ᑰᔾᔪᐊᖅ ᑐᙵᓱᒃᑎᑦᑎᓂᐊᕐᑐᑦ ᓴᓇᐅᒐᓕᐅᕐᑕᓄᑦ ᐃᓂᒋᔭᐅᔪᓄᑦ ᐅᑯᓄᖓ ᐊᕙᑕᖅ-ᐃᓱᐊᕐᓯᕕᒃ ᐱᓕᕆᖃᑎᒌᓂᒃ

For English version, see Kuujjuaq to host new arts space through Avataq-Isuarsivik partnership

ᓄᑖᖅ ᐃᓕᖅᑯᓯᓕᕆᓂᕐᒧᑦ ᑲᑎᒪᓂᖅ ᐃᓕᓐᓂᐊᖅᑎᑕᐅᔾᔪᑎᒃᓴᓂ ᐋᖅᑭᒃᓱᐃᕙᓪᓕᐊᔪᑦ ᑰᔾᔪᐊᖅᒥ, ᖁᔭᓐᓇᒦᒃ ᐅᑯᓄᖓ ᐱᓕᕆᖃᑎᒌᖕᓂᖏᓐᓄᑦ ᐊᕙᑕᖅ ᐃᓕᖅᑯᓯᓕᕆᔨᒃᑯᑦ ᐊᒻᒪᓗ ᐃᓱᐊᕐᓯᕕᒃ ᒪᒥᓴᕐᕕᓕᕆᔨᒃᑯᑦ.

ᖃᓄᐃᓕᐅᕈᑎᐅᔪᒪᓂᖅ ᐅᖃᕐᓯᒪᔪᖅ ᐱᔭᐅᔭᕆᐊᖃᓪᓚᕆᒃᑐᒥ ᐱᓕᕆᕝᕕᐅᖃᑦᑕᕐᓂᐊᕐᑐᒥ ᐊᒻᒪ ᐃᑲᔪᕈᑎᐅᓗᓂ ᓄᓇᕕᒃᒥ ᓴᓇᐅᒐᓕᐅᕐᑎᓂᒃ, ᐅᓄᕐᓂᕐᓴᐃᓪᓗ ᑐᓚᒃᑕᕐᕕᖃᖃᑦᑕᖅᖢᑎᒃ ᓴᓇᐅᒐᓕᐅᕋᓱᖕᓂᒃᑯᑦ ᐊᒻᒪ ᐱᓕᕆᐊᖏᓐᓂ ᖃᐅᔨᑎᑕᐅᓇᓱᖕᓂᒃᑯᑦ.

“ᐃᓱᒪᒐᑦᑕᓕ ᓄᓇᓕᖕᓂ ᓴᓇᐅᒐᓕᐅᕐᑎᑦ ᓇᖕᒥᓂᖅ ᓴᓇᔭᖏᓐᓂᒃ ᑎᑎᕋᐅᔭᒐᓕᐅᕈᓐᓇᓕᕐᓗᑎᒃ ᐊᒻᒪᓗ ᐊᓯᖏᓐᓂ ᑎᑎᕋᐅᔭᒐᖅᑎᓂᒃ ᓴᓇᖁᔭᐅᓕᕈᓐᓇᕐᓯᓗᑎᒃ ᐊᓯᖏᓐᓃᑦᑐᓂᒃ ᓄᓇᓕᖕᓂᒃ,” ᐅᖃᕐᑐᖅ ᐋᓐᑐᕇ-ᐋᓐ ᕖᓐ, ᑐᑭᒧᐊᖅᑎᑦᑎᔨᐅᖃᑕᐅᔪᖅ ᐊᐅᒫᒡᒌᕕᒃᒥ, ᓄᓇᕕᒃᒧᑦ ᓴᓇᐅᒐᓕᐅᖅᑎᓂᒃ ᐱᓕᕆᐊᖃᖅᑐ ᐊᕙᑕᖅᒥᑦ.

“ᐅᓇ ᑮᓇᐅᔭᓕᐅᕈᑎᐅᔪᓐᓇᕐᓯᓇᔭᕐᑐᖅ ᐃᓚᖏᓐᓄᑦ, ᒫᓐᓇᓗ ᑕᐃᒪᐃᓕᐅᖅᑐᖃᙱᒻᒪᑦ ᓄᓇᕕᒃᒥᑦ.”

