ᑭᙵᕐᒥᐅᑕᖅ ᐊᕐᓇᖅ ᑭᐱᙳᓪᓗᓂ ᐃᓕᓐᓂᐊᖅᑎᐅᓚᐅᖅᐳᖅ ᓄᓇᕐᔪᐊᒥ-ᖃᐅᔨᒪᔭᐅᕐᔪᐊᕐᓂᖓᓂ ᑎᑎᕋᐅᔭᖅᑎᐅᓂᖓᓂ

ᑎᑎᕋᐅᔭᖅᑎᓪᓗᒍ ᐸᐃᑉᐹᒥ ᒪᕐᕉᔫᒃ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᖢᑎᒃ ᐃᓕᓴᐃᔨᙳᕐᓂᕐᒥ ᑭᙵᕐᓂ.

2011−ᖑᓚᐅᖅᐳᖅ. ᐊᑭᓱᒃ ᑭᐱᙳᓚᐅᖅᐳᖅ ᐊᒻᒪ ᐃᔨᒥᓂᒃ ᐅᐃᓴᑎᑦᑎᓇᓱᐊᓚᐅᖅᐳᖅ.

“ᐅᔾᔨᕆᓚᐅᖅᐸᕋ ᑎᑎᕋᐅᔭᖅᑕᖓᓂ ᐊᒻᒪ ᑕᑯᓚᐅᖅᐳᖓ ᐊᑕᐅᓯᕐᒥ ᐱᐅᒋᕐᔪᐊᓚᐅᖅᑕᓐᓂ,” ᑏᕕ ᐅᖃᓚᐅᖅᐳᖅ.

ᑏᕕ ᐅᖃᐅᔾᔨᓚᐅᖅᐳᖅ ᐊᑭᓱᖕᒥ ᑎᑎᕋᐅᔭᖅᑎᐅᓂᖓᓂ —ᐊᑭᓱᒃ ᐅᖃᓚᐅᖅᐳᖅ ᐃᒻᒥᓂᒃ ᐃᓱᒪᒋᓚᐅᖅᓯᒪᙱᓐᓂᖓᓂ ᑎᑎᕋᐅᔭᖅᑎᐅᓂᖓᓂ, ᐊᑭᓱᒃ ᐅᖃᓚᐅᖅᐳᖅ, ᐅᔾᔨᕈᓱᒃᐸᓪᓕᐊᓕᓚᐅᖅᐳᖅ “ᑎᑎᕋᐅᔭᕐᓂᖓ” ᐊᔾᔨᒋᔭᐅᙱᑐᐃᓐᓇᕆᐊᖃᕐᓂᖓᓂ ᑕᐃᒃᑯᓇᓂ ᐊᓯᖏᓐᓂ.

“ᑎᑎᕋᐅᔭᖅᑎᐅᕌᓂᒃᐳᖅ. ᖃᐅᔨᒪᙱᑐᐃᓐᓇᓚᐅᖅᐳᖅ,” ᑏᕕ ᐅᖃᓚᐅᖅᐳᖅ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐹᖅᓯᓚᐅᖅᐳᑦ ᑏᕕ ᐊᒻᒪ ᐊᑭᓱᖕᒥ ᐱᓇᖕᓇᒥ ᕿᑭᖅᑖᓗᖕᒥ ᐃᓄᖕᓄᑦ ᑯᐊᐸᒃᑯᑦ ᓴᓇᐅᒐᓕᕆᕝᕕᖓᓂ ᑭᙵᕐᓂ ᔪᓚᐃ 18−ᒥ, ᒪᕐᕉᔫᒃ ᐃᖅᑲᓇᐃᔭᓕᕐᓂᖏᓐᓂ ᑎᑎᕋᐅᔭᖅᑎᐅᓪᓗᑎᒃ.

