ᐃᕗᔾᔨᕕᖕᒥ ᐃᓕᓐᓂᐊᖅᑎᓂ ᓇᓂᓯᕗᑦ ᖃᐅᔨᓴᕐᓂᕐᒥ ᑰᑉ ᐃᖅᑲᖓᓂ

For the English version of this story, please see Ivujivik students find science in the riverbanks.

ᒪᕐᕉᖕᓄᑦ ᖁᑦᑎᖕᓂᓕᖕᓂ 6−ᒥ ᐃᓕᓐᓂᐊᖅᑎᓂᑦ ᐃᕗᔾᔨᕕᖕᒥ, ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᐱᕕᒃᓴᖃᕐᓂᐅᕗᖅ ᐋᖅᑭᒃᓱᐃᓂᖓᓂ ᖃᐅᔨᔪᒪᓂᕐᔪᐊᖓᓐᓂ — ᐃᓛᓪᓚᕆᒃ.

ᓯᐊᓯ ᐊᐃᓇᓕᒃ ᐊᒻᒪ ᓵᓂᓐ ᐅᓱᐊᕐᔪᒃ ᖃᐅᔨᔪᒪᓚᐅᖅᐳᑦ ᔭᕐᕋᐅᔭᖃᕐᒪᖔᑦ ᓄᓇᓕᖓᓐᓂ. ᑕᐃᒫᒃ ᖃᐅᔨᒋᐊᓚᐅᖅᐳᑦ, ᐅᖃᖃᑎᖃᖅᖢᑎᒃ ᓄᓇᓕᖕᒥᐅᑕᓂ, ᐊᒻᒪ ᓇᓂᓯᓚᐅᖅᐳᑦ ᖃᑯᖅᑕᒥ ᔭᕐᕋᐅᔭᓂ ᑰᑉ ᖃᓂᒋᔭᖓᓂ.

“ᓯᐅᕋᐅᖅᑰᔨᑐᐃᓐᓇᓚᐅᖅᑐᖅ,” ᐅᖃᓚᐅᖅᐳᖅ ᐊᐃᓇᓕᒃ. “ᐅᔭᖅᑲᖏᑦ ᐲᕙᕆᐊᖃᑐᐃᓐᓇᓚᐅᖅᑕᕗᑦ, ᐃᒪᐃᔭᕐᓗᒍ, ᐊᒻᒪ ᐃᓕᓗᒍ ᐊᑭᓯᐅᑉ ᐴᖓᓄᑦ [ᓱᕈᐃᔭᐃᓂᕐᒥ].”

ᐅᓇ ᐱᓕᕆᐊᒃᓴᖅ ᓴᓇᔭᐅᓚᐅᖅᐳᖅ ᐃᕗᔾᔨᕕᖕᒥ ᒪᕐᕉᔪᓂ ᓯᐊᓯ ᐊᐃᓇᓕᖕᒥ ᐊᒻᒪ ᓵᓂᓐ ᐅᓱᐊᕐᔪᒃ. ᑲᑎᖅᓱᐃᓚᐅᖅᐳᑦ ᖃᑯᖅᑕᒥ ᔭᕐᕋᐅᔭᓂ ᖃᓂᑦᑐᒥ ᑰᖕᒥ ᐃᕗᔾᔨᕕᖕᒥ, ᓱᕈᐃᔭᖅᑕᐅᓪᓗᓂ ᐊᒻᒪ ᐊᒥᐊᒃᑯᖓᓂ ᓴᓇᙳᐊᒐᓕᐅᖅᐳᑦ. (ᐊᔾᔨᓕᐅᖅᑕᐅᔪᖅ ᑲᑎᕕᒃ ᖏᓕᓴᕐᓂᓕᕆᓂᖅ/ ᔭᐃᑦ ᐳᕐᓇᐃᒧᑦ)

ᐃᒃᓯᓐᓇᓚᐅᖅᐸᖓ ᐃᑲᕐᕋᓄᑦ 48−ᓄᑦ ᑯᑐᒃᑎᑦᑎᓂᖓᓂ ᐃᒪᖓᓂ ᐃᓗᐊᓂ, ᐋᖅᑭᒃᓱᐃᓪᓗᑎᒃ  ᐃᓗᓕᖏᓐᓂᑦ ᐊᓗᒡᕕᓄᑦ ᐊᒻᒪ ᐆᒻᒪᑎᓄᑦ, ᐊᒻᒪ ᐆᑦᑎᓪᓗᒋᑦ.

ᐃᓱᐊᓂ ᖃᓄᐃᓕᖓᓂᖓᓂ ᐋᖅᑭᒃᓱᐃᓚᐅᖅᐳᖅ ᐃᑲᔪᖅᓱᐃᓂᖓᓂ 25−ᖓᓂ ᓴᓇᓯᒪᓂᐅᔪᒥ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ, ᑲᒪᒋᔭᐅᔪᒥ ᑕᒪᑐᒪᓂ ᐊᕐᕌᒎᔪᒥ ᑰᔾᔪᐊᒡᕋᐱᖕᒥ/ᐅᐊᑉᒪᒎᔅᑐᐃᓄᑦ.

