ᐃᓄᐃᑦ ᑕᐱᕇᑦ ᑲᓇᑕᒥ ‘ᐱᓕᕆᕙᓪᓕᐊᓂᖃᖅᐳᖅ’ ᐃᓕᓐᓂᐊᕐᕕᓪᓗᐊᑕᕆᓂᐊᖅᑕᖓᓂ ᑐᓂᔭᐅᓂᐅᔪᓂ

For the English version of this story, please see ITK ‘working through’ submissions to host university main Arctic campus.

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᐅᓯᖃᕐᓂᐊᖅᐳᖅ ᖃᖓᒃᑲᓐᓂᐅᔪᒥ ᑕᒪᑐᒪᓂ ᐊᕐᕌᒎᔪᒥ ᓇᓕᐊᖕᓂ ᓄᓇᓕᐅᔪᑦ ᐱᓇᓱᐊᕐᓂᖏᓐᓂ ᑲᒪᒋᔭᖃᕐᓂᕐᒥ ᐃᓕᓐᓂᐊᕐᕕᓪᓗᐊᑕᕆᓂᐊᖅᑕᖓᓂ ᐸᕐᓇᒃᑕᐅᔪᒥ ᐃᓄᐃᑦ ᓄᓇᖓᓐᓂ ᓯᓚᑦᑐᖅᓴᕐᕕᒡᔪᐊᖓᓂ, ᓂᕈᐊᒋᔭᐅᔪᒥ ᒪᑐᐃᓛᕐᓂᖓᓂ 2030−ᒥ.

ᑲᓇᑕᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᖅ ᐱᒋᐊᖅᑎᑦᑎᓚᐅᖅᐳᖅ ᖃᐃᖁᔨᓂᐅᔪᒥ ᑐᒃᓯᕋᐅᑎᓂᒃ ᖃᖓᒃᑲᓐᓂᐅᔪᒥ ᓯᕗᓂᐊᓂ ᑕᒪᑐᒪᓂ ᐊᕐᕌᒎᔪᒥ ᓄᓇᓕᖕᓄᑦ ᐃᓄᕕᐊᓗᐃᑦ ᓄᓇᑖᖅᓯᒪᓂᕐᒧᑦ ᐊᕕᒃᑐᖅᓯᒪᓂᐅᔪᒥ, ᓄᓇᕗᒻᒥ, ᓄᓇᕕᖕᒥ ᐊᒻᒪ ᓄᓇᑦᓯᐊᕗᒻᒥ.

ᐱᔪᒪᔪᓂ ᓄᓇᓕᖕᓂ ᐊᐱᕆᔭᐅᓚᐅᖅᐳᑦ ᐱᔭᕇᖅᓯᓂᕐᒥ ᑭᓪᓕᓯᓂᐊᕐᓂᐅᔪᒥ ᓇᓗᓇᐃᖅᓯᔪᒥ ᓄᓇᖏᓐᓂ ᐊᑐᐃᓐᓇᐅᓂᖏᓐᓂ, ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐅᓯᑲᑦᑕᕐᓂᐅᔪᒥ ᐊᑐᐃᓐᓇᖃᕐᓂᕐᒥ ᐊᒻᒪ ᓄᓇᓕᖕᓂ ᐱᔨᑦᑎᕋᕐᓂᐅᔪᓂ, ᐊᒻᒪ ᐊᑦᑕᑕᖅᓯᒪᑦᑎᐊᖅᑐᒥ ᐃᑲᔪᖅᓱᐃᓂᐅᔪᒥ ᓄᓇᓕᖕᓂ ᕼᐋᒻᓚᒃᑯᓐᓂ ᑲᑎᒪᔨᐅᔪᓂ.

ᐊᐃᑉᕆᓕ 7−ᒥ ᑐᓂᓯᓂᐅᔪᒥ ᐃᓱᓕᕝᕕᒃᓴᖓᓂ ᐋᖅᑭᒃᑕᐅᔪᖃᓚᐅᖅᐳᖅ, ᐊᓱᐃᓛᒃ ᐅᖓᕙᕆᐊᖅᑕᐅᓪᓗᓂ ᐊᐃᑉᕆᓕ 17−ᒧᑦ.

