ᐃᖅᑲᖅᑐᐃᔨ ᓄᓇᕕᒃᒥ ᑎᒍᔭᐅᓯᒪᕝᕕᒧᑦ ᓈᒻᒪᙱᓕᐅᕈᑎᒋᔭᐅᔪᖅ ᐃᓄᒋᐊᓄᑦ ᑲᔪᓯᑎᑦᑎᔪᖅ ᒪᓐᑐᕆᐊᒥ

ᑯᐸᐃᒃᒥ ᐊᖓᔪᖅᑳᖅ ᐃᖅᑲᖅᑐᐃᔨ ᐅᓇ ᐃᓄᒋᐊᓄᑦ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎ ᐅᖃᖅᖢᑎᒃ ᐃᓄᐃᑦ ᑎᒍᔭᐅᓯᒪᔪᑦ ᐊᑯᓂᐅᓂᕐᓴᖅ ᑎᒍᔭᐅᓯᒪᕙᖕᓂᖏᓐᓂ ᐋᖅᑭᒃᑕᐅᓯᒪᔫᑉ ᐅᖓᑖᓄᑦ ᐃᖅᑲᖅᑐᐃᕕᖕᒥ ᐱᓕᕆᐊᖑᓕᓚᐅᖅᑎᓐᓇᒋᑦ ᑖᒃᑯᐊᓗ ᒪᓐᑐᕆᐊᒥ ᐱᓕᕆᐊᖑᓗᑎᒃ ᓅᑕᐅᙱᓪᓗᑎᒃ ᐊᐃᒪᔅᒧᑦ, ᑕᐃᑲᓂᓗ ᐊᒥᓱᑦ ᑎᒍᔭᐅᓯᒪᕙᒃᖢᑎᒃ.

ᓗᐊᐃᔭ ᐊᓕᒃᓵᓐᑐ ᐳᕌᓱ-ᕕᐅᕆ, ᑭᒡᒐᖅᑐᐃᔪᖅ ᐃᖅᑲᖅᑐᐃᔨᒥ ᒪᐃᑯᓪ ᑯᕆᐅᒥᓐ, ᑭᐅᓗᒍᑎᖃᓚᐅᕐᑐᖅ ᐅᐸᒍᑎᔭᕆᐊᖃᕐᓂᖅ ᐊᒃᓱᕉᑎᐅᓇᔭᕐᓂᖓᓂ ᐃᖅᑲᖅᑐᐃᕕᒃᑰᖅᑎᑦᑎᓂᒧᑦ ᐊᒻᒪᓗ ᐃᖅᑲᖅᑐᐃᕕᒃᑰᑎᑦᑎᖃᑕᐅᔪᑦ ᐃᓚᐅᔪᓐᓇᙱᓐᓂᕐᓴᐅᓗᑎᒃ.

ᑯᕆᐅ, ᑲᖏᕐᓱᒥᐅᑕᖅ, 2018-ᒥ ᐱᒋᐊᖅᑎᑦᑎᓕᓚᐅᕐᓯᒪᔪᖅ ᐃᓄᒋᐊᓄᑦ ᐃᖅᑲᖅᑐᐃᕕᒃᑯᑦ ᐱᓕᕆᔭᐅᑎᑦᑎᓂᕐᒥ ᑎᒍᔭᐅᓯᒫᓪᓚᓚᐅᖅᑎᓪᓗᒍ ᐅᓪᓗᕐᓂ ᖁᓕᓂ ᐅᕙᓂ ᓴᓂᑦ ᔨᕉᒻ ᑎᒍᔭᐅᓯᒪᕝᕕᒃᒥ ᒪᓐᑐᕆᐊᒥ ᐃᖅᑲᖅᑐᐃᕕᑰᓚᐅᖅᑎᓐᓇᒍ.

