ᑰᔾᔪᐊᕌᐱᒃᒥ ᐅᓇᑕᖅᑐᓃᑦᑐᕕᓂᖅ ᐃᖅᑲᐅᒪᔭᐅᔪᖅ ᐊᕐᕌᒍᑦ 70 ᐊᓂᒍᖅᑎᓪᓗᒍ ᑯᕆᐊᒥ ᐅᓇᑕᕐᓂᕕᓂᐊᓗᒃ

ᐃᐊᑎ ᐅᐃᑖᕐᑐᒃ ᐅᕙᓂ ᐊᔾᔨᖃᕐᑐᖅ ᓇᓗᓇᐃᕐᓯᒪᙱᖢᓂ ᖃᖓᓕᓴᐅᓂᖓᓂ ᐊᔾᔨᙳᐊᖅ. ᐅᓇ ᐊᔾᔨ ᐃᓚᒋᔭᐅᔪᖅ ᓴᖅᑭᔮᒐᕆᔭᐅᔪᓂᒃ ᐅᕙᓂ ᑕᑯᔭᒐᖃᕐᕕᒃᒥ ᑲᓃᑕᒥᐅᑕᑦ ᐅᓇᑕᖅᑐᕕᓂᕐᓂᒃ ᑕᑯᔭᒐᖃᕐᕕᒃᒥ (Canadian War Museum) ᐊᑐᕚᒥ, ᑖᓐᓇᓗ ᓇᓗᓇᐃᒃᑯᑎᐅᓪᓗᓂ ᐊᕐᕌᒍᑦ 70-ᓂ ᑯᕆᐊᒥ ᐅᓇᑕᕐᓂᖅ ᓄᖅᑲᓚᐅᕐᓯᒪᓂᖓᓂᒃ. (ᐊᔾᔨᙳᐊᖁᑎᒋᔭᐅᔪᖅ)

ᐃᓄᒃ ᐅᓇᑕᖅᑐᓃᓐᓂᑯ ᐃᐊᑎ ᐅᐃᑖᕐᑑᑉ ᐅᓂᒃᑳᖓ ᓱᓕ ᑐᓴᐅᒪᔭᐅᕙᒃᑐᖅ ᓄᓇᕕᒃᒥ ᐊᕐᕌᒍᑦ 70 ᐊᓂᒍᕐᓯᒪᓕᕐᑎᓪᓗᒍ ᑯᕆᐊᒥ ᐅᓇᑕᕕᒡᔪᐊᕐᓇᐅᒪᕐᓯᒪᔪᖅ, ᑖᓐᓇᓗ ᐅᖃᐅᓯᐅᕙᒃᖢᓂ ᑲᓇᑕᒥ “ᐳᐃᒍᖅᑕᐅᓂᑯ” ᐅᓇᑕᕕᒡᔪᐊᕐᓇᖅ.

ᔪᓚᐃ 27, 2023 ᓇᓪᓕᐅᑎᕝᕕᐅᓂᐊᕐᑐᖅ ᐊᕐᕌᒍᓂ 70-ᓂ ᑯᕆᐊᒥ ᐅᓇᑕᕕᒡᔪᐊᕐᓇᐅᓚᐅᕐᓯᒪᔪᑦ ᓄᖅᑲᓚᐅᕐᓯᒪᓂᖏᓐᓂᒃ ᐊᖏᖃᑎᒌᒍᑎᓄᑦ.

ᐊᕐᕌᒍᓂ ᐱᖓᓱᓂᒃ ᓈᒻᒪᙱᓕᐅᕈᑎᖃᖅᑎᓪᓗᒋᑦ — ᒫᓐᓇᒧᓪᓗ ᑕᐃᒪᐃᔾᔪᑎᒋᔭᐅᓪᓗᓂ ᐅᓇ ᓄᖅᑲᖅᑎᑦᑎᖃᑦᑕᐅᑎᓂᕕᓂᖅ ᐅᐊᖕᓇᕐᒥᐅᓂᒃ ᐊᒻᒪ ᓂᒋᕐᒥᐅᓂᒃ ᑯᕆᐊᒥᒃ — 516 ᑲᓇᑕᒥᐅᑕ ᐃᓅᔪᓐᓃᓚᐅᕐᓯᒪᔪᑦ ᐅᓇᑕᖅᑎᓪᓗᒋᑦ.

