ᐃᓴᕈᐃᑦ ᓴᓇᐅᒐᓕᐅᖅᑎᑦ ᑲᒪᒋᔭᖃᓕᕐᑐᑦ ᐃᓄᒃᑎᑐᑦ ᐅᖃᓪᓚᒡᕕᒃᒥ
‘ᐅᖃᓪᓚᒡᕕᒃ’ ᐅᕙᓂ CKCU 93.1 FM ᓄᑖᓂ ᐅᖃᓪᓚᒡᕕᒃᒥ ᐅᖃᖅᑎᐅᓇᔭᖅᑐᓂᒃ
ᔭᓯ ᖃᙳᖅ ᐅᖃᓪᓚᒃᑎᒋᔭᐅᔪᖅ ᐅᕙᓂ ᐅᖃᓪᓚᒡᕕᒃ ᓈᓚᐅᑎᒃᑯᑦ ᑐᓴᖅᓴᐅᕙᒃᑐᖅ ᐅᕘᓇ CKCU-FM ᐅᕙᓂ ᑳᕐᑕᓐ ᓯᓚᑦᑐᖅᓴᕐᕕᐊᓗᖕᒥᑦ ᐋᑐᕚᒥ. ᓈᓚᐅᑎᒃᑯᑦ ᑐᓴᖅᓴᐅᕙᒃᑐᑦ ᐃᓄᒃᑎᑐᑦ ᐊᒻᒪ ᖃᓪᓗᓈᑎᑐᑦ ᐃᑲᔪᖅᑕᐅᓕᕐᑐᖅ ᐃᓴᕈᐃᑦ ᓴᓇᐅᒐᓕᐅᖅᑎᓄᑦ ᐅᑯᐊ ᑐᙵᓱᕝᕕᖓᑦ ᐃᓱᓕᑦᑎᓚᐅᖅᑎᓪᓗᒋᑦ ᐱᓕᕆᖃᑎᒌᖓᓂ. (ᐊᔾᔨᙳᐊᖅ ᐅᕙᙵᑦ ᔭᓯ ᖃᙳᖅ)
For the English version of this story, please see Isaruit Inuit Arts takes over Ottawa Inuktitut radio program.
ᔭᓯ ᖃᙳᖅᒧᓪᓕ, ᐅᖃᓪᓚᒃᑎᐅᓂᖓ ᐃᓄᒃᑎᑑᖅᑐᓂ ᓈᓚᐅᑎᒃᑯᑦ ᐃᖅᑲᐃᔾᔪᑎᒋᔭᖓ ᐊᑖᑕᖓᓗ ᓈᓚᐅᑎᓂ ᑐᓵᖃᑦᑕᓚᐅᕐᓯᒪᓂᖏᓐᓂᒃ ᐃᒡᓗᓕᒃᒥᑦ, ᑕᒪᕐᒥ ᑐᓵᔪᐃᓐᓇᐅᓪᓗᑎᒃ ᓈᓚᐅᑎᒥ.
ᐅᖃᓪᓚᒃᑎᐅᖃᑦᑕᕐᓯᒪᔪᖅ ᐅᕙᓂ ᐅᖃᓪᓚᒡᕕᒃ ᐅᕘᓇ CKCU 93.1 FM ᐅᕙᓂ ᑳᕐᑕᓐ ᓯᓚᑦᑐᖅᓴᕐᕕᐊᓗᒃᒥ ᐋᑐᕚᒥ ᑕᐃᒪᙵᑦ ᐱᒋᐊᓚᐅᕐᓯᒪᑎᓪᓗᒍ 2019-ᒥ.