ᒪᕐᕉᒃ ᐃᓕᓐᓂᐊᖅᑎᑦ ᐱᓕᕆᓚᐅᖅᐳᑦ ᑕᖅᑭᐸᓗᖕᓂ ᑎᓴᒪᓂ ᐱᓕᕆᓪᓗᑎᒃ ᐱᓕᕆᐊᒃᓴᒥᓂᑦ ᐆᒧᖓ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ.

ᐅᖃᓚᐅᖅᐳᖅ ᑕᑯᓂᕐᒥ ᑕᒪᒃᑭᓂ ᐊᓯᖏᓐᓂ ᐃᓚᐅᖃᑕᐅᔪᓂ ᐊᒻᒪ ᐱᓕᕆᐊᕆᔭᖏᓐᓂ ᑲᔪᖏᖅᓴᐃᓯᒪᕗᖅ ᐃᒻᒥᖕᓂᑦ ᐱᓕᕆᒃᑲᓐᓂᕐᓂᕐᒧᑦ ᖃᐅᔨᓴᕐᓂᕐᒧᑦ, ᐱᖢᐊᖅᑐᒥ ᖁᕝᕙᖅᑎᑕᐅᕙᒃᑐᓂ ᐊᒻᒪ ᖃᖓᑦᑕᖅᑎᑕᐅᕙᒃᑐᓂ.

ᑐᕌᒐᒃᓴᖓ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ, ᐋᖅᑭᒃᓱᖅᑕᐅᔪᒥ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒥ ᐊᒻᒪ ᑎᑎᕋᐅᔭᕐᓂᕐᒥ ᑲᑐᔾᔨᖃᑎᒌᖑᔪᓂ, ᑲᑎᑎᕆᓂᕐᒧᑦ ᐃᓕᓐᓂᐊᖅᑎᓂ ᑕᒪᒃᑭᓂ 11−ᓂ ᓄᓇᖃᖅᑳᖅᓯᒪᔪᓄᑦ ᑲᑎᙵᓂᐅᔪᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐊᑕᐅᓯᐅᔪᒥ ᐃᒡᓗᒥᒃ ᐅᖃᐅᓯᖃᕐᓂᕐᒥ ᐃᓕᖅᑯᓯᖓᓐᓂ ᐊᒻᒪ ᖃᐅᔨᒪᓂᖏᓐᓂ ᖃᐅᔨᓴᕐᓂᒃᑯᑦ.

ᑕᒪᑐᒪᓂ ᐊᕐᕌᒎᔪᒥ, 80−ᐸᓗᖕᓂ ᐃᓚᐅᔪᖃᓚᐅᖅᐳᖅ.

“ᐊᒥᓱᓂ ᐱᓕᕆᐊᒃᓴᐅᔪᓂ ᑕᐅᑐᒃᑕᑐᐊᖃᑲᐃᓐᓇᓚᐅᖅᐳᖅ ᐃᓕᖅᑯᓯᒥ ᐃᑦᑕᕐᓂᓴᓂ,” ᐅᖃᓚᐅᖅᐳᖅ ᒫᒃ ᓚᓛᓐᑦ, ᐊᖓᔪᖅᑳᖑᔪᖅ ᑲᑐᔾᔨᖃᑎᒌᖑᔪᒥ, ᐅᐃᕖᑎᑐᑦ ᐊᐱᖅᓱᖅᑕᐅᓂᐅᔪᒥ.

“ᐅᐱᒍᓱᒃᐳᑦ ᓇᑭᙶᕐᓂᖏᓐᓂ ᐊᒻᒪ ᐱᕈᖅᓴᐅᓂᖏᓐᓂ ᐃᒻᒥᓂᒃ ᐅᒃᐱᕈᓱᖕᓂᖏᓐᓂ ᐆᒥᖓ ᖃᓄᐃᓐᓂᐅᔪᒥ.”

ᑕᒪᑐᒪᓂ ᐊᕐᕌᒎᔪᒥ, ᑕᒪᒃᑭᑦ ᐄᔫ ᐃᔅᑎ ᐃᓕᓐᓂᐊᕐᕕᖕᒥ ᑲᑎᒪᔨᐅᔪᑦ ᐊᒻᒪ ᑲᑎᕕᖕᒥ ᐃᔨᓴᕐᓂᓕᕆᓂᖅ ᐃᑲᔪᓚᐅᖅᐳᑦ ᐋᖅᑭᒃᓱᐃᓂᕐᒥ ᖃᓄᐃᓐᓂᐅᔪᒥ ᐃᓕᓐᓂᐊᖅᑎᓂᑦ ᐸᖅᑭᔭᐅᓪᓗᑎᒃ ᐃᓚᒌᖑᔪᓂ ᑕᒪᒃᑭᓂ ᑰᔾᔪᐊᒡᕋᐱᖕᒥ ᐊᒻᒪ ᐅᐊᑉᒪᒍᔅᑐᐃᒥ.

