ᐅᖃᐅᓯᕐᒥᑦ ᓴᓗᒪᔪᒥᒃ ᐃᑯᒪᓕᐅᕐᓂᒧᑦ, ᐋᑕᒥ ᓯᕗᒧᑦ ᑕᑯᓐᓇᑐᖅ

For an English version of this article, please see From language to clean energy, Aatami looks forward.

ᐱᑕ ᐋᑕᒥ ᐅᑎᕐᑎᓯᒍᒪᔪᖅ ᑎᓪᓕᑕᐅᓯᒪᓂᕋᕐᑕᒥᓂᒃ.

“ᐅᖃᕐᖁᖓ ‘ᑎᓪᓕᑕᐅᓯᒪᔪᖅ’ ᑲᖕᖑᓱᓐᓇᖓ,” ᒪᑭᕝᕕᐅᑉ ᐊᖓᔪᕐᖄᖓ ᐅᖃᓚᐅᕐᑐᖅ ᐅᖄᑦᓱᓂ ᖃᓪᓗᓈᑦ ᐊᐅᓚᑦᓯᒐᓱᑦᓱᑎᒃ ᐊᔪᐃᓐᓇᓯᒪᓂᖏᓐᓂᒃ ᓴᓇᒐᓱᑦᓱᑎᒃ ᔦᒥᔅ ᐯᒥ ᑰᒻᒧᑦ ᐃᑯᒪᓕᐅᕈᑎᒥᒃ.

ᐃᓱᒪᒋᑦᓱᒋᑦ 50 ᐊᕐᕌᒍᐃᑦ ᐊᑎᓕᐅᕈᑎᐅᓚᐅᕐᓯᒪᑎᓪᓗᒍ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ, ᐋᑕᒥ ᓄᐃᑕᑎᑦᓯᔪᖅ ᐅᐱᒍᓱᓐᓂᒥᓂᒃ ᒪᑭᕝᕕᐅᑉ, ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ-ᑎᒍᒥᐊᕐᑎᐅᑉ ᑎᒥᐅᔫᑉ ᓄᓇᕕᒻᒥ, ᐱᔭᕆᓯᒪᔭᖏᓐᓂᒃ ᐊᑐᕐᓱᓂ $90 ᒥᓕᐊᓐ ᑖᓚᓂᒃ ᐊᖏᖃᑎᒌᒍᑎᕕᓂᕐᓂᒃ ᑲᔪᓯᒍᓐᓇᓯᑎᑦᓯᓱᑎᒃ ᑰᒻᒧᑦ ᐃᑯᒪᓕᐅᕈᑎᐅᑉ ᓴᓇᔭᐅᓂᖓᓂᒃ ᐃᓄᑐᐃᓐᓀᑦ ᓄᓇᖓᓂ.

ᑭᓯᐊᓂᓕ ᒫᓐᓇ ᑕᑯᓐᓇᓕᕐᑐᖅ ᓯᕗᓂᕐᒥᒃ.

ᐋᑕᒥ ᓇᓗᓀᕐᓯᓚᐅᕐᑐᖅ ᐱᖓᓱᓂᒃ ᑐᕌᒐᕐᓂᒃ ᖃᒻᒥᖅ ᐊᐱᕐᓱᑕᐅᑦᓱᓂ: ᐅᖃᐅᓯᕐᒥᒃ ᐆᒻᒪᑎᑦᓯᒋᐊᒃᑲᓂᕐᓂᖅ, ᓴᓗᒪᔪᒥᒃ ᐃᑯᒪᓕᐅᕐᓂᖅ ᐊᒻᒪᓗ ᐃᓄᑐᐃᓐᓀᑦ ᓇᒻᒥᓂᖅ ᐊᐅᓚᒍᓐᓇᓂᖓ.

