‘ᐃᓅᖃᑎᑦᑎᓐᓂ ᓂᕆᑎᑦᑎᓂᐅᖕᒪᓐ’: ᐊᖑᓇᓱᒃᑏᑦ ᐅᓄᕐᓂᕐᓴᓂ ᐱᔪᓐᓴᕐᓯᓂᐊᕐᓂᖏᓐᓂ ᓂᕆᐅᒃᑐᑦ
ᖃᐅᔨᓴᖅᑎᐅᔪᑦ ᓯᕗᓪᓕᕐᒥ ᐃᒪᓐᓇ ᐋᖅᑭᒃᓯᒋᐊᓚᐅᕐᑐᑦ ‘ᐅᔾᔨᕐᓱᕋᓱᒍᑎᖃᕆᐊᓚᐅᕐᑐᑦ’ ᑐᒃᑐᓂ ᐱᔭᐅᔪᓐᓇᖅᑐᓂᒃ, ᑭᓯᐊᓂᓕ ᐊᓯᔾᔨᖅᑕᐅᓚᐅᕐᑐᖅ ᐅᖃᖃᑎᖃᑲᑖᓪᓚᓚᐅᖅᖢᑎᒃ ᐊᖑᓇᓱᒃᑎᓄᑦ ᐊᒻᒪ ᒥᑭᒋᐊᖅᑎᓄᑦ ᑲᑐᔾᔨᖃᑎᒌᓄᑦ
ᑐᒃᑐᐃᑦ ᐅᓄᕐᓂᖏᑦ ᕿᑭᖅᑖᓗᒃᒥ ᐅᓄᕐᓯᕙᓪᓕᐊᖕᒪᑕ ᐅᓄᕈᓐᓃᑉᓯᒫᓪᓚᓚᐅᖅᖢᑎᒃ ᐊᕐᕌᒍᒐᓴᖕᓂ, ᖃᐅᔨᓴᖅᑏᑦ ᐅᖃᓚᐅᕐᑐᑦ. (ᐊᔾᔨᙳᐊᖁᑎᒋᔭᐅᔪᖅ)
For the English version of this story, please see ‘It’s feeding our people’: Caribou hunters eager for bigger harvest.
ᑭᙵᓂ ᐊᖑᓇᓱᒃᑎ ᑕᖅᑭᐊᓗᒃ ᓄᓇ ᓂᕆᐅᒃᑐᖅ ᑐᑐᒐᓱᒍᓐᓇᕐᓂᐊᕐᓂᖏᓐᓂᒃ ᐊᐅᔭᐅᔪᖅ.
ᐅᓇ ᐊᑯᓂᐊᓗᒃ ᓂᕆᐅᒋᔭᐅᓯᒪᔪᖅ. ᐊᕐᕌᒍᓂ ᖁᓕᓂ ᑐᒃᑐᐃᑦ ᐱᔭᐅᔪᓐᓇᕐᓂᖏᑦ ᐃᓱᖃᖅᑎᑕᐅᑲᑕᓚᐅᖅᑎᓪᓗᒋᑦ ᕿᑭᖅᑖᓗᒃᒥ, ᓄᓇᕗᒥᑦ ᒐᕙᒪᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᑕᒪᓐᓇ ᑕᖅᑭᖅ ᐱᒋᐊᓕᓵᕐᓯᒪᑎᓪᓗᒍ ᑐᒃᑐᑕᐅᔪᓐᓇᕐᓄᑦ ᐅᓄᕐᓯᑎᑕᐅᓂᐊᕐᓂᕋᖅᑕᐅᓪᓗᑎᒃ 6,000-ᓂ ᑐᒃᑐᒍᓐᓇᕐᓗᑎᒃ — ᖁᓖᕐᓱᖅᖢᓂ ᐅᓄᕐᓂᕐᓴᒻᒪᕇᑦ ᐅᕙᙵᑦ 550-ᓂ ᐊᕐᕌᓂ ᐱᔭᐅᔪᓐᓇᓚᐅᕐᑐᓂᒃ.