ᑏᕕ ᐱᔪᓐᓇᑦᑎᐊᖅᖢᓂ ᐆᒃᑐᕋᐅᑎᓂ ᑎᑎᕋᐅᔭᖅᑎᐅᕗᖅ ᐊᒻᒪ ᑎᑎᕋᖅᑎᐅᓪᓗᓂ ᓇᖕᒥᓂᖅ ᐱᔪᓐᓇᕐᓂᖓᓂ. ᐱᓕᕆᐊᖏᑦ ᑕᑯᒃᓴᐅᑎᑕᐅᓚᐅᖅᐳᑦ ᖃᖓᒃᑲᓐᓂᐅᓚᐅᖅᑐᒥ ᑕᒪᑐᒪᓂ ᐊᕐᕌᒎᔪᒥ ᑕᑯᒃᓴᐅᑎᑕᐅᓂᐅᔪᒥ ᐊᑦᓛᓐᑎᒃᒥ ᑭᖕ ᓄᓇᖁᑎᖏᓐᓂ.

ᐊᑭᓱᒃ ᓴᓇᓲᖑᕗᖅ ᓴᓇᐅᒐᓂ ᓄᓇᕐᔪᐊᒥ ᐅᓐᓄᕌᓂ ᓂᐅᕕᐊᒃᓴᖃᖅᐸᒃᑐᓄᑦ ᓲᕐᓗ Canada Goose ᐊᒻᒪ ᑎᑎᕋᐅᔭᕐᓂᖏᑦ ᑕᑯᒃᓴᐅᑎᑕᐅᓯᒪᕗᑦ ᔫᓇᐃᑎᑦ ᔅᑕᐃᑦᔅᓂ ᐅᐊᕆᒐᓐᒥ ᓂᐅ ᔪᐊᒃᒧᑦ ᐊᒻᒪ ᓄᓇᕐᔪᐊᓕᒫᒥᓪᓘᓐᓃᑦ, ᐃᓚᒋᔭᐅᓪᓗᓂ ᑕᑯᒃᓴᐅᑎᑕᐅᓂᐅᔪᒥ ᓂᒋᕐᒥ ᑯᕇᐊᒥ.

ᔪᓚᐃ ᐅᓪᓗᖓᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᙳᑎᓚᐅᖅᐳᑦ ᐊᑭᓱᖕᒥ, ᑕᖅᓯᖅᓱᐃᓚᐅᖅᐳᖅ ᐊᓯᐊᓂ ᑎᑎᕋᐅᔭᖅᑕᖓᓐᓂ ᐊᒻᒪᓗᑦᑕᐅᖅ ᓇᖏᖅᖢᓂ ᐊᔾᔨᓕᐅᖅᑕᐅᓂᕐᒥ ᐊᓐᓄᕌᓄᑦ ᓂᐅᕕᐊᒃᓴᖃᖅᐸᒃᑐᓂ ᐊᕆᑦᓯᐊᒃᑯᓐᓂ, ᓯᕗᓂᒃᓴᒥ ᑲᑐᔾᔨᖃᑎᒌᖕᓂᐅᑐᐃᓐᓇᕆᐊᖃᖅᑐᒥ.

ᐊᑭᓱᒃ ᐱᕈᖅᓴᓚᐅᖅᐳᖅ ᑭᙵᕐᓂ, ᖃᐅᔨᒪᔭᐅᕐᔪᐊᖅᑐᒥ ᐃᓄᖕᓄᑦ ᓴᓇᐅᒐᓂᐅᔪᓄᑦ. ᐊᑖᑕᑦᑎᐊᖓ ᓴᓇᙳᐊᖅᑎᐅᓚᐅᖅᐳᖅ, ᐊᒻᒪ ᐊᕙᓗᓯᒪᐃᓐᓇᐅᔭᓚᐅᖅᐳᖅ ᓴᓇᐅᒐᓂᑦ. ᑭᓯᐊᓂ ᐊᓕᐊᓇᐃᒋᓚᐅᙱᑕᖓ ᑕᐃᔅᓱᒪᓂ. ᒫᓐᓇ ᐃᒃᐱᒍᓱᑦᑎᐊᕐᓂᖃᓕᖅᐳᖅ.