ᐅᓇ ᐃᓄᒋᐊᓄᑦ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎᐅᔪᖅ ᑭᐅᓗᒍᑎᖃᓚᐅᕐᑐᖅ “ᑭᖑᕙᕆᐊᖅᑕᐅᑎᑦᑎᕙᖕᓂᖅ ᐅᓪᓗᐃᑦ ᐱᖓᓱᑦ ᐅᖓᑖᓄᑦ ᒪᓕᒐᕐᓂ ᓱᕋᐃᔾᔪᑎᐅᖕᒪᑦ, ᑭᓯᐊᓂ ᐊᖏᖅᑕᐅᓯᒪᓐᓂᕈᓂ ᓯᕗᓂᐊᒍᑦ,” ᐊᒻᒪᓗ ᑯᕆᐅᑉ ᐊᑐᕐᓯᒪᔭᖓ ᐊᑐᕐᑕᐅᒡᒍᓪᓗᓂ ᑎᒍᔭᐅᓯᒪᕝᕕᒃᑕᖃᙱᓗᐊᕐᓂᖓᓄᑦ ᓄᓇᕕᒃᒥ. ᐱᒋᐊᖅᖢᓂ 2019-ᒥ, 2,400 ᐅᖓᑖᓃᑦᑐᑦ ᐃᓄᐃᑦ ᐃᓚᐅᓯᒪᓕᕐᑐᑦ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᓂᒃ.

ᐊᖓᔪᖅᑳᖅ ᐃᖅᑲᖅᑐᐃᔨ ᑖᓐᓇ ᐱᓕᕆᐊᖑᑐᐃᓐᓇᕆᐊᖃᕐᓂᖓᓂᒃ ᐊᐃᒪᔅᒥ ᓲᖃᐃᒻᒪ ᖃᓂᓐᓂᕐᓴᐅᖕᒪᑦ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᑦ ᓄᓇᖓᓂ, ᐅᖃᕐᑐᖅ ᐳᕌᓱ-ᕕᐅᕆ ᐅᐃᕖᑐᑦ ᐊᐱᕐᓱᖅᑕᐅᑎᓪᓗᒍ ᔪᓚᐃ         29-ᖑᑎᓪᓗᒍ.

“ᒪᓕᒐᖅ ᐱᔪᓐᓇᖅᑎᑦᑎᓯᒪᖕᒪᑦ ᐊᖓᔪᖅᑳᖅ ᐃᖅᑲᖅᑐᐃᔨᓄᑦ ᐃᖅᑲᖅᑐᐃᕕᒃᑰᖅᑐᒃᓴᓂᒃ ᐊᓯᐊᓂ ᐱᓕᕆᐊᕆᔭᐅᑎᑦᑎᔪᓐᓇᖅᖢᓂ ᓈᒻᒪᒐᔭᖅᐸᓐ ᖃᓄᑐᐃᓐᓇᖅ ᐱᔾᔪᑎᒋᔭᐅᔪᓄᑦ,” ᐅᖃᕐᑐᖅ.

ᑭᓯᐊᓂᓕ ᐊᐃᒪᔅᒧᑦ ᐅᐸᖃᑕᐅᔪᒃᓴᓂ ᐊᒥᓱᐃᑦ ᖃᖓᑕᔭᕆᐊᖃᕋᔭᕐᒪᑕ ᓄᓇᕕᒃᒥ ᒪᓐᑐᕆᐊᒧᓐ, ᐃᓛᓐᓂᒃᑯᑦ ᓯᓂᒃᑕᕆᐊᖃᖅᖢᑎᒃ, ᐊᒻᒪᓗ ᐃᑲᕐᕋᓂ 8-ᓂ ᐸᓯᒃᑰᕆᐊᖃᓕᕐᒥᓗᑎᒃ.

ᐊᒥᓱᑦ ᐃᓚᒋᔭᐅᓕᕐᑐᑦ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᓂ ᓈᒻᒪᒃᓴᓚᐅᙱᒻᒪᑕ ᐊᐃᒪᔅᒧ ᓅᑕᐅᓇᓱᒃᑐᒥ ᓲᖃᐃᒻᒪ ᐊᒃᑐᐊᓗᐊᕆᔭᐅᓪᓗᓂ ᓄᓇᓕᕐᔪᐊᕐᒥ ᑎᒍᔭᐅᓯᒪᔪᓄᑦ ᐊᑐᖅᑕᐅᖃᑦᑕᓗᐊᕐᑐᓂ ᐊᒻᒪ ᐱᔪᓐᓇᐅᑎᖏᓐᓂ ᓱᕋᐃᓯᒪᓐᓇᓗᐊᖅᖢᓂ ᐳᕌᓱ-ᕕᐅᕆ ᐅᖃᕐᑐᖅ.