“ᖁᕕᐊᓇᕈᓘᔭᕐᓂᖓ ᐊᒻᒪᓗ ᐅᖃᓪᓚᒡᕕᒃᒦᓐᓂ ᓲᕐᓗ ᐊᖏᕐᕋᖅᓯᒪᓐᓇᖅᑰᔨᔪᖅ, ᐊᑖᑕᓐᓂ ᐃᖅᑲᐃᓐᓇᖅᑐᖅ,” ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ ᓯᑎᐱᕆ 9-ᖑᑎᓪᓗᒍ. “ᓈᓚᐅᑎᒥ ᑐᓵᓪᓗᓂ ᖁᕕᐊᓇᕐᓂᖓ ᑐᓴᕐᓴᐅᓐᓇᕐᒥᔪᖅ ᒫᓂᓘᓐᓂᑦ ᓄᓇᓕᕐᔪᐊᒥ. ᓄᓇᕗᒥᑐᐊᖅ ᐅᕝᕙᓘᓐᓃᑦ ᐃᓄᑭᑦᑐᓂᓪᓘᓐᓃᑦ ᑐᓵᔪᑑᖃᑦᑕᕆᐊᖃᙱᒻᒪᑕ, ᑖᓐᓇ ᐱᒃᑯᒋᖃᑦᑕᖅᑕᕋ.”
ᒫᓐᓇᓕ ᐅᓇ ᐅᖃᓪᓚᒡᕕᓕᕆᓂᖅ ᖃᙴᑉ ᐃᑲᔪᖅᑐᖅᖢᓂᐅᒃ ᐋᖅᑭᒃᓱᖅᑕᐅᕙᓪᓕᐊᓂᑯ ᓄᑖᒥ ᐱᒋᐊᕐᕕᖃᕐᓂᐊᓕᕐᒪᑦ.
ᐃᓴᕈᐃᑦ ᓴᓇᐅᒐᓕᐅᖅᑎᑦ, ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ ᐃᒪᓐᓇ ᐅᖃᕐᓯᒪᓪᓗᓂ, ᖁᕕᐊᓲᑎᖃᕐᓂᖏᓐᓂᒃ ᐃᓄᐃᑦ ᓴᓇᐅᒐᓕᕆᔪᓐᓇᕐᓂᖏᓐᓂᒃ ᐊᔪᕈᓐᓃᖅᓴᖅᐸᓪᓕᐊᓂᒃᑯᑦ, ᑲᒪᒋᔭᖃᓕᓚᐅᕐᑐᑦ ᑕᖅᑭᐅᓵᖅᑐᒥᓐ ᐅᖃᓪᓚᒡᕕᒃᒥ ᐅᑯᓇᙵᑦ ᑐᙵᓱᕝᕕᖓᑦ ᐃᓄᐃᑦᑯᓐᓄᑦ, ᑮᓇᐅᔭᓕᐅᕋᓱᒐᑎ ᒪᓂᒻᒪᐃᓯᒪᔪᑦ ᐃᑲᔪᖅᑐᐃᔾᔪᑎᒃᓴᓂ ᐊᒻᒪ ᐃᖅᑲᓇᐃᔭᓕᖅᑎᑦᑎᓇᓱᖕᓂᕐᒥᑦ.
“ᐃᓴᕈᐃᑦ ᐱᓕᕆᖃᑕᐅᓕᖅᑎᓪᓗᒋᑦ ᐱᐅᒻᒪᕆᖕᓂᐊᖅᑐᖅ ᓲᖃᐃᒻᒪ ᐅᒃᐱᕈᓱᒻᒪᕆᖕᒪᑕ ᖃᐅᔨᒪᑎᑦᑎᔪᒪᓂᕐᒥ ᐅᖃᓪᓚᒡᕕᐅᑉ ᑕᐅᑐᙳᐊᒐᖓᓂ ᒪᑯᓂᖓ ᐅᓂᒃᑳᓂ ᐃᓐᓇᕐᓂ ᑐᓵᑎᑦᑎᕙᒡᓗᑎᒃ,” ᐅᖃᕐᑐᖅ ᖃᙳᖅ, ᑖᓐᓇᑦᑕᐅᖅ ᑐᓴᐅᒪᔾᔪᑎᓕᕆᓂᕐᒥ ᐅᖃᐅᔾᔪᐅᔨ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ. “ᖁᕕᐊᓱᑦᑎᐊᒻᒪᕆᒃᑐᖓ ᑖᓐᓇ ᓴᙱᒃᑎᑉᐹᓪᕈᓐᓇᕐᓂᐊᕋᑦᑎᒍᑦ.”
