ᑭᖓᐃᑦ ᑎᑎᕋᐅᔭᒐᖅᑎᖓ ᖁᕕᐊᓲᑎᒋᔭᐅᕗᖅ ᕇᑑ ᕼᐋᓪᒥ

For the English version of this story, please see Kinngait artist honoured with award at Rideau Hall ceremony.

ᐊᕐᕌᒍᑲᓴᐅᓕᕐᑐᓂᒃ 30-ᓂ ᓲᕕᓇᐃ ᐊᓲᓂ ᐊᑐᖃᑦᑕᕐᓯᒪᔪᖅ ᑕᕐᓴᓕᖕᓂ ᑎᑎᕋᐅᑎᓂ ᐊᒻᒪ ᐃᒪᓕᖕᓂ ᑎᑎᕋᐅᔭᖅᖢᓂ ᐅᑭᐅᕐᑕᖅᑐᕐᒥ ᓄᓇᙳᐊᖢᓂ ᐊᒻᒪ ᐃᓄᐃᑦ ᐃᓅᓯᖏᓐᓂ ᑎᑎᕋᐅᔭᖅᖢᓂ.

ᓄᕕᐱᕆ 14-ᒥ, ᑭᖓᐃᑦ ᑎᑎᕋᐅᔭᒐᖅᑎᖓ ᖁᕕᐊᓲᑎᒋᔭᐅᓚᐅᕐᑐᖅ ᐱᓕᕆᐊᒥᓄᑦ ᑐᓂᔭᐅᑎᓪᓗᒋ ᑎᑎᕋᐅᔭᒐᖅᑎᐅᓂᕐᒧᑦ ᐃᓕᓴᕆᔭᐅᔾᔪᑎᒥ (Artistic Achievement Award) ᒐᕙᓇ ᔭᓄᕈᓪ ᒥᐊᓕ ᓴᐃᒪᓐᒧᑦ ᖁᕕᐊᓲᑎᖃᖅᑎᓪᓗᒋᑦ ᕇᑑ ᕼᐋᓪᒥ ᐋᑐᕚᒥ.

ᐊᓲᓇ ᐃᓚᒋᔭᐅᔪᖅ 8-ᓂ ᑐᓂᔭᐅᔪᓂᒃ ᑕᒪᑐᒪᓂ ᐊᕐᕌᒍᒥ ᐆᒥᖓ ᒐᕙᓇ ᔭᓄᕉᑉ ᐃᓕᓴᕆᔭᐅᔾᔪᑎᐊᓂ ᑕᑯᔭᒐᒃᓴᓄᑦ ᐊᒻᒪ ᑐᓴᐅᒪᔭᐅᔭᕆᐊᓕᖕᓄᑦ ᐱᓕᕆᐊᓄᑦ, ᐊᒻᒪ ᐱᖓᔪᒋᔭᐅᓪᓗᓂ ᐃᓄᒃ ᐃᓕᓴᕆᔭᐅᔾᔪᑎᒥ ᑐᓂᔭᐅᔪᓂ.

ᔨᕐᒪᐃᓐ ᐊᕐᓇᒃᑕᐅᔪᒃ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ 2021-ᒥ, ᐊᒻᒪᓗ ᐅᓇᐅᓚᐅᕐᓯᒪᔪᖅ ᑭᓄᔪᐊᒃ ᐋᓯᕙᒃ 2008-ᒥ.

“ᐱᓕᕆᓂᕆᔭᐃᑦ ᓴᙱᔪᐊᓘᒻᒪᑦ,” ᓴᐃᒪᓐ ᐅᖃᐅᔾᔨᓚᐅᕐᑐᖅ ᑐᓂᔭᐅᔪᓄᑦ ᐊᒻᒪ ᑕᐅᑐᒋᐊᖅᑐᕐᓯᒪᔪᓄᑦ.

“ᑎᑎᕋᐅᔭᒐᕐᓂᖅ ᐃᓱᒪᒃᑯᑦ ᐊᑯᑦᑐᓂᐅᔪᓂ ᐋᖅᑭᒃᓯᒪᔾᔪᑎᐅᕗᑦ ᐊᓯᐊᒍᑦ ᑕᐃᒪᐃᓐᓇᔭᙱᖢᑎᒃ.”