ᔪᓚᐃ 10-ᒥ ᐊᖓᔪᖅᑳᖅ ᐃᖅᑲᖅᑐᐃᔨᐅᑉ ᒧᕆ-ᐋᓐ ᐸᑭᐊᑦ ᐊᖏᓚᕐᒥᔪᖅ ᑖᓐᓇ ᐱᓕᕆᐊᖑᓂᐊᕐᑐᖅ ᓅᑕᐅᒍᓂ ᐊᐃᒪᔅᒧᑦ ᓈᒻᒪᙱᓗᐊᕋᔭᕐᓂᖓᓂ ᐱᓕᕆᐊᖃᕋᓱᒃᑐᓄᑦ ᐊᒻᒪᓗ ᒪᓐᑐᕆᐊᒥᓐ ᐱᓕᕆᐊᖑᖁᐃᓐᓇᖅᖢᓂᐅᒃ.

“ᐅᓇ ᓈᒻᒪᓛᖑᓯᒪᔪᖅ ᐃᓱᒪᓕᐊᕆᔭᐅᔪᖅ ᓲᖃᐃᒻᒪ ᒪᓐᑐᕆᐊᓪ ᐅᐸᒐᒃᓴᐅᓂᕐᓴᐅᖕᒪᓐ ᓄᓇᕕᒃᒥᐅᓄᑦ,” ᐳᕌᓱ-ᕕᐅᕆ ᐅᖃᕐᑐᖅ.

2022-ᒥ ᐅᓂᒃᑳᓕᐊᕕᓂᕐᓂ ᐆᒧᖓ ᐱᕋᔭᒃᓯᒪᔪᓄᑦ ᓗᐊᔭᒧᑦ ᔮᓐ-ᑯᓘᑦ ᓚᑐᕋᕗᒡᒧᑦ ᐃᓱᒪᓕᐅᕆᓯᒪᓚᐅᕐᓯᒪᖕᒪᑦ   60-ᓂ ᐱᐅᓯᕚᓪᓕᖅᑎᑦᑎᔾᔪᑎᐅᓇᔭᕐᑐᓂ ᒪᓕᒐᓕᕆᓂᕐᒥᒃ ᐊᒻᒪ ᐃᓅᓱᒃᑐᓂ ᓴᐳᔾᔨᓯᒪᓂᕐᒨᕐᑐᓂᒃ ᑕᒫᓂ ᓄᓇᕕᒃᒥ.

ᐱᖁᔨᓯᒪᓚᐅᕐᑐᖅ ᑐᑭᒧᐊᖅᑎᑦᑎᔨ ᐃᖅᑲᖅᑐᐃᕕᒃᒥ ᐸᓯᔭᒃᓴᐅᑎᑦᑎᕙᑐᓂ, ᑖᒃᑯᐊᓗ ᐱᕋᔭᒍᑎᒋᔭᐅᔪᓂᒃ ᐱᓕᕆᐊᖃᖅᐸᒃᖢᑎᒃ, ᒪᓐᑐᕆᐊᒥ ᐱᓕᕆᐊᖑᕙᒡᓗᓂ ᐊᐃᒪᔅᒥᐅᙱᖔᖅᑐᖅ, ᐃᖅᑲᖅᑐᐃᔨᓂᒡᓗ ᐊᒥᒐᕐᓯᕙᒃᖢᑎᒃ ᑕᐃᒪᓐᓇᓗ ᑭᖑᕙᕆᐊᕈᑎᐅᔭᖢᓂ.

“ᐅᓇ ᐃᓱᒪᓕᐊᕆᔭᐅᔪᖅ ᐃᓱᒪᓕᐅᕈᑎᓅᖓᕙᓪᓕᐊᔪᖅ ᑕᐃᒪᓐᓇᓗ ᐱᑲᔪᕈᑎᐅᑦᑎᐊᕐᓂᕐᓴᐅᓂᐊᖅᖢᑎ ᑕᒪᓐᓇ ᑕᐅᕗᖓ ᐱᓕᕆᐊᖑᓂᐊᕆᐊᒃᓴᖓᓂᒃ,” ᐳᕌᓱ-ᕕᐅᕆ ᐅᖃᕐᑐᖅ.

ᐃᓄᒋᐊᓄᑦ ᐃᖅᑲᖅᑐᐃᕕᒃᑰᑎᑦᑎᓂᖅ ᐱᓇᓱᒍᑎᐅᔪᖅ $75 ᒥᓕᐊᓐᑖᓚᓂ ᓈᒻᒪᙱᓕᐅᕈᑎᐅᓯᒪᔪᓄᑦ ᐅᑯᓇᙵᑦ ᑯᐸᐃᒃ ᒐᕙᒪᒃᑯᖏᓐᓂ.