ᐃᒻᒪᓕᓴᕐᓂ ᖃᓄᐃᓕᐅᕈᑎᕕᓂᕐᓂᒃ ᑎᑎᕋᖅᑎᐅᔪᑦ ᑎᑎᕋᐅᓯᖃᒡᒍᓚᐅᕐᑐᑦ ᑯᕆᐊᒥ ᐅᓇᑕᕕᒡᔪᐊᕐᓇᒥᒃ, 1950ᒥ 1953ᒧ, ᑲᓇᑕᐅᑉ “ᐳᐃᒍᕐᓂᑯᖓ” ᐅᓇᑕᕕᒡᔪᐊᕐᓇᕐᒥ. ᑕᒪᐃᓐᓂ ᓯᕗᓪᓕᖅ ᓄᓇᕐᔪᐊᒥ ᐅᓇᑕᕕᒡᔪᐊᕐᓇᖅ ᐊᒻᒪ ᐊᐃᑉᐸᖓ ᓄᓇᕐᔪᐊᕐᒥ ᐅᓇᑕᕕᒡᔪᐊᕐᓇᖅ ᑖᔅᓱᒥᖓ ᑖᓪᓕᖅᓯᒪᓚᐅᕐᓯᒪᖕᒪᑕ.

ᑭᓯᐊᓂᓕ ᓄᓇᕕᒃᒥ ᓄᓇᓕᖕᓂ, ᐅᓇᑕᖅᑐᒃᓴᐅᖃᑕᐅᓂᑰᑉ ᐅᓂᒃᑳᖓ ᑲᔪᓰᓐᓇᕐᑐᖅ.

ᐅᐃᑖᕐᑐᒃ ᐃᓱᒪᒋᔭᐅᔪᖅ ᓯᕗᓪᓕᖅᐹᖑᖃᑕᐅᒪᐅᕐᓂᖓᓂᒃ ᐃᓄᖕᓂ ᐅᓇᑕᖅᑐᒃᓴᓂᒃ ᑲᓇᑕᒥ ᐅᓇᑕᖅᑐᒃᓴᓄᑦ.

ᐃᓅᓂᑰᓪᓗᓂ ᓄᓇᐃᓐᓇᕐᒥ, ᐅᐃᑖᕐᑐᒃ ᐊᖏᕐᕋᖃᕐᑐᖅ ᑰᔾᔪᐊᕌᐱᒃᒥ, ᓄᓇᒥᒃᒥ ᓂᒋᕐᒦᓛᖅ ᓄᓇᓕᖕᓂ ᑕᓯᐅᔭᕐᔪᐊᑉ ᓯᒡᔭᖏᓐᓂᒃ.

1951ᓂ, ᐊᕐᕌᒍᖃᖅᖢᓂ 18ᓂ 19ᓂᓪᓗᑭᐊᖅ, ᐅᓇᑕᖅᑐᒃᓴᓄᑦ ᐊᑎᓕᐅᓚᐅᕐᓯᒪᔪᖅ ᐃᒪᓐᓇ ᐃᐊᑎ ᕙᐃᑐᓪ. ᐅᓇ ᐊᑎᙳᐊᕆᓪᓗᓂᐅ ᐃᓅᓂᕐᒥᓂᒃ ᖃᐅᔨᔭᐅᑦᑕᐃᓕᓪᓗᓂ.

ᐅᐃᑖᕐᑐᒃ ᑯᕆᐊᒥ ᐅᓇᑕᖃᑕᐅᓚᐅᕐᓯᒪᔪᖅ ᑭᖑᓪᓕᖅᐹᖓᓂ ᐊᕐᕌᒍᒥ ᐅᓇᑕᕐᓇᐅᑉ ᐊᒻᒪᓗ ᐅᓇᑕᖅᑐᒃᓴᓃᖢᓂ ᐊᕐᕌᒍᑦ ᖁᓕᑦ ᐅᖓᑖᓂ ᑭᖑᓂᐊᒍᑦ.

ᐃᓅᔪᓐᓃᓚᐅᕐᓯᒪᔪᖅ 2005ᒥ.

