ᑰᔾᔪᐊᖅᒥ ᐊᖑᓇᓱᒃᑎ ᐅᖃᖅᑐᖅ ᑐᖁᑎᑦᑎᔪᒪᓚᐅᙱᓐᓂ
ᕋᖅᖢᓂ ᓇᓄᕐᒥ ᓄᓇᓕᖕᓄᐊᖅᓯᒪᔪᒥᒃ

For English version, see Kuujjuaq hunter says he wishes he didn’t have to kill invading polar bear

ᐅᓇ ᐅᓪᓗᖅ ᐊᐃᑉᐹᖑᑐᐃᓐᓇᓚᐅᕐᓯᒪᔪᖅ ᐅᓐᓄᒃᑯᑦ ᑰᔾᔪᐊᖅᒥ ᐆᒧᖓ ᑖᒪᔅ ᓯᐄ ᓛᒻᒧᑦ, ᑭᓯᐊᓂᓕ ᖁᑭᖅᓯᔭᕆᐊᖃᓕᕐᒪᑦ ᓇᓄᕐᒥ.

ᐊᖏᕐᕋᖅᓯᒪᓕᖅᖢᓂ ᐃᖅᑲᓇᐃᔮᓪᓚᓚᐅᖅᖢᓂ ᐅᖁᒪᐃᑦᑐᒥ ᓄᓇᓯᐅᑎ ᐊᖁᑎᐅᓂᕐᒥ, ᓯᐄ ᓛᒻ ᓈᓚᐅᑎᓂ ᑐᓵᖑᔭᓚᐅᕐᓯᒪᔪᖅ ᐃᕐᖑᑕᖓᓗᑦ ᔭᓄᐊᕆ 30-ᐅᑎᓪᓗᒍ ᒫᓂ 5:00 ᒥᒃᓵᓂ ᐅᓐᓄᓴᒃᑯᑦ.

ᓈᓚᐅᑎᒥ ᐅᖃᖅᑎᐅᔪᖅ ᐅᖃᐅᓯᖃᓚᐅᕐᑐᖅ ᓇᓄᖕᒥ ᐊᖑᑎᒥ ᒪᓕᓵᖅᑐᒥ ᐊᖏᕐᕋᖓᓄᙵᐅᔪᒥᑦ ᐊᒻᒪᓗ ᐃᓯᕋᓱᓚᐅᑲᒃᖢᓂ ᐃᒡᓗᒧᑦ.

“ᐃᒪᐃᓚᐅᕐᑐᖓ, ᑕᐃᒪᐃᒻᒪᖃᐃ?” ᓯᐄ ᓛᒻ ᐅᖃᕐᑐᖅ, ᑖᔅᓱᒥᖓ ᑐᓴᓵᖅᑎᓪᓗᒍ ᔭᓄᐊᕆ 31-ᒥ ᐊᐱᖅᓱᖅᑕᐅᑎᓪᓗᒍ. ᐅᖃᓚᐅᕐᑐᖅ ᐃᒪᐃᓕᓚᐅᕐᓂᕋᖅᖢᓂ, “ᐆᑮ ᑭᑦᔅ, ᖁᑭᐅᑎᒐ ᐱᓂᐊᕋᒃᑯᑦ, ᓱᓇᒐᐃᓪᓗ ᐊᒻᒪ ᓇᓄᕐᓯᐅᕐᓂᐊᖅᖢᑕ!”

ᓯᐄ ᓛᒻ ᓄᓇᓕᖕᓂ ᐃᓚᐅᕈᓘᔭᖃᑦᑕᕐᒪᑦ ᐊᒻᒪᓗ ᖃᓄᐃᑦᑐᓂᒃ ᐅᐸᖃᑦᑕᖅᖢᓂ ᐊᒻᒪᓗ ᖃᑦᑎᕆᔨᐅᓪᓗᓂ ᐃᖅᑲᓇᐃᔮᖃᖅᖢᓂ. ᑖᓐᓇ ᐃᕐᓂᖓᓗ ᖃᐅᔨᒪᔭᐅᔫᒃ ᐊᖑᓇᓱᒃᑎᒻᒪᕆᐅᓂᖏᓐᓂ.

ᑐᓴᕋᒥ ᓈᓚᐅᑎᒃᑰᖅᑕᐅᔪᒥᒃ ᖁᑭᐅᑎᖓ .270 ᐳᕋᐅᓂᖕ ᐊᖑᓇᓲᑎᖓ ᐱᓪᓗᓂᐅ ᓇᓄᖅ ᐅᐸᒃᓯᒪᔭᖓᓄᙵᐅᓕᖅᖢᓂ.

“ᓲᖃᐃᒻᒪᓗ ᐃᓄᒃᑕᖃᐅᕈᓘᔭᓕᖅᖢᓂ ᒫᓂ 50-ᖏᓐᓂ 100-ᓄ, ᑕᒪᕐᒥ ᓇᓄᕐᒥ ᕿᓂᕋᓱᒃᑐᐃᑦ,” ᓯᐄ ᓛᒻ ᐅᖃᕐᑐᖅ.

