ᓄᓇᕕᒻᒥᐅᑦ ᑕᑯᒥᓇᕐᑐᓕᐅᕐᑏᑦ ᓇᒻᒥᓂᖅ ᐅᓂᒃᑲᐅᓯᕐᒥᓂᒃ ᐅᓂᒃᑳᑐᑦ

50 ᐊᓂᒍᕐᑐᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑎᓕᐅᕐᑕᐅᓚᐅᕐᓯᒪᑎᓪᓗᒍ ᓄᑭᑖᕐᑎᓯᑦᓱᓂ ᐃᓄᑐᐃᓐᓇᓂᒃ ᑕᑯᒥᓇᕐᑐᓕᐅᕐᑎᓂᒃ, ᐱᖕᖑᑎᑦᓯᔨᓂᒃ ᐅᓂᒃᑳᑎᓂᓪᓗ ᓄᓇᕕᒻᒥᐅᓂᒃ ᓇᒻᒥᓂᖅ ᐅᓂᒃᑲᐅᓯᕐᒥᓂᒃ ᐅᓂᒃᑖᓱᑎᒃ.

“ᐊᕐᕌᒍᐃᑦ 50 ᓱᑲᑦᑐᒥᒃ ᐊᓂᒍᕐᑐᑦ” ᐅᖃᓚᐅᔪᖅ ᑲᑦᔪᒐᕐᒧᑦ ᑕᑯᒥᓇᕐᑐᓕᐅᕐᑎ ᐃᓕᓐᓂᐊᑎᑦᓯᔨᐅᑦᓱᓂᓗ ᒫᑭ ᓇᐹᕐᑐᖅ. “ᐊᕐᕌᒍᐃᑦ ᖁᓕᑦ ᐊᓂᒍᕐᑐᑦ, ᓄᓇᑦᑎᓂ ᖃᓄᐃᓕᖓᓂᐅᓯᒪᔪᑦ ᑕᑯᑦᓱᒋᑦ ᐊᒥᓱᓄᑦ ᐱᕈᕈᑎᐅᓯᒪᔪᑦ ᐃᓄᓐᓄᑦ ᐃᓕᓐᓂᐊᑎᑦᓯᓂᕐᑖᒋ­ᐊᓪᓚᓱᓂᓗ.”

ᐃᓕᓐᓂᐊᑎᑦᓯᔨ ᖃᕆᑕᐅᔭᒃᑯᑦ ᐊᓪᓚᖑᐊᕐᑎ ᑑᒪᓯ ᒪᖏᐅᖅ ᐃᓚᒋᐊᕆᓚᐅᔪᖅ ᐅᖃᕐᓱᓂ, “ᐱᒍᓐᓇᓯᑦᓯᐊᑐᒻᒪᕇᑦ ᑕᒫᓂ ᐱᕕᑦᓴᒥ.”

“ᐅᐱᒍᓱᓪᓚᕆᒃᑯᖓ ᐃᓄᓐᓂᒃ ᐊᖏᖃᑎᒌᒐᓱᐊᕐᓯᒪᔪᓂᒃ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ.” ᒪᖏᐅᖅ ᐅᖃᕐᓱᓂ.

ᐅᑯᐊ ᑕᑯᒥᓇᕐᑐᓕᐅᕐᑏᑦ ᓄᓇᕕᒻᒥᐅᑦ ᐃᓂᒥᓃᑦᑐᑦ ᓴᕐᕿᑎᑦᓯᓂᕐᒥᒍᑦ ᓄᐃᑦᓯᓯᒪᑦᓱᑎᒃ.

ᒫᑭ ᓇᐹᕐᑐᖅ – ᑰᒃᔪᐊᒥᐅᑦᓴᔭᖅ ᒫᑭ ᓇᐹᕐᑐᖅ ᖃᐅᔨᒋᐊᖕᖓᓯᒪᔪᖅ ᑲᑦᔪᒐᕐᒧᑦ ᑕᑯᒥᓇᕐᑐᓕᐅᕐᓂᒥᒃ ᑲᑎᒪᓂᐊᕈᓯᖃᕐᑎᓗᒋᑦ 2015-ᒥ.