ᐅᓇ ᑐᑭᖃᕐᑐᖅ ᐊᒥᓱᑦ ᐃᓅᓱᖕᓂᕐᓴᐃᑦ ᑕᒫᓂ ᓄᓇᖃᖅᑐᑦ, ᐃᓚᖏᓪᓘᓐᓃᑦ ᑐᒃᑐᒐᓱᖃᑕᐅᓚᐅᕐᓯᒪᙱᖢᑎᒃ, ᐅᖃᕐᑐᖅ ᓄᓇ, ᐃᒃᓯᕙᐅᑕᕆᔭᐅᖕᒥᔪᖅ ᐊᐃᕕᖅ ᐊᖑᓇᓱᒃᑐᓕᕆᔨᓄᑦ ᐊᒻᒪ ᒥᑭᒋᐊᖅᑎᓄᑦ ᑲᑐᔾᔨᖃᑎᒌᓄᑦ, ᐅᕙᓂ ᑭᙵᓂᑦ.
“ᐅᓇ ᐱᐅᒻᒪᕆᒃᑐᖅ ᐊᖑᓇᓱᒃᑎᓄᑦ, ᐱᓗᐊᖅᑐᒥ ᐃᓅᓱᖕᓂᕐᓴᓄᑦ — ᐱᕈᓚᐅᙱᒻᒪᑕ, ᒫᓐᓇᓕ ᑕᐃᒪᐃᓐᓂᐊᓕᕐᑐᑦ,” ᐅᖃᕐᑐᖅ.
ᑖᒃᑯᐊ ᑲᑐᔾᔨᖃᑎᒌᑦ 750-ᓂ ᑐᒃᑐᒍᓐᓇᐅᑎᖃᖅᑐᑦ ᑐᓂᔭᐅᔪᒃᓴᓂ ᒫᓂ 1,400 ᐃᓄᖕᓄᑦ ᓄᓇᖃᖅᑐᓂ ᑕᕝᕙᓂ. ᐊᕐᕌᓂᓕ ᑲᑐᔾᔨᖃᑎᒌᑦ 58-ᓂ ᑐᒃᑐᒍᓐᓇᖅᑎᑦᑎᓚᐅᕐᓯᒪᔪᑦ.
“ᐅᓇ ᓄᓇᓕᖕᓄᑦ ᐱᐅᒻᒪᕆᒃᑐᖅ ᓲᖃᐃᒻᒪ ᐊᑯᓂᐊᓗᒃ ᓄᖅᑲᖓᑎᑦᑎᔾᔪᑎᐅᖕᒪᓐ,” ᓄᓇ ᐅᖃᕐᑐᖅ. “ᐃᓅᖃᑎᑦᑎᓐᓂ ᓂᕆᑎᑦᑎᓂᐅᖕᒪᓐ.”
ᑕᒪᑐᒪᓂ ᐊᕐᕌᒍᒥ ᑐᒃᑐᑕᐅᔪᓐᓇᖅᑐᑦ 12 ᐳᓴᓐᑎᒋᔭᐅᔪᑦ ᑐᒃᑐᐃᑦ ᐅᓄᕐᓂᕆᔭᖏᓐᓂ ᒫᓂ 49,000-ᓂ ᐱᔭᐅᔪᓐᓇᖅᑐᓂᒃ. ᑐᒃᑐᒐᓱᖕᓇᓚᐅᖅᑎᓐᓇᒍ ᐃᓚᖏᑦ ᑲᑎᒪᔨᐅᖃᑕᐅᔪᑦ ᓄᓇᕗᒥᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐃᓱᒫᓘᑎᖃᓚᐅᕐᑐᑦ ᐋᖅᑭᒃᑕᐅᓯᒪᓂᖓᓂ ᐊᕕᒃᑐᖅᓯᒪᓂᒃᑯᑦ, ᐅᖃᖅᖢᑎᒃ ᓴᖅᑭᑦᑎᔾᔪᑎᐅᓂᖓᓂ “ᐊᖏᓗᐊᕈᒥᓇᖅᑐᒥ ᐅᓗᕆᐊᓇᖅᑐᒦᓐᓇᔭᕆᐊᒃᓴᖏᑦ” ᑐᒃᑐᐃᑦ, ᑖᑯᐊᓗ ᐅᓄᕐᓯᕙᓪᓕᐊᓕᕐᑎᓪᓗᒋᑦ.