ᒪᑭᕝᕕᒃ ᐱᓇᓱᐊᖃᑎᓕᒃ ᐊᕙᑕᖅ ᐱᐅᓯᑐᖃᓕᕆᕕᒻᒥᒃ ᐆᒻᒪᑎᑦᓯᒋᐊᒃᑲᓂᕋᓱᑦᓱᑎᒃ ᐃᓄᑦᑎᑐᑦ ᐅᖃᐅᓯᐅᑉ ᐊᑐᕐᑕᐅᓂᖓᓂᒃ, “ᓲᖑᔫᖏᓐᓇᓂᕋᕐᑕᒥᓂᒃ” ᓄᓇᕕᒻᒥ, ᑕᑯᓐᓇᓱᒋᑦ ᐊᓯᖏᑦ ᐃᓄᑐᐃᓐᓀᑦ ᓄᓇᖏᑦ.

ᐋᑕᒥ ᐅᖃᓚᐅᕐᑐᖅ ᓂᕆᐅᓐᓂᖃᕐᓂᒥᓂᒃ ᖃᒻᒥᖅ $38 ᒥᓕᐊᓐ ᑖᓚᓂᒃ ᑮᓇᐅᔭᕐᑖᑎᑕᐅᓚᐅᕐᓂᖓᓄᑦ ᐊᕙᑕᐅᑉ — $22 ᒥᓕᐊᓐ ᑖᓓᑦ ᒪᑭᕝᕕᒥᑦ ᐊᒻᒪᓗ $16 ᒥᓕᐊᓐ ᑖᓓᑦ ᑲᕙᒪᑐᖃᒃᑯᓂᑦ — ᐃᑲᔪᕐᓯᓚᖓᒋᐊᖏᑦ ᐊᖏᓕᒋᐊᕆᓂᕐᒥᒃ ᐊᑐᕐᑕᐅᓂᖓᓂᒃ.

“ᓄᓀᕐᑕᐅᓱᑕ, ᐊᓯᐊᔨᓚᐅᕐᓯᒪᔪᒍᑦ ᐊᖏᔪᒻᒪᕆᒻᒥᒃ ᐃᓚᖓᓂᒃ ᐃᓅᓯᑦᑕ ᐃᓕᓐᓂᐊᕆᐊᕐᑎᑕᐅᓯᒪᓂᑯᑦᑎᓄᑦ,” ᐅᖃᓚᐅᕐᑐᖅ.

ᑕᑯᓐᓇᓱᓂ ᓴᓗᒪᔪᒥᒃ ᐃᑯᒪᓕᐅᕐᓂᒥᒃ, ᐋᑕᒥ ᐃᕐᖃᐅᒪ­ᓚᐅᕐᑐᖅ ᐃᑲᔪᕐᓯᒪᓂᕐᒥᓂᒃ ᓄᐃᑦᓯᓂᕐᒥ ᑕᕐᖁᑎ ᐃᑯᒪᓕᐅᕐᓂᒧᑦ ᑎᒥᐅᔪᒥᒃ 2021-ᒥ ᐊᒻᒪᓗ ᖃᓄᖅ ᑎᒥᐅᔪᖅ ᓄᐃᑦᓯᕙᓪᓕᐊᓕᕐᒪᖔᑦ ᐱᕙᓪᓕᕈᑎᓂᒃ.

ᐊᓄᕆᒧᑦ ᐃᑯᒪᓕᐅᕐᓂᖅ ᐳᕕᕐᓂᑐᒥ ᖁᐊᕐᑕᒥᓗ ᒥᑭᓕᒋᐊᕆᓚᖓᔪᖅ ᑕᑎᖃᕐᓂᖏᓐᓂᒃ ᑖᒃᑯᐊ ᓄᓇᓖᒃ ᓄᑕᐅᓯᓕᕈᓐᓇᖏᑦᑐᒥᒃ ᐃᑯᒪᓕᐅᕐᓂᒥᒃ.