“ᐱᒋᐊᕐᓂᖓᓂ ᐱᒐᓱᐊᓪᓗᐊᓯᒪᖕᖏᓚᖓ… ᐃᓕᓐᓂᐊ­ᓯᒪᑦᓯᐊᖏᓐᓂᑯᒐᓄᑦ, ᑲᑦᔪᒐᕐᒧᓗ ᐊᑭᓐᓇᒥᐅᑕᓕᐅᕐᓂᒥᒃ ᖃᐅᔨᒪᖕᖏᓂᑯᒐᓄᑦ,” ᐅᖃᕐᓱᓂ. “ᓴᓇᖕᖑᐊᕆᐊᖕᖓᓯᑦᓴ­ᑐᐊᕋᒪ ᐃᐱᕋᑦᓵᓯᒪᖕᖏᑕᕋ… ᓇᔪᕐᑎᒌᓐᓇᓂᐊᕐᑕᕋ.”

ᓇᐹᕐᑐᖅ ᐃᓄᑐᖃᕐᓂᒃ ᐅᓂᒃᑲᐅᓯᖏᓐᓂᓗ ᓄᓇᒥᓂ ᓴᓇᖕᖑᐊᑕᒥᒍᑦ ᓄᐃᑦᓯᓲᖅ.

“ᐃᓄᑐᖃᕐᓂᒃ ᓈᓚᑦᓱᖓ, ᑕᐅᑐᕐᖂᓯᓲᖑᕗᖓ ᐃᓱᒪᒋᖕᖑᐊᓯᑦᓱᒋᓪᓗ ᑐᑭᓯᑦᓱᖓ ᓱᓇᓂᒃ ᐅᖄᒻᒪᖔᑕ … ᓯᕗᓕᕗᑦ ᐱᒐᓱᐊᒻᒪᕆᑦᓯᒪᒻᒪᑕ … ᖃᐅᑕᒫᑦ ᐃᓅᑦᓱᑎᒃ. ᐊᔪᐃᓐᓇᓂᖓ ᓴᐱᓕᕐᑌᑑᓂᖓᓗ ᑭᓇᐅᓂᑦᑎᓂᒃ ᐱᐅᓕᑦᓯᒍᑎᐅᓯᒪᔪᖅ. ᑕᑯᔭᐅᑎᑦᓯᒍᒪᒐᒪ ᓯᓚᕐᔪᐊᒥᐅᓄᑦ ᓯᕗᓕᕗᑦ ᐊᓐᓇᐅᒪᓯᒪᓂᖏᓐᓂᒃ ᐅᓪᓗᒥᒧᑦ ᑎᑭᒍᑎᒋᒐᑦᑎᒍ. ᓴᓇᖕᖑᐊᓯᒪᔭᓕᒫᒃᑲ ᐱᕐᖁᓯᑐᖃᕐᑎᓂᒃ ᑐᖕᖓᕕᖃᕐᑐᑦ.”

ᓇᐹᕐᑐᖅ ᐅᑉᐱᕆᔭᖃᕐᑐᖅ ᖃᐅᔨᒪᐅᓯᑦᑎᓂ ᑐᓂᔨᒋᐊᖃᕐᓂᑎᓐᓂᒃ ᐅᕕᒃᑲᓄᑦ ᐃᓕᓐᓂᐊᑎᑦᓯᓲᖅ ᐊᕐᕕᑕᕐᓱᓂ ᑲᑦᔪᒐᕐᒧᑦ ᐊᑭᓐᓇᐅᒥᐅᑕᓕᕐᓂᒥᒃ.

“ᑕᑯᒍᓐᓇᓇᕐᑐᖅ ᑕᓯᐅᔭᕐᔪᐊᒥᐅᑦ ᐅᖓᕙᒥᐅᓪᓗ ᐊᑦᔨᒌᖕᖏᑐᒐᓚᐅᓂᒋᓐᓂᒃ, ᑭᓯᐊᓂ ᐃᓄᑐᐃᓐᓇᓕᒫᑦ ᐱᑐᑦᓯᒪᖃᑎᒌᑦᑐᑦ.”

