ᑭᙵᓂ ᓴᓇᐅᒐᓕᕆᔨᖓ ᓇᒃᓴᖅᐳᖅ ᐃᓄᐃᑦ ᐅᓂᒃᑳᖅᑐᐊᖏᓐᓂ ᓯᑦᓂ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ
ᓂᖏᐅᑯᓗᒃ ᑏᕕᐅᑉ ᑎᑎᕋᐅᔭᒐᖓ ᓴᖅᑭᔮᖅᑎᑕᐅᓂᐊᖅᐳᖅ ᐃᒡᓗᕐᔪᐊᑉ ᑎᖏᕋᐅᑎᖏᓐᓄᑦ 2026−ᓗᒃᑖᒥᑦ
ᑭᙵᓂ ᑎᑎᕋᐅᔭᖅᑎ ᓂᖏᐅᑯᓗᒃ ᑏᕕ ᓇᖏᖅᐳᖅ ᓯᕗᓂᐊᓂ ᓴᓇᙳᐊᖅᓯᒪᔪᓂᒃ ᑕᕐᕆᔭᓕᐅᖅᑕᐅᓂᖓᓂ ᑎᑎᕋᐅᔭᒐᕐᓂ ᐃᓄᐃᑦ ᐅᓂᒃᑳᖅᑐᐊᖓᓐᓂ ᐅᒃᐱᒡᔪᐊᖅ ᐊᒻᒪ ᑐᓗᒐᖅ, ᓴᖅᑭᔮᖅᑎᑕᐅᔪᒥ ᑎᖏᕋᐅᑎᖏᓐᓄᑦ ᓯᑦᓂ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ ᐃᓚᒋᔭᐅᓪᓗᓂ ᐊᓪᓚᓄᑦ ᑕᑯᒃᓴᐅᑎᑕᐅᓂᖓᓂ ᐸᑐ ᒋᓕ: ᐅᓂᒃᑳᖅᑐᐊᖅᑏᑦ. ᐱᒋᐊᓚᐅᖅᐳᖅ ᑎᓯᐱᕆ 17−ᒥ ᐊᒻᒪ ᓂᐱᓕᖅᑎᓪᓗᒍ. (ᑲᓵᓐᑐᕋ ᕼᐋᓇᒐᓐ ᐊᔾᔨᖁᑎᖓ)
ᓂᖏᐅᑯᓗᒃ ᑏᕕᐅᑉ ᓴᓇᙳᐊᖅᓯᒪᔪᓂᒃ ᑕᕐᕆᔭᓕᐅᖅᑕᐅᓂᖓᓂ ᑎᑎᕋᐅᔭᒐᖏᑦ ᐃᓄᐃᑦ ᐅᓂᒃᑳᖅᑐᐊᖓᓐᓂ ᐅᒃᐱᒡᔪᐊᖅ ᐊᒻᒪ ᑐᓗᒐᖅ, ᓴᖅᑭᔮᖅᑎᑕᐅᔪᒥ ᑎᖏᕋᐅᑎᖏᓐᓄᑦ ᓯᑦᓂ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ ᐃᓚᒋᔭᐅᓪᓗᓂ ᐊᓪᓚᓄᑦ ᑕᑯᒃᓴᐅᑎᑕᐅᓂᖓᓂ ᐸᑐ ᒋᓕ: ᐅᓂᒃᑳᖅᑐᐊᖅᑏᑦ. (ᒫᒃ ᐳᑯᐊᓂ ᐊᔾᔨᖁᑎᖓ)
For English version, see Kinngait artist brings Inuit legend to Sydney Opera House
ᑭᙵᓂ ᑎᑎᕋᐅᔭᖅᑎ ᓂᖏᐅᑯᓗᒃ ᑏᕕ ᐅᓂᒃᑳᕆᕗᖅ ᐅᓂᒃᑳᖅᑐᐊᒥ ᐅᒃᐱᒡᔪᐊᖅ ᐊᒻᒪ ᑐᓗᒐᖅ ᖁᙱᐊᖅᑎᐅᔪᓂ ᑎᖏᕋᐅᑎᖏᓐᓂᑦ ᓯᑦᓂ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ ᐋᔅᑐᕋᐃᓕᐊᒥ.