ᓄᓇᓕ ᐊᖑᓇᓱᒃᑎ ᑖᒪᔅ ᓯᐄ ᓛᒻ ᑐᖂᑦᑎᔪᖅ ᓇᓄᕐᒥ ᑰᔾᔪᐊᖅᒥ ᑕᑯᔭᐅᑲᑕᒃᑐᖅ ᔭᓄᐊᕆ 30-ᒥ. (ᐊᔾᔨᙳᐊᖅ ᐅᕙᙵᑦ ᓰᓇ ᒍᐊᑕᓐ)

ᐅᖃᓚᐅᕐᑐᖅ ᓄᓇᓯᐅᑎᖓᑕ ᖃᑦᑎᕆᔨᐅᓂᕐᒧᑦ ᖃᐅᒻᒪᖅᑯᑎᖏᑦ ᐃᑭᑎᓐᓂᕋᖅᖢᓂᒋᑦ ᐸᓖᓯᒃᑯᑦ ᓄᓇᓯᐅᑎᖓ ᓴᓂᑦᑎᐊᖓᓂ ᐊᒻᒪᓗ ᐃᓄᐃᑦ ᑎᒃᑯᐊᖅᑐᓕᖅᖢᓂ ᓇᓄᖅ ᓇᓃᓐᓂᖓᓂᒃ. ᐸᓖᓯᒃᑯᑦᑕᐅᖅ ᖁᑭᐅᑎᖏᓐᓂᒃ ᑎᒍᒥᐊᕐᓂᕋᓚᐅᖅᑕᖏᑦ, ᓯᐄ ᓛᒻ ᐅᖃᕐᑐᖅ.

“ᓴᕿᓐᓇᒪ ᐅᖃᖅᖢᖓ, ‘ᐊᖏᔪᐊᓗᖕᒥ ᖁᑭᐅᑎᖃᖅᑐᖓ!’ ᓇᓄᕐᓗ ᑕᑯᓪᓗᖓ ᐊᒻᒪ ᐹᖕ! ᖁᑭᖅᖢᒍ,” ᐅᖃᕐᑐᖅ.

“ᐅᕙᓐᓄᙵᐅᓯᓪᓗᓂ ᖁᑭᐊᓪᓚᓚᐅᖅᖢᒍ ᐊᒻᒪᓗ ᒪᕐᕉᒃ ᐸᓖᓯᒃ ᖁᑭᐅᑎᖏᓐᓂᒃ ᑎᒍᒥᐊᖅᖢᑎᒃ,” ᓯᐄ ᓛᒻ ᐅᖃᕐᑐᖅ. “ᓱᒃᑲᔪᐊᓗᖕᒥ ᖁᑭᖅᓴᖅᐸᓕᑦᑎᓯᑲᐅᑎᒋᓪᓗᑎᒃ.”

ᐊᒥᓱᐃᖅᖢᑎᒃ ᖁᑭᖅᓵᓪᓚᓚᐅᖅᖢᑎᒃ ᑖᓐᓇ ᓇᓄᖅ ᑐᖁᑕᐃᓐᓇᓚᐅᖅᑐᖅ 5:30 ᒥᒃᓵᓂᑦ, ᐸᓖᓯᑦ ᐅᖃᓚᐅᕐᑐᑦ.

ᓯᐄ ᓛᒻ ᐅᖃᓚᐅᕐᑐᖅ ᓇᓄᖅ ᖃᒧᑕᐅᔭᒥᓄᐊᕐᓂᕋᖅᖢᓂᐅᒃ ᐊᒻᒪ ᐊᖏᕐᕋᐅᑎᓪᓗᓂᐅᒃ ᐱᓚᒃᑐᕐᓂᐊᕋᒥᐅᒃ ᐃᕐᓂᕇᖑᓗᑎᒃ.

“ᐆᒃᑐᕋᓚᐅᕐᑕᕋ ᕿᖓᖓᓂᒃ ᐸᒥᐅᖓᓄᑦ ᐊᒻᒪ ᑕᑭᓂᖃᓪᓗᐊᖅᖢᓂ 70 ᐃᓐᓯᔅᓂᒃ [178 ᓴᓐᑎᒦᑕᔅ], ᑕᐃᒪᓕ ᒫᓂ 6 ᕖᑦ,” ᐅᖃᕐᑐᖅ. “ᐊᒻᒪ ᐃᓱᒪᔪᖓ ᒪᕐᕉᖕᓂ ᓇᑉᐸᕐᒥᓪᓗ ᐊᕐᕌᒍᖃᕆᐊᒃᓴᖓᓂ.”

ᓇᓄᖅ ᓴᓪᓗᐊᓘᓂᖓᓄᑦ ᐃᑲᕐᕋᐅᑉ ᓇᑉᐸᑐᐃᓐᓇᖓᓂᒃ ᐱᓕᕆᐊᖑᓚᐅᕐᑐᖅ.