ᕕᑦᑑᔨᐊ ᐅᑉᐱᒃ  – “ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑎᓕᐅᕐᑕᐅᓚᕐᓯᒪᑎᓪᓗᒍᓂᑦ, ᐊᒥᓱᑦ ᐱᐅᔪᑦ ᓴᕐᕿᓯᒪᒻᒪᑕ ᓄᓇᑦᑎᓂ, ᐃᓚᐅᑎᓪᓗᒍ ᑕᑯᒥᓇᕐᑐᓕᐅᕐᓂᖅ,” ᐅᖃᕐᓱᓂ ᐅᒃᐱᒃ ᐊᓐᓄᕌᓕᐅᕐᑎ ᕕᑦᑑᔨᐊ ᐅᑉᐱᒃ.

ᐅᓪᓗᒥ, ᐊᒥᓲᓕᕐᒪᑕ ᐃᑲᔪᕐᓯᓲᑦ ᑕᑯᒥᓇᕐᑐᓕᐅᕐᑎᓂᒃ ᓄᓇᕕᒻᒥ, ᑖᒃᑯᓇᖕᖓᑦ ᐃᑲᔪᕐᑕᐅᓯᒪᒋᕗᖓ ᓇᒻᒥᓂᖅ ᒪᑭᑕᑎᑦᓯᒍᑎᒐᓄᑦ.”

ᐊᕐᕌᒍᓂᒃ ᐱᖓᓱᓂ ᐊᓐᓄᕌᓕᐅᕐᓂᒥᒃ ᐃᓕᓐᓂ­ᐊᓚᐅᑲᑦᓱᓂ 1999-ᖑᑎᓪᓗᒍ, ᖁᐊᕐᑕᒥᐅᔭᖅ ᓇᒻᒥᓂᖅ ᐱᒋᐊᓚᐅᔪᖅ, ᓄᓇᕕᒻᒥᐅᑦ ᓴᓇᒐᖏᓐᓂᒃ (ᑎᒥᐊᕈᑎᐅ­ᓚᐅᔪᖅ ᒪᑭᕝᕕᒧᑦ), ᐅᒃᑯᐊᓂᖓᓄᑦ ᑎᑭᑦᓱᓂ. ᐊᕐᕌᒍᐃᑦ ᐊᒥᓲᖕᖏᑐᑦ ᑭᖑᓂᒐᒍᑦ ᖃᕆᑕᐅᔭᒃᑯᑦ ᓂᐅᕐᕈᓯᖃᑦᑕᓯ­ᓚᐅᔪᖅ ᐊᑎᒋᓂᒃ ᐱᐅᓗᖁᑕᒐᓚᓐᓂᓗ.

“ᓱᕐᕋᑕᐅᒍᑎᒋᒻᒪᕆᑦᑕᑲ ᐱᕐᖁᓯᑐᙯᑦ ᓄᓇᑦᑎᓂᒥᐅᔦᑦ. ᐊᑎᒋᓕᐅᕈᓯᑦᑎᓂᒃ ᐱᐅᑦᓴᓲᖑᒐᒪ — ᐃᓱᐊᕐᑐᑐᐃᓐᓇᕋᑎᒃ ᐅᑭᐅᒥ ᐊᓐᓄᕌᑦᓯᐊᑦ, ᐱᐅᔫᑦᓱᑎᒃ ᐊᑦᔨᐅᖏᑦᑑᓱᑎᒃ ᐊᓯᖏᓐᓄᑦ ᐊᓐᓄᕌᓄᑦ ᐊᓃᕐᓯᐅᑎᓄᑦ.”

ᐃᓕᓴᐱ – ᐃᖕᖏᑎ ᑕᑯᓐᓇᕋᑦᓴᓕᐅᕐᑎ ᐃᓕᓴᐱ ᐱᑐᑦᓯᒪᒻᒪᕆᑦᑐᖅ ᓄᓇᕕᒻᒧᑦ ᐅᖃᐅᓯᖓᓄᓪᓗ, ᓄᐃᑕᑎᑦᓯᓗᐱᑦᓱᓂ ᓄᓇᖓ­ᓂᒃ ᑲᑦᔮᓇᕐᓂᖓᓂᓪᓗ ᐃᓄᐃᑦ ᓄᓇᖓᑦ, ᐱᓇᓱᐊᓲᖏᓐᓄᑦ ᑐᖕᖓᕕᓪᓚᕆᐅᑦᓱᓂ.