ᑏᕕᐅᑉ ᑎᑎᕋᐅᔭᒐᖏᑦ ᑕᑯᒃᓴᐅᑎᑕᐅᓂᐊᖅᐳᑦ ᑎᖏᕋᐅᑎᖏᓐᓂᑦ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ ᐃᓚᒋᔭᐅᓗᓂ ᐅᓐᓄᑕᒫᖅ ᐊᓪᓚᓄᑦ ᑕᑯᒃᓴᐅᑎᑕᐅᓂᐅᔪᒥ, ᐸᑐ ᒋᓕ: ᐅᓂᒃᑳᖅᑐᐊᖅᑏᑦ. ᐱᒋᐊᓚᐅᖅᐳᖅ ᑎᓯᐱᕆ 17−ᒥ ᐊᒻᒪ ᐃᖏᕐᕋᓂᐊᖅᐳᖅ ᒪᓕᒃᑐᒧᑦ ᐊᕐᕌᒍᒧᑦ.
6-ᒥᓂᑦᒥ ᓴᓇᙳᐊᖅᓯᒪᔪᓂᒃ ᑕᕐᕆᔭᓕᐅᖅᑕᐅᓂᖓᓂ, ᐱᓕᕆᐊᖑᓚᐅᖅᑐᒥ ᓯᑦᓂᒥ-ᑐᙵᕕᓕᖕᒥ ᐱᒡᒍᔾᔨᔨᓂᑦ ᕚᓐᑖᓪᒧᑦ, ᐃᓚᖃᖅᐳᖅ ᑏᕕᐅᑉ ᐱᓕᕆᐊᖏᑦ ᐊᒥᐊᕆᔭᐅᓂᑯᓂ ᒎᓂᔮᓐᑎ ᐃᓄᑐᖃᕐᒥ ᒨᕕᓐ ᓯᑐᕇᑦᒧᑦ.
ᒎᓂᔮᓐᑎ ᓄᓇᖃᖅᑳᖅᓯᒪᔪᓂ ᐃᓅᕗᑦ ᑭᒻᐳᓕ ᐊᕕᒃᑐᖅᓯᒪᓂᐅᔪᒥ ᐱᓇᖕᓇᕐᒥ ᐋᔅᑐᕋᐃᓕᐊᒥ.
“ᑲᒪᓇᖅᐳᖅ ᑕᒪᒃᑭᑦ ᐱᓕᕆᐊᕗᑦ ᐊᑕᐅᓯᙳᖅᑎᑕᐅᔪᓐᓇᕐᓂᖏᓐᓂ, ᐅᖃᖅᑕᒥᓂᑦ, ᒪᕐᕉᖕᓂ ᓄᓇᕐᔪᐊᑉ ᖄᖓᓂ ᐊᑖᓂᓗ,” ᐅᖃᓚᐅᖅᐳᖅ ᑏᕕ ᐊᐱᖅᓱᖅᑕᐅᓂᐅᔪᒥ ᕙᐃᔅᐳᒃᑯᑦ ᐅᖃᐅᓯᒃᓴᓕᐅᕆᓂᒃᑯᑦ.
ᑕᑯᒃᓴᐅᑎᑕᐅᓂᐅᔪᑦ ᐱᓕᕆᐊᖏᓐᓂ ᐊᐅᓚᓂᐊᖅᐳᑦ ᐅᓐᓄᑕᒫᖅ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓐᓂ ᑎᖏᕋᐅᑎᖏᓐᓂᑦ — ᓴᐅᓂᓕᒃᑎᑐᑦ-ᓴᓂᒪᓂᓕᒃ ᓴᓇᓯᒪᔪᒥ ᐃᒡᓘᑉ ᖄᕆᔭᖓᓂ — ᑕᐃᑲᓂᓗᒃᑖᖅ 2026−ᒥ.