2015-ᒥ ᓄᖅᑲᖅᑎᑦᑎᓯᒪᓚᐅᑲᓚᐅᕐᓯᒪᖕᒪᑕ ᑐᒃᑐᒐᓱᖕᓂᕐᒥ ᕿᑭᖅᑖᓗᒃᒥ ᓯᕗᓂᐊᓂ ᐊᕐᕌᒍᒥ ᖃᐅᔨᓴᕐᓂᒃᑯᑦ ᖃᐅᔨᓚᐅᖅᑎᓪᓗᒋᑦ ᑐᒃᑐᐃᑦ ᒫᓃᑐᐃᓐᓇᕐᓂᖏᓐᓂᒃ 4,600-ᖏᓐᓂ.
ᓯᕗᓂᐊᒍᓪᓕ ᐃᓱᒪᒋᔭᐅᕙᓚᐅᕐᓯᒪᔪᑦ 1980-ᖏᓐᓂ ᒫᓃᓇᓱᒋᔭᐅᓪᓗᑎᒃ 100,000-ᓂ 150,000-ᓄ.
ᓄᓇ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᑐᒃᑐᐃᑦ ᓄᕐᕋᖅᑖᑲᐅᕐᑐᕐᓂᐊᕋᓱᒋᓪᓗᓂᒋᑦ ᐅᓄᕐᓯᕚᓪᓕᕐᓂᐊᕐᒪᑕ. ᐅᖃᖅᖢᓂ. ᐅᖃᖅᖢᓂ ᐅᓄᓗᐊᙱᑎᑕᐅᒍᑎ ᐱᐅᓂᕐᓴᐅᓇᔭᕐᓂᖓᓂ ᐋᓐᓂᐊᖅᑖᙱᓐᓂᕐᓴᐅᔾᔪᑎᐅᓗᓂ ᑐᒃᑐᓄᑦ.
ᐃᒪᓐᓇᓕ ᐃᓱᒪᓚᐅᕐᑐᑦ ᐅᑯᐊ ᖃᐅᔨᓴᖅᑏᑦ ᐊᕙᑎᓕᕆᔨᒃᑯᓐᓄᑦ ᐃᓱᒪᓕᐅᕆᓗᑎᒃ 5 ᐳᓴᓐᖏᓐᓂ ᑐᒃᑐᐃᑦ ᑐᒃᑐᒍᓐᓇᖅᑕᐅᑎᓪᓗᒋ ᐅᕙᓂ ᕿᑭᖅᑖᓗᒃᒥ ᑐᒃᑐᓂ ᑕᒪᑐᒪᓂ ᑐᒃᑐᒐᓱᖕᓇᒥ, ᐊᒻᒪᓗ ᐊᖑᓇᓱᒍᓐᓇᕐᓂᖏᑦ ᐃᓱᖃᖅᑎᑕᐅᓗᑎ ᒪᑯᓄᖓ ᐊᕐᓇᕐᓗᖕᓄᑦ ᓄᕐᕋᖏᓐᓄᓪᓗ.
ᐅᓇ ᐅᔾᔨᕈᓱᒐᓱᖕᓂᕐᒧᑦ ᐊᒻᒪ “ᐅᓗᕆᐊᓇᙱᑦᑐᒥ” ᑐᒃᓯᕋᐅᓯᐅᕋᓱᖕᓂᖅ, ᐅᖃᕐᑐᖅ ᑐᕆᑲᔅ ᒋᓯᖕ, ᑐᑭᒧᐊᖅᑎᑦᑎᔨ ᐆᒪᔪᓕᕆᓂᕐᒥ ᐊᐅᓚᑦᑎᔪᓂ ᓄᓇᕗᒥᑦ ᐊᕙᑎᓕᕆᔨᒃᑯᓐᓂ, ᑲᒪᒋᔭᖃᖅᖢᑎᒃ ᐅᓄᕐᓂᖏᓐᓂ ᖃᐅᔨᓴᖃᑦᑕᕐᓂᕐᒥᒃ.
