃᓗᐊᓂ ᐃᑲᕐᕋᓂ−24-ᓂ ᐱᓕᕆᓂᐅᔪᒥ. ᑭᓯᐊᓂ ᓄᓇᓕᐸᐅᔭᖅ ᐊᖏᙱᑦᑐᓐᓇᖅᐳᑦ ᐅᑎᖅᑎᕆᓂᕐᒥ ᐆᒪᔪᒥ ᐱᔭᐅᓯᒪᔪᒥ ᒪᕐᕈᐃᖅᓱᖅᑐᒥ ᐅᓄᕐᓂᖅᓴᐅᔪᒥ.

ᐱᔭᐅᔪᒥ ᐆᒪᔪᒥ ᐊᑐᙱᑦᑐᒥ ᓄᓇᓕᐸᐅᔭᕐᒥ ᓚᐃᓴᓐᓯᒥ ᓇᓗᓇᐃᒃᑯᑕᖓᓐᓂ ᑐᖁᑕᐅᔪᓐᓇᖅᐳᖅ ᖃᖓᑐᐃᓐᓇᑦᑎᐊᖅ.

ᑐᖂᑦᑎᓂᖅ “ᑭᖑᓪᓕᖅᐹᑦᑎᐊᖑᓪᓗᓂ ᓂᕈᐊᒐᒃᓴᐅᕗᖅ” ᐆᒪᔪᖅ ᓚᐃᓴᓐᓯᖃᕈᓂ ᐋᒃᑲᓘᓐᓃᑦ. ᐊᕙ ᐅᖃᓚᐅᖅᐳᖅ.

ᐆᒪᔪᒥ ᐃᓕᔭᐅᔪᓐᓇᖅᐳᖅ ᑎᒍᐊᖅᑕᐅᓂᐅᔪᒥ ᐅᕝᕙᓘᓐᓃᑦ ᖃᓪᓗᓈᑦ ᓄᓇᖓᓐᓄᐊᖅᑕᐅᓗᓂ, ᒪᓕᒃᑐᒥ “ᖃᓄᐃᓐᓂᖓᓂ” ᕿᒻᒥᕐᒥ, ᐃᓱᒪᓕᐊᖑᕙᒃᑐᒥ ᓄᓇᓕᐸᐅᔭᒥ ᐃᖅᑲᓇᐃᔭᖅᑎᐅᔪᒥ, ᐅᖃᓚᐅᖅᐳᖅ.

“ᖃᓂᒪᔪᐊᓘᒃᐸᑦ, ᐃᓱᒪᓕᐅᕆᓗᑎᑦ. ᐅᓗᕆᐊᓇᖅᐸᑦ, ᐃᓱᒪᓕᐅᕆᓗᑎᑦ,” ᐊᕙ ᐅᖃᓚᐅᖅᐳᖅ.

ᒎᕐᓛᒃ ᐅᖃᓚᐅᖅᐳᖅ ᓄᓇᓕᐸᐅᔭᐅᑉ ᐃᓱᒪᓕᐊᖓ “ᐃᓱᒪᓂᕐᒧᑦ ᐊᐅᓚᑕᐅᕗᖅ” ᐅᓇᐅᙱᖔᖅᑐᖅ “ᖃᐅᔨᓴᕐᓂᒃᑯᑦ.”

“ᑕᑯᔪᒪᓚᐅᖅᐳᖓ ᑭᓪᓕᓯᓂᐊᕐᓂᖃᕐᒪᖔᑦ ᐅᓄᖅᓯᒋᐊᕐᓂᖓᓂ ᕿᒻᒥᓄᑦ ᐱᒋᐊᖅᑕᐅᓂᐅᔪᓄᑦ ᐅᕝᕙᓘᓐᓃᑦ ᒪᓕᒐᓕᕆᔨᓛᒃᑯᓐᓄᑦ ᐃᖅᓯᓇᖅᑐᓄᑦ ᐆᒪᔪᓄᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓴᙱᓂᖅᓴᐅᔪᒥ ᒪᓕᒐᐅᔪᒥ ᓄᓇᓕᖕᓂ ᐅᖃᓗᙱᓐᓂᖅᓴᐅᓇᔭᕐᓂᖏᓐᓂ ᒪᓕᒐᕋᓛᕐᒥ ᐃᖅᑲᓇᐃᔭᖅᑎᓄᑦ ᕿᒻᒥᐅᑉ ᒥᒃᓵᓄᑦ.

“ᖁᑭᖅᓯᓂᐊᕈᑎᒃ ᐃᑲᕐᕋᓂ 24−ᓂ, ᐅᖃᓗᔾᔮᙱᑦᑐᖓ ᒪᓕᒐᕋᓛᓕᕆᔨᓄᑦ ᑭᓯᐊᓂ ᑕᑯᒍᒪ ᕿᒻᒥᒥᒃ ᑭᓇᑐᐃᓐᓇᒥᒃ ᐱᒋᐊᖅᓯᔪᒥ.”