ᑏᕕ ᑐᓴᕋᒥ ᑎᑎᕋᐅᔭᒐᖏᑦ ᑕᑯᒃᓴᐅᑎᑕᐅᓂᐊᕐᓂᖏᓐᓂ ᐆᒥᖓ ᐃᓕᓴᕆᔭᐅᓯᒪᔪᒥ ᓄᓇᒥ ᓇᓗᓇᐃᒃᑯᑕᐅᔪᒥ, ᐅᖃᓚᐅᖅᐳᖅ ᐃᒃᐱᒍᓱᓚᐅᖅᐳᖅ “ᐅᒃᐱᕈᓱᙱᓐᓂᐅᔪᒥ ᐊᒻᒪ ᐊᓱᐃᓛᒃ ᖁᕕᐊᓐᓂᑐᐃᓐᓇᐅᔪᒥ.”
ᐊᐅᓪᓛᓚᐅᖅᐳᖅ ᐋᔅᑐᕋᐃᓕᐊᒧᑦ ᓄᕕᐱᕆ 20−ᒥ ᐊᓂᖓᓗ ᑕᕐᕆᔭᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ.
ᑏᕕ ᐅᖃᓚᐅᖅᐳᖅ ᐊᑯᓂᐅᔪᒥ ᖃᖓᑕᓂᐅᔪᒥ ᐋᔅᑐᕋᐃᓕᐊᒧᑦ ᑲᑉᐱᐊᓇᓚᐅᖅᐳᖅ, “ᖃᖓᑕᓲᒦᓚᐅᖅᓯᒪᙱᒻᒪᑦ ᖃᖓᑕᓂᐊᖅᑐᒥ ᐃᑲᕐᕋᑦ 13 ᐅᖓᑖᓄᑦ,” ᑭᓯᐊᓂ ᐊᐅᓪᓛᕐᓂᖅ ᑲᑎᖃᑎᖃᕐᓂᐅᓚᐅᖅᐳᖅ ᐊᑖᑕᒋᓚᐅᖅᑕᖓᓂ, ᔪᐊᓇᓯ ᓵᓚᒨᓂᒥᑦ.
ᓵᓚᒨᓂ, ᐃᓅᔪᓐᓃᓚᐅᖅᓯᒪᔪᒥ 1998−ᒥ, ᐃᖅᑲᓇᐃᔭᓚᐅᖅᐳᖅ ᑎᑎᕋᐅᔭᖅᑎᐅᓪᓗᓂ ᐊᒻᒪ ᐃᑲᔪᓚᐅᖅᐳᖅ ᑎᒥᙳᖅᑎᑦᑎᓂᕐᒥ ᐱᓇᖕᓇᒥ ᕿᑭᖅᑖᓗᖕᒥ ᐃᓄᖕᓄᑦ ᑯᐊᐸᒃᑯᓐᓂ. ᐳᓚᕋᓚᐅᖅᓯᒪᕗᖅ ᐋᔅᑐᕋᐃᓕᐊᒧᑦ 1960−ᖏᓐᓂ ᓄᙳᐊᓂ ᐊᒻᒪ ᐱᓕᕆᓂᑰᑐᖃᓚᐅᖅᐳᖅ ᐃᓄᐃᑦ ᑕᕐᕆᔭᓕᐊᖏᓐᓂ ᐊᒻᒪ ᑕᓚᕖᓴᒥᑦ.
ᑏᕕᐅᑉ ᓴᓇᙳᐊᖅᓯᒪᔪᓂᒃ ᑕᕐᕆᔭᓕᐅᖅᑕᐅᓂᖓᓂ ᐆᒻᒪᖅᑎᑦᑎᕗᖅ ᐃᓄᐃᑦ ᐅᓂᒃᑳᖅᑐᐊᖓᓂ ᐅᒃᐱᒡᔪᐊᖅ ᐊᒻᒪ ᑐᓗᒐᖅ, ᐅᓂᒃᑳᖅᑐᐊᖅ ᑏᕕ ᓯᕗᓪᓕᕐᒥ ᑐᓴᓚᐅᖅᓯᒪᔭᖓᓂ ᐅᓂᒃᑳᖅᑐᐊᖅᑕᐅᓪᓗᓂ ᐃᓄᑐᖃᕐᒧᑦ.