“ᐱᔪᒪᑦᑎᐊᓚᐅᙱᓚᖓ,”ᐅᖃᓚᐅᖅᐳᖅ. “ᑐᑭᓯᐅᒪᓂᖃᑦᑎᐊᓚᐅᙱᓚᖓ ᓴᓇᐅᒐᓂᑦ.”

ᓴᐃᒻᒪᐃᔪ ᐊᑭᓱᒃ, ᓴᐅᒥᖕᒥ, ᐅᖃᖅᐳᖅ ᐱᖃᓐᓇᕆᔭᖓ ᓂᖏᐅᑯᓗᒃ ᑏᕕ, ᑕᓕᖅᐱᖕᒥ, ᑕᑯᓚᐅᖅᑐᒥ ᑎᑎᕋᐅᔭᖅᑎᐅᔪᒥ ᑭᐱᙳᔪᒥ ᐃᓕᓐᓂᐊᖅᑎᒥᒃ ᑎᑎᕋᐅᔭᖅᑐᒥ ᐃᓕᓐᓂᐊᕐᕕᐊᕈᓯᖓᓐᓂ. (ᐋᑎ ᓵᑭᓯᐊᓐ ᐊᔾᔨᓕᐅᖅᑕᖓ)

ᓯᕗᓪᓕᖅᐹᖅ ᑎᑎᕋᐅᔭᒐᖓ “ᓇᑉᐸᖓᓂ ᐃᓅᓪᓗᓂ ᐃᓴᕈᖃᖅᖢᓂ” ᐊᒻᒪ ᒪᕐᕈᖓ ᓄᓇᒥ ᑕᑯᒃᓴᐅᓂᐅᓚᐅᖅᐳᖅ. ᐅᖃᓚᐅᖅᐳᖅ “ᐱᐅᒋᙱᕐᔪᐊᓚᐅᖅᐸᖏᑦ” ᑕᒪᒃᑭᑦ.

ᐱᖓᔪᖓᓐᓂ ᑎᑎᕋᐅᔭᖅᑕᖓᓂ, ᐃᒃᓯᕚᓚᐅᖅᐳᖅ ᐃᓗᓕᖃᙱᑦᑐᒥ ᑎᑎᕋᐅᔭᕐᕕᒃᓴᒥ ᐊᒻᒪ ᐊᑯᓂᐊᓗᒃ ᕿᕕᐊᖓᓚᐅᖅᐸᖓ.

“ᖃᐅᔨᒪᓗᐊᙱᓚᖓ. ᐃᑲᕐᕋᓪᓗᐊᓂ ᒪᕐᕉᖕᓂ ᐱᖓᓱᓂᓪᓘᓐᓃᑦ,” ᐅᖃᓚᐅᖅᐳᖅ. “ᐊᒻᒪ ᐊᓱᐃᓛᒃ ᐃᖅᑲᐃᓚᐅᖅᐳᖓ ᐊᑖᑕᑦᑎᐊᓐᓂ ᐊᒻᒪ ᐊᑕᐅᓯᐅᔪᒥ ᓴᓇᙳᐊᒐᖏᓐᓂ. ᑎᑎᕋᐅᔭᓕᓚᐅᖅᐳᖓ ᐊᑕᐅᓯᐅᔪᒥ ᑎᖕᒥᐊᓕᐊᕆᓚᐅᖅᑕᖏᓐᓂ.”

ᓯᕗᓪᓕᖅᐸᐅᓪᓗᓂ ᑎᑎᕋᐅᔭᒐᕐᒥ ᓂᐅᕕᖅᑕᐅᑎᑦᑐᓐᓇᓚᐅᖅᑕᖓᓂ.

ᑕᐃᒪᙵᓂ, ᐊᑭᓱᒃ ᑎᑎᕋᐅᔭᖅᓯᒪᕗᖅ ᑎᖕᒥᐊᙳᐊᖏᓐᓇᒐᓚᖕᓂ — ᖁᕕᐊᓱᒃᑐᓂ ᑎᖕᒥᐊᓂᑦ, ᒧᒥᖅᑐᓂ ᑎᖕᒥᐊᓂ ᐊᒻᒪ ᑎᖕᒥᐊᑐᐃᓐᓇᓂ ᐃᒻᒥᓂᒃ ᐊᓕᐊᓇᐃᒍᓱᒃᑐᓂ.