ᓴᓚᒦᕙ ᐅᐃᑖᕐᑐᒃ, ᐃᐊᑎᐅᑉ ᓇᔭᖓ ᓄᑲᕐᖠᐅᓪᓗᓂ, ᐊᕐᕌᒍᖃᓚᐅᕐᓯᒪᔪᖅ 6ᓂ ᐅᓇᑕᕕᒡᔪᐊᕈᓐᓃᕐᑎᓪᓗᒋᑦ ᔪᓚᐃ 1953ᒥ.

“ᑲᑉᐱᐊᒋᖃᑦᑕᓚᐅᕐᑕᕋ,” ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ, ᐅᖃᐅᓯᖃᖅᖢᓂ ᐃᐊᑎᐅᑉ ᐃᓅᓯᕆᓚᐅᕐᑕᖓᓂᒃ — ᑕᐃᔅᓱᒪᓂᓗ 20ᖏᓐᓂ ᐊᕐᕌᒍᖃᓕᖅᖢᓂ — ᐊᖏᕐᕋᖅᑎᓪᓗᒍ ᑰᔾᔪᐊᕌᐱᒃᒧᑦ ᐅᓇᑕᖅᑐᒃᓴᕐᓯᐅᑎᓂ ᐊᓐᓄᕌᕐᓯᒪᓪᓗᓂ.

ᐅᓇ ᐃᖅᑲᐅᒪᔭᖓ ᑕᑯᑕᐃᓐᓇᕋᒥᐅᒃ ᓲᖃᐃᒻᒪ ᖃᓪᓗᓈᓂ ᓄᓇᖃᓚᐅᕐᒪᑦ ᐅᓇᑕᖏᑎᓪᓗᒋᑦ.

ᓵᓚᒦᕙ ᐅᐃᑖᕐᑐᒃ ᐅᖃᓚᐅᕐᑐᖅ ᐅᓈᓇᖓ ᒥᐊᓕ ᐅᐃᑖᕐᑐᒃ, ᓈᓚᐅᑎᒃᑯᑦ ᑐᓵᖃᑦᑕᓚᐅᕐᓯᒪᓂᕋᖅᖢᓂᐅᑉ ᐅᓇᑕᖅᑐᓂᒃ.

ᑕᖅᑭᖅ ᐊᓂᒍᕌᖓ ᐅᖄᓚᖃᑦᑕᓚᐅᕐᑐᖅ ᐋᖅᑭᖕᓂᑯᖓᓂᒃ ᐅᖄᓚᐅᑎᒧᑦ.

“ᑐᓵᖃᑦᑕᓚᐅᕐᑐᖅ ᐅᓇᑕᖅᑐᐃᑦ ᒥᒃᓵᓂᒃ, ᑭᓯᐊᓂᓕ ᐅᔾᔨᕆᓗᐊᓚᐅᙱᑕᕋ ᓱᕈᓯᐅᓂᓐᓄᑦ,” ᐅᖃᕐᑐᖅ.

“ᐅᖄᓚᐅᑎᒥ ᐋᖅᑭᒃᑕᐅᑎᑦᑎᓚᐅᕐᓯᒪᔪᖅ ᐊᓈᓇᒥᓄ ᐅᖄᓚᖃᑦᑕᕐᓂᐊᕐᒪᑦ ᑕᖅᑭᑕᒫᓐ. ᐊᓈᓇᒪ ᐊᑭᓕᕈᓐᓇᙱᒻᒪᒍ ᐊᓂᒪ ᐊᑭᓕᖃᑦᑕᓚᐅᕐᓯᒪᔭᖓ ᐅᐸᒃᓯᒪᔭᖓᓂᒃ.”

ᐅᓇᑕᕈᓐᓃᖅᑎᓪᓗᒋᑦ ᓵᓚᒦᕙ ᐅᐃᑖᕐᑐᖅ ᐃᓱᒪᖃᑦᑕᓕᓚᐅᕐᓯᒪᔪᖅ ᐊᓂᖓᑕ ᐅᓂᒃᑳᕆᕙᒃᑕᖏᓐᓂᒃ.

ᑭᓯᐊᓂᓕ ᐅᓄᕐᑐᑎᑐᑦ ᐅᓇᑕᖅᑐᓃᑦᑐᕕᓂᕐᓂᒃ ᐃᐊᑎ ᐅᓂᒃᑲᐅᓯᖃᓗᐊᕈᒪᕙᓚᐅᙱᑦᑐᖅ ᐊᑐᖅᑕᕕᓂᕐᒥᓂᒃ.

