ᑲᕕᓐ ᑲᑉᓗᑦᓯᐊᒃ ᐃᓄᐃᑦ ᑕᐱᕇᒃᑯᓐᓄᑦ ‘ᓄᑖᙳᕆᐊᖅᑎᑦᑎᓂᕐᒧᑦ’ ᐊᖓᔪᖅᑳᖑᔪᒪᓂᖃᕐᑐᖅ

For English version, see Kevin Kablutsiak vows to be president of ‘renewal’ at ITK

ᑲᕕᓐ ᑲᑉᓗᑦᓯᐊᒃ ᓂᕈᐊᒐᒃᓴᐅᓕᕐᑐᖅ ᐅᕙᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᒃᓴᒥ ᓂᕈᐊᓕᕐᐸᑕ, ᐃᓱᒪᓪᓗᓂ “ᓄᑖᙳᕆᐊᖅᑎᑦᑎᓂᕐᒥ” ᐊᖓᔪᖅᑳᖑᓕᕈᓂ.

“ᐃᓱᒪᔪᖓ ᐅᓇ ᖃᓄᐃᓕᐅᕐᓇᕈᑎᐅᓂᖓᓂ, ᓄᑖᙳᕆᐊᖅᑎᑦᑎᓂᐅᓗᓂ, ᑲᑎᖃᑎᒌᒃᑲᓐᓂᕐᓗᑎᒃ ᐊᒻᒪᓗ ᐃᓅᓂᑦᑎᓐᓂ ᐅᔾᔨᕈᓱᒃᑲᓐᓂᓕᕐᓗᑕ,” ᐅᖃᓚᐅᕐᑐᖅ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᐋᒐᓯ 22-ᒥ.

“ᐊᒻᒪᓗ ᓂᕈᐊᒐᒃᓴᐅᓕᕐᖢᖓ ᐃᓚᒋᔭᐅᔪᒪᒐᒪ ᓄᑖᙳᕆᐊᕋᓱᒃᑐᓂᒃ.”

ᑲᑉᓗᑦᓯᐊᒃ, 47, ᓯᕗᓪᓕᖅᐹᖑᔪᖅ ᓂᕈᐊᒐᒃᓴᐅᓂᕋᖅᖢᓂ ᓂᕈᐊᖅᑕᐅᓯᒪᔪᒥ ᓇᐃᑕᓐ ᐅᐱᐊᑦ ᐃᓂᖓᓄᐊᕋᓱᒃᖢᓂ, ᑖᓐᓇᓕ ᐊᖓᔪᖅᑳᕆᔭᐅᓯᒪᓕᖅᖢᓂ ᐊᕐᕌᒍᓂ ᖁᓕᓂ.

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᕐᑎᖓ ᐹᑐᕇᓯᐊ ᑕ’ᓲᔭ ᐅᖃᕈᒪᓚᐅᙱᑦᑐᖅ ᐊᓯᐊᓂ ᓂᕈᐊᒐᒃᓴᙳᕐᑐᖃᕆᐊᒃᓴᖓᓂ. ᓂᕈᐊᖅᑐᓕᕆᔭᐅᔪᖅ ᑭᐅᓚᐅᙱᒻᒥᔪᖅ ᐊᐱᕆᔭᐅᓇᓱᒃᑲᓗᐊᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐊᔾᔨᒌᙱᑦᑑᑎᓂ ᐃᖅᑲᓇᐃᔮᖃᕐᓯᒪᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᑲᑉᓗᒃᓯᐊᒃ ᐃᖅᑲᓇᐃᔮᕕᓂᖏᑦ ᐊᓯᖃᕐᒥᔪᑦ ᐊᔾᔨᒌᙱᑦᑑᑎᓂ ᑲᑐᔾᔨᖃᑎᒌᓂᒃ ᐅᑯᓇᓂ ᓄᓇᕗᑦ ᑐᙵᕕᒃᑯᓐᓂ, ᕘᔅᓯ ᐃᐅ ᐊᒻᒪ ᑲᓃᑎᐊᓐᓄᐊᑦᑯᓐᓂ. ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓂᑰᓪᓗᓂᓗ ᐅᑯᓄᖓ ᐅᑭᐅᕐᑕᖅᑐᕐᒥ ᐱᓕᕆᐊᖃᕈᒪᓂᕐᒧᑦ ᓵᓚᒃᓴᐅᓯᐊᓕᕆᔨᓄᑦ ᐊᒻᒪᓗ ᐊᐅᓚᑦᑎᔨᐅᓂᑰᓪᓗᓂ ᓰᐲᓰ ᐅᑭᐅᕐᑕᖅᑐᕐᒥ.