ᓄᓇᕕᒃ ᐋᖅᑭᒃᓱᐃᓯᒪᙱᒻᒪ ᖃᓄᖅ ᐊᐅᓚᑦᑎᔾᔪᑎᐅᓇᔭᕐᑐᓂᒃ ᐊᒻᒪ ᓴᓇᐅᒐᓕᐊᓂ ᓂᐅᕐᕈᑎᖃᑲᑕᖕᓂᕐᒥ ᐅᓄᕐᓂᕐᓴᓄᑦ, ᕖᓐ ᐅᖃᕐᑐᖅ.

ᐃᓚᖏᑦ ᓴᓇᐅᒐᓕᐅᕐᑏᑦ ᓂᐅᕐᕈᑎᖃᖃᑦᑕᕐᒪᑕ ᓄᓇᓕᖕᓂ ᓂᐅᕕᐊᒃᓴᖃᖅᐸᒃᑐᓂ ᐅᑯᑎᑐᓇᖅ ᑎᕖ ᑎᑎᕋᐅᔭᒐᖃᕐᕕᒃᒧᑦ ᑰᔾᔪᐊᖅᒥ ᐅᕝᕙᓘᓐᓃᑦ ᑕᑯᔭᒐᕐᓂ ᓴᖅᑭᔮᒐᖃᖃᑦᑕᖅᑐᓂᒃ ᐅᑯᑎᑐᓇᖅ ᕆᕙᐃᕗᓪ: ᑎᑎᕋᐅᔭᒐᐃᑦ ᓄᓇᕕᒃᒥ (2014-2019), ᑖᒃᑯᐊᓗ ᒫᓐᓇ ᓴᖅᑭᔮᒐᕆᔭᐅᓪᓗᑎᒃ ᐋᑐᕚᒥ ᑎᑎᕋᐅᔭᒐᖃᕐᕕᒃᒥᑦ (Ottawa Art Gallery).

ᕖᓐ ᐅᖃᓚᐅᕐᑐᖅ ᑎᑎᕋᐅᔭᒐᖅᑏᑦ ᐃᓛᓐᓂ ᐃᓂᖃᖅᑎᑕᐅᔪᓐᓇᓗᐊᙱᒻᒪᑕ, ᐃᓂᒃᓴᓕᐅᕐᕕᖃᙱᖢᑎᒡᓗ ᐊᒻᒪ ᐃᑲᔫᑎᒃᓴᖃᙱᖢᑎᒃ.

“ᐃᓚᒌᑦ ᐃᓂᓴᖃᖃᑎᒌᖃᖃᑦᑕᕐᑐᑦ, ᑕᐃᒪᓐᓇᓗ ᑎᑎᕋᐅᔭᒐᖅᑏᑦ ᐊᑐᐃᓐᓇᖃᖃᑦᑕᓗᐊᙱᒻᒪᑕ ᑎᑎᕋᐅᔭᒐᖏᓐᓂᒃ ᐅᕝᕙᓘᓐᓃᑦ ᐱᓕᕆᐊᖏᓐᓂ ᐱᓕᕆᐊᖃᐃᓐᓇᕈᓐᓇᙱᖢᑎᒃ ᐊᒻᒪᓗ ᐃᓚᖏᓐᓂᓪᓗ ᑲᒪᒋᔭᖃᕆᐊᖃᖅᖢᑎᒃ,” ᐲᓐ ᐅᖃᕐᑐᖅ.

“ᑎᑎᕋᐅᔭᒐᖅᑎᓂᒃ ᑮᓇᐅᔭᓕᐅᖃᑦᑕᖁᔨᒐᑦᑕ ᓴᓇᔭᖏᓐᓄᑦ, ᑭᓯᐊᓂᓕ ᐃᓱᒪᒋᓛᕆᒐᑦᑎᒍᑦ ᓈᒻᒪᒃᑐᓂᒃ, ᐱᖁᑎᖃᑦᑎᐊᖅᑐᓂᒃ, ᐅᓗᕆᐊᓇᙱᑦᑐᓂᒃ ᐱᓕᕆᕝᕕᐅᖃᑦᑕᕐᓂᐊᖅᑐᓂᒃ.”

