ᐊᖏᕐᕋᕆᔭᐅᑐᐃᓐᓇᕆᐊᓕᑦ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖓᓄᑦ ᓴᖅᑭᑕᐅᔪᑦ

For English version, see ITK shortlists 8 communities as potential hosts for Inuit Nunangat University main campus

ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ ᖃᓂᓐᓂᖅᓴᐅᓕᖅᐳᖅ ᓇᓂᓯᓂᖏᓐᓂ ᐊᖏᕐᕋᒃᓴᐅᓂᐊᖅᑐᒥ ᐃᓕᓐᓂᐊᕐᕕᓪᓗᐊᑕᖓᓂ, ᐃᓄᐃᑦ ᑕᐱᕇᑦ ᑲᓇᑕᒥ ᓇᐃᒡᓕᒋᐊᖅᑐᒥ ᓂᕈᐊᖅᓯᓚᐅᖅᑎᓪᓗᒋᑦ 8-ᖑᔪᓂ ᓄᓇᓕᐅᔪᓂ, ᒪᓕᒃᑐᒥ ᕿᒥᕐᕈᔭᐅᓂᖓᓂ ᐸᕐᓇᒃᓯᒪᓂᖏᓐᓂ ᐊᒻᒪ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ.

ᓇᐃᒡᓕᒋᐊᖅᑐᒥ ᓂᕈᐊᖅᑕᐅᓯᒪᔪᓂ ᓄᓇᓕᐅᔪᑦ ᐅᑯᐊᖑᕗᑦ ᐃᖃᓗᐃᑦ, ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ ᐊᒻᒪ ᐊᕐᕕᐊᑦ ᓄᓇᕗᒻᒥ; ᐳᕕᕐᓂᑦᑐᖅ ᐊᒻᒪ ᑰᔾᔪᐊᖅ ᓄᓇᕕᖕᒥ; ᐃᓅᕕᒃ ᐃᓄᕕᐊᓗᐃᑦ ᓇᓗᓇᐃᖅᑕᐅᓯᒪᓂᖓᓂ ᐊᕕᒃᑐᖅᓯᒪᓂᐅᔪᒥ; ᐊᒻᒪ ᓇᐃᓐ ᓄᓇᑦᓯᐊᕗᒻᒥ.

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᐅᓯᖃᓚᐅᖅᐳᖅ ᕙᐃᔅᐳᒃᑯᑦ ᐅᒃᑐᐱᕆ 9−ᒥ ᑲᑎᒪᔨᖏᑦ ᐊᖏᓚᐅᖅᐳᑦ ᑎᑎᕋᖅᓯᒪᓂᐅᔪᓂ ᓯᑎᐱᕆ 17−ᒥ.

ᐅᑯᐊ ᓄᓇᓕᐅᔪᑦ ᖃᐃᖁᔭᐅᓂᐊᓯᕗᑦ ᓇᓗᓇᐃᖅᓯᓂᖏᓐᓂ ᐱᔪᒪᓂᖏᓐᓂ ᓄᓇᓕᖕᓂ ᑲᑎᒪᔨᖏᓐᓄᑦ ᐃᓚᐅᑎᑦᑎᓚᐅᙱᓐᓂᖏᓐᓂ ᐃᓄᐃᑦ ᑕᐱᕇᑦ ᑲᓇᑕᒥ ᓄᓇᓕᖕᓂ ᐱᔪᓐᓇᕐᓂᖏᓐᓂ ᐊᒻᒪ ᐱᔭᕆᐊᓕᖏᓐᓂ.

“ᓯᕗᓪᓕᖅᐹᖅ ᐃᓱᒪᒋᔭᓐᓂ ᐅᓇᐅᕗᖅ, ᐅᐊᑲᓪᓚᖔ. ᖁᑦᑎᓛᖑᔪᓄᑦ 8−ᖑᖃᑕᐅᕗᒍᑦ,” ᐊᕐᕕᐊᑦ ᒪᐃᔭᖓ ᔫ ᓴᕕᑲᑖᖅ ᓄᑲᖅᖠᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᓱᓕ ᐱᔭᒃᓴᖃᕐᔪᐊᖅᐳᑦ ᐱᓕᕆᐊᖑᔭᕆᐊᓕᖕᓂ. ᑐᑭᖃᖅᐳᖅ 8−ᖑᔪᑦ ᓄᓇᓕᐅᔪᑦ ᐱᕕᒃᓴᖃᓕᖅᐳᑦ ᑐᓂᓯᓂᕐᒥ ᑐᒃᓯᕋᐅᑕᐅᔪᒥ ᐅᓂᒃᑳᕆᔪᒥ ᖃᓄᐃᒻᒪᑦ ᓂᕈᐊᖅᑕᐅᓪᓗᐊᕐᓂᖏᓐᓂ,” ᐅᖃᓚᐅᖅᐳᖅ.

