ᖃᐃᕐᓂᖅ ᓄᖅᑲᖅᐳᖅ ᒥᓂᔅᑕᐃᑦ ᑲᑎᒪᔨᖏᓐᓂᑦ ᓯᕗᓕᖅᑎ ᐅᖃᐅᓯᖃᖅᑎᓪᓗᒍ ᐱᓇᓱᐊᑦᑎᐊᕆᐊᖃᕐᓂᕐᒧᑦ ᐊᐅᓚᑕᐅᔾᔪᑎᓂ ᓱᕋᐃᓂᖓᓂ

For English version, see Kaernerk quits cabinet as premier cites code of conduct violations

ᐅᖃᐅᓯᖃᖅᖢᓂ “ᓱᕋᐃᓂᖓᓂ ᐱᓇᓱᐊᑦᑎᐊᕆᐊᖃᕐᓂᕐᒧᑦ ᐊᐅᓚᑕᐅᔾᔪᑎᓂ,” ᓯᕗᓕᖅᑎ P.J. ᐊᕿᐊᕈᖅ ᐅᖃᖅᐳᖅ ᐊᖅᓵᖅᓯᓚᐅᕐᓂᖓᓂ ᒪᓕᒐᓕᐅᖅᑎ ᔪᐃᓕ ᖃᐃᕐᓂᕐᒥ ᒥᓂᔅᑕᐃᑦ ᑲᑎᒪᔨᖏᓐᓂᑦ ᒥᓂᔅᑕᐃᑦ ᑲᒪᒋᔭᕆᐊᖃᖅᑕᖏᓐᓂᑦ.

“ᓂᕈᐊᖅᑕᐅᓯᒪᓪᓗᑕ ᑲᑎᒪᔨᕐᔪᐊᖑᓪᓗᑕ ᑐᕌᖅᑎᑦᑎᔪᒥ ᓄᓇᕗᒻᒥ ᒐᕙᒪᒃᑯᓐᓂ, ᒥᓂᔅᑕᐃᑦ ᑎᒍᒥᐊᖅᑕᐅᕗᑦ ᖁᑦᑎᓛᖑᔪᒥ ᐊᑐᒐᒃᓴᓂ ᐋᖅᑭᒃᑕᐅᓯᒪᓂᖏᑎᒍᑦ,” ᐊᕿᐊᕈᖅ ᐅᖃᓚᐅᖅᐳᖅ ᔭᓄᐊᕆ 17−ᒥ ᑐᓴᒐᒃᓴᓕᐊᖑᔪᒥ, ᑐᓂᓯᒃᑲᓐᓂᕐᓇᓂ ᐅᓂᒃᑳᕆᒃᑲᓐᓂᕐᓂᐅᔪᒥ ᑐᕌᖅᑎᑦᑎᓚᐅᖅᑐᒥ ᐃᓱᒪᓕᐊᖓᓐᓂ.

ᒪᓕᒃᑐᒥ ᐲᖅᑕᐅᓂᖓᓂ ᒥᓂᔅᑕᐃᑦ ᑲᒪᒋᔭᕆᐊᖃᖅᑕᖏᓐᓂᑦ, ᖃᐃᕐᓂᖅ ᐃᒻᒥᓂᒃ ᓄᖅᑲᓚᐅᖅᐳᖅ ᒥᓂᔅᑕᐃᑦ ᑲᑎᒪᔨᖏᓐᓂᑦ, ᑐᓴᒐᒃᓴᓕᐊᖅ ᐅᖃᓚᐅᖅᐳᖅ.

ᖃᐃᕐᓂᖅ, ᒪᓕᒐᓕᐅᖅᑎ ᐊᒥᑦᑐᕐᒧᑦ, ᐊᑦᑎᖅᑕᐅᓚᐅᖅᐳᖅ ᒥᓂᔅᑕᐅᓂᖓᓂ ᐃᓕᖅᑯᓯᓕᕆᔨᒃᑯᑦ ᐃᑦᑕᕐᓂᓴᓕᕆᓂᕐᒧᓪᓗ, ᒥᓂᔅᑕ ᐅᖃᐅᓯᕐᓄᑦ, ᐊᒻᒪ ᒥᓂᔅᑕ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᓯᑎᐱᕆᐅᑉ ᓄᙳᐊᓂ.

ᓯᕗᓂᐊᓂ, ᓄᖅᑲᖅᑎᑕᐅᓚᐅᑲᓚᐅᖅᐳᖅ ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑎᐅᓂᖓᓂ ᐃᓄᖕᓃᑎᓪᓗᒍ ᐋᖓᔮᕐᓂᖓᓄᑦ, ᐋᖓᔮᕐᓂᕋᖅᑕᐅᓪᓗᓂ ᒪᓕᒐᓕᐅᕐᕕᖕᒥ.

ᑕᐃᔅᓱᒪᓂ, ᐅᖃᓚᐅᖅᐳᖅ ᒪᓕᒐᓕᐅᕐᕕᖕᒥ ᑲᒪᒋᔭᖃᓕᕐᓂᖓᓂ ᖃᓄᐃᓕᐅᕐᓂᖓᓂ ᐊᒻᒪᓗ “ᕿᓂᕋᓱᐊᖅᐳᖓ ᐃᑲᔪᖅᑕᐅᓂᕐᒥ ᐅᐃᕆᓯᒪᓂᓐᓄᑦ … ᐊᖑᑕᐅᕗᖓ ᓱᓕᓪᓗᖓ ᐊᒻᒪ ᕿᓂᓪᓚᕆᖕᓂᐊᖅᐳᖓ ᐃᑲᔪᖅᑕᐅᓂᕐᒥ.”

ᓯᕗᓕᖅᑎᐅᑉ ᑐᖏᓕᖓ ᐹᒥᓚ ᒍᕉᔅ ᒥᓂᔅᑕᐅᓚᐅᑲᖕᓂᐊᖅᐳᖅ ᐃᓕᖅᑯᓯᓕᕆᔨᒃᑯᑦ ᐃᑦᑕᕐᓂᓴᓕᕆᓂᕐᒧᓪᓗ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᒥᓂᔅᑕᐅᓚᐅᑲᖕᓂᐊᖅᐳᖅ ᑲᒪᒋᔭᖃᖅᑐᒥ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ, ᐅᖃᓚᐅᖅᐳᖅ ᐊᕿᐊᕈᖅ ᑐᓴᒐᒃᓴᓕᐊᖑᔪᒥ.