ᐅᓇ ᓄᑖᖅ ᐱᓕᕆᕝᕕᒃᓴᖅ ᐊᖏᔪᕈᓘᖕᒥ ᐃᒡᓗᕈᓯᖃᕐᓂᐊᖅᑐᖅ ᐊᔾᔨᒌᙱᑦᑐᓄᑦ ᖃᓄᐃᓕᐅᕈᑎᕝᕕᒃᓴᒥᒃ, ᑎᑎᕋᐅᔭᒐᖕᓂᒃ ᓴᓇᙳᐊᕐᕕᖕᒥᑦ, ᐱᐅᓴᐅᑎᓕᐅᕈᑎᓄᑦ ᐅᔭᒥᖕᓄᑦ, ᓇᒡᒍᐊᕐᒥᖕᓄᑦ ᐊᓯᖏᓐᓄᓪᓗ ᐊᒻᒪ ᑎᑎᕋᕐᕕᖃᕐᓗᓂ.

ᓄᓇᓕᖕᓂ ᑎᑎᕋᐅᔭᒐᖅᑎᓐᓄ ᐊᑐᐃᓐᓇᐅᓂᐊᖅᖢᓂ ᐊᒻᒪ ᐃᓱᐊᕐᓯᕕᒃᒥ ᐱᔨᑦᑎᕋᖅᑕᐅᔪᓄᑦ, ᒪᑯᓂᖓ ᑕᑯᔭᒃᓴᓂᒃ ᐊᒻᒪ ᖃᓄᐃᓕᐅᕈᑎᓂᒃ ᓴᓇᐅᒐᕐᓄᑦ, ᓴᓇᐅᒐᓕᐊᓄᑦ ᐊᒻᒪ ᐊᓯᖏᑦᑎᒍᑦ ᓴᓇᐅᒐᓕᐅᕐᓂᕐᒧᑦ.

ᐸᕐᓇᐅᑎᖃᕐᒪᑕ ᐋᖅᑭᒃᓱᐃᓗᑎᒃ ᐊᔪᕈᓐᓃᕐᓴᕈᑎᒃᓴᓂ ᓴᓇᐅᒐᓕᐅᕐᑎᓂᒃ ᖃᐅᔨᑎᑦᑎᒃᑲᓐᓂᕈᑎᓂ ᑎᑎᕋᐅᔭᒐᕐᓂ ᓴᓇᐅᒐᓕᐅᕐᓂᕐᒧᑦ ᐱᒻᒪᕆᐅᔾᔪᑎᒋᔪᓐᓇᖅᑕᖏᓐᓂᒃ, ᓲᕐᓗ ᒪᑯᓂᖓ ᖃᔅᓯᓂ ᐅᓄᕐᑐᓕᐅᖃᑦᑕᕆᐊᖃᕐᓂᕐᒥᒃ ᐊᒻᒪ ᐊᑭᒋᔭᐅᓇᔭᕐᑐᓂᒃ ᐋᖅᑭᒃᓱᐃᓂᕐᒥᒃ, ᑕᐃᒪᓐᓇ ᓂᐅᕐᕈᑎᖃᕈᓐᓇᐃᓐᓇᕈᓐᓇᖁᓪᓗᒋᑦ ᐱᓕᕆᐊᖏᓐᓂᒃ.

ᐅᓇ ᐸᕐᓇᐅᑎ ᐋᖅᑭᒃᓯᓯᒪᔪᑦ ᑲᑎᒪᓂᒃᑯᑦ ᐊᔪᕈᓐᓃᕐᓴᕈᑎᓂᒃ ᐋᖅᑭᒃᓱᐃᓗᑎᒃ ᒪᐅᓇ ᐃᓱᐊᕐᓯᕕᒃ ᒪᒥᓴᕐᕕᐅ ᖃᓂᒋᔭᖓᓂ ᑰᔾᔪᐊᖅᒥ.

“ᐊᕙᑕᖅ ᒥᑭᑦᑑᖕᒪᑦ ᑮᓇᐅᔭᓕᐅᕋᓱᒐᑎᒃ ᐱᓕᕆᕝᕕᐅᓪᓗᓂ. ᓇᒻᒥᓂᖃᕈᓐᓇᙱᓐᓇᑦᑕ ᑲᒪᒋᔭᖃᕐᓗᑕᓗ ᐃᒡᓗᑎ ᑕᐃᒪᐃᑦᑐᒥ ᐃᓄᑑᓗᑕ. ᑭᓯᐊᓂᓕ ᐅᑯᐊ ᐃᓱᐊᕐᓯᕕᒃ ᐊᔪᙱᒻᒪᑕ, ᑕᐃᒪᓕ ᐱᓕᕆᖃᑎᒌᖕᓂᕗᑦ ᐱᒻᒪᕆᐊᓘᒻᒪᑦ,” ᐲᓐ ᐅᖃᕐᑐᖅ.