ᐅᖃᓚᐅᕐᑐᖅ “ᐊᓕᐊᓇᖕᖏᑐᖅ” ᐃᓚᒋᐊᕈ­ᑎᖃᕐᓂᖏᒻᒪᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓂ ᓴᓗᒪᔪᒥᒃ ᐃᑯᒪᓕᐅᕐᓂᒧᑦ ᓄᓇᕕᒻᒥ.

“ᐃᑯᒪᓕᐊᖑᔪᓕᒫᖅ ᐊᐅᓪᓚᑎᑕᐅᖃᑦᑕᓚᖓᔪᕕᓂᖅ ᖃᓪᓗᓈᑦ ᓄᓇᖓᓐᓄᑦ,” ᐅᖃᓚᐅᕐᑐᖅ.

“ᐱᕙᓪᓕᕈᑎᖃᕐᓯᒪᔪᑦ ᑖᑦᓱᒥᖓ ᓴᓗᒪᔪᒥᒃ ᐃᑯᒪᓕ­ᐅᕐᓂᒥᒃ. ᐅᕙᒍᓪᓕ? ᐊᑐᖏᓐᓇᑎᑦᓯᓯᒪᔪᑦ ᐅᕙᑦᑎᓂᒃ ᐅᕐᓱᐊᓗᒻᒥᒃ.”

ᓇᒻᒥᓂᖅ ᑲᕙᒪᖃᕐᓂᒧᑦ, ᐋᑕᒥ ᐊᒻᒧᑦ ᑕᑯᓐᓇᑐᖅ — ᓄᓇᐅᑉ ᐃᑭᐊᖓᓄᑦ.

ᓄᓇᐅᑉ ᐃᑭᐊᖓᓂᒃ ᐱᔪᓐᓇᐅᑎᖃᕐᕕᖃᕐᓃᑦ ᐃᓚᒋᔭᐅ­ᓗᐊᖕᖑᐊᑐᑦ ᐊᖏᖃᑎᒌᒐᓱᐊᕐᓂᓄᑦ, ᐃᓄᑐᐃᓐᓇᓂᒃ ᐱᔪᓐᓇᓂᕐᑖᑎᑦᓯᓚᖓᔪᑦ ᑐᑭᑖᕈᓐᓇᓂᕐᒥᒃ ᑲᔪᓯᑎᑦᓯᓂᕐᒥᒃ ᐅᕝᕙᓘᓐᓃᑦ ᑲᔪᓯᖕᖏᑑᑎᑦᓯᓂᕐᒥᒃ ᓯᕗᓂᕐᒥ ᐅᔭᕋᓐᓂ­ᐊᓂᕐᓂᒃ ᐊᒻᒪᓗ ᓴᖑᑎᖔᕐᓗᒋᑦ ᐱᕙᓪᓕᖁᑏᑦ ᑌᒃᑯᓇᖕᖓᑦ ᐱᓇᓱᐊᕐᓂᓂᑦ ᑭᖕᖒᒪᓇᓪᓚᕆᑦᑐᓄᖔᖅ ᐃᓱᕐᕉᑎᒻᒪᕆᓐᓄᑦ, ᐆᑦᑑᑎᒋᓗᒋᑦ ᑕᑭᓂᕐᓭᑦ ᒥᕝᕖᑦ.

“ᑕᑯᓐᓇᕈᓐᓀᓗᓯ ᓱᓇᖃᕐᒪᖔᑦᑕ,” ᐅᖃᓚᐅᕐᑐᖅ ᓄᓇᕕᐅᑉ ᐅᔭᕋᓐᓂᐊᕋᑦᓴᖃᕐᓂᖓᓄᑦ.

“ᑕᑯᓐᓇᖔᕐᓗᓯ ᓱᓇᖃᖕᖏᓂᑦᑎᓂᒃ.”

— ᑐᓴᕐᕕᐅᔪᕕᓂᖅ ᔨᐊᕝ ᐱᐊᓪᑎᐁ

This project has been made possible in part by the Government of Canada.