ᑰᒑᕐᔪᒃᒥ ᐊᒃᑕᕐᕕᒃ ᐃᑭᔾᔪᑎᓕᒃ ᖁᒻᒧᑦ ᐃᑭᑎᑕᐅᓲᓄᑦ

For English version, see Kugaaruk landfill fire caused by improperly disposed-of fireworks

ᐅᓪᓗᓂ ᑎᓴᒪᓂ ᐃᑯᒪᓕᓚᐅᕐᑐᖅ ᐅᓇ ᑰᒑᕐᔪᒃᒥ ᐊᒃᑕᕐᕕᑦ ᑕᖅᑭᐅᓵᖅᑑᑉ ᓄᙳᐊᓂ ᓱᕈᓯᕐᓂ ᓇᓂᓯᔪᖃᓚᐅᖅᑎᓪᓗᒍ ᐃᑯᒪᓐᓂᙱᑦᑐᓂ ᖁᒻᒧᑦ ᐃᑭᑎᑕᐅᓲᓂᒃ ᐊᒻᒪᓗ ᐃᑭᑎᑕᐅᓪᓗᑎᒃ ᑖᒃᑯᓇᙵᑦ.

ᐃᑯᐊᓚᔪᖅ ᐅᖃᐅᓯᐅᓚᐅᕐᓯᒪᔪᖅ ᔫᓂ 27-ᒥ 1:00 ᐅᓐᓄᓴᒃᑯ ᐊᓂᒍᓕᓵᖅᑎᓪᓗᒍ, ᐅᖃᕐᑐᖅ ᒥᓯᐊᓪ ᐸᐃᔪᔅ, ᕼᐋᒻᒪᓚᒃᑯᓐᓄᑦ ᐊᐅᓚᑦᑎᔨ ᖃᕋᓴᐅᔭᒃᑯᑦ ᑎᑎᕋᖅᖢᓂ ᔪᓚᐃ 2-ᒥ.

“ᖃᑦᑎᕆᔩ ᖃᐅᔨᓕᓚᕐᑐᑦ ᐃᑭᑎᑕᐅᙱᑦᑐᕕᓂᕐᓂ ᖁᒻᒧᑦ ᐃᑭᑎᑕᐅᓲᓂ ᐊᒃᑕᕐᕕᒃᒥᑦ,” ᐸᐃᔪᔅ ᑎᑎᕋᖅᑐᖅ. “ᐅᑯᐊ ᖁᒻᒧᑦ ᐃᑭᑎᑕᐅᓲᑦ ᐃᑭᑎᑕᐅᓚᐅᕐᒪᑕ ᓱᕈᓯᕐᓂ ᐱᙳᐊᖅᑐᓂᒃ ᐊᒃᑕᕐᕕᖕᒥ, ᑖᓐᓇᓗ ᓇᓗᓇᕈᓐᓃᖅᖢᓂ ᐱᒋᐊᕈᑎᐅᓂᖓᓂ ᐃᑭᑦᑐᒧᑦ.”

ᐅᖃᓚᐅᙱᑦᑐᖅ ᑖᒃᑯᐊ ᓇᑭᙶᕐᓂᑰᔭᕆᐊᒃᓴᖏᓐᓂ ᖁᒻᒧᑦ ᐃᑭᑎᑕᐅᓲᑦ.

ᑰᒑᕐᔪᒃᒥ ᖃᑦᑎᕆᔨ ᑰᕆ ᖃᕝᕕᒃ ᐃᓚᒋᔭᐅᓚᐅᕐᑐᖅ ᖃᑦᑎᕆᓇᓱᒃᑐᓂᒃ ᐃᑯᒪᔪᒥᒃ. ᐅᖃᓚᐅᕐᑐᖅ ᑕᕝᕙᓃᓚᐅᕐᓂᖓᓂ ᐃᑲᕐᕋ 24 ᐅᖓᑖᓂ.

“ᓄᑭᖃᓗᐊᕈᓐᓃᓚᐅᕐᑐᖓ,” ᖃᕝᕕᒃ ᐅᖃᕐᑐᖅ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ. ᐃᓚᖓᓪᓕ ᐊᔪᕐᓇᕐᓂᖅᐹᖑᓚᐅᕐᑐᖅ, ᐅᖃᕐᑐᖅ, ᐅᓪᓗᓕᒫᕌᓗᒃ ᐳᔫᖅᑐᒦᓪᖢᓂ ᐃᑯᐊᓚᔪᓄᑦ ᐊᒃᑕᑯᓄᑦ.

ᖃᕝᕕᒃ ᐃᑯᐊᓚᔪᖅ ᐊᖏᓂᖃᖅᑎᒋᓂᕋᓚᐅᕐᑕᖓ ᐃᒡᓗᑎᑐᑦ ᖁᓕᕇᓕᒃᑎᑐᑦ. ᖃᑦᑎᕆᔩ ᓂᑭᑦᑖᑲᑕᓚᐅᕐᑐᖅ, ᖃᐅᔨᓇᖅᖢᑎᒃ ᐊᒻᒪ ᐃᑯᐊᓚᔪᒥ ᖃᒥᑦᑎᓇᓱᒃᖢᑎᒃ ᑎᑭᖢᒍ 4:00 ᐅᓪᓛᒃᑯᑦ ᔫᓂ 30.

ᐃᑯᐊᓚᔪᖅ ᐊᔪᓕᖅᑕᐅᒻᒪᕆᓚᐅᙲᓐᓇᖅᑐ, ᐃᒡᓗᓂᒡᓗ ᓱᕋᑐᖃᙱᖢᓂ ᐊᒻᒪᓗ ᐋᓐᓂᖅᑐᖃᓚᐅᙱᖢᓂ, ᐅᖃᕐᑐᖅ ᐸᐃᔪᔅ.

ᑰᒑᕐᔪᒃᒧᑦ ᒪᐃᔭ ᑎᐊᑎ ᐊᑉᓴᒃᑕᐅᓐ ᖁᔭᓕᓚᐅᕐᑐᖅ ᖃᑦᑎᕆᔨᓂ ᐱᓕᕆᐊᖏᓐᓄᑦ.

“ᐱᓕᕆᓇᓱᒃᑐᒍᑦ ᖃᐅᔨᓇᓱᒃᖢᑎᒍᑦ ᑭᓇᑭᐊᖅ ᓄᓇᓕᖕᓂ ᐊᑐᕐᓯᒪᙱᑦᑐᓂᒃ ᖁᒻᒧᑦ ᐃᑭᑎᑦᑕᐅᓲᓂ ᐅᕗᖓ ᐊᒃᑕᕐᕕᒃᒧᑦ,” ᐅᖃᕐᑐᖅ ᖃᕋᓴᐅᔭᒃᑯᑦ ᐅᖃᐅᓯᑎᒍᑦ.

“ᐊᒃᑕᕐᕕᒃ ᓈᒻᒪᙱᒻᒪ ᐃᒋᑦᑎᕕᐅᓂᐊᕐᓗᓂ ᖄᖅᑕᔫᓂ ᐅᕝᕙᓘᓐᓃᑦ ᖁᒻᒧᑦ ᐃᑭᑎᑕᐅᓲᓂᒃ.”