ᑐᓴᒐᒃᓴᓕᐅᖅᑎ, ‘ᑕᖃᔪᐃᑦᑐᖅ’ ᐃᑲᔪᖅᓱᐃᔨᐅᔪᖅ ᓵᓚᖃᖅᐳᖅ ᐊᕐᓇᓄᑦ ᓵᓚᖃᐅᓯᐊᖑᔪᒥ

For the English version of this story, please see Journalist, ‘tireless advocate’ win Qulliit’s women’s awards.

ᐊᑕᐅᓯᖅ ᑐᓂᓯᓲᖑᕗᖅ ᓂᕿᓂᑦ ᐃᓕᓐᓂᐊᖅᑎᓄᑦ ᓴᓪᓕᓂ ᐊᒻᒪ ᐊᐃᑉᐸᖓ ᑐᓴᒐᒃᓴᓕᐅᖅᑎᐅᕗᖅ ᐊᒻᒪ ᐱᙳᐊᖅᑎ — ᑲᑎᙵᓪᓗᑎᒃ ᑕᒪᑐᒪᓂ ᐊᕐᕌᒎᔪᒥ ᓯᓚᑐᔪᖅ ᐊᕐᓇᖅ ᓵᓚᖃᐅᓯᐊᕐᒥ ᐊᒻᒪ ᑲᒪᓇᖅᑐᖅ ᒪᒃᑯᒃᑐᒥ ᐊᕐᓇᖅ ᓵᓚᖃᐅᓯᐊᕐᒥ ᐱᕗᑦ.

ᐃᓄᓕᕆᔨᒃᑯᑦ ᒥᓂᔅᑕᖓ ᒫᒡᒍᓕ ᓇᑲᓱᒃ ᑐᓂᓯᓚᐅᖅᐳᖅ 2023−ᒥ ᓯᓚᑐᔪᖅ ᐊᕐᓇᖅ ᓵᓚᖃᐅᓯᐊᕐᒥ and ᑲᒪᓇᖅᑐᖅ ᒪᒃᑯᒃᑐᒥ ᐊᕐᓇᖅ ᓵᓚᖃᐅᓯᐊᕐᒥ ᒫᔾᔨ 8−ᒥ, ᓄᓇᕐᔪᐊᒥ ᐊᕐᓇᓄᑦ ᐅᓪᓗᖓᓂ, ᒪᓕᒐᓕᐅᕐᕕᖕᒥ.

ᑎᕇᓴ ᕿᐊᑦᓱᖅ, ᑕᒪᑐᒪᓂ ᐊᕐᕌᒎᔪᒥ ᑲᒪᓇᖅᑐᖅ ᒪᒃᑯᒃᑐᒥ ᐊᕐᓇᖅ ᓵᓚᖃᐅᓯᐊᕐᒥ ᐱᔪᖅ, ᐅᖃᐅᓯᖃᓚᐅᖅᐳᖅ ᖁᕕᐊᓐᓂᖓᓂ ᑎᑭᐅᑎᔪᓐᓇᕐᓂᐅᔪᒥ.

“ᖁᖓᔮᖏᓐᓇᖅᐳᖓ,” ᕿᐊᑦᓱᖅ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᕿᐊᑦᓱᖅ ᐃᓅᓪᓗᓂ ᑐᓴᒐᒃᓴᓕᐅᖅᑎᐅᕗᖅ CBC ᐃᖃᓗᖕᓂ, ᐊᒻᒪᓗᑦᑕᐅᖅ ᐱᙳᐊᖅᑎᐅᓪᓗᓂ ᖃᔅᓯᒐᓚᖕᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐹᔅᑭᑦᐹᓪᒥ ᐊᒻᒪ ᕼᐋᑭᒥ.

ᑐᓂᓯᑎᓪᓗᒍ ᓵᓚᖃᐅᓯᐊᕐᒥ, ᓇᑲᓱᒃ ᑕᐃᓯᓚᐅᖅᐳᖅ ᕿᐊᑦᓱᕐᒥ “ᑲᒪᓇᖅᖢᓂ ᑐᓴᒐᒃᓴᓕᐅᖅᑎᐅᓂᖓᓂ, ᐱᙳᐊᖅᑎ ᐊᒻᒪ ᐅᖃᐅᓯᕐᒧᑦ ᑭᒡᒐᖅᑐᖅᑎᒻᒪᕆᐅᓂᖓᓂ, ᐊᒻᒪ ᐊᓈᓇᐅᓪᓗᓂ.”

ᕿᐊᑦᓱᖅ ᐅᖃᓚᐅᖅᐳᖅ ᓵᓚᖃᐅᓯᐊᖅ ᑲᔪᖏᖅᓴᐃᕗᖅ ᐊᒃᑐᐃᓕᓂᐅᖏᓐᓇᕐᓂᖓᓂ.

