ᐃᓄᐃᑦ ᑕᐱᕇᑦ ᑲᓇᑕᒥ ᐱᓇᓱᒃᑲᓐᓂᖅᐳᑦ ᒐᕙᒪᑐᖃᒃᑯᓐᓂᒃ ᑮᓇᐅᔭᓂᒃ ᐃᓄᖕᓄᑦ ᐱᔭᐅᔭᕆᐊᓕᖕᓄᑦ

‘ᖃᓄᐃᓕᐅᖅᐸᓪᓕᐊᓂᖅ ᐃᓛᓐᓂ ᐱᐅᓂᕐᓴᐅᕙᒃᑐᖅ ᒪᑯᓇᙵᓪᓕ ᐊᑕᐅᓰᕐᓗᑎᒃ ᐃᑲᔫᑎᑖᖅᑎᑦᑎᕙᖕᓂᕐᒥᒃ ᐃᓄᖕᓄᑦ,’ ᓇᐃᑕᓐ ᐅᐱᐊᑦ ᐅᖃᖅᑐᖅ

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᖅᑐᖅ ᐱᓕᕆᖃᑎᖃᕐᓂᐊᕐᓂᕋᖅᖢᓂ ᒐᕙᒪᑐᖃᒃᑯᓐᓂ ᐃᑲᔪᖅᑐᐃᔪᓂᒃ ᐃᓄᖕᓅᖓᔪᓄᑦ ᐱᓕᕆᐊᒃᓴᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᓴᐃᕋ ᕌᔾᔪᔅ

For an English version of this story, see ITK pushes for more Inuit-focused federal spending

ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᕆᔭᐅᔪᖅ ᐅᖃᖅᑐᖅ ᐸᕐᓇᒃᓯᒪᓕᕐᓂᕐᒥᓂᒃ ᐱᓕᕆᖃᑎᖃᕈᓐᓇᕐᓯᓂᖓᓂᒃ ᒐᕙᒪᑐᖃᒃᑯᓐᓂ ᐃᑲᔪᖅᑐᐃᔪᓐᓇᖅᑐᓂᒃ ᐃᓄᖕᓅᖓᔪᓄᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᐱᔪᒪᔭᖏᓐᓂᒃ ᓴᖅᑭᑎᑦᑎᓚᐅᕐᑐᑦ ᓯᑎᐱᕆ 20 ᓂᕈᐊᕐᓇᐅᓛᖅᑑᑉ ᑐᖔᒍᑦ, ᓯᕗᓕᐅᖅᑎᒋᔭᐅᔪᓂᒃ ᐃᓄᐃᑦ ᓄᓇᖓᓂᒃ ᐱᔭᐅᔭᕆᐊᓕᖕᓂᒃ ᐱᓕᕆᐊᖃᕐᓂᖅᓴᐅᖁᔨᓪᓗᓂ.

ᐱᓇᓱᐊᕈᓯᐅᓚᐅᕐᑐᒥ, ᕉᔅᐋᓐ ᐋᓯᐹᑦ, ᑲᓇᑕᒥ ᓄᓇᖃᖅᑳᖅᑐᑦ ᐊᓪᓚᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ, ᐊᒻᒪ ᑕᐃᒪᓐᓇᐸᓗᒃ ᐱᖁᔨᓚᐅᕆᕗᖅ ᓯᕗᓪᓕᐅᑎᑕᐅᖁᔭᖏᓐᓂᒃ. ᐅᓇᖓ ᓄᓇᖃᖅᑳᖅᑐᑦ ᐊᓪᓚᐃᑦ ᑲᑐᔾᔨᖃᑎᒌᖏᑦ ᐃᓚᖃᖅᑎᑦᑎᓚᐅᕐᑐᑦ ᓯᕗᓪᓕᐅᑎᑕᐅᖁᔭᖏᓐᓂᒃ ᒪᑯᓂᖓ ᐋᖅᑭᒋᐊᒃᑲᓐᓂᕈᑎᓕᕆᓂᕐᒥᒃ, ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐊᒻᒪᓗ ᐱᕙᓪᓕᐊᓂᒃᑯᑦ ᐱᕈᖅᐸᓪᓕᐊᒍᑎᒃᓴᓂᒃ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ ᐃᓱᒪᓂᕋᖅᖢᓂ ᑕᒪᒃᑯᐊ ᐅᖃᓪᓚᖃᑎᒌᒍᑎᕕᓂᐅᔪᑦ, ᐃᑲᔪᕈᑎᓕᕆᓂᐅᓂᑯᑦ ᐊᒻᒪᓗ ᒪᓕᒐᓕᕆᓂᒃᑯᑦ ᐱᓕᕆᓂᐅᔪᑦ ᑲᔪᓯᔪᓐᓇᖁᓪᓗᓂᒋ ᐅᑯᑎᒎᓇᖅ ᒫᓐᓇ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦᑎᒍᑦ.