“ᐅᕘᓇ ᓴᓇᙳᐊᖅᓯᒪᔪᓂᒃ ᑕᕐᕆᔭᓕᐅᖅᑕᐅᓂᖓᓂ, ᕿᒥᕐᕈᕗᖓ ᖃᓄᖅ ᑐᓗᒐᐅᑉ ᕿᑲᕈᓐᓇᙱᑦᑐᒥ ᑕᕐᓂᖓᓂ ᐊᒻᒪ ᐅᒃᐱᒡᔪᐊᑉ ᓴᐃᓕᓂᖓᓂ ᐃᓱᒪᑐᓂᖓᓂ ᑕᑯᒃᓴᐅᑎᑦᑎᓂᖓᓂ ᐃᓄᐃᑦ ᐊᑐᖅᐸᒃᑕᖏᓐᓂ ᐊᒻᒪ ᐃᓕᓐᓂᐊᕈᑕᐅᔪᓂ ᓇᓂᔭᐅᔪᓐᓇᖅᑐᓂ ᐱᖅᑯᓯᑐᖃᑦᑎᓐᓂ,” ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.
ᑏᕕ ᐅᖃᓚᐅᖅᐳᖅ ᐅᓂᒃᑳᖅᑐᐊᖅ ᐱᓯᒪᐃᓐᓇᖅᓯᒪᕙᖓ ᑕᐃᒪᙵᓂ ᓱᕈᓯᐅᓂᖓᓂ.
“ᖃᔅᓯᐊᕐᔪᑐᐃᓐᓇᐃᑦ ᐅᓂᒃᑳᖅᑐᐊᑦᑎᐊᕈᓐᓇᖅᐳᑦ [ᐅᑯᓂᖓ ᐅᓂᒃᑳᖅᑐᐊᓂ], ᐱᓰᑦ ᐊᒻᒪ ᐊᔮᔮᑦ. ᐅᓂᒃᑳᖅᑐᐊᑦ ᐆᒪᑎᑕᐅᓂᖏᓐᓂ ᐱᒻᒪᕆᐅᕗᖅ ᐸᐸᑦᑎᓂᕐᒥ ᐅᖃᐅᓯᑦᑎᓐᓂ,” ᐅᖃᓚᐅᖅᐳᖅ, ᖁᔭᓕᓂᖃᖅᖢᓂ ᑭᙵᓂ ᓴᓇᐅᒐᓕᕆᔨ ᐊᒻᒪ ᐅᓂᒃᑳᖅᑐᐊᖅᑎ ᒥᐊᓕᐊ ᔮᒥ, ᐃᓅᔪᓐᓃᓚᐅᖅᑐᒥ 2006−ᒥ, ᑲᔪᖏᖅᓴᐃᔨᐅᓂᖓᓂ ᑎᑎᕋᐅᔭᖅᑕᖏᓐᓂ.
ᑕᑯᒃᓴᐅᑎᑕᐅᓂᐅᔪᖅ ᑲᑐᔾᔨᖃᑎᒌᖕᓂᐅᕗᖅ ᐅᑯᓇᓂ ᓯᑦᓂ ᓂᔾᔭᐅᓯᔭᕐᓂᕐᒧᑦ ᐃᒡᓗᖁᑎᖓᓄᑦ, Biennale of ᓯᑦᓂᒥ ᐊᒻᒪ ᐱᐊᕆᔅᒥ-ᑐᙵᕕᓕᖕᒥ ᐃᓕᓐᓂᐊᕐᕕᐅᔪᒥ Fondation Cartier pour l’art contemporain, ᑳᑎᐊᐃ ᑐᙵᕕᐅᔪᖅ ᒫᓐᓇᐅᔪᒥ ᓴᓇᐅᒐᓕᕆᓂᕐᓂ.