ᑭᓯᐊᓂᓕ ᐅᖃᐅᓯᖃᖅᐸᓚᐅᕐᑐᖅ “ᐱᐅᔫᑎᐅᓂᖏᓐᓂᒃ.”

“ᖃᐅᔨᔪᒪᖃᑦᑕᓚᐅᕐᑐᖓ ᐃᓅᓂᖓᓂᒃ… ᑭᓯᐊᓂᓕ ᐃᖅᑲᐅᒪᔪᒪᕙᓚᐅᙱᒻᒪᒋᑦ,” ᐅᖃᕐᑐᖅ.

“ᐱᖃᓐᓇᕆᓚᐅᕐᑕᖏᓐᓂᒃ ᐊᒻᒪ ᖃᐅᔨᒪᓕᓚᐅᕐᑕᖏᓐᓂᒃ ᐅᖃᐅᓯᖃᖃᑦᑕᓚᐅᕐᑐᖅ… ᐊᒻᒪᓗ ᐊᕐᓇᒥ ᓇᒡᓕᒍᓱᒻᒪᕆᓕᓚᐅᕐᓯᒪᔪᖅ ᑭᓯᐊᓂᓕ ᐊᖏᕐᕋᐅᑎᔪᓐᓇᓚᐅᕐᓯᒪᙱᒻᒪᒍ.”

ᐃᐊᑎ ᑎᑎᕋᐅᓯᖃᖃᑦᑕᓚᐅᕐᓯᒪᔪᖅ ᖃᓄᐃᓕᐅᕈᑎᕕᓂᖏᓐᓂᒃ ᐅᓇᑕᖅᑐᓂᒃ, ᐃᓚᖃᖅᖢᓂ ᐅᖃᐅᓯᖃᖅᖢᓂ ᐃᒻᒥᒃ ᐅᕘᓇ From the Tundra to the Trenches ᐊᒻᒪᓗ ᑎᑎᕋᐅᔭᒐᖅᑎᒍᑦ.

ᐊᑕᐅᓯᖅ ᑎᑎᕋᐅᔭᒐᖅ ᓴᖅᑭᑎᑦᑎᓯᒪᔪᖅ ᑲᓇᑕᒥᐅᑕᑦ ᐅᓇᑕᕐᑐᒃᓴᐃᑦ ᖁᕕᐊᓱᖕᓂᖏᓐᓂᒃ ᐊᖏᖃᑎᒌᒃᑎᓪᓗᒋ — ᔪᓚᐃ 27, 1953ᒥ — ᖃᐅᔨᑎᓪᓗᒋ ᐊᖏᕐᕋᐅᓂᐊᓕᕐᓂᖏᓐᓂᒃ.

ᑲᓇᑕᒥ ᐅᓇᑕᖅᑐᕕᓂᕐᓄᑦ ᑕᑯᔭᒐᖃᕐᕕᒃ ᐋᑐᕚᒥ ᓴᖅᑭᑎᑦᑎᖃᓯᐅᑎᓯᒪᔪᖅ ᐃᐊᑎᐅᑉ ᐅᓂᒃᑳᖓᑕ ᐃᓚᖓᓂᒃ ᓇᓗᓇᐃᒃᑯᑎᒋᔭᐅᓪᓗᓂ ᐊᕐᕌᒍᓂ 70ᓂ ᓄᖃᖅᓯᒪᓕᕐᓂᖓᓂᒃ ᐅᓇᑕᕕᒡᔪᐊᕐᓇᐅᓚᐅᕐᑐᖅ.

“ᖃᓄᐃᓕᐅᕈᓘᔭᓚᐅᕐᓯᒪᔪᖅ ᐅᓂᒃᑳᖏᓐᓂ ᑐᓴᖅᑕᐅᑎᑦᑎᓇᓱᒃᖢᓂ, ᐊᒻᒪᓗ ᐊᓕᐊᓇᐃᑦ ᑕᐃᒪᐃᓚᐅᕐᒪᑦ ᓲᖃᐃᒻᒪ ᐃᓚᒋᔭᐅᔪᓐᓇᓚᐅᕐᑐᑦ ᓴᖅᑭᔮᖅᑎᑕᐅᔪᓂᒃ,” ᐅᖃᕐᑐᖅ ᐋᓐᑐᕌ ᐴᑦᔅ, ᐃᒻᒪᓕᓴᕐᓂ ᖃᐅᔨᒪᔨ ᑕᑯᔭᒐᖃᕐᕕᒃᒥ.