ᐋᖅᑭᒃᑕᐅᓂᑰᓪᓗᓂ ᑲᓇᑕᒥ ᑲᑎᒪᔨᕐᔪᐊᓄᑦ ᑎᑎᕋᐅᔭᒐᓕᕆᓂᕐᒧᑦ 1999-ᒥ, ᐅᓇ ᒐᕙᓇ ᔭᓄᕈ ᐃᓕᓴᕆᔭᐅᔾᔪᑎᖏ ᒪᑯᓄᖓ ᑕᑯᔭᒐᒃᓴᓄᑦ ᐊᒻᒪ ᑐᓴᐅᒪᔭᐅᔭᕆᐊᓕᖕᓄᑦ ᐱᓕᕆᐊᓄᑦ ᐃᓕᓴᕆᔭᐅᔾᔪᑎᒋᔭᐅᔪᖅ ᐱᓕᕆᐊᕆᔭᐅᔪᓄᑦ ᐊᒻᒪ ᑕᑯᔭᒐᒃᓴᓕᕆᓂᕐᒨᖓᔪᓄᑦ ᑲᓇᑕᒥ.

ᐊᑐᓂ ᓵᓚᒃᓴᖅᑐᖅ ᑐᓂᔭᐅᓚᐅᕐᑐᖅ ᐅᔭᒥᒃᑕᐅᓚᐅᕐᑐᖅ ᐊᒻᒪᓗ $25,000 ᓴᓚᒃᓴᐅᓯᐊᕐᒥ.

ᐃᓕᓴᕆᔭᐅᔾᔪᑎᖓᓂ ᐱᐊᓪᓚᓚᐅᖅᖢᓂ, ᐊᓲᓇ ᐅᐸᒃᓯᒪᔪᓄᑦ ᐃᓄᒃᑎᑐᑦ ᐅᖃᓪᓚᓚᐅᕐᑐᖅ ᐊᒻᒪ ᑐᓵᔨᒧᑦ ᖃᓪᓗᓈᑐᑦ ᐅᖃᖅᑕᐅᕙᓪᓕᐊᓪᓗᑎᒃ.

“ᓇᑯᕐᒦ ᐆᒥᖓ ᐱᒻᒪᕆᐅᓛᒥᑦ ᐃᓕᓴᕆᔭᐅᔾᔪᑎᒥ ᑐᓂᔭᐅᒐᒪ ᖁᕕᐊᒋᔭᓐᓄᑦ ᑎᑎᕋᐅᔭᒐᖃᑦᑕᖅᑕᓐᓄᑦ,” ᐅᖃᕐᑐᖅ.

“ᐃᓱᒪᒋᕙᕋ ᐊᑖᑕᒐ, ᑭᐅᒐᒃ, ᐊᒻᒪ ᐊᓈᓇᑦᑎᐊᕋ, ᐱᑦᓯᐅᓛᒃ, ᖁᕕᐊᓲᑎᒋᔭᐅᓚᐅᕐᓂᖏᓐᓄᑦ ᑕᐃᒪᓗ ᑕᐃᒪᐃᑕᐅᓕᕆᕗᖓ.”

ᐊᓲᓇᐅᑉ ᑎᑎᕋᐅᔭᒐᖏᑦ ᓄᓇᕐᔪᐊᓕᒫᒥ ᓴᖅᑭᔮᖅᑎᑕᐅᓯᒪᔪᑦ, ᐃᓚᒋᔭᐅᓪᓗᓂ ᓄᑖᕕᓂᖅ ᑕᑯᔭᒐᖃᕐᕕᒃ ᐱᐅᕆᔅᒥ ᒪᑯᓂᖓ ᑲᓇᑕᒥ ᐃᓕᖅᑯᓯᓕᕆᕝᕕᒃᒥ ᖁᕕᐊᓲᑎᖃᖅᖢᑎᒃ ᓄᓇᕗᑦ ᐊᕐᕌᒍᓂ 25-ᓂ ᓇᓪᓕᐅᓐᓂᕐᓯᐅᕐᓂᖓᓄᑦ.

