ᑰᔾᔪᐊᖅ ᒪᐃᔭ ᐅᖃᕐᑐᖅ ᐃᓅᓱᒃᑐᓄᑦ ᐱᓕᕆᐊᒃᓴᐃᑦ ᓯᕗᓪᓕᐅᔭᕆᐊᖃᕐᓂᖏᓐᓂᒃ

For English version, see Kuujjuaq’s mayor says youth programs are her priority

ᐅᑎᖅᑎᑕᐅᓚᐅᖅᑎᓪᓗᒍ ᐊᐃᑉᐸᖓᓂ ᒪᐃᔭᐅᓂᐊᕐᓂᕐᒥ ᑰᔾᔪᐊᖅᒥ ᐱᓇᓱᐊᕈᓯᐅᓚᐅᕐᑐᒥ, ᒥᐊᓕ ᔪᐊᓇᔅ ᐅᖃᕐᑐᖅ ᐃᓅᓱᒃᑐᓄᑦ ᐱᓕᕆᐊᒃᓴᐃᑦ ᓯᕗᓪᓕᐅᑎᓐᓂᕋᖅᖢᓂᒋᑦ ᐸᕐᓇᐅᑎᖏᑦᑎᒍᑦ.

“ᑲᒪᓚᐅᕐᑐᖓ ᒪᐃᔭᐅᓂᕐᒧᑦ ᓂᕈᐊᒐᒃᓴᖅᑕᖃᓚᐅᙱᓐᓂᖓᓂ ᐊᓯᓐᓂ,” ᐅᖃᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᕕᐱᕆ 7-ᒥ ᕼᐋᒻᒪᓚᒃᑯᑦ ᑎᑎᕋᕐᕕᖓᓂ.

“ᖁᕕᐊᓱᒃᑐᖓ ᐃᑲᔪᖅᑐᖅᑕᐅᑲᑕᑦᑎᐊᕋᒪ, ᐊᒻᒪᓗ ᓂᕆᐅᒃᖢᖓ ᐱᓕᕆᖃᑎᖃᕐᓂᐊᕐᓂᓐᓂ ᓄᑖᓂ ᑲᑎᒪᔨᓂ.”

ᓄᓇᓕᖕᓄᑦ ᑲᑎᒪᔨᒃᓴᓂ ᓂᕈᐊᓚᐅᕐᒪᑕ ᓄᓇᕕᒃᒥ ᐱᓇᓱᐊᕈᓯᐅᓚᐅᕐᑐᒥ. ᓂᕈᐊᕐᓇᐅᖃᑦᑕᕐᒪᑦ ᐊᕐᕌᒍᑦ ᐱᖓᓱᑦ ᐊᓂᒍᕌᖓᑕ ᑭᓯᐊᓂᓕ 2021-ᒥ ᓂᕈᐊᕐᓂᐅᔪᖅ ᐅᖓᕙᕆᐊᖅᑕᐅᓚᐅᕐᓯᒪᖕᒪᑦ 2022-ᒧᑦ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᓂᖓᓄᑦ.

ᓂᕈᐊᕆᐊᕐᑐᓚᐅᕐᑐᑦ ᑰᔾᔪᐊᖅᒥ 25.6 ᐳᓴᓐᑎᖏᑦ ᓂᕈᐊᕈᓐᓇᖅᑐᐃᑦ, ᐊᑦᑎᖕᓂᖅᐹᖅ 8-ᓂ ᓄᓇᓕᖕᓂ ᓂᕈᐊᖅᑕᐅᔪᓂ ᐅᖃᐅᓯᖃᕐᓯᒪᓕᕐᑐᓂ.

ᔪᐊᓇᔅ ᐅᖃᓚᐅᕐᑐᖅ ᐃᓄᐃᑦ “ᐃᓚᐅᖃᑦᑕᕆᐊᖃᕐᒪᑕ,” ᐊᒻᒪᓗ ᓄᓇᓖᑦ ᐃᓄᖃᖅᑐᖅ 2,700-ᐸᓗᖕᓂ ᐃᑲᐅᖃᑦᑕᕆᐊᖃᖅᖢᑎᒃ.