ᐅᓇ ᐱᓕᕆᐊᖑᔪᖅ ᐱᒋᐊᖅᑕᐅᓚᐅᕐᓯᒪᔪᖅ 2019-ᒥ ᐅᓇᐅᓚᐅᖅᑎᓪᓗᒍ ᓂᐱᕗᑦ, ᐃᓄᐃᑦ ᓈᓚᖃᑦᑕᖅᓚᐅᖅᑕᖓᑦ ᒪᓐᑐᕆᐊᒥ, ᐅᐸᓚᐅᕐᓯᒪᖕᒪᑕ ᑐᙵᓱᕝᕕᖓᑦ ᐃᓄᐃᑦᑯᓐᓄᑦ ᐊᔾᔨᐸᓗᐊᓂ ᐋᖅᑭᒃᓯᖁᔨᓪᓗᑎᒃ ᐋᑐᕚᒥ.
ᑖᒃᑯᐊ ᑲᑐᔾᔨᖃᑎᒌᑦ ᐊᖏᓚᐅᕐᓯᒪᖕᒪᑕ ᐊᒻᒪ ᓴᓇᑎᑦᑎᓕᖅᖢᑎᒃ ᖃᙳᖅᒥᓐ ᐊᒻᒪ ᒪᕐᕈᒃᑲᓐᓃᖕᓂ ᐅᖃᓪᓚᒃᑎᒃᓴᓂ.
ᑐᙵᓱᕝᕕᖓᑦ ᐃᓄᐃᑦ ᐃᑲᔪᖅᑐᐃᓯᒪᓚᐅᖅᑐᑦ ᐅᖃᓪᓚᒡᕕᒃᒥ ᐱᒋᐊᓕᖅᑎᓪᓗᒍ ᑕᒪᑐᒪᓂ ᐊᕐᕌᒍᒧᑦ ᑎᑭᖢᒍ. ᑭᓯᐊᓂᓕ ᐃᑲᔫᑎᖃᕈᓐᓇᐃᓪᓕᓚᐅᕐᒪᑕ ᑖᔅᓱᒥᖓ, ᐅᖃᕐᑐᖅ ᐸᕗᓕ ᐃᓪᓚᐅᖅ, ᐃᓴᕈᐃᑦ ᓴᓇᐅᒐᓕᕆᔨᒃᑯᓐᓄᑦ ᑐᑭᒧᐊᖅᑎᑦᑎᔨ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
ᐃᑲᔫᑎᒃᓴᖃᕈᓐᓃᖅᑎᓪᓗᒋᑦ ᖃᙳᖅ ᐊᒻᒪ ᐅᖃᓪᓚᒃᑎᐅᖃᑎᖓ ᕗᕌᓐᑯ ᐳᓴᒥ ᐃᑲᔪᑐᐃᓐᓇᖅᖢᑎᒃ ᐅᖃᓪᓚᒡᕕᒃᒥ ᐱᓕᕆᐊᖃᓕᓚᐅᕐᑐᑦ ᑖᓐᓇ ᑲᔪᓯᑎᑕᐅᓇᓱᒃᖢᓂ.
ᑐᙵᓱᒡᕕᖓᑦ ᐃᓄᐃᑦ ᐅᐸᒍᑎᓕᓚᐅᖅᑐᑦ ᐃᓴᕈᐃᑦᑯᓐᓄᑦ ᑲᒪᒋᖁᔭᐅᖔᓕᖅᖢᑎᒃ ᐱᓕᕆᖃᑎᒌᖕᓂᕐᒥ ᑕᖅᑭᐅᓚᐅᖅᑐᒥ, ᐃᓪᓚᐅᖅ ᐅᖃᕐᑐᖅ.
ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᙵᓱᒡᕕᖓᑦ ᐃᓄᐃᑦᑯᓐᓄᑦ ᖃᐅᔨᓇᓱᓚᐅᕐᓯᒪᔪᑦ ᑭᓯᐊᓂᓕ ᑭᐅᔭᐅᓚᐅᙱᒻᒪᑕ.