ᑲᑐᔾᔨᖃᑎᒌᖑᔪᖅ “ᐱᓕᕆᓂᖃᖅᐸᓪᓕᐊᕗᖅ” ᑐᒃᓯᕋᐅᑕᐅᔪᓂ, ᐅᖃᓚᐅᖅᐳᖅ ᐸᑐᕆᓯᐊ ᑎ’ᓲᓴ, ᐃᓄᐃᑦ ᑕᐱᕇᑦ ᑲᓇᑕᒥ ᐋᔩᖃᑎᒌᖕᓂᕐᒧᑦ ᑐᑭᒧᐊᒃᑎᑦᑎᔨᖓ, ᒪᐃ 1−ᒥ ᖃᕋᓴᐅᔭᒃᑯᑦ ᑎᑎᕋᕐᓂᐅᔪᒥ.

ᑐᓴᒐᒃᓴᒃᑲᓐᓂᕐᓂ ᓴᖅᑭᑎᑕᐅᔪᖃᕐᓂᐊᖅᐳᖅ ᐅᑭᐊᒃᓵᒥ ᑭᖑᓂᐊᒍᑦ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᐅᔪᓂ ᕿᒥᕐᕈᓚᐅᖅᑎᓪᓗᒋᑦ ᑐᓂᔭᐅᓂᐅᔪᓂ. ᐅᑯᓇᙵᑦ ᑐᓂᔭᐅᓂᐅᔪᓂ, ᑎᓴᒪᓂ 6−ᓄᑦ ᓄᓇᓕᖕᓂ ᓂᕈᐊᖅᑕᐅᔪᖃᕐᓂᐊᖅᐳᖅ ᑐᓂᓯᓂᖏᓐᓂ ᑕᒪᒃᑭᐅᒪᔪᓂ ᑐᒃᓯᕋᐅᑕᐅᔪᓂ, ᐅᖃᐅᓯᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᐃᑭᐊᖅᑭᕕᖓᓐᓂ.

ᑎ’ᓲᓴ ᐅᖃᕈᒪᓚᐅᙱᓚᖅ ᓇᓕᐊᖕᓂ ᓄᓇᓕᐅᔪᑦ ᑐᒃᓯᕋᖅᓯᒪᓂᖏᓐᓂ.

ᑐᒃᓯᕋᖅᑕᐅᔪᖅ ᐃᒡᓗᕐᔪᐊᖅ ᐃᒡᓗᖃᖅᑎᑦᑎᓇᔭᖅᐳᖅ 100−ᓂ ᐃᓕᓐᓂᐊᖅᑎᓂ ᐊᒻᒪ ᐃᓚᖃᕐᓗᓂ 80−ᓂ ᐃᖅᑲᓇᐃᔭᖅᑎᓂ, 26,900-ᑭᑉᐹᕆᒃᑐᒥ-ᐃᓯᒐᓪᓗᐊᓂ ᐃᒡᓗᓪᓗᐊᑕᕆᓇᔭᖅᑕᖓᓂ ᐊᒻᒪ 21,500 ᑭᑉᐹᕆᒃᑐᒥ ᐃᓯᒐᓪᓗᐊᓂ ᑐᔪᕐᒥᕕᒃᓴᐅᓇᔭᖅᑐᒥ.

ᓄᕕᐱᕆᒥ ᐊᐱᖅᓱᖅᑕᐅᓂᐅᔪᒥ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᐅᖃᓚᐅᖅᐳᖅ ᐃᓄᐃᑦ ᓄᓇᖓᓐᓂ ᓯᓚᑦᑐᖅᓴᕐᕕᒡᔪᐊᖅ ᐃᑲᔪᕐᓂᐊᕐᓂᖓᓂ ᒥᒃᖠᒋᐊᖅᑎᑦᑎᓂᕐᒥ ᐊᒡᕕᐊᕈᑕᐅᔪᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᓂᐅᔪᒥ ᐃᓄᖕᓄᑦ ᖃᓂᓐᓂᖅᓴᐅᑎᑦᑎᓗᓂ ᐃᓕᓐᓂᐊᖅᑎᐅᑉ ᐊᖏᕐᕋᖓᓂ ᓄᓇᓕᖏᓐᓂ ᐊᒻᒪ ᕿᑎᐊᓃᓪᓗᓂ ᐃᓄᐃᑦ ᓄᓇᕐᔪᐊᒥ ᑕᑯᓂᕆᔭᖏᓐᓂ.