ᓯᕗᓪᓕᖅᐹᖑᙱᓚᖅ ᑏᕕᐅᑉ ᑎᑎᕋᐅᔭᒐᖏᑦ ᑕᑯᒃᓴᐅᑎᑕᐅᓂᖏᓐᓂ ᓄᓇᕐᔪᐊᓕᒫᒥ. 2024−ᒥ, 26−ᖑᔪᓂ ᑎᑎᕋᐅᔭᖅᑕᖏᓐᓂ ᑕᑯᒃᓴᐅᑎᑕᐅᓚᐅᖅᐳᑦ ᑕᑯᒃᓴᐅᑎᑕᐅᓂᐅᔪᒥ ᐅᓂᒃᑳᖅᑐᐊᓂ ᑭᙵᓂ ᑲᓇᑕᐅᑉ ᐃᒡᓗᖁᑎᖓᓄᑦ ᓚᓐᑎᓐ, ᐃᖕᓚᓐᒥ.
ᑏᕕ ᐱᖃᕆᕗᖅ 47−ᓂ ᑎᑎᕋᐅᔭᒐᖏᓐᓂ ᐅᐃᓂᐱᐊᒡ ᓴᓇᐅᒐᓕᕆᓂᕐᒧᑦ ᑕᑯᔭᒐᖃᕐᕕᖓᓂ-ᖃᐅᒪᔪᖅ ᑲᑎᙵᓂᐅᔪᒥ ᐊᒻᒪᓗ 2023−ᒥ ᓵᓚᖃᓚᐅᖅᐳᖅ ᐃᓄᐃᑦ ᓴᓇᐅᒐᖏᓐᓂ ᑐᙵᕕᐅᔪᒥ ᕿᓐᓄᐊᔪᐊᖅ ᐋᓯᕙᒥ ᐃᖅᑲᐅᒪᓂᐅᔪᒥ ᓵᓚᖃᐅᓯᐊᒥᑦ, ᐃᓚᖃᖅᑐᒥ ᐃᓄᑑᓪᓗᓂ ᑕᑯᒃᓴᐅᑎᑕᐅᓂᐅᔪᒥ ᑕᑯᔭᒐᖃᕐᕕᖕᒥ ᑕᒪᑐᒪᓂ ᐅᑭᐊᒃᓵᖑᔪᒥ.
ᑏᕕ ᐅᖃᓚᐅᖅᐳᖅ ᖁᔭᓕᕗᖅ “ᐱᔪᒪᓂᕆᔭᐅᓂᖓᓂ ᐋᔅᑐᕋᐃᓕᐊᒥᖑᑕᓂ ᐃᓄᖏᓐᓂ ᐃᓕᓯᓚᐅᖅᑐᓂ ᓴᓇᐅᒐᓂ ᑲᑎᑕᐅᓪᓗᑎᒃ ᐊᒻᒪ ᐆᒻᒪᖅᑎᑕᐅᓪᓗᑎᒃ, ᐊᒻᒪ ᑐᙵᓇᕐᓂᐅᔪᒥ ᑕᑯᒃᓴᐅᑎᑕᐅᓚᐅᖅᑐᒥ.”
“ᐊᒻᒪ ᑭᖑᓪᓕᖅᐹᖑᔪᒥ ᒥᑭᓛᖑᙱᑦᑐᒥ, ᑕᐃᔅᓱᒧᖓ ᓇᒡᓕᒋᔭᓐᓄᑦ ᐅᖃᓚᐅᖅᑐᒥ ᑲᔪᓰᓐᓇᖁᔨᓪᓗᓂ, ᑭᖑᓂᖃᖅᐳᑎᑦ,” ᐅᖃᓚᐅᖅᐳᖅ.
(0) Comments