ᑲᒪᒋᔭᖃᕐᓂᕐᒥ ᓯᓚᑦᑐᖅᓴᕐᕕᒡᔪᐊᕐᒥ ᐱᕚᓪᓕᕈᑎᖃᕋᔭᖅᐳᖅ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ, ᐊᕐᕕᐊᑐᐊᖑᙱᑦᑐᒥ, ᓴᕕᑲᑖᖅ ᐃᓚᒋᐊᖅᓯᓚᐅᖅᐳᖅ.

“ᐊᓯᖏᓐᓂ ᐃᓚᒋᔭᐅᔪᓂ ᐊᕕᒃᑐᖅᓯᒪᓂᐅᔪᒥ, ᑲᖏᖅᖠᓂᖅᑕᐅᖅ, ᐱᕚᓪᓕᕈᑎᖃᕋᔭᕆᕗᖅ, ᐱᔾᔪᑎᖃᖅᑐᒥ ᖃᓄᖅ ᓂᐅᕕᐊᒃᓴᓄᑦ ᖃᖓᑕᓲᓂ ᐊᐅᓚᑉᐸᖕᓂᖏᓐᓂ ᐅᕙᓂ ᐊᕕᒃᑐᖅᓯᒪᓂᐅᔪᒥ,” ᐅᖃᓚᐅᖅᐳᖅ.

ᐃᓚᒋᐊᖅᓯᓚᐅᖅᐳᖅ ᐊᕐᕕᐊᑦ ᐱᖃᖅᐳᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᓕᖏᓐᓂ ᑲᒪᒋᔭᖃᕐᓂᕐᒥ ᐃᒡᓗᕐᔪᐊᒥᑦ.

“ᓇᓗᓇᐃᖅᓯᓚᐅᖅᐳᒍᑦ [ᐃᓄᐃᑦ ᑕᐱᕇᑦ ᑲᓇᑕᒥ] ᓈᒻᒪᒃᑐᒥ ᓄᓇᖁᑎᖃᕐᓂᑦᑎᓐᓂ, ᓈᒻᒪᒃᑐᒥ ᑐᐊᐸᖕᒥ. ᐃᒪᕐᒥ ᐱᔪᓐᓇᕐᓂᑦᑎᓐᓂ ᑲᒪᒋᔭᖃᕈᓐᓇᖅᐳᖅ ᐱᔪᒪᓂᐅᔪᒥ,” ᓴᕕᑲᑖᖅ ᐅᖃᓚᐅᖅᐳᖅ. “ᐊᑲᐅᙱᓕᐅᕈᑎᖃᙱᓚᖅ ᑯᕕᖅᑕᖅᑕᐅᓂᐅᔪᒥ ᐅᕝᕙᓘᓐᓃᑦ ᐊᒃᑕᑯᓄᑦ. ᑭᓱᓕᒫᑦ ᐃᓗᐊᓃᑉᐳᑦ ᑭᒡᓕᒋᔭᑦᑎᓐᓂ.”

ᓴᕕᑲᑖᖅ ᑎᒃᑯᐊᕆᓚᐅᕆᕗᖅ ᐊᕐᕕᐊᑦ ᓴᙱᔪᒥ ᐊᑐᕐᓂᖓᓂ ᐃᓄᒃᑎᑐᒻᒥ ᐊᒻᒪ ᐱᔭᕇᓕᒑᑦᑎᐊᖅᑐᒥ ᕿᓚᒻᒥᐅᔪᒥ ᓇᑉᐸᖅᑎᒐᒃᓴᐅᔪᓂ ᐊᖏᕐᕋᓂ ᓴᓇᕝᕕᖕᒥ ᐱᖁᑎᒋᔭᐅᓂᖓᓂ.

ᐱᓕᕆᐊᒃᓴᖅ “ᑕᒪᒃᑭᓄᑦ ᓵᓚᖃᕐᓂᐅᓇᔭᖅᐳᖅ” ᓄᓇᓕᖕᓄᑦ, ᓇᒃᓴᕐᓂᖓᓂ ᓇᖕᒥᓂᕆᔭᐅᔪᓂ ᐊᒻᒪ ᐃᑲᔪᕐᓂᕐᒥ ᓄᓇᓕᖕᓂ ᓇᖕᒥᓂᕆᔭᐅᔪᓂᑦ, ᐅᖃᓚᐅᖅᐳᖅ.