ᒫᓐᓇᓕ ᐱᓕᕆᐊᖃᕐᑐᖅ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᓂᐅᕐᕈᑎᖃᕋᓱᖕᓂᕐᒧᑦ ᖃᐅᔨᒪᔨᐅᓪᓗᓂ ᐅᑯᓄᖓ ᓯᕗᒧᑦ ᓴᓘᓴᓐᔅ. ᖃᑉᓗᑦᓯᐊᖅ ‘ᓵᓚᖃᕋᓱᙱᑦᑐᖅ’ ᑭᓇᑐᐃᓐᓇᕐᒥᒃ, ᐅᖃᕐᑐᖅ.

“ᐱᐅᒃᓴᙱᓐᓂᕐᒨᙱᑦᑐᖓ ᓇᐃᑕ ᖃᓄᐃᓕᐅᕐᓯᒪᔭᖏᓐᓂ, ᐃᓱᒪᓪᓗᖓᓗ ᐱᓕᕆᑦᑎᐊᕐᓯᒪᓂᖓᓂ ᑲᓇᑕᒥ ᐃᓄᖕᓂ ᑭᒡᒐᖅᑐᐃᓂᖓᓄᑦ,” ᐅᖃᕐᑐᖅ.

“ᑐᙵᕕᐅᔪᓐᓇᖅᑐᒥ ᐋᖅᑭᒃᓯᔪᒪᒐᒪ ᑭᓯᐊᓂᓕ ᐊᔾᔨᒋ5ᑕᖓᒎᕐᓗᖓ.”

ᑲᑉᓗᑦᓯᐊᒃ ᐅᖃᓚᐅᕐᑐ ᑕᒪᐃᓐᓄ ᐳᓛᕈᒪᓂᕋᖅᖢᓂ ᑎᓴᒪᓄ ᐊᕕᒃᑐᕐᓯᒪᓂᒃᑰᖓᔪᓂ ᓄᓇᓕᖕᓂ: ᓄᓇᕗᑦ, ᓄᓇᕗᑦ, ᐃᓄᕕᐊᓗᐃᑦ ᓄᓇᖓi ᐊᒻᒪ ᓄᓇᑦᓯᐊᕗᑦ, ᐊᖓᔪᖅᑳᙳᕐᑎᑕᐅᒍᓂ ᐅᓪᓗᑦ 100 ᐃᓗᖓᓂ.

ᐅᓇ “ᑐᓴᑲᑕᒐᓱᖕᓂᕐᒨᖓᔪᖅ” ᐃᓚᒋᔭᐅᓪᓗᓂ ᖃᓄᐃᓕᐅᕐᓂᐊᕈᒪᔭᖏᓐᓂ ᐃᓄᐃᑦ ᑕᐱᕇᒃᑯᓐᓂ ᓄᓇᓕᖕᓂ ᐃᓱᒪᒋᔭᐅᓯᒪᔪᓂᒃ. “ᑲᓇᑕᒥ ᓯᕗᓕᐅᕐᑎᐅᓂᖅ ᖃᓂᑦᑐᒦᔾᔪᑎᐅᔭᕆᐊᓕᒃ ᐅᖓᓯᒃᑐᒥᐅᙱᑦᑐᖅ,” ᑲᑉᓗᑦᓯᐊᒃ ᐅᖃᕐᑐᖅ.

ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᖏᓐᓄᑦ ᐅᑯᑎᑐᓇᖅ ᐃᓄᐃᑦ ᓄᓇᖓᓂ ᓯᓚᒃᑐᖅᓴᕐᕕᐊᓗᖓᓂ, ᐅᖃᓚᐅᕐᑐᖅ ᕿᒥᕐᕋᐅᕈᓂ ᐃᓱᒪᓕᐅᕆᔪᓐᓇᖅᖢᓂ ᑖᒃᑯᐊ ᖃᓄᖅ ᐱᓕᕆᔭᕆᐊᖃᕐᓂᖏᓐᓂ, ᐅᖃᒃᑲᓐᓂᖅᖢᓂ ᖃᓄᐃᓕᐅᕈᑎᒃᓴᐃᓪᓗ ᐃᓄᖕᓂ ᑐᓴᑲᑕᖕᓂᕐᒨᖓᓇᔭᖅᖢᑎᒃ.

“ᐃᓱᒪᒐᒪ ᐃᑲᔪᕈᓐᓇᕋᔭᕐᓂᓐᓂ — ᓯᕗᓕᐅᕐᑎᐅᓂᕐᒥ ᐃᓱᒪᒋᔭᖃᑦᑎᐊᕐᓂᒃᑯ ᐊᒻᒪ ᐱᓕᕆᖃᑎᖃᕐᓂᒃᑯᑦ,” ᐅᖃᕐᑐᖅ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᕆᓛᕐᑕᖓ ᓂᕈᐊᕐᑕᐅᓛᕐᑐᖅ ᓯᑎᐱᕆ 18-ᒥ ᐅᑯᓇᙵ ᑎᓴᒪᓂ ᐃᓄᐃᑦ ᑲᑐᔾᔨᖃᑎᒌᓂ ᐊᒻᒪᓗ ᒪᕐᕉᖕᓂ ᓂᕈᐊᒐᒃᓴᐅᖃᑕᐅᓂᐊᕐᑐᓂᒃ ᐊᕕᒃᑐᖅᓯᒪᓂᒃᑯᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓᓄᑦ ᑐᒡᓕᕆᔭᐅᓂᐊᕐᑐᒥ.

ᓂᕈᐊᒐᒃᓴᐃᑦ ᐃᓅᔭᕆᐊᖃᕐᑐᖅ ᐊᕐᕌᒍᖃᕐᓗᑎᒃ 18 ᐅᖓᑖᓄᑦ. ᓂᕈᐊᒐᒃᓴᐅᔪᓐᓇᖅᖢᑎᒃ ᑲᑐᔾᔨᖃᑎᒌᓄᑦ ᑭᒡᒐᖅᑐᐃᔨᐅᖃᑕᐅᔪᒥ ᐅᕝᕙᓘᓐᓃᑦ ᑎᑎᕋᕐᓗᑎᒃ ᓯᕗᓕᐅᖅᑎᐅᓯᒪᓂᖏᑦᑕ ᒥᒃᓵᓂ, ᑕᐃᒪᓐᓇ ᓂᕈᐊᒐᒃᓴᐅᔪᒪᔪᑦ ᒪᓕᒋᐊᖃᖅᖢᑎᒃ.

ᓂᕈᐊᒐᒃᓴᐅᓂᖅ ᐃᓱᖃᕐᓂᐊᕐᑐᖅ ᐋᒐᓯ 28-ᒥ 5:00-ᒥ ᐅᓐᓄᓴᒃᑯᑦ ᑲᓇᖕᓇᕐᒥᐅᖅ ᖃᐅᔨᓴᐅᑎᖓᒍᑦ.