ᐃᖃᓗᖕᓂ ᐃᓐᓇᑐᖃᖅ ᑲᑎᒪᔨᓂ ᖃᓄᐃᓕᐅᖁᔨᔪᖅ ᓇᓂᑐᐃᓐᓇ ᐃᒥᐊᓗᖃᑦᑕᓗᐊᕐᓂᕐᒥ

For the English version of this story, please see ‘It’s like Las Vegas’: Iqaluit elder urges council to act on public drinking.

ᐃᖃᓗᖕᓂ ᐃᓐᓇᑐᖃᖅ ᓄᓇᓕᐸᐅᔭᓄᑦ ᑲᑎᒪᔨᓂ ᐱᓕᕆᐊᖃᖁᔨᔪᖅ ᑕᒫᓂᒥᐊᖅ ᐃᒥᖃᑦᑕᓗᐊᕐᓂᕐᒥᒃ — ᐅᓇ ᐱᐅᔪᓐᓃᖅᐹᓪᓕᕐᓂᕋᖅᑕᖓ ᑕᐃᒪᙵᑦ ᓄᓇᓕᐸᐅᔭᐃᑦ ᐱᐊᓂ ᐊᒻᒪ ᕗᐊᐃᓂᓂ ᓂᐅᕕᖃᓕᓚᐅᖅᓯᒪᑎᓪᓗᒍ 2017-ᒥ.

ᓘ ᕕᓕᑉ, ᐃᓕᓐᓂᐊᖅᑎᑦᑎᕙᒃᑐᖅ ᐊᒻᒪᓗ ᐸᓖᓯᐅᓂᑯ, ᐊᐱᕆᓚᐅᕐᑐᖅ ᑲᑎᒪᔨᓄ ᔭᓄᐊᕆ 23-ᒥ ᑲᑎᒪᑎᓪᓗᒋᑦ ᓂᐅᕕᖅᑕᐅᔪᓐᓇᖅᑐᑦ ᐅᓄᕐᓂᖏᓐᓂᒃ ᐊᓯᔾᔨᖅᓯᖁᔨᓪᓗᓂ ᐃᒥᐊᓗᒃᑖᕐᕕᒃᒥ.

ᒫᓐᓇᓕ ᓂᐅᕕᕈᓐᓇᖅᑎᑕᐅᔪᒃ ᑎᑭᓪᓗᒍ 24-ᓂ ᐱᐊᓂ ᐊᒻᒪ ᐃᒥᐊᓗᖕᓂ ᐅᓪᓗᕐᒧᑦ.

ᐃᓄᒃᑎᑐᑦ ᐅᖃᓪᓚᒃᖢᓂ ᐅᖃᓚᐅᕐᑐᖅ ᐃᓐᓇᑐᖃᐃᑦ ᐊᒻᒪ ᓱᕈᓰᑦ ᑕᒪᑐᒧᖓ ᐋᓐᓂᓗᐊᖃᑦᑕᕐᒪᑕ ᐃᒥᐊᓗᒃᒧᑦ ᖃᓄᐃᓕᐅᕈᑎᓄᑦ ᓄᓇᓕᖕᓂ.

“ᓲᕐᓗᓕ ᓚᔅ ᕖᒐᔅᑎᑑᓕᕐᑐᖅ,” ᕕᓕᑉ ᐅᖃᕐᑐᖅ, ᐅᖃᐅᓯᖃᖅᑎᓪᓗᒍ ᑕᑯᖃᑦᑕᖅᑕᖏᓐᓂᒃ ᐃᓄᖕᓂ ᐃᓄᒋᐊᓃᑦᑐᓂ ᐃᖃᓗᖕᓂ.

“ᐃᓐᓇᑐᖃᕗᑦ ᑲᑉᐱᐊᓱᖃᑦᑕᕐᒪᑕ ᐃᒥᐊᓗᖃᑦᑕᕐᑐᓂ ᖃᐅᑕᒫᑦ ᐅᓐᓄᓕᒫᒧᑦ.”

ᕕᓕᑉ ᐅᖃᐅᓯᖃᓚᐅᕐᒥᔪᖅ ᑲᖏᖅᖠᓂᖅᒥ ᓯᑎᐱᕆᐅᑎᓪᓗᒍ ᓂᐅᕕᖅᑕᐅᔪᓐᓇᖅᑐᓂ ᐋᖅᑭᒃᓯᓚᐅᕐᓯᒪᓂᖏᓐᓂᒃ  12-ᓂ ᐅᓪᓗᕐᒧᑦ.