ᑭᓯᐊᓂᓕ ᑖᓐᓇ ᐊᓯᙳᖅᑕᐅᓚᐅᕐᑐᖅ ᒐᕙᒪᒃᑯᑦ ᐱᓕᕆᔨᒻᒪᕆᖏᑦ ᐅᖃᖃᑎᖃᓚᐅᕐᑎᓪᓗᒋᑦ ᓄᓇᓕᖕᓂ ᐊᖑᓇᓱᒃᑐᓕᕆᔨᓂ ᕕᕝᕗᐊᕆᐅᑎᓪᓗᒍ.
“ᐊᖑᓇᓱᒃᑐᓕᕆᔨᒃᑯᑦ ᐅᓗᕆᐊᓇᕐᓂᕐᓴᒦᑎᑦᑎᑐᐃᓐᓇᕆᐊᖃᕐᑐᑦ,” ᒋᓯᖕ ᐊᐱᕐᓱᖅᑕᐅᑎᓪᓗᒍ ᐅᖃᓚᐅᕐᑐᖅ.
ᒋᓯᖕ ᕿᑭᖅᑖᓗᒃᒥᓐ ᑐᒃᑐᐃᑦ ᐅᓄᕐᓯᕚᓪᓕᕐᓂᖏᑦ ᐱᓕᕆᖃᑎᒌᖕᓂᒃᑰᕐᓂᕋᖅᑕᖓ ᐅᑯᓄᖓ ᒐᕙᒪᒃᑯᓐᓄᑦ, ᖃᐅᔨᓴᖅᑎᓄᑦ, ᐊᒻᒪᓗ ᓄᓇᓕᖕᓂ ᐊᖑᓇᓱᒃᑐᓕᕆᔨᓄᑦ ᑖᒃᑯᐊᓗ ᐱᔪᐅᔪᓐᓇᖅᑎᑕᐅᔪᓂᒃ ᒪᓕᖃᑦᑕᐃᓐᓇᖅᖢᑎᒃ.
ᑐᒃᑐᐃᑦ ᐅᓄᕐᓂᖏᑦ ᐅᓄᕈᓐᓃᖅᐹᓪᓕᕋᔭᕐᓂᖏᑦ “ᐊᑦᑎᒃᑐᒦᓪᓚᕆᒃᑐᖅ,” ᒋᓯᖕ ᐅᖃᕐᑐᖅ.
ᐊᕐᕌᒎᓕᕐᑐᓂᒃ ᖁᓕᓂ ᑐᒃᑐᐃᑦ ᐅᓄᕐᓂᖏᑦ ᕿᑭᖅᑖᓗᒃᒥ ᐅᓄᕐᓯᒋᐊᖃᑦᑕᖅᓯᒪᔪᑦ 25 ᐳᓴᓐᑎᒥ ᐊᕐᕌᒍᑕᒪᓐ, ᑖᓐᓇᓗ ᓱᒃᑲᓐᓂᕐᓴᐅᓪᓗᓂ ᐊᓯᖏᓐᓃᑦᑐᓂ ᑐᒃᑐᓂ.