“ᐅᖃᑲᑕᒍᓐᓇᖅᐸᑕ ᑐᓴᐅᒪᔾᔪᑎᓕᕆᓂᒃᑯᑦ ᓇᓂᑐᐃᓐᓇᕐᓘᓐᓃᑦ, ᐃᓚᐅᓕᕈᓐᓇᖅᑐᑦ, ᐊᑐᐃᓐᓇᐅᕙᒡᓗᑎᒃ ᐊᒻᒪ ᒪᓕᒐᓕᕆᓂᕐᒥ ᐱᓕᕆᐊᖃᕋᓱᒡᓗᑎᒃ,” ᐅᖃᕐᑐᖅ.

8-ᓂ ᓂᕈᐊᒐᒃᓴᖅᑕᖃᖅᖢᓂ 6-ᓄ ᐃᓂᒃᓴᓄᑦ ᑲᑎᒪᔨᓂ, ᐅᑯᐊ ᓵᓚᒃᓴᓚᐅᕐᑐᑦ ᔭᓂᕗ ᒥᐅᓂᒃ-ᕗᐊᑦᑭᓐᔅ, ᓕᐅᕆ ᕗᐊᑦ, ᑯᓘᑦ ᒐᑦᐳᐊ, ᔫᓴᕝ ᓯᓅᐹᓪ, ᑕᐃᕕᑦ ᑎᐳᐃ ᐊᒻᒪ ᔫᐱ ᑕᒃᑭᐊᐱᒃ.

ᓂᕈᐊᒐᒃᓴᐃᑦ ᐅᓄᕐᓂᕐᓴᐃᑦ ᐅᖃᐅᓯᖃᖃᑦᑕᓚᐅᕐᑐᑦ ᐃᓅᓱᒃᑐᓄᑦ ᐱᓕᕆᕝᕕᒃᓴᖃᕐᓂᖅ ᓯᕗᓪᓕᐅᔾᔭᐅᓂᕋᖅᑕᐅᓪᓗᓂ.

ᑰᔾᔪᖅᒥ ᐃᓅᓱᒃᑐᓄᑦ ᐅᐸᒡᕕᒃ ᐊᑐᖅᑕᐅᖃᑦᑕᕈᓐᓃᕐᓯᒪᖕᒪᑦ ᐊᕐᕌᒍᒐᓴᐅᓕᕐᑐᓂ ᑕᐃᒪᙵᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᑕᖃᓚᐅᕐᓯᒪᑎᓪᓗᒍ ᑖᓐᓇᓗ ᐃᒡᓗ ᓄᑕᐅᔪᓐᓃᖅᖢᓂ ᐊᒻᒪ ᖁᐊᕐᓵᕐᓇᖅᓯᓪᓗᓗᓂ.

ᔪᐊᓇᔅ ᐅᖃᓚᐅᕐᑐᖅ 2025 ᑎᑭᑎᓪᓗᒍ ᐱᓕᕆᐊᖃᓕᕆᐊᕐᓂᐊᖅᑐᑦ ᓄᑖᒥ ᐃᓅᓱᒃᑐᓄᑦ ᐅᐸᒡᕕᒃᓴᒥ ᐃᑲᔫᑎᖃᖅᖅᑎᑕᐅᓗᑎᒃ ᒪᑭᕕᒃᑯᓐᓂ.

ᑰᔾᔪᐊᖅᒥ ᐳᐃᔾᔪᕋᕐᕕᒃ ᐊᒻᒪ ᓂᕈᐊᒐᒃᓴᐅᔪᓄᑦ ᐅᖃᐅᓯᐅᖃᑦᑕᓚᐅᕐᒥᔪᖅ. ᓴᓇᔭᐅᓚᐅᕐᓯᒪᓪᓗᓂ 2007-ᒥ, ᐃᒡᓗ ᐊᕐᕌᒍᒐᓴᐅᓕᕐᑐᓂ ᒪᑐᓯᒪᓕᕐᒪ ᐊᒻᒪᓗ ᓴᓇᔭᐅᒃᑲᓐᓂᕆᐊᖃᖅᖢᓂ.