“ᐱᓕᕆᐊᖃᐃᓐᓇᕐᓂᐊᕋᑦᑕ ᓇᓕᐊᒃ ᒐᕙᒪᙳᖅᑎᑕᐅᒐᓗᐊᖅᐸᑦ ᑲᔪᓯᑎᑦᑎᓇᓱᒡᓗᑕ,” ᐅᐱᐊᑦ ᐅᖃᖅᑐᖅ.

“ᐃᑲᔪᕐᓂᐊᕈᒪᒐᑦᑎᒍᑦ ᓇᓕᐊᒃ ᐱᓕᕆᐊᖃᓕᕐᓂᐊᖅᑐᖅ ᑲᔪᓯᑎᓐᓇᓱᒡᓗᒋᑦ ᐊᕐᕌᒍᒐᓴᐅᓕᕐᑐᓂᒃ ᐱᓕᕆᐊᖑᓕᕐᑐᓂᒃ.”

ᐅᐱᐊᑦ ᐅᖃᐅᓯᖃᕐᑐᖅ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᓂᒃ, ᑲᑎᕐᖓᔪᑦ ᒪᓕᒐᓕᕆᔩᑦ ᑎᒥᖏᑦ ᐋᖅᑭᒃᑕᐅᓂᑯ ᑲᓇᑕᒧᑦ ᐊᖓᔪᖅᑳᖅᔪᐊᕐᒥᓐ ᔭᔅᑎᓐ ᑐᕉᑑ 2017-ᖑᑎᓪᓗᒍ.

ᑕᐃᒪᙵᓪᓕ ᐱᒋᐊᖅᑕᐅᓚᐅᕐᓯᒪᖕᒪᑕ ᑖᒃᑯᐊ ᑲᑎᒪᔨᕋᓛᑦ ᐱᒻᒪᕆᒃᑯᑦ ᓯᕗᒧᒃᐸᓪᓕᐊᑎᑦᑎᓯᒪᓕᕐᑐᑦ ᐅᓄᙱᑦᑑᒐᓗᐊᓂᒃ ᐱᓕᕆᐊᒃᓴᖏᓐᓂᒃ, ᐃᓚᖃᖅᖢᑎᒃ ᐅᑭᐅᕐᑕᖅᑐᕐᒥᒃ ᐊᒻᒪ ᐅᑭᐅᕐᑕᖅᑐᕐᒥᐅᓄᑦ ᐊᑐᐊᒐᓄᑦ ᐋᖅᑭᒃᓱᐃᔾᔪᑎᒃᓴᓂᒃ, ᐊᑐᓕᖅᑎᑦᑎᓂᕐᒥᒃ ᓄᑖᒥ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᒪᓕᒐᖅᒥᒃ ᐊᒻᒪᓗ ᐳᕙᒡᓗᖕᓇᒥᒃ ᐱᑕᖃᕈᓐᓃᖅᑎᑦᑎᔾᔪᑎᐅᓇᓱᒃᑐᓂᒃ ᐅᑭᐅᕐᑕᖅᑐᕐᒥ 2030 ᑎᑭᓚᐅᕐᑎᓐᓇᒍ.

ᑲᑎᒪᔨᕋᓛ ᐱᒋᐊᖅᑎᑦᑎᓚᐅᕐᒥᔪᑦ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᒃ, ᑖᓐᓇᓕ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᑐᖃᑦᑕᕆᐊᖃᖅᑕᖏᓐᓂᒃ ᒪᓕᒐᓕᐅᕋᓱᖕᓂᐊᕈᑎᒃ ᐅᕝᕙᓘᓐᓃᑦ ᐊᖏᖃᑎᒌᒍᑎᓕᕆᓂᐊᕈᑎᒃ ᐃᓄᐃᑦ ᓄᓇᖓᑦᑕ ᒥᒃᓵᓅᖓᔪᓂᒃ.

“ᐅᓇᓕ ᐅᑯᓂᖓ ᒐᕙᒪᑐᖃᒃᑯᓐᓂᒃ ᐱᓕᕆᐊᖃᕐᓂᐊᖅᑐᓂᒃ ᐋᖅᑭᒃᓯᒪᓂᖅᓴᐅᑎᑦᑎᓇᔭᖅᖢᓂ ᐅᕝᕙᓘᓐᓃᑦ ᐱᓕᕆᖃᑎᒌᖕᓂᖅᓴᐅᔪᓐᓇᕐᓂᒃᑯᑦ,” ᐅᐱᐊᑦ ᐅᖃᖅᑐᖅ.