ᓴᓪᓗᒥᐅᔭᐅᑦᓱᓂ, ᓄᓇᓕᒻᒥ ᐱᕈᕐᓴᕕᒋᓯᒪᔭᒥᓂ ᑎᒍᐊᖑᑦᓱᓂ, ᖃᑕᖕᖑᑎᒥᓂᒃ ᐅᖁᒣᑦᑐᑎᒎᕐᑐᓂᒃ ᑕᑯᖃᑦᑕᓯᒪᔪᖅ ᐃᓅᒍᓐᓀᑐᓂᓪᓗ ᖃᓪᓗᓈᓄᑦ ᑎᑭᑕᐅᓚ­ᐅᕐᓂᕕᓂᐅᑉ ᓱᕐᕃᓯᒪᓂᖓᓄᑦ, ᐱᕈᕐᓴᓚᐅᕐᓯᒪᔪᖅ ᐅᕕᒐᕐᑑ­ᓂᕐᒥᓂ ᓄᓇᓕᐊᕈᕐᒥ ᐋᓐᓂᐊᒍᑎᒥᓂᒃ ᓄᐃᑦᓯᖃᑦᑕᓱᓂ ᑖᓂᓯᕐᓂᑯᑦ ᓄᓇᓕᐅᑉ ᐱᖕᖑᐊᕕᖓᓂ.

ᐊᖓᒻᒥᓂᒃ ᐃᓚᖃᕐᓱᓂ ᐅᕕᒐᕐᑑᓱᓂ ᐃᖕᖏᖃᑎ­ᐅᖃᑦᑕᓯᒪᔪᖅ, ᓴᓪᓗᐃᑦ ᓂᑦᔭᓗᑦᑖᑎᖏᓐᓂᒃ, ᑐᓴᐅᑎᕐᑎ­ᐅᒥᑦᓱᓂ.

ᒪᓐᑐᕆᐊᓪᒧᑦ ᓅᓯᒪᓕᕐᓱᓂ ᐃᓕᓐᓂᐊᕆᐊᕐᓱᓂ ᐱᓇᓱᐊᕐᓱᓂᓗ ᓂᑦᔭᓗᑦᑖᑎᐅᓂᕐᒥᓂᒃ, ᑲᓇᑕᒥ ᐃᓄᑐᐃᓐᓇ­ᐅᓱᓂ ᓱᕐᕃᓯᒪᒻᒪᐱᕆᑦᑐᖅ ᐃᖕᖏᑎ-ᐃᖕᖏᕈᓯᓕᐅᕐᑎᐅᓱᓂ, 70 ᐅᖓᑖᓄᑦ ᓄᓇᓕᕐᔪᐊᓂ ᐃᖕᖏᕆᐊᕐᑐᓯᒪᓕᕐᑐᖅ, ᐃᓗᕐᖁᓯᒥᓂᒃ ᐃᓚᐅᑎᑦᓯᖏᓐᓇᓕᒫᕐᓱᓂ ᐱᓇᓱᐊᕐᑕᒥᓄᑦ ᐅᓪᓗᒥᓂᑕᕐᓂᒃ ᐱᕐᖁᓯᑐᖃᕐᒥᓗ ᐅᐊᕈᑎᒌᑎᑦᓯᓱᓂ.

ᑑᒪᓯ ᒪᖏᐅᖅ – ᐃᓕᓐᓂᐊᓚᐅᑲᑦᓱᓂ ᐊᓪᓚᖑᐊᕐᑎᐅᓂᕐᒥᒃ ᖃᕆᑕᐅ­ᔭᒃᑯᑦ, ᑑᒪᓯ ᒪᖏᐅᖅ, ᐃᕗᔨᕕᒻᒥᐅᖅ ᐅᖃᓚᐅᔪᖅ “ᐊᑯᓂ ᐃᓕᓐᓂᐊᕈᒪᓲᖑᓕᕐᓱᖓ…ᓄᐃᑦᓯᓲᖑᕗᖓ, ᐱᓇᓱᒍᑎᑦᓴᓂᒃ ᐃᓗᕐᖁᓯᕐᒨᓕᖓᔪᓂᒃ, ᐃᓅᑦᔪᓯᕗᓐᓂᒃ ᑫᓪᓚᑐᐃᒍᑎᒋᑦᓱᒍ.”