ᐅᓇ ᐅᖃᓪᓚᒡᕕᒃ ᐃᑲᔫᑎᖃᕐᓂᐊᓕᕐᑐᖅ ᐃᓴᕈᐃᑦᑯᑦ ᐃᓕᖅᑯᓯᕐᒧᑦ ᐅᑎᕐᓂᖅ, ᑖᓐᓇᓗ ᐃᑲᔪᖅᑕᐅᓯᒪᓪᓗᓂ ᑲᓇᑕᒥ ᑲᑎᒪᔨᕐᔪᐊᕐᓄᑦ ᓴᓇᐅᒐᓕᕆᓂᕐᒧᑦ, ᓄᓇᖃᖅᑳᖅᑐᑦ ᐱᔨᑦᑎᕋᐅᑎᓕᕆᔨᓄᑦ ᑲᓇᑕᒥ, ᐋᑐᕚ ᓄᓇᓕᐸᐅᔭᖓᓄᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓄᑦ.
ᐃᓇᑐᖃᐃᑦ, ᓴᓇᐅᒐᓕᐅᖅᑎᑦ ᐊᒻᒪ ᐅᖃᓪᓚᒡᕕᓕᕆᔨᑦ ᐊᑭᓕᖅᓱᖅᑕᐅᓂᐊᖅᑐᑦ, ᐃᓪᓚᐅᖅ ᐅᖃᕐᑐᖅ.
ᐃᓴᕈᐃᑦ ᓄᑖᓂᒃ ᐅᖃᓪᓚᒃᑎᒃᓴᖅᑖᕋᓱᒃᑐᑦ ᐊᔪᕈᓐᓃᖅᓴᖅᑎᑕᐅᓇᔭᖅᖢᑎᒃ ᐅᕘᓇ CKCU-FM ᐅᒃᑑᐱᕆᒥ. ᖃᙳᖅ ᐅᖃᓚᐅᕐᑐᖅ ᐃᓴᕈᐃᑦ ᐱᓕᕆᐊᖓ ᑐᑭᒧᐊᖅᑕᐅᕙᖕᓂᖓᓂ ᐱᐊᓐ ᐃᓪᓚᐅᖅᒧᑦ ᐊᒻᒪ ᐃᓐᓇᕐᓄᑦ ᐅᖃᖅᑎᐅᕙᒃᑐᒧᑦ ᐊᓯᓇ ᑲᓐᓄᑕᖅᒧᑦ ᐃᓚᐅᖃᑦᑕᕐᓂᐊᖅᑐᑦ ᑐᙵᓱᒃᑎᑦᑎᔨᐅᖃᑕᐅᓗᑎᒃ.
“ᕿᓂᕋᑦᑕ ᑐᓴᖅᑎᑦᑎᖃᑦᑕᕈᒪᔪᒥ ᐃᓄᐃᑦ ᐃᓕᖅᑯᓯᖏᓐᓂᒃ, ᐅᖃᐅᓯᖏᓐᓂᒃ ᐊᒻᒪ ᓴᖅᑭᑎᑕᐅᒃᑲᓐᓂᕐᓗᓂ ᐊᒻᒪᓗ ᐅᖃᓪᓚᒋᐊᒃᓴᖅ ᑲᙳᓱᙱᑦᑐᓂᒃ,” ᐅᖃᕐᑐᖅ ᖃᙳᖅ.
ᐅᖃᓪᓚᒡᕕᒃ ᑐᓴᕐᓴᐅᖃᑦᑕᖅᑐᖅ ᐱᖓᔪᐊᑕᒫᓐ 11:00-ᒥ ᐅᓪᓛᒃᑯᑦ 12:00 ᑎᑭᖢᒍ ᐊᒻᒪ ᐅᖃᓪᓚᒃᐸᒃᖢᑎᒃ ᐃᓄᒃᑎᑐᑦ ᐊᒻᒪ ᖃᓪᓗᓈᑎᑐᑦ.
(0) Comments