“ᐃᓱᒪᒐᑦᑕ ᓯᕗᓪᓕᕐᓂ ᑕᖅᑭᓂᒃ ᐅᑯᐊ ᒐᕙᒪᐅᓕᓵᖅᑐᑦ ᐱᐊᓂᒃᑎᑦᑎᔪᓐᓇᕐᓗᑎ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᒃ … ᐊᒻᒪᓗ ᑖᓐᓇ ᐊᑐᖅᑕᐅᑎᑕᐅᓕᑲᐅᑎᒋᓗᓂ.”

ᐃᓄᐃᑦ ᑕᐱᕇᑦ ᑲᓇᑕᒥ ᒐᕙᒪᐅᓕᕐᓂᐊᖅᑐᓂᒃ ᐱᓕᕆᐊᖃᕐᓂᐊᖁᔨᔪᑦ ᐊᓯᖏᓐᓂᒃ ᒪᑯᓂᖓ: ᐋᓐᓂᐊᖃᖅᑕᐃᓕᓂᕐᒧᑦ ᒪᓕᒐᓕᕆᓂᕐᒥᒃ, ᐃᓕᓴᖅᓯᓯᒪᔪᓂᒃ ᐃᓄᐃᑦ ᐋᓐᓂᐊᖃᖅᑐᑦ ᐱᔪᓐᓇᐅᑎᖏᓐᓂᒃ ᐃᓄᒃᑐᑦ ᐅᖃᐅᓯᒃᑯᑦ ᑲᒪᒋᔭᐅᔪᓐᓇᕐᓂᕐᒥᒃ ᐅᕝᕙᓘᓐᓃᑦ ᑲᒪᒋᔭᐅᔪᓐᓇᕐᓗᑎᒃ ᐊᖏᕐᕋᖏᑦᑕ ᖃᓂᒋᔭᖓᓂ. ᐃᓄᐃᑦ ᑕᐱᕇᑦ ᑲᓇᑕᒥ ᑭᖑᓪᓕᕐᓂᒃ ᒐᕙᒪᐅᓂᐊᖅᑐᓂᒃ ᒪᓕᒐᓕᐅᕐᓂᐊᖁᔨᓪᓗᑎᒃ 2022 ᐅᐱᕐᖔᖓᓂᒃ.

ᐊᖏᔪᓂᒃ ᓄᑖᓂᒃ ᐃᑲᔪᕈᑎᐅᔪᓐᓇᖅᑐᓂᒃ ᐃᓄᖕᓄᑦ ᐊᐅᓚᑕᐅᔪᓄᑦ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑎᓄᑦ, ᒪᑯᓄᖓᓗ ᐃᒡᓗᒃᓴᓄᑦ, ᐊᖏᕐᕋᖃᙱᑦᑐᓄᑦ ᐅᐸᒡᕕᒃᓴᓄᑦ ᐊᒻᒪᓗ ᐊᑐᓗᐊᕐᓂᕐᒧᑦ ᒪᒥᓴᕐᕕᒃᓴᓄᑦ.

ᐃᑲᔪᕈᑎᖃᕐᓗᑎᒃ ᓂᕿᖃᕈᓐᓇᑦᑎᐊᖅᑎᑦᑎᓂᕐᒥᒃ ᐃᓄᖕᓂᒃ, ᑕᒪᓐᓇ ᓇᓗᓇᐃᖅᑕᐅᓯᒪᓂᖓᓄᑦ ᓄᑖᓂᒃ ᓴᖅᑭᑕᐅᓵᕐᓂᑯᓂᒃ ᐅᕙᓂ ‘ᐃᓄᐃᑦ ᓄᓇᖓᓂᒃ ᓂᕿᖃᑦᑎᐊᖅᑎᑦᑎᓂᕐᒧᑦ ᖃᓄᐃᓕᐅᕈᑎᒃᓴᑦ’ᓂᒃ.

ᐊᖏᔪᓂᒃ ᐊᒻᒪᓗ ᑲᒪᒋᔭᐅᔪᓐᓇᖅᑐᓂᒃ ᐃᑲᔫᑎᒃᓴᓕᕆᓂᖅ ᒪᐅᓇ ᐱᖁᑎᒃᓴᓕᕆᓂᕐᒥᒃ ᐊᒻᒪ ᐃᒡᓗᓕᕆᓂᕐᒥᒃ ᐅᑭᐅᕐᑕᖅᑐᓕᒫᒥᒃ.

“ᖃᓄᐃᓕᐅᖅᐸᓪᓕᐊᓂᖅ ᐃᓛᓐᓂ ᐱᐅᓂᕐᓴᐅᕙᒃᑐᖅ ᒪᑯᓇᙵᓪᓕ ᐊᑕᐅᓰᕐᓗᑎᒃ ᐃᑲᔫᑎᑖᖅᑎᑦᑎᕙᖕᓂᕐᒥᒃ ᐃᓄᖕᓄᑦ,” ᓇᐃᑕᓐ ᐅᐱᐊᑦ ᐅᖃᖅᑐᖅ.