ᐱᓇᓱᐊᕐᓯᒪᔭᖏᑦ ᒪᑯᐊ ᓯᑕᒪᑦ ᐱᐊᕋᕐᓄᑦ ᕿᒥᕐᕈᐊᑦ, ᐅᖃᐅᓯᕐᓂᒃ ᐱᖓᓱᓂᒃ ᐊᑐᕐᓱᓂ ᐱᖕᖑᐊᕈᑎ ᓄᓇᒥ ᑌᔭᐅᔪᖅ, ᐊᒻᒪᓗ ᖃᕆᑕᐅᔭᕈᑎᓕᐅᕐᓱᓂ ᑌᔭᐅᔪᒥᒃ ᐃᓄᐃᑦ ᐅᓂᒃᑲᐅᓯᓕᐅᕈᓯᖏᑦ, ᑐᑭᓯᓇᕐᑎᓱᒍ “ᐃᓄᐃᑦ ᐅᓂᒃᑲᐅᓯᓕᐅᕈᓯᖓ.”

“ᐃᓕᓐᓂᐊᓂᒃᑯᑦ ᐃᓕᑦᓯᓯᒪᔭᒃᑲ ᐊᓪᓚᖑᐊᕐᓂᒥ, ᓄᐃᑦᓯ­ᒍᓐᓇᕈᑎᒋᓯᒪᔭᒃᑲ ᖃᕆᑕᐅᔭᒃᑯᑦ ᐃᓄᒃᑎᑐᑦ ᐊᓪᓚᒍᓯᕐᓂᒃ.”

ᒪᖏᐅᖅ ᐅᖃᓚᐅᔪᖅ ᐱᒐᓱᐊᕈᑎᖃᕐᓂᕋᕐᓱᓂ “ᐱᒍᒪᓂᖃᕐᓂᖅ ᖃᐅᔨᒪᒍᒪᓂᕐᓗ ᓄᓇᒦᑦᓱᓂ… ᓯᓚᐅᑉ ᐊᓯᑦᔨᑕᕐᓂᖓ ᒪᓕᑦᓱᒐ, ᐊᕐᕌᒍᑕᒫᑦ, ᐊᓯᑦᔨᓲᖅ.”

“ᐊᑯᓂ, ᐱᒐᓱᐊᓕᓂᐅᓕᕋᑦᑕ ᐊᓯᑦᑕ ᐃᓗᕐᖁᓯᖏᓐᓂᒃ… ᐃᓄᒃᑎᑑᕐᑐᓂᒃ ᐱᑕᖃᓪᓗᐊᖏᑦᑐᖅ… ᑕᑯᔭᐅᑎᑦᓯᒍ­ᒪᓚᐅᔪᒐᒪ ᐃᓅᖃᑎᒃᑲᓄᑦ, ‘ᐱᒍᓐᓇᕈᒪ, ᐱᒍᓐᓇᒥᒋ­ᐊᖏᓐᓂᒃ.’”

“ᐊᖓᔪᕐᖄᑕ ᐃᓅᓯᕆᓚᐅᔭᖓ ᐃᓅᓯᕆᓕᕐᑕᕗᓪᓗ ᖃᒻᒥᓂᑕᒻᒪᕆᐅᒻᒪᑦ ᐅᕝᕙᓗᓗᓐᓃᑦ ᐊᓈᓇᑦᓯᐊᕗᑦ ᑭᖑᕚᕆᖑᔪᒍᑦ ᖃᓂᑕᕇᑦᓱᑕ,” ᒪᖏᐅᖅ ᐅᖃᕐᓱᓂ, “ᐊᓯᑦᔨᐸᓪᓕᐊᔪᖅ, ᐊᓯᑦᔨᑐᖅ… ᓇᓪᓕᑳᓚᖓᔭᕗᑦ ᖃᓄᖅ ᐊᓯᑦᔨᓂᖓ.”

This project has been made possible in part by the Government of Canada.