“ᖃᓄᐃᓐᓂᐊᕆᐊᒃᓴᓐᓂ ᐅᖃᕈᓐᓇᙱᑦᑐᖓ ᒫᓐᓇ,” ᔪᐊᕐᓇᔅ ᐅᖃᕐᑐᖅ ᐅᖃᐅᓯᖃᖅᖢᓂ ᐳᐃᔾᔪᕋᕐᕕᐅᑉ ᓯᕗᓂᒃᓴᖓᓂ.

“ᓈᒻᒪᙱᓕᐅᕈᑎᖃᕈᓘᔭᕐᓯᒪᒐᑦᑕ ᑖᔅᓱᒧᖓ. ᐃᑲᔫᑎᒃᓴᑲᓪᓚᖕᓂ ᐊᑐᓚᐅᕐᓯᒪᔪᑦ ᐊᐅᓚᑕᐅᔪᓐᓇᕐᓂᐊᕐᒪᑕ ᑕᖅᑭᓂ ᐱᖓᓱᓂ ᑎᓴᒪᓄ ᐊᕐᕌᒍᒥ. ᐊᒻᒪᓗ ᐱᐅᔪᓐᓃᖅᐸᓪᓕᐊᓂᐊᖅᖢᓂ ᓄᓇᒦᑦᑐᒧᑦ ᓯᑯᑐᕐᖃᕐᒧᑦ.”

ᐅᖃᓚᐅᕐᑐᖅ ᐸᕐᓇᐅᓯᐅᕈᒪᓪᓗᓂ ᐱᓕᕆᐊᕆᔭᐅᓂᐊᕐᒪᑦ ᐳᐃᔾᔪᕋᕐᕕᒃ ᐊᒻᒪᓗ “ᐃᑲᔫᑎᒃᓴᓂ ᕿᓂᕆᐊᖃᕐᓂᐊᖅᖢᑕ ᓲᖃᐃᒻᒪ ᐊᑭᑭᑦᑑᙱᒻᒪ ᓄᑖᒥ ᓴᓇᓂᐊᕐᓗᓂ.”

ᔪᐊᓇᔅ ᐅᖃᓚᐅᕐᑐᖅ ᓯᕗᓪᓕᕐᒥ ᓂᕈᐊᖅᑕᐅᑎᓪᓗᒍ 2022-ᒥ, ᓯᕗᓪᓕᐅᔾᔭᐅᑎᑦᑎᓚᐅᕐᓯᒪᔪᑦ ᓄᖅᑲᖅᑎᑦᑎᓇᓱᖕᓂᖅ ᐋᖓᔮᕐᓇᖅᑐᓂᒃ ᐃᒥᐊᓘᙱᑦᑐᓂ ᑰᔾᔪᐊᖅᒧᐊᖃᑦᑕᖅᑐᓂᒃ.

ᐋᖓᔮᕐᓇᖅᑐᑦ ᐃᒥᐊᓘᙱᑦᑐᑦ “ᐊᒃᑐᐃᓂᖃᓗᐊᓕᕐᒪᑐ ᐅᓄᕐᑐᓂᒃ ᐃᓅᓱᒃᑐᓂᒃ ᐊᒻᒪᓗ ᐃᓐᓇᕗᑦ ᐱᑦᑎᐊᖅᑕᐅᑲᑕᒍᓐᓃᖅᖢᑎᒃ,” ᐅᖃᓚᐅᕐᑐᖅ ᓄᕕᐱᕆ 7-ᒥ. “ᐱᓕᕆᖃᑎᖃᖃᑦᑕᕋᒪ ᐸᓖᓯᒃᑯᓐᓂ ᐊᒻᒪᓗ ᓈᓚᐅᑎᒃᑰᕈᑎᒋᓚᐅᖅᖢᒍ ᑕᒪᓐᓇ ᐃᓱᒫᓗᖕᓇᕐᓂᖓᓂᒃ,” ᐅᖃᕐᑐᖅ.