“ᐊᖏᔪᒥ ᐃᒡᓗᕐᔪᐊᒥ ᐊᒻᒪ ᐃᓄᖕᓂ ᑎᑭᑦᑐᓂ, ᑕᒪᓐᓇ ᓇᒃᓴᖅᐳᖅ ᐱᕚᓪᓕᕈᑎᐅᔪᓂ ᓄᓇᓕᖕᓄᑦ,” ᐅᖃᓚᐅᖅᐳᖅ.

ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᒥ, ᐃᖃᓗᒃᑑᑦᑎᐊᑉ ᓄᓇᓕᖕᓂ ᐊᐅᓚᑦᑎᔨᐅᔪᖅ ᔨᒻ ᒥᒃᐃᐅᑭᓐ ᐅᖃᓚᐅᖅᐳᖅ ᓄᓇᓕᐅᔪᖅ ᑕᑯᒃᓴᐅᑎᑦᑎᓯᒪᕙᒌᖅᐳᖅ ᑲᒪᒋᔭᖃᕈᓐᓇᕐᓂᖓᓂ ᐊᖏᔪᓂ ᐱᕙᓪᓕᐊᑎᑦᑎᓂᕐᒥ ᐱᓕᕆᐊᒃᓴᐅᔪᓂ.

“ᑕᑯᓗᑎᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓᓂ, [ᐃᖃᓗᒃᑑᑦᑎᐊᖅ] ᑕᑯᒃᓴᐅᑎᑦᑎᓯᒪᕗᖅ ᐸᕐᓇᒃᓯᒪᓂᑦᑎᓐᓂ ᐊᒻᒪ ᖁᕕᐊᑉᐳᒍᑦ ᐱᓕᕆᓂᕐᒥ ᐊᖏᓂᖅᓴᐅᔪᒥ ᐱᓕᕆᐊᒃᓴᐅᔪᓂ, ᐊᒻᒪ ᓱᖏᐅᔾᔨᔪᓐᓇᖅᐳᒍᑦ ᐱᕈᖅᐸᓪᓕᐊᓂᖓᓂ ᓄᓇᓕᖕᓂ,” ᒥᒃᐃᐅᑭᓐ ᐅᖃᓚᐅᖅᐳᖅ.

ᕼᐋᒻᓚᐅᑉ ᐃᓂᖓ ᐱᔪᒥᓇᑦᑎᐊᖅᖢᓂ ᐃᓂᒃᓴᐅᔪᓐᓇᖅᐳᖅ ᐃᓕᓐᓂᐊᖅᑎᓄᑦ ᐊᒻᒪ ᖃᐅᔨᓴᖅᑎᓄᑦ ᐊᐅᓪᓛᖅᑐᓂ ᐅᑭᐅᖅᑕᖅᑐᓕᒫᒥ ᐊᒻᒪ ᖃᓪᓗᓈᑦ ᓄᓇᖓᓐᓂ ᑲᓇᑕᒥ, ᐅᖃᓚᐅᖅᐳᖅ.

“ᖃᐅᑕᒫᑦ ᖃᖓᑕᓲᖃᓲᖑᕗᒍᑦ ᓄᓇᑦᓯᐊᕐᒧᑦ ᐊᒻᒪ ᔭᓗᓇᐃᕝᒧᑦ, ᐊᔪᕐᓇᙱᑦᑐᓂ ᑲᑎᖃᑎᖃᕐᓂᐅᔪᓂ ᐃᐊᑦᒪᓐᑕᓐᒧᑦ, ᑐᕌᓪᑐᒧᑦ, ᕚᓐᑰᕙ — ᑕᒪᒃᑭᓄᑦ ᐱᓕᕆᕝᕕᐅᒐᔪᒃᑐᓄᑦ,” ᐅᖃᓚᐅᖅᐳᖅ.

ᒥᒃᐃᐅᑭᓐ ᐅᖃᓚᐅᖅᐳᖅ ᑲᒪᒋᔭᖃᕐᓂᕐᒥ ᓯᓚᑦᑐᖅᓴᕐᕕᒡᔪᐊᕐᒥ ᓇᒃᓴᕋᔭᖅᐳᖅ ᑕᒪᒃᑭᓂ ᕿᓚᒻᒥᐅᔪᒥ ᐊᒻᒪ ᐊᑯᓂᐅᔪᒥ ᑮᓇᐅᔾᔭᒃᓴᓂᕐᒧᑦ ᐱᕚᓪᓕᕈᑎᓂᑦ.