ᐊᑭᓱᒃ ᐅᓪᓗᓕᒫᒥ ᐊᓈᓇᑦᑎᐊᖑᕗᖅ ᑎᒍᐊᖅᓯᒪᔭᖓᓂ ᓄᑕᕋᓛᒥ. ᓄᖅᑲᓚᐅᖅᐳᖅ ᖁᑦᑎᖕᓂᓕᕐᒥ 2−ᒥ ᐃᓕᓴᐃᔨᐅᓂᖓᓂ ᑭᖑᓂᑦᑎᐊᖓᓂ ᓄᕙᒡᔪᐊᕐᓇᖅ-19−ᒥ ᐊᒥᓱᓂ ᖃᓂᒻᒪᓐᓇᐅᔪᒥ, ᐊᕐᕌᒍᓂ ᑕᓪᓕᒪᓂ ᐃᓕᓴᐃᔨᐅᓂᕐᒥ.

ᓄᖅᑲᓚᐅᖅᑎᓪᓗᒍ, ᐊᑭᓱᒃ ᐊᐅᓪᓛᖃᑕᐅᓯᒪᕗᖅ ᒪᐃᐋᒥᒧᑦ Canada Goose−ᑯᓐᓂ ᑎᓯᐱᕆᒥ ᑕᑯᒃᓴᐅᑎᑦᑎᔭᖅᑐᖅᖢᓂ ᐱᖓᓱᓂ ᑎᑎᕋᐅᔭᖅᑕᖏᓐᓂ — ᓇᓄᖅ, ᐃᔨᕋᐃᑦ ᐊᒻᒪ ᓂᕐᓖᑦ —2023−ᒥ Art Basel Miami Beach ᓴᓇᐅᒐᓂ ᑕᑯᒃᓴᐅᑎᑦᑎᓂᐅᔪᒥ.

ᓯᕗᓂᐊᓂ, ᐊᐅᓪᓛᓚᐅᖅᐳᖅ ᓂᐅ ᔪᐊᒃ ᓯᑎᒧᑦ 2015−ᒥ ᐊᒻᒪ ᐳᐊᑦᓚᓐ, ᐅᐊᕆᒐᓐᒥ, ᑎᑎᕋᐅᔭᒐᖏᑦ ᑕᑯᒃᓴᐅᑎᑕᐅᓚᐅᖅᑐᓂ ᐳᕈᒃᓕᓐ ᑕᑯᔭᒐᖃᕐᕕᖓᓂ ᐊᒻᒪ ᕗᕉᓕᒃ ᑕᑯᔭᒐᖃᕐᕕᖕᒥ.

“ᑕᐸᐃᖅᓯᒪᑐᐃᓐᓇᕆᕗᖓ ᑭᒃᑯᓕᒫᑎᑐᑦ,” ᐊᑭᓱᒃ ᐅᖃᓚᐅᖅᐳᖅ ᐱᓕᕆᑦᑎᐊᕐᓂᕆᔭᖓᓂ.

“ᐃᓱᒪᓐᓇᐅᔭᓚᐅᖅᐳᖓ ᐃᓕᓴᐃᔨᐅᖏᓐᓇᐅᔭᕐᓂᐊᕋᓱᒋᓪᓗᖓ ᐊᒻᒪ ᐊᕐᕌᒍᓄᑐᐃᓐᓇᖅ ᑕᓪᓕᒪᓅᓚᐅᖅᐳᖅ. ᐃᓱᒪᓚᐅᖅᓯᒪᙱᓚᖓ ᖃᐅᔨᒪᔭᐅᓕᕐᓂᐊᕐᓂᓐᓂ ᑕᐃᒪᓐᓇ.”