ᐱᓕᕆᐊᖏᑦ ᐅᖃᐅᓯᐅᓯᒪᓚᐅᕐᒥᔪᑦ 2022-ᒥ ᓄᓇᕐᔪᐊᕐᒥ ᑎᑎᕋᐅᔭᒐᕐᓂ ᓴᖅᑭᔮᒐᖃᖅᑐᓂ ᐅᕙᓂ La Biennale di Venezia ᕙᓂᔅᒥᑦ, ᐅᓇ Gershon Iskowitz Foundation ᓵᓚᒃᓴᐅᓯᐊᖅ ᑕᑯᔭᒐᓕᕆᓂᕐᒧᑦ ᑲᓇᑕᒥ 2018-ᒥ ᐊᒻᒪᓗ 2013-ᒥ ᓂᕈᐊᕆᔭᐅᓚᐅᕐᓯᒪᓪᓗᓂ ᐅᑯᓄᖓ Royal Canadian Academy of Arts.

ᐊᓲᓇ ᓂᕈᐊᒐᒃᓴᙳᖅᑎᑕᐅᓚᐅᕐᓯᒪᔪᖅ ᒐᕙᓇ ᔭᓄᕈᒧᑦ ᐃᓕᓴᕆᔭᐅᔾᔪᑎᒧᑦ ᐆᒧᖓ ᕌᐳᑦ ᑳᑕᔅᒧᑦ, ᓇᖕᒥᓂᖃᖅᑎ ᐆᒥᖓ ᒥᐅᕆᐊᓐ ᓯᑳᑦ ᑕᑯᔭᒐᖃᕐᕕᒃᒥᑦ (Marion Scott Gallery) ᕚᓐᑰᕙᒥ, ᑖᒃᑯᐊᓗ ᓴᖅᑭᔮᖅᑎᑦᑎᕙᒃᖢᑎᒃ ᐃᓄᖕᓂ ᑎᑎᕋᐅᔭᒐᖅᑎᓂᒃ ᐊᒻᒪ ᐱᓕᕆᐊᕆᕙᒃᑕᖏᓐᓂᒃ.

ᐊᓯᖏᑦ ᑐᓂᔭᐅᓚᐅᕐᑐᑦ ᓴᓇᐅᒐᓕᕆᓂᕐᒧᑦ ᐃᓕᓴᕆᔭᐅᔾᔪᑎᒥ ᐅᑯᐊ ᐹᐳᕋ ᐋᔅᑦᒪᓐ, ᒍᕆᒡ ᓯᑖᑦᔅ, ᑖᒥᓃᒃ ᐱᓖᓐ, ᑖᓐ ᕆᑐᕐ ᐊᒻᒪ ᒫᔾᔪᕆ ᐱᐅᑭᔾᔭ

ᓗᐃᔅ ᓚᒥᐅ ᐸᕉᐱ ᑐᓂᔭᐅᓚᐅᕐᑐᒥᖅ ᐆᒥᖓ Saidye Bronfman ᐃᓕᓴᕆᔭᐅᔾᔪᑎᒥ ᐊᒻᒪ ᒥᓯᐊᓪ ᔮᒃ ᑐᓂᔭᐅᓪᓗᓂ ᐆᒥᖓ Outstanding Contribution Award.

ᐊᓲᓇᐅᑉ ᐱᓕᕆᐊᖏᑦ ᓴᖅᑭᔮᕐᑎᑕᐅᓂᐊᖅᑐᑦ ᐃᓚᒋᔭᐅᓗᑎᒃ ᐅᕙᓂ ᒐᕙᓇ ᔭᓄᕉᑉ ᐃᓕᓴᕆᔭᐅᔾᔪᑎᐊᓂ ᑕᑯᔭᒐᒃᓴᓄᑦ ᐊᒻᒪ ᑐᓴᐅᒪᔭᐅᔭᕆᐊᓕᖕᓄᑦ ᐱᓕᕆᐊᓄᑦ 2024-ᒥ ᓴᖅᑭᔮᖅᑎᑕᐅᔪᓂ ᐅᕙᓂ ᑲᓇᑕᒥ ᓴᖅᑭᔮᒐᖃᕐᕕᒃᒥ (Gallery of Canada) ᐋᑐᕚᒥ ᓄᕕᐱᕆ 15-ᒥ ᒫᔅᓯ 23, 2025-ᒧ.