“ᓇᑉᐸᖅᑎᕆᓂᕐᒥ ᖁᕝᕙᕆᐊᖅᐹᓪᓕᕐᓂᖃᕋᔭᖅᐳᖅ, ᐆᒥᖓᑐᐃᓐᓇᐅᙱᑦᑐᖅ ᓯᓚᑦᑐᖅᓴᕐᕕᒡᔪᐊᕐᒥᑐᐊᖅ ᑭᓯᐊᓂ ᑕᒪᒃᑭᓂ ᐃᑲᔪᖅᓱᐃᓂᐅᔪᓂ ᐊᐅᓚᑕᐅᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᖃᕋᔭᖅᑐᓂ,” ᐅᖃᓚᐅᖅᐳᖅ.

ᐃᖃᓗᒃᑑᑦᑎᐊᖅ ᐅᖃᓪᓚᖃᑎᖃᖅᐸᓪᓕᐊᕌᓂᒃᓯᒪᓕᖅᐳᑦ ᓄᓇᓕᖕᓂ ᓇᖕᒥᓂᕆᔭᐅᔪᓂ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ, ᐊᒻᒪ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᖃᓄᖅ ᓴᙱᒃᑎᒋᐊᖅᓯᓂᕐᒥ ᑐᒃᓯᕋᐅᑎᖓᓐᓂ.

ᓇᐃᓐᒥ, ᒪᐃᔭ ᑑᓂ ᐋᓐᑐᓴᓐ ᐅᖃᓚᐅᖅᐳᖅ ᑐᒃᓯᕋᐅᑎ ᕿᓚᒻᒥᐅᔪᒥ ᑐᓂᔭᐅᓂᐊᖅᐳᖅ ᑲᑎᒪᔨᓄᑦ ᐅᒃᑐᐱᕆ 14−ᒥ ᑲᑎᒪᓂᖓᓐᓂ.

“ᓱᓕᔭᕆᐊᖃᖅᐳᒍᑦ ᐊᒻᒪ ᐃᓱᒪᒃᓴᖅᓯᐅᕆᓗᑕ — ᐱᖃᖅᐱᑕ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐅᕙᓂ? ᐅᓯᑲᑦᑕᕐᓂᖃᖅᐱᑕ ᑕᐃᑯᖓ ᐊᒻᒪ ᐊᓂᓂᕐᒥ ᓄᓇᓕᐅᔪᒥ ᓈᒻᒪᒐᔭᖅᑐᒥ ᑲᒪᒋᔭᖃᕐᓂᕐᒥ ᐃᓕᓐᓂᐊᕐᕕᓪᓗᐊᑕᐅᔪᒥ?”

ᐅᖃᓚᐅᖅᐳᖅ ᑲᔪᖏᖅᓴᓂᖃᓚᐅᖅᐳᖅ ᑐᓴᕐᓂᕐᒥ ᓄᓇᓕᐅᔪᑦ ᓂᕈᐊᖅᑕᐅᙱᑦᑐᑦ ᑲᒪᒋᔭᖃᕐᓂᕐᒥ ᐃᓕᓐᓂᐊᕐᕕᓪᓗᐊᑕᐅᔪᒥ ᐃᓱᒪᒋᔭᐅᓂᐊᕐᓂᖏᓐᓂ ᑲᒪᒋᔭᖃᕐᓂᖏᓐᓂ ᐊᑕᐅᓯᐅᔪᒥ ᐱᖓᓱᓂ ᓯᓚᑦᑐᖅᓴᕐᕕᒡᔪᐊᑉ ᖃᐅᔨᒪᓂᐅᔪᒥ ᐱᓕᕆᕝᕕᐅᓂᐊᕐᓂᖏᓐᓂ.

ᐋᓐᑐᓴᓐ ᐅᖃᓚᐅᖅᐳᖅ ᓇᐃᓐ ᕿᒥᕐᕈᐃᓐᓇᖅᐳᑦ ᐱᓕᕆᓂᐅᔪᓂ ᓴᙱᒃᑎᒋᐊᖅᓯᓂᕐᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐅᓯᑲᑦᑕᕐᓂᖏᓐᓂ ᐱᓕᕆᔾᔪᓯᐅᔪᓂ ᑭᓯᐊᓂ ᓇᓗᓇᐃᖅᓯᓚᐅᖅᐳᖅ ᓈᒻᒪᒃᑎᑦᑎᐊᕐᓂᐅᔪᒥ ᐱᓕᕆᓂᐅᔪᒥ.