“ᐃᒥᐊᓗᒃᒥ ᓂᐅᕕᕋᓱᖕᓂᖅ ᐅᐊᑲᓪᓚᓗᐊᖑᖕᒪᑦ, ᑕᐃᒪᓕ ᐱᔭᐅᔪᓐᓇᖅᑐᑦ ᐅᓄᕈᓐᓃᖅᐹᓪᓕᖅᑎᑕᐅᔪᓐᓇᖅᑐᖃᐃ. ᖃᐅᔨᒪᔪᖓ ᒐᕙᒪᒃᑯᑦ ᐱᓕᕆᔨᖏᓐᓄᑦ ᐅᖃᓪᓚᒍᓐᓇᖅᑐᓯ,” ᐅᖃᓚᐅᕐᑐᖅ ᑲᑎᒪᔨᓄᑦ.

ᑲᑎᒪᔩ ᐅᓄᕈᓘᔭᕐᑐᑦ ᑕᐃᒪᓐᓇᑦᑕᐅᖅ ᐃᓱᒫᓘᑎᖃᓚᐅᕐᒥᔪᑦ.

ᒪᐃᔭ ᓵᓚᒪᓐ ᐊᕙ ᐅᖃᓚᐅᕐᑐᖅ ᑕᒪᑐᒥᖓ ᐅᔾᔨᕆᔭᖃᕐᓂᕋᖅᖢᓂ ᐊᒻᒪᓗ ᑲᑎᒪᔨᓄᑦ ᐅᖃᐅᓯᐅᔭᕆᐊᖃᕐᓂᕋᖅᖢᓂᐅᒃ.

ᑲᑎᒪᔨ ᕼᐃᐅᕆ ᕕᓕᐅᕋᑎ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᐅᔪᑦ ᕿᑭᖅᑖᓗᒃ ᒑᓴᓖᖅᑖᕐᕕᒃᒥ ᐱᑦᑎᐊᖃᑦᑕᙱᓯᒪᔪᑦ ᐋᖓᔮᖅᑐᑦ. ᕕᓕᐅᕋᑎ ᐊᖓᔪᖅᑳᕆᔭᐅᖕᒪᑦ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ, ᓇᖕᒥᓂᖃᖅᑎᓄᑦ ᒑᓚᓖᖅᑖᕐᕕᒃᒥᑦ.

ᐅᖃᓚᐅᕐᑐᖅ ᐃᓱᒪᓂᕋᖅᖢᓂ 2 ᐳᓴᓐᑎᑐᐃᓐᓇᖏ ᐃᖃᓗᖕᓂ ᓄᓇᖃᖅᑐᓂ ᓈᒻᒪᙱᓕᐅᕈᑎᖃᖅᑎᑦᑎᕙᖕᓂᖏᓐᓂᒃ.

ᑕᐃᒪᓐᓇᐅᒐᓗᐊᖅᑎᓪᓗᒍ ᐅᖃᓚᐅᕐᑐᖅ ᑲᑎᒪᔩ ᕕᓕᑉ ᐅᖃᐅᓯᖓᓂ ᐱᓕᕆᐊᖃᕆᐊᖃᕐᓂᖏᓐᓂᒃ ᐋᖅᑭᒋᐊᕈᑎᐅᓂᐊᖅᑐᓂᒃ.

“ᐊᕐᕌᒍᑦ 7-ᑐᐃᓐᓇᐅᓕᕐᑐᑦ ᐊᒻᒪᓗ ᑐᓴᖃᑦᑕᖅᖢᑕ ᓈᒻᒪᙱᔾᔪᑎᒋᔭᐅᕙᒃᑐᓂᒃ ᐃᓄᒋᐊᓂ, ᐅᕙᓂᓗ ᑲᑎᒪᕝᕕᑦᑎᓐᓂᒃ, ᒪᓕᒐᓕᕆᕕᒡᔪᐊᕐᒥ, ᑭᓯᐊᓂᓕ ᐅᐃᔾᔮᑐᐃᓐᓇᖂᔨᒐᑦᑕ,” ᕕᓕᐅᕋᑎ ᐅᖃᕐᑐᖅ.