“ᓂᕿᖓ ᑐᓐᓂᖁᑎᒋᑲᑕᓚᐅᙱᑕᕋ, ᐅᕐᓱᖃᙱᑦᑎᐊᓚᐅᕐᑐᑦ ᐅᕝᕙᓘᓐᓃᑦ ᐊᕿᐊᕈᖓᓃᑦᑐᖃᙱᖢᓂ,” ᓯᐄ ᓛᒻ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓇᓄᖅ ᐋᓐᓂᐊᖃᓚᐅᕆᐊᒃᓴᖓᓂ.

“ᕿᒪᒃᑕᐅᑐᐃᓐᓇᖅᑐᕕᓂᕐᓘᓐᓃᑦ ᐅᕝᕙᓘᓐᓃᑦ ᓂᕆᑦᑎᐊᑲᑕᙱᑦᑐᕕᓂᖅ ᐊᑯᓂᐊᓗᒃ. ᐃᓐᓇᐅᙱᑦᑐᓪᓛᓘᓪᓗᓂ, ᓴᓪᓗᐊᓗᒃ ᐊᒻᒪ ᑳᒃᑐᐊᓘᓪᓗᓂ. ᒪᓕᒃᐸᓵᓚᐅᕐᒪᑦ ᐃᒡᓗᒧᑦ ᐅᓪᓚᒃᑐᒥᑦ.”

ᓇᓄᖅ ᑕᐃᒪᐃᑎᓪᓗᒍ ᐅᓗᕆᐊᓇᕈᓐᓇᕐᒪᑦ, ᓯᐄ ᓛᒻ ᐅᖃᕐᑐᖅ.

ᓯᐄ ᓛᒻ ᐅᖃᒪᐅᕐᑐᖅ ᑐᖁᑦᑐᒪᓚᐅᙱᓐᓂᕋᖅᖢᓂᐅᒃ ᑭᓯᐊᓂᓕ ᑕᐃᒪᐃᑦᑕᕆᐊᖃᓚᐅᕐᒪᑦ.

ᐆᒪᔪᓄᑦ ᐋᓐᓂᐊᖅᑐᓂᒃ ᐱᓕᕆᔨᑕᖃᙱᒻᒪᑦ ᐅᕝᕙᓘᓐᓃᑦ ᓄᑭᖃᕈᓐᓃᕐᓇᖅᑐᓂᒃ ᑰᔾᔪᐊᖅᒥ ᑖᔅᓱᒥᖓ ᓇᓄᕐᒥ ᑐᖁᑕᐅᙱᔾᔪᑎᐅᓇᔭᖅᑐᓂᒃ.

ᐅᓇ ᓯᕗᓪᓕᖅᐹᖅ ᓇᓄᖅ ᑰᔾᔪᐊᖅᒧᐊᖅᑐᑦ ᓯᐄ ᓛᒻ ᖃᐅᔨᔭᖏᓐᓂᒡᓕ ᐊᒻᒪᓗ ᐃᓱᒪᓪᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐊᒃᑐᐊᓂᖃᕋᔭᕆᐊᒃᓴᖓᓂ ᓄᓇᓕᖕᓄᑦ ᓂᕿᓯᐅᕋᓱᖕᓂᖓ.

ᐅᖓᕙ ᓱᓕ ᓯᑯᖃᙱᒻᒪ ᐅᐊᖕᓇᖓᓄᑦ ᑕᐃᒪᓕ ᓇᓄᐃᑦ ᓇᑦᑎᕋᓱᒍᓐᓇᙱᒻᒪᑕ ᑕᐃᑲᓂ.

ᑰᔾᔪᐊᖅ ᒫᓂ 60 ᑭᓛᒥᑕᓂ ᓯᒡᔭᒥᐅᖓᓯᒃᓴᕋᓗᐊᕐᒪᑕ ᓇᓄᐃᑦ ᓄᓇᖅᐸᓯᖕᓂᕐᓴᒧᙵᐅᔭᕆᐊᖃᕐᒪᑕ ᓂᕿᓯᐅᕋᓱᒃᖢᑎᒃ.

“ᐅᓇ ᐃᓕᖅᑯᓯᐅᙱᒻᒪ ᓇᓄᕐᒥ ᑕᒪᐅᖓᑐᖃᖅ ᑎᑭᓂᖓᓂᒃ,” ᓯᐄ ᓛᒻ ᐅᖃᕐᑐᖅ.

ᒫᓐᓇᐅᔪᕐᓕ ᓇᓄᕕᓂᖅ ᒫᓐᓇ ᓯᐄ ᓛᒻ ᓯᕐᓗᐊᖓᓃᑦᑐᖅ ᓂᐅᕕᖅᑕᐅᓇᓱᖕᓂᖓᓂᒃ.