ᒪᕐᕉᖕᓂ ᓄᓇᕕᖕᒥ ᐃᓕᓐᓂᐊᕐᕕᐅᔪᓂ ᐃᓚᐅᖃᑕᐅᓚᐅᖅᐳᑦ — ᑰᔾᔪᐊᒡᕋᐱᖕᒥ ᐊᒻᒪ ᐃᕗᔾᔨᕕᖕᒥ. ᓴᓪᓗᐃᑦ ᓂᕆᐅᒋᔭᐅᓚᐅᖅᐳᑦ ᐃᓚᐅᖃᑕᐅᓂᕐᒥ, ᑭᓯᐊᓂ ᓯᓚᒧᑦ ᐊᔪᕐᓇᖅᑎᑦᑎᓚᐅᖅᐳᖅ ᐃᓕᓐᓂᐊᖅᑎᓂ ᑕᐃᑯᖓ ᖃᖓᑕᓂᕐᒧᑦ ᓈᒻᒪᖅᑯᑦᑐᒥ.

ᓚᓛᓐᑦ ᐅᖃᓚᐅᖅᐳᖅ ᐊᔪᕐᓇᖅᑐᑯᓘᙱᓚᖅ ᒪᒃᑯᒃᑐᓄᑦ ᐅᑭᐅᖅᑕᖅᑐᒥ ᓄᓇᓕᐅᔪᓂ ᐱᓕᕆᓪᓚᕆᖕᓂᖏᓐᓂ ᖃᐅᔨᓴᕐᓂᕐᒧᑦ ᐅᑭᐅᖅᑯᖅᑐᓗᐊᙱᑎᓪᓗᒋᑦ ᐱᔾᔪᑎᖃᖅᑐᒥ ᖁᑦᑎᒃᑐᒥ ᐃᓕᓴᐃᔨᓄᑦ ᓴᖑᕙᓪᓕᐊᖏᓐᓇᐅᔭᖅᑐᓂ ᐊᕕᒃᑐᖅᓯᒪᓂᐅᔪᒥ.

“ᓯᕗᓕᐅᖅᑎᖃᕆᐊᖃᖅᐳᑦ ᐃᓕᓐᓂᐊᕐᕕᖕᒥ ᑲᑎᒪᔨᐅᔪᓂ ᐊᒻᒪ ᓄᓇᖏᓐᓂ ᐅᖃᐅᔾᔨᔪᒥ ᒪᒃᑯᒃᑐᓂ ᐱᒻᒪᕆᐅᓂᖓᓂ,” ᐅᖃᓚᐅᖅᐳᖅ.

ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᐱᓕᕆᓂᖃᓚᐅᖅᐳᖅ ᐅᓪᓗᓂ ᒪᕐᕉᖕᓂ, ᒫᔾᔨ 19−ᒥ 20−ᒧᑦ. ᖄᒃᑲᓐᓂᐊᒍᑦ ᓱᕈᓯᕐᓂ ᐃᓚᐅᖃᑕᐅᓂᖏᓐᓂ ᐃᓕᖅᑯᓯᒧᑦ ᖃᓄᐃᓕᐅᕈᑕᐅᔪᓂ, ᖁᕕᐊᓱᒍᑎᖃᓚᐅᕆᕗᖅ ᒪᑐᓯᓂᕐᒥ ᖃᓄᐃᓐᓂᐅᔪᒥ.

ᖃᓄᐃᓕᖓᓂᐅᔪᓂ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᐃᓱᒪᓕᐅᕆᓂᐊᖅᐳᖅ ᓇᓕᐊᑦ ᐃᓚᐅᖃᑕᐅᔪᓂ ᐱᔪᓐᓇᕐᓂᐊᕐᓂᖏᓐᓂ ᓵᓚᖃᕋᓱᐊᕐᓂᕐᒥ ᑲᓇᑕᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ, ᑲᒪᒋᔭᐅᔪᒥ ᓯᕗᓪᓕᐅᔪᒥ ᐱᓇᓱᐊᕈᓯᕐᒥ ᔫᓂᒥ ᕗᕋᑐᕆᒃᑎᓐ, ᓅ ᐳᕋᓐᔅᐅᐃᒃᒥ, 500−ᐸᓗᖕᓂ ᐃᓚᐅᖃᑕᐅᔪᓂ ᓵᓚᖃᕋᓱᐊᕐᓂᐊᖅᑐᓂ.

ᐊᑕᐅᓯᖅ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᐃᓚᐅᖃᑕᐅᔪᖅ ᐱᕕᖃᕐᓂᐊᖅᐳᖅ ᐊᐅᓪᓛᕐᓂᕐᒧᑦ ᐊᐳ ᑕᐱᒧᑦ, United Arab Emirates−ᓂ, ᓯᑎᐱᕆᒥ MILSET ᓄᓇᕐᔪᐊᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᖁᙱᐊᖅᑎᐅᓗᓂ.