ᒫᓐᓇᒧᓪᓕ ᐅᐱᐊᑦ ᐱᕕᖃᕐᓯᒪᔪᖅ ᑲᓇᑕᒧᑦ ᐊᖓᔪᖅᑳᖅᔪᐊᖅ ᔭᔅᑎᓐ ᑐᕉᑑᒥ ᑲᑎᖃᑎᖃᖅᓯᒪᓪᓗᓂ ᐃᖃᓗᖕᓄᑦ ᑖᓐᓇ ᐳᓛᖅᑎᓪᓗᒍ ᐱᓇᓱᐊᕈᓯᐅᓚᐅᕐᑐᒥᓐ. ᑲᑎᖃᑎᖃᕈᒪᖕᒥᔪᖅ ᐊᓯᖏᓐᓂᒃ ᓯᕗᓕᐅᖅᑎᒋᔭᐅᔪᓂᒃ ᐅᖃᐅᓯᖃᕈᒪᒐᒥ ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᓪᓕᐅᑎᓯᒪᔭᖏᓐᓂᒃ ᓯᑎᐱᕆ 20 ᓯᕗᓂᐊᓂ.

ᐅᐱᐊᑦ ᐅᖃᓚᐅᖅᑐᖅ ᓂᕈᐊᕐᓇᖅ “ᐊᒃᓱᕈᕐᓇᕈᓘᔭᕐᓂᖓᓂᒃ” ᑲᑐᔾᔨᖃᑎᒌᓄᑦ ᒪᑯᓄᖓ ᓲᒃᓗ ᐃᓄᐃᑦ ᑕᐱᕇᑦ ᑲᓇᑕᒥ ᓲᖃᐃᒻᒪ ᒪᓕᒐᓕᕆᓂᒃᑯᑦ ᑭᓯᐊᓂ ᐱᓕᕆᐊᖃᓪᓚᕆᒍᓐᓇᕐᓂᖏᓐᓄᑦ.

“ᑕᐃᒪᙵᑦ ᒐᕙᒪᑐᖃᒃᑯᑦ ᓂᕈᐊᕐᓇᖃᓕᕌᖓᑕ, ᑖᒃᑯᐊᓘᓐᓃᑦ ᐊᖓᔪᖅᑳᑦ ᓵᓚᒃᓴᒃᑲᓐᓂᕋᓗᐊᖅᐸᑕ ᓂᕈᐊᖅᑕᐅᓂᒃᑯᑦ, ᒐᕙᒪᒃᑯᑦ ᐊᓯᙳᖅᑎᑦᑎᖃᑦᑕᕐᒪᑕ ᓇᓕᐊᓐᓂᒃ ᓯᕗᓪᓕᐅᑎᓂᐊᓂᕋᖅᓯᒪᔭᖏᓐᓂᒃ,” ᐅᖃᖅᑐᖅ.

ᐅᐱᐊᑦ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐊᓂᒍᖅᑎᑕᐅᑦᑎᐊᕐᓯᒪᔪᑦ ᐅᑯᓇᙵᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦᑎᒍᑦ ᑲᔪᓯᑎᑕᐅᔪᓐᓇᕐᓂᐊᖁᓪᓗᓂᒋᑦ.

“ᐱᒻᒪᕆᐊᓘᖕᒪᑦ ᒪᓕᒐᓕᕆᕕᒡᔪᐊᕐᒥ ᐃᓚᒋᔭᐅᔪᑦ ᐃᓄᖕᓂᒃ ᑭᒡᒐᖅᑐᐃᔨᐅᔪᑦ  ᐱᓕᕆᖃᑎᖃᕈᓐᓇᕐᓗᑎᒃ ᐃᓄᖕᓂᒃ ᐊᒻᒪᓗ ᓄᓇᓕᖕᓂ ᐱᔭᐅᔭᕆᐊᓕᖕᓄᑦ,” ᐅᖃᒃᑲᓐᓂᖅᑐᖅ.

“ᐃᓱᒪᔪᖓᓕ ᑲᓇᑕᒥ ᑲᔪᓯᔪᓐᓇᕐᓂᐊᖅᑯᓪᓗᒋᑦ ᐋᖅᑭᒋᐊᒃᑲᓐᓂᕐᓂᖅ ᓯᕗᓪᓕᐅᑎᑕᐅᓯᒪᓗᓂ ᐊᒻᒪᓗ ᐃᒡᓗᖃᖅᑎᑦᑎᓂᕐᒥᒃ ᑲᓇᑕᒥᐅᑕᓕᒫᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*