ᐊᕙ ᐅᖃᓚᐅᖅᐳᖅ ᐃᓚᒋᐊᕈᑕᐅᔪᑦ ᐱᒋᐊᖅᑎᑕᐅᓚᐅᖅᐳᖅ ᖃᔅᓯᒐᓚᖕᓂ ᐅᖃᓗᖕᓂᐅᔪᓄᑦ ᓄᓇᓕᐸᐅᔭᕐᒧᑦ ᕿᒻᒥᓂᒃ ᐃᐱᖅᓯᒪᙱᑦᑐᓂ ᐊᒻᒪ ᖃᓄᐃᓐᓂᐅᔪᓂ ᓄᓇᖃᖅᑎᐅᔪᓂ ᐱᒋᐊᖅᑕᐅᓂᖏᓐᓂ ᐃᐱᖅᓯᒪᙱᑦᑐᓂ ᕿᒻᒥᓄᑦ, ᑭᓯᐊᓂ ᓇᓗᓇᐃᖅᑕᐅᓯᒪᔪᓂ ᓈᓴᐅᑎᖃᙱᖦᖢᓂ.

“ᓈᓴᐅᑎᖃᙱᓚᖓ. ᐊᑐᕐᓂᑯᖃᖅᐳᖓ,” ᐊᕙ ᐅᖃᓚᐅᖅᐳᖅ.

ᐃᓄᐃᑦ ᐅᖃᓪᓚᓚᐅᖅᐳᑦ ᐊᑭᕋᖅᑐᖅᖢᑎᒃ ᑐᒃᓯᕋᖅᑕᐅᔪᒥ ᐃᓚᒋᐊᕈᑕᐅᔪᓂ ᒪᓕᒐᕋᓛᖅ ᐊᓂᒍᖅᑕᐅᔪᒥ ᓯᕗᓪᓕᕐᒥ ᐊᒻᒪ ᒪᕐᕈᖓᓐᓂ ᐅᖃᓕᒫᖅᑕᐅᓂᖓᓂ ᐅᐱᕐᙶᖑᓚᐅᖅᑐᒥ. ᐊᑕᐅᓯᐅᔪᖅ ᐅᖃᓪᓚᓚᐅᖅᑐᒥ, ᓯᑕᕙᓂ ᑕᐅᔅ, ᐱᒋᐊᖅᑎᑦᑎᓚᐅᖅᐳᖅ ᖃᕋᓴᐅᔭᑎᒍᑦ ᐊᑎᓕᐅᖅᓯᒪᔪᒥ ᑐᒃᓯᕋᐅᒻᒥ ᐊᑎᓕᐅᖅᑕᐅᓯᒪᔪᒥ 1,860−ᐸᓗᖕᓂ ᐃᓄᖕᓂ ᓄᓇᕐᔪᐊᓕᒫᒥ.

“ᐊᓂᒍᖅᑎᑕᐅᓚᐅᖅᐳᖅ ᐱᕕᖃᖅᑎᑦᑎᙱᖦᖢᑎᒃ ᐃᓄᓕᒫᓂ ᐅᖃᐅᓯᒃᓴᓕᐅᕐᓂᕐᒥ, ᐊᒃᑐᐃᓂᖃᕋᓗᐊᖅᑎᓪᓗᒍ ᐃᓄᓕᒫᓂᒃ,” ᐅᖃᓚᐅᖅᐳᖅ ᑲᑎᒫᓂᒃᑎᓪᓗᒋᑦ.

ᐃᓚᒋᐊᕈᑕᐅᔪᓂ ᐃᓚᒋᐊᖅᓯᓚᐅᕆᕗᑦ ᐃᓚᖏᓐᓂ ᓄᑖᓂ ᐊᑭᓖᔭᕆᐊᖃᕐᓂᐅᔪᓂ, ᐃᓚᖃᖅᑐᒥ “ᖃᐅᑕᒫᒥ ᐸᖅᑭᔭᐅᓂᖏᓐᓂ ᐊᒻᒪ ᓂᕆᑎᑦᑎᓂᕐᒧᑦ ᐊᑭᓕᐅᑎᒥᒃ” $30−ᒥ, ᐃᓚᖃᖅᑐᒥ ᕿᒻᒥᒥᒃ ᐱᔭᐅᓂᖓᓂ ᐊᑭᓕᐅᑎᒥᒃ $150−ᒥ ᓯᕗᓪᓕᕐᒥ ᐱᔭᐅᑎᓪᓗᒍ, $250−ᓂ ᒪᕐᕈᖓᓄᑦ, $300−ᓂ ᐱᖓᔪᖓᓐᓄᑦ ᐊᒻᒪ $350−ᓂ ᑎᓴᒪᖓᓐᓄᑦ.