“ᓂᕆᐅᒃᐳᒍᑦ ᓴᖅᑭᑎᑦᑎᔪᓐᓇᕐᓂᐊᕐᓂᑦᑎᓐᓂ ᓯᓚᑦᑐᖅᓴᕐᕕᒡᔪᐊᒥᒃ ᐅᖓᕙᕆᐊᕐᓂᐅᔪᒥ ᐃᓄᐃᑦ ᐃᓅᖃᑎᒌᖑᔪᓄᑦ ᐊᒻᒪ ᐃᓚᐅᑎᑦᑎᓂᐊᖅᑐᒥ ᐃᓄᖕᓂ ᑕᒪᒃᑭᓂ ᐊᕕᒃᑐᖅᓯᒪᓂᐅᔪᓂ ᐅᕝᕙᓘᓐᓃᑦ ᑭᓇᑐᐃᓐᓇᒥᒃ ᐃᓚᐅᖃᑕᐅᔪᒪᔪᒥ ᓯᓚᑦᑐᖅᓴᕐᕕᒡᔪᐊᒥᒃ,” ᐆᐱᑦ ᐅᖃᓚᐅᖅᐳᖅ.

ᓯᓚᑦᑐᖅᓴᕐᕕᒡᔪᐊᖅ ᐃᑲᔪᖅᓯᖅᑕᐅᓂᐊᖅᐳᖅ ᐊᕕᒃᑐᖅᓯᒪᓂᐅᔪᓂ ᖃᐅᔨᒪᓂᐅᔪᓂ ᐱᓕᕆᕝᕕᓂᑦ, ᐅᕝᕙᓘᓐᓃᑦ ᖃᖓᑦᑕᖅᑎᑕᐅᓯᒪᔪᓂ ᐃᓕᓐᓂᐊᕐᕕᐅᔪᓂ ᐃᓄᐃᑦ ᓄᓇᖓᓐᓂ. ᑐᓂᓯᓂᐊᖅᐳᑦ ᓄᓇᓕᖕᓂ ᐱᓕᕆᐊᖑᓂᐅᔪᓂ ᐃᓂᐅᔪᓂ ᓲᕐᓗ ᑕᕆᐅᕐᒥ ᖃᐅᔨᓴᕐᓂᐅᔪᓂ, ᐃᕐᓂᓱᒃᓰᔨᐅᔪᓄᑦ ᐊᒻᒪ ᐃᓄᒃᑐᑦ ᐅᖃᐅᓯᕐᒥ ᑲᑎᙵᓂᖃᖅᑐᒥ.

ᐃᓕᓐᓂᐊᕐᕕᒃ ᐸᕐᓇᒃᐳᖅ ᐱᒋᐊᖅᑎᑦᑎᓂᐊᕐᓂᖓᓂ 7−ᖑᔪᓂ ᐃᒡᓗᖁᑕᐅᔪᓂ ᐃᓚᖃᖅᑐᒥ ᐊᐅᓚᑦᑎᓂᐅᔪᒥ, ᐃᓗᒃᑐᑦ, ᐃᓄᓕᕆᓂᕐᒥ, ᐊᒻᒪ ᐃᓕᓐᓂᐊᖅᑐᓕᕆᓂᕐᒥ, ᐅᖃᐅᓯᐅᓪᓗᓂ ᑎᑎᕋᖅᑕᐅᒋᐊᙵᕈᒻᒥ ᕿᒥᕐᕈᔭᐅᓂᖓᓂ. ᓯᕗᓪᓕᖅᐸᐅᔪᑦ ᐃᓕᓐᓂᐊᖅᑎᑦ ᑎᑭᑦᑐᒃᓴᐅᑕᐅᕗᑦ 2030−ᒥ.

ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓇᐃᖅᓯᓯᒪᙱᓚᑦ ᓇᓗᓇᐃᖅᑕᐅᓯᒪᔪᒥ ᐅᓪᓗᖓᓂ ᑲᑎᒪᔨᐅᔪᓂ ᓂᕈᐊᖅᓯᓂᐊᕐᓂᖏᓐᓂ ᐃᓂᒃᓴᐅᔪᒥ ᑲᒪᒋᔭᖃᕐᓂᐊᖅᑐᒥ ᐃᓕᓐᓂᐊᕐᕕᓪᓗᐊᑕᕆᓂᐊᖅᑕᖓᓂ.

“ᑐᓂᓯᒃᑲᓐᓂᕐᓂᐊᖅᐳᒍᑦ ᐅᓂᒃᑳᕆᓂᒃᑲᓐᓂᐅᔪᓂ ᐊᑐᐃᓐᓇᐅᓕᑐᐊᖅᐸᑕ,” ᑎ’ᓲᓴ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.