ᐅᖃᓚᐅᕐᑐᖅ ᐅᓇ ᕕᐊᓐᑕᓄᓪ (fentanyl) — ᐋᖓᔮᕐᓇᖅᑐᖅ ᐄᔭᒐᐅᓪᓗᓂ ᐅᖃᐅᓯᐅᓯᒪᔪᖅ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓴᙱᓂᕐᓴᐅᓂᖓᓂ 20-ᖏᕐᓱᖅᖢᓂ ᒪᐅᖓ 40-ᖏᕐᓱᖅᖢᓂ ᕼᐃᐅᕈᐃᓐᙳᕆᕋᖅᑕᐅᔪᒥᑦ (heroin) ᐊᒻᒪᓗ ᓱᓐᓂᓗᐊᒧᑦ ᐃᓅᔪᓐᓃᕈᑎᐅᔪᓐᓇᖅᖢᓂ — ᑖᓐᓇᓗ ᓄᓇᓕᖕᓄᑦ ᑎᑭᑎᑕᐅᖃᑦᑕᓕᕐᒪ ᐊᒻᒪᓗ ᐅᓄᕐᑐᓂᒃ ᐃᓅᔪᓐᓃᕈᑎᐅᓯᒪᓕᖅᖢᓂ.

“ᑕᒪᑐᒥᖓ ᐱᓕᕆᐊᖃᕈᒪᓪᓚᕆᒃᑲᒪ ᑕᒪᒃᑯᐊ ᐅᓗᕆᐊᓇᖅᑐᐊᓗᐃᑦ ᐋᖓᔮᕐᓇᖅᑐᑦ ᐃᒥᐊᓘᙱᑦᑐᑦ ᓄᓇᑦᑎᓐᓄᐊᖅᑕᐃᓕᑎᓐᓇᓱᒡᓗᒋᑦ,” ᐅᖃᕐᑐᖅ. “ᐅᑯᐊ ᓂᐅᕕᐊᒃᓴᖃᖅᐸᒃᑐᑦ ᖃᐅᔨᒪᔪᖅ ᐅᓄᕐᑐᓂ ᐃᓚᒋᔭᐅᔪᓂᒃ ᐋᓐᓂᖅᑎᑦᑎᓯᒪᓕᕐᓂᖏᓐᓂᒃ ᐊᒻᒪᓗ ᐃᒪᒌᓂ ᐊᕕᑎᑦᑎᔾᔪᑎᐅᓪᓗᑎᒃ.”

ᐊᐅᔭᐅᕋᑖᕐᑐᖅ, ᑰᔾᔪᐊᑉ ᐊᒃᑕᕐᕕᖓᓂ ᐱᓕᕆᕝᕕᒃᓴᓕᐅᓚᐅᕐᑐᑦ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐱᓕᕆᐊᒃᓴᒧᑦ ᒪᑯᓂᖓ ᐊᐅᔭᑦᑐᓂᒃ, ᓴᕕᕋᔭᖕᓂᒃ ᐊᒻᒪᓗ “ᖃᓄᐃᑦᑐᑐᐃᓐᓇᓂᒃ ᐊᑐᒃᑲᓐᓂᕈᓐᓇᖅᑐᓂᒃ.”

ᔪᐊᓇᔅ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᐅᔪᑦ ᑕᒪᑐᒥᖓ ᓱᓕ ᓴᓇᔭᕆᐊᖃᕐᒪᑕ ᑭᓯᐊᓂᓕ ᓄᑖᒥ ᐊᕐᕌᒍᒥ ᐊᐅᓚᑕᐅᓕᓛᖅᖢᓂ.

ᐃᓚᒋᓪᓗᒍ, ᐅᖃᒃᑲᓐᓂᕐᑐᖅ, ᐴᕆᔭᐅᕙᖕᓂᐊᖅᑐᓂᒃ ᑰᔾᔪᐊᖅᒧᑦ ᑎᑭᑎᑦᑎᓂᐊᖅᑐᑦ ᓄᓇᖃᖅᑐᐃᑦ ᐊᕕᒃᑐᐃᔪᓐᓇᓂᐊᕐᒪᑕ ᐊᑐᒃᑲᓐᓂᕈᓐᓇᖅᑐᓂᒃ ᐊᒃᑕᑯᖏᓐᓂᒃ.