“ᐊᒃᓱᐊᓗᒃ ᑐᓴᕈᒥᓇᕐᑐᖅ ᐊᒻᒪ ᐱᒻᒪᕆᐊᓘᓪᓗᓂ ᐊᓯᐅᑎᑕᐅᓯᒪᙱᓐᓂᖓ.”

ᐊᖏᕐᕋᖓᓂᓕ ᓵᓚᒦᕙ ᐅᐃᑖᕐᑐᒃ ᐅᖃᓚᐅᕐᑐᖅ ᐊᓂᖓᑕ ᐃᓅᓯᕆᓚᐅᕐᑕᖓ ᑐᓴᐅᒪᔭᐅᑦᑎᐊᕐᓂᖓᓂᒃ ᓄᓇᖓᓂ..

2019ᒥ, ᑭᖑᓪᓕᖅᐹᒧᑦ ᐅᖃᐅᓯᕐᓄᑦ ᐃᑲᔫᑎ (the Last Post Fund), ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᑦ ᐅᓇᑕᕐᑐᒃᓴᕕᓂᕐᓂᒃ ᐃᓗᕕᖅᑕᐅᑎᑦᑎᓂᕐᒥᒃ ᐱᓕᕆᐊᖃᕐᑐᑦ ᐊᒻᒪ ᓇᓗᓇᐃᒃᑯᑎᓂᒃ, ᐃᓚᒌᓂ ᑐᓂᓯᓚᐅᕐᓯᒪᔪᖅ ᐃᐊᑎᐅᑉ ᐃᓗᕕᐊᓄᑦ ᓇᓗᓇᐃᒃᑯᑎᐅᓂᐊᕐᑐᒥᒃ ᐅᒥᐅᔭᖅᒥ.

ᐊᕐᕌᒍᑕᒫᑦ ᐅᓇᑕᖅᑐᕕᓃᑦ ᐃᖅᑲᐅᒪᔭᐅᕝᕕᐊᓂ ᐅᖄᓚᕝᕕᐅᖃᑦᑕᖅᑐᖅ ᐃᐊᑎᐅᑉ ᒥᒃᓵᓄᑦ.

ᐃᓱᒪᒋᔭᐅᕙᖕᒪᑦ ᓱᓕ ᐱᖃᓐᓇᕆᓚᐅᕐᑕᖏᓐᓂᒃ ᐊᒻᒪᓗ ᐅᓇᑕᖅᑐᒃᓴᐅᓚᐅᕐᓂᖓ ᐃᖅᑲᐅᒪᔭᐅᖏᓐᓇᖅᖢᓂ ᐱᓕᕆᐊᕆᓚᐅᕐᑕᖓᒍᑦ ᐅᕘᓇ ᐅᓇᑕᖅᑐᒃᓴᖑᐊᓕᕆᑎᓪᓗᒍ.

“ᐊᓂᒐ ᐃᓄᑦᑎᐊᕚᓘᓚᐅᕐᑐᖅ ᐊᒻᒪᓗ ᑭᒃᑯᓕᒫᒥ ᕿᓚᓕᐊᓛᖁᔨᓪᓗᓂ,” ᐅᖃᕐᑐᖅ.

“ᐅᓇᑕᖅᑐᒃᓴᙳᐊᓂ ᓄᑲᖅᖠᕐᓂ ᐱᓇᓱᖁᔨᑦᑎᐊᖃᑦᑕᓚᐅᕐᑐᖅ ᑰᔾᔪᐊᕌᐱᒃᒥ ᐊᒻᒪ ᐅᒥᐅᔭᖅᒥ, ᑕᐃᒪᓕ ᐃᑲᔪᕈᒪᓪᓗᖓ ᑕᒪᐃᓐᓂ ᐅᓇᑕᖅᑐᒃᓴᖑᐊᓂ ᐱᓇᓱᑦᑎᐊᖁᔨᓪᓗᖓ ᐊᒻᒪᓗ ᐅᐱᒋᓪᓗᒋᑦ ᓄᓇᖏᓐᓂᒃ ᓴᐳᔾᔨᓯᒪᓇᓱᖕᓂᖏᓐᓂᒃ.”