“ᐅᕙᓐᓂ ᐃᓱᒪᒋᔪᒪᓲᖑᕗᖓ ᓯᕗᓂᒃᓴᒥ ᓯᕗᓕᐅᖅᑎᐅᓛᕐᓂᓐᓂ ᑕᐃᒫᒃ ᐱᐅᔪᐊᓘᕗᖅ ᐃᓕᓴᕆᔭᐅᓂᕐᒥ ᑕᐃᒪᓐᓇ,” ᐅᖃᓚᐅᖅᐳᖅ.

ᓕᐊᕈᑏᓐ ᐃᒥᒃᑕᐅᑦ, ᑕᒪᑐᒪᓂ ᐊᕐᕌᒎᔪᒥ ᓯᓚᑐᔪᖅ ᐊᕐᓇᖅ ᓵᓚᖃᐅᓯᐊᕐᒥ ᓵᓚᒃᓴᖅᑎ, ᑐᓂᓯᓯᒪᕗᖅ ᐅᓪᓛᕈᒻᒥᑕᕐᓂ, ᑕᖁᐊᕐᓂ ᐊᒻᒪ ᐅᓪᓗᕈᒻᒥᑕᓂ ᐱᓕᕆᐊᖑᔪᒥ ᐃᓕᓐᓂᐊᖅᑎᓄᑦ ᓴᒃᑯ ᐃᓕᓐᓂᐊᕐᕕᖕᒥ ᓴᓪᓕᓂᑦ ᐅᓄᕐᓂᖅᓴᐅᔪᓂ ᐊᕐᕌᒍᓂ 10−ᓂ.

ᑮᓇᐅᔭᓂᒃ ᑐᓂᓯᓯᒪᕗᖅ ᐱᓕᕆᐊᖑᔪᒧᑦ, ᐊᒻᒪ ᐃᓛᓐᓂᒃᑯᑦ ᓂᖅᖠᐅᖅᐸᒃᖢᓂ, 300−ᓄᑦ ᐃᓕᓐᓂᐊᖅᑎᓄᑦ.

“ᑕᖃᔪᐃᑦᑑᓪᓗᓂ ᐃᑲᔪᖅᓱᐃᔨᐅᕗᖅ ᐊᒻᒪ ᐱᔭᕆᐊᖃᓪᓗᐊᑦᑎᐊᖅᐳᖅ ᐆᒥᖓ [ᓵᓚᖃᐅᓯᐊᕐᒥ],” ᓇᑲᓱᒃ ᐅᖃᓚᐅᖅᐳᖅ ᐃᒥᒃᑕᐅᒻᒥ.

ᐃᒥᒃᑕᐅᑦ ᖁᕕᐊᓱᒍᑕᐅᔪᒦᓚᐅᙱᓐᓂᖓᓂ, ᐊᐃᕕᓕᒃ ᒪᔨᒐᓕᐅᖅᑎ ᓵᓚᒪᓐ ᒪᓕᑭ ᐱᓚᐅᖅᐸᖓ ᑭᒡᒐᖅᑐᐃᓪᓗᓂᐅᒃ.

ᓇᑲᓱᒃ ᐅᖃᓚᐅᖅᐳᖅ ᓵᓚᖃᐅᓯᐊᖑᔪᑦ ᐅᐱᒋᔭᖃᓲᖑᕗᖅ ᓄᓇᕗᒻᒥ ᐊᕐᓇᓂ ᐊᒻᒪ ᑲᔪᖏᖅᓴᐃᓲᐅᕗᖅ ᐊᓯᖏᓐᓂ ᓴᖅᑭᑎᑦᑎᓂᕐᒥ ᐱᐅᔪᒥ ᐊᓯᔾᔨᕐᓂᐅᔪᒥ ᓄᓇᕘᑉ ᓄᓇᓕᖏᓐᓂ.

“ᑕᒪᑐᒪᓂ ᐊᕐᕌᒎᔪᒥ ᐱᔪᑦ ᐆᒃᑑᑎᑦᑎᐊᕙᒻᒪᕆᐅᕗᑦ ᐱᓐᓇᕆᔭᑦᑎᓐᓂ,” ᐅᖃᓚᐅᖅᐳᖅ.

ᑕᒪᒃᑭᑦ ᓵᓚᖃᐅᓯᐊᑦ ᑐᓂᔭᐅᕙᒃᐳᑦ ᖁᓪᓖᑦ ᓄᓇᕗᒻᒥ ᐊᕐᓇᓄᑦ ᑲᑎᒪᔨᖏᓐᓄᑦ, ᑐᕌᒐᒃᓴᖃᖅᑐᒥ ᖁᕝᕙᖅᓴᐃᓂᕐᒥ ᓇᓕᒧᑦᑐᒥ ᐃᓚᐅᖃᑕᐅᓂᕐᒥ ᐊᕐᓇᓂ ᐃᓅᖃᑎᒌᖑᔪᓄᑦ.