“ᑕᒪᑐᒧᖓ ᑲᒪᒋᔭᖃᖅᑐᖃᙱᒻᒪᑦ… ᐃᓱᒪᔪᖓᓕ ᓄᓇᓕᐸᐅᔭᓄᑦ ᑲᑎᒪᔨᐅᓪᓗᑕ ᐱᐅᓂᕐᓴᒃᑯᑦ ᐱᓕᕆᐊᖃᕋᔭᖅᑐᒍ ᐊᒻᒪᓗ ᐱᐅᓂᕐᓴᒃᑰᖅᑎᑦᑎᔭᕆᐊᖃᖅᖢᑕ.”

ᐊᕐᕌᒍᒐᓴᐅᓕᕐᑐᓂ ᐱᓕᕆᔨᒻᒪᕆᐅᔪᑦ ᐃᓱᒫᓘᑎᖃᕐᓯᒪᔪᑦ ᐃᖃᓗᐃᑦ ᐱᐊᓂ ᐊᒻᒪ ᕗᐊᐃᓐᓂ ᓂᐅᕕᕐᕕᐅᑉ ᒥᒃᓵᓄᑦ.

ᒪᐃᔭᐅᓚᐅᕐᓯᒪᔪᖅ ᑭᐊᓂ ᐱᐊᓪ ᒪᑐᔭᐅᖁᔨᓚᐅᕐᓯᒪᔪᖅ 2022-ᒥ, ᑭᓯᐊᓂᓕ ᓄᓇᕗᒥᑦ ᒐᕙᒪᒃᑯᑦ ᐅᖃᓚᐅᕐᓯᒪᖕᒪᑕ ᑕᒪᓐᓇ ᐋᖅᑭᒍᑎᐅᓇᓱᖕᓂᑯ ᓂᐅᕕᐊᒃᓴᖃᔭᑦᑐᓂᒃ ᓄᖃᖅᑎᑦᑎᒐᓱᖕᓂᕐᒨᕐᓂᑰᓂᖓᓂ.

ᐊᐅᔭᐅᓚᐅᕐᑐᖅ ᐸᓖᓯᒃᑯᑦ ᓄᓇᖃᖅᑐᓂ ᐅᔾᔨᕈᓱᖁᔨᓚᐅᕐᓯᒪᔪᑦ ᑎᒡᓕᖃᑦᑕᖅᑐᓂ ᐃᒥᐊᓗᒃᑖᕐᕕᐅᑉ ᖃᓂᒋᔭᖓᓃᑦᑐᓂᒃ. ᑕᒪᒃᑯ ᖃᓄᐃᓕᐅᕈᑎᐅᓂᑯᑦ ᑕᒫᓂ ᓴᐳᓐᓂᐊᖅᑎᖃᖅᑎᑦᑎᓕᓚᐅᕐᓯᒪᔪᑦ ᖃᐅᔨᓴᖃᑦᑕᕐᓂᐊᖅᑐᓂᒃ.

ᐅᓇ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᓚᐃᑦᓯᑑᓐ, ᑕᒫᓃᑦᑐᓂᒡᓗ ᓄᓇᒥ ᑭᒡᒐᖅᑐᐃᓪᓗᓂ ᓂᐅᕕᕐᕕᒃ ᐃᓚᐅᓪᓗᓂ ᐅᖃᓚᐅᕐᓯᒪᔪᖅ ᒪᓕᒐᓕᕆᕝᕕᒃ ᐱᓕᕆᐊᕆᔭᐅᖁᓪᓗᓂᐅᒃ ᐃᓄᒋᐊᓂ ᐋᖓᔮᖃᑦᑕᓗᐊᖃᑦᑕᖅᑐᑦ.

ᒫᓂ 55 ᐳᓴᓐᑎᖏ ᐃᖃᓗᐃ ᐸᓖᓯᓄᑦ ᐅᖃᐅᓯᐅᓯᒪᔪᑦ ᐃᒥᐊᓗᖕᒨᖓᓚᐅᕐᓯᒪᔪᐃᑦ, ᐅᖃᕐᓯᒪᓚᐅᕐᑐᖅ ᑕᕿᖅᒧᑦ ᐅᓂᒃᑳᓕᐊᖏᑦ ᐸᓖᓯᒃᑯᓐᓄᑦ ᐊᖓᔪᖅᑳᒧᑦ ᑎᐅᕈᓪ ᒋᐅᓪᒧᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᑐᓂᔭᕕᓂᖏᓐᓂᒃ ᑲᑎᒪᑎᓪᓗᒋᑦ.