ᒋᓯᖕ ᐅᖃᓚᐅᕐᑐᖅ ᐅᓄᙱᓐᓂᖏᑦ ᓂᕐᔪᑏᑦ ᑐᒃᑐᒐᓱᒃᐸᒃᑐᑦ ᐊᒻᒪᓗ ᑎᖏᐅᔭᐃᑦ ᐱᕈᖅᐹᓪᓕᕐᓂᖏᓐᓄᑦ ᑐᒃᑐᓄᑦ ᓂᕆᔭᐅᕙᒃᑐᐃᑦ ᐅᓄᕐᓯᕚᓪᓕᕈᑎᒋᔭᐅᔪᒃᓴᐅᔪᖅ. ᑐᒃᑐᐃᑦ ᐅᓄᕐᓂᖏᑦ ᑲᑕᒃᐹᓪᓕᕐᓯᒪᓚᐅᕐᓯᒪᖕᒪᑕ 2014-ᒥ ᓲᖃᐃᒻᒪ ᑐᒃᑐᐃᑦ ᓂᕆᕙᒃᑕᖏᓐᓂ ᓄᖒᑦᑎᓯᒪᓗᐊᕐᓂᖏᓐᓄᑦ.
“ᓄᖑᑎᑦᑎᕚᓪᓕᖃᑦᑕᕐᒪᑕ ᑎᖏᐅᔭᕐᓂ ᓂᕿᒋᒐᒥᒡᔪᒃ, ᐱᓗᐊᖅᑐᒥᓐ ᐅᑭᐅᒃᑯᑦ, ᐊᒻᒪᓗ ᑖᒃᑯᐊ ᐱᕈᖅᐸᓪᓕᐊᖃᑦᑕᖅᖢᑎᒃ ᓱᒃᑲᐃᑦᑐᒻᒪᕆᐊᓗᖕᓂ,” ᒋᓯᖕ ᐅᖃᕐᑐᖅ.
“ᓄᓇᓖᓪᓕ ᐱᔪᒪᖕᒪᑕ ᓴᐳᔾᔨᓯᒪᓗᑎᒃ ᑖᒃᑯᓂᖓ ᑐᒃᑐᐃᑦ ᐃᓂᒋᕙᒃᑕᖏᓐᓂ ᐊᒻᒪᓗ ᐅᓄᕐᓯᑎᑦᑎᓗᐊᖅᑕᐃᓕᒪᓗᑎᒃ ᑐᒃᑐᓂ ᑕᐃᒪᓐᓇᓗ ᑐᒃᑐᑲᑕᓗᐊᓕᕐᐸᑕ ᐃᒡᓗᖃᕈᓐᓃᑐᐃᓐᓇᕆᐊᖃᕋᔭᖅᖢᑎᒃ ᐊᒻᒪ ᐊᖏᕐᕋᖃᕈᓐᓃᕐᓗᑎᒃ.”
ᐅᖃᖅᖢᓂ ᖃᐅᔨᓴᖅᑏᑦ ᑲᔪᓯᓂᐊᕐᓂᕋᖅᖢᓂᒋᑦ ᖃᐅᔨᓴᖃᑦᑕᕐᓂᕐᒥ ᐅᓄᕐᓂᕆᔭᐅᔪᓂᒃ ᐊᒻᒪ ᖃᓄᐃᙱᒃᑲᓗᐊᕐᒪᖔᑕ ᐋᓐᓂᐊᖃᖅᑕᐃᓕᓂᒃᑯᑦ ᕿᑭᖅᑖᓗᒃᒥ. ᓴᐳᔾᔨᓯᒪᓂᕐᒧᑦ ᐃᓱᒫᓘᑎᖃᓕᖅᐸᑕ ᓯᕗᓂᑦᑎᓐᓂ, ᒋᓯᖕ ᐅᖃᕐᑐᖅ ᐅᓄᕈᓐᓃᖅᑎᑕᐅᕚᓪᓕᖅᑎᑦᑎᔪᓐᓇᕐᓗᑎᒃ ᐱᔭᐅᔪᓐᓇᖅᑐᓂᒃ.
ᑐᒃᑐᐃᑦ ᐱᔭᐅᔪᓐᓇᕐᓂᖏᑦᑕ ᐅᓄᕐᓂᖏᑦ ᒪᓕᒃᑕᐅᓯᒪᓂᐊᖅᑐᖅ ᑎᑭᓪᓗᒍ ᔫᓂ 30, 2027.
This is pretty much their life’s here in Nunavut. Inuit hunts eats only caribou without employment just food from the land for safety food security reasons.