ᑲᖏᖅᖠᓂᕐᒥ ᐱᓕᕆᔨᕐᔪᐊᑦ ᐅᖃᓚᐅᖅᐳᑦ ᐸᕐᓇᖕᓂᖏᓐᓂ ᐅᖃᐅᓯᖃᕐᓂᕐᒥ ᐱᓕᕆᐊᖑᓂᐅᔪᒥ ᒪᓕᒃᑐᒥ ᑲᑎᒪᔨᒃᑯᑦ ᑲᑎᒪᓂᖓᓐᓂ.

ᑭᒡᒐᖅᑐᐃᔨᐅᔪᑦ ᐊᓯᖏᓐᓂ ᓇᐃᒡᓕᒋᐊᖅᓯᒪᔪᓂ ᓂᕈᐊᖅᑕᐅᓯᒪᔪᓂ ᓄᓇᓕᐅᔪᓂ ᐊᑐᐃᓐᓇᐅᓚᐅᙱᓚᑦ ᐅᖃᐅᓯᒃᓴᓕᐅᕐᓂᕐᒧᑦ ᐅᒃᑐᐱᕆ 10−ᒥ.

ᑐᙵᕕᖃᖅᑐᒥ ᐃᓄᐃᑦ ᑕᐱᕇᑦ ᑲᓇᑕᒥ ᑎᑎᕋᖅᑕᐅᒋᐊᕐᙳᕆᒻᒥ ᓇᐃᓈᖅᓯᒪᔪᒥ, ᓂᕈᐊᖅᓯᓂᐅᔪᒥ ᐃᓕᓐᓂᐊᕐᕕᓪᓗᐊᑕᖓᓂ ᓂᕆᐅᒋᔭᐅᕗᖅ 2025−ᒥ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐸᕐᓴᐃᓂᖓᓂ ᐱᒋᐊᕐᓗᓂ 2026−ᒥ. ᓯᓚᑦᑐᖅᓴᕐᕕᒡᔪᐊᖅ ᑐᕌᕋᓱᐊᖅᐳᖅ ᒪᑐᐃᓛᕐᓂᖓᓂ 2030−ᒥ, ᐃᒡᓗᖃᖅᑎᑦᑎᓗᓂ 100−ᐸᓗᖕᓂ ᐃᓕᓐᓂᐊᖅᑎᓂ ᐊᒻᒪ ᐃᖅᑲᓇᐃᔭᖅᑎᑦᑎᓗᑎᒃ 80−ᐸᓗᖕᓂ ᐃᖅᑲᓇᐃᔭᖅᑎᓂ.

ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ ᑕᑯᒃᓴᐅᑎᑦᑎᓂᐊᖅᐳᖅ 7−ᓂ ᐃᒡᓗᕐᔪᐊᓂ — ᐃᓚᖃᖅᑐᒥ ᐊᐅᓚᑕᐅᓂᖓᓂ, ᐃᓄᒃᑐᑦ, ᐃᓄᓕᕆᓂᕐᒥ ᐊᒻᒪ ᐃᓕᓐᓂᐊᖅᑐᓕᕆᓂᕐᒥ — ᐊᒻᒪ ᐃᑲᔪᖅᓯᖅᑕᐅᓂᐊᖅᐳᖅ ᐊᕕᒃᑐᖅᓯᒪᓂᐅᔪᓂ ᖃᐅᔨᒪᓂᕐᒧᑦ ᐱᓕᕆᕝᕕᓂᑦ ᓇᓗᓇᐃᖅᓯᓂᕐᒥ ᐊᑐᓂ ᐃᓄᐃᑦ ᐊᕕᒃᑐᖅᓯᒪᓂᐅᔪᓂ ᐃᓚᓕᐅᔾᔭᐅᓂᖏᓐᓂ ᐱᓕᕆᐊᖑᓂᐅᔪᓄᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᐅᖃᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᖅ ᐃᑲᔪᕐᓂᐊᖅᐳᖅ ᒥᒃᖠᒋᐊᖅᑎᑦᑎᓂᕐᒥ ᐊᒡᕕᐊᕈᑕᐅᔪᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᓂᐅᔪᒥ ᐃᓄᖕᓄᑦ ᖃᓂᓐᓂᖅᓴᐅᓂᖓᓂ ᐊᖏᕐᕋᒧᑦ ᐊᒻᒪ ᑐᙵᕕᖃᕐᓗᓂ ᐃᓄᐃᑦ ᓄᓇᕐᔪᐊᒥ ᑕᑯᓐᓇᕐᓂᐅᔪᓄᑦ.