ᐱᓕᕆᖃᑎᒌᖕᓂᕆᔭᐅᔪᖅ ᐊᕙᑕᖅᑯᓐᓂ ᒪᓕᒃᓯᒪᐸᓗᒃᑐᖅ ᐃᓕᖅᑯᓯᓕᕆᓂᕐᒧᑦ ᑐᙵᕕᒋᔭᐅᔪᒥ ᒪᒥᓴᕐᕕᒃᒥᑦ ᐊᑐᖅᑕᐅᕙᒃᑐᒥᑦ, ᑖᒃᑯᐊᓗ ᐃᓄᖕᓂ ᐃᑲᔪᖅᐸᒃᖢᑎᒃ ᐊᑐᓗᐊᖅᑐᕕᓂᕐᓂᒃ ᐋᖓᔮᕐᓇᖅᑐᓂᒃ, ᐅᖃᕐᑐᖅ ᐃᓱᐊᕐᓯᕕᒃᒧᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐄᑐᐊ ᓯᓅᐹᓪ.

“ᐅᓇ ᐱᓕᕆᕝᕕᒃ ᐱᔨᑦᑎᕋᐅᑎᖃᕐᓂᐊᖅᑐᖅ ᓄᓇᖃᖅᑐᓄᑦ ᐊᒻᒪ ᑎᑭᑎᑕᐅᓯᒪᔪᓄᑦ,” ᐅᖃᕐᑐᖅ. “ᑎᑎᕋᐅᔭᒐᕐᓂ ᐅᓄᕐᓯᓕᐅᕈᑎᓕᕆᓂᕐᒧᑦ, ᐱᐅᓴᐅᑎᓄᑦ ᐊᔪᕈᓐᓃᖅᓴᖅᑎᑕᐅᓂᕐᒧᑦ, ᐴᒃᓴᓕᐅᕈᓐᓇᖅᓯᓂᕐᒧᑦ, ᐃᒻᒪᖄᓪᓘᓐᓃᑦ ᑕᑯᓐᓇᒐᕐᕕᒃᒥᑦ ᐊᒻᒪ ᑎᑕᐅᑎᓕᕆᔨᓂ ᑕᒫᓂᓗ ᑕᐃᒪᐃᑦᑐᓂ ᐱᑕᖃᕆᐊᖃᒻᒪᕆᒃᖢᓂ ᓄᓇᕕᒃᒥ.”

ᐃᓕᖅᑯᓯᓕᕆᓂᕐᒧᑦ ᐱᓕᕆᕝᕕᐅᔪᖅ ᐃᓱᒪᒋᔭᐅᖃᑕᐅᓯᒪᔪᖅ ᑖᓐᓇ ᓴᓇᔭᐅᓂᐊᓕᖅᑎᓪᓗᒍ, ᓯᓅᐹᓪ ᐅᖃᕐᑐᖅ, ᑭᓯᐊᓂᓕ ᐱᓕᕆᖃᑎᖃᕐᓂᖏᓐᓄᑦ ᐊᕙᑕᒃᑯᓐᓂ ᐱᓇᓱᐊᖅᑕᐅᔪᒪᔪᖅ ᐃᓱᒪᒋᔭᐅᒃᑲᓐᓂᕈᓐᓇᕐᑐᖅ.

“ᑎᑎᕋᐅᔭᒐᕐᓂᖅ ᐅᓄᕐᓯᓕᖅᑎᑦᑎᕙᓪᓕᐊᓂᖅ ᐅᕙᑦᑎᓐᓄᑦ ᐅᐱᒋᒐᑦᑎᒍᑦ ᐊᒻᒪᓗ ᓴᖅᑭᑕᐅᒃᑲᓐᓂᕆᐊᖃᖅᖢᓂ ᐊᑐᖃᑦᑕᓚᐅᕐᓯᒪᓂᕗᑦ,” ᐅᖃᕐᑐᖅ.

ᐅᖃᐅᓯᖃᓚᐅᕐᑐᖅ ᐅᓇ $6.1 ᒥᓕᐊᓐᑐᕐᑐᖅ ᐱᓕᕆᕝᕕᒃᓴᖅ “ᐳᐊᕐᕆᔭᖅᑕᐅᑐᐃᓐᓴᕆᐊᖃᓕᕐᓂᖓᓂᒃ,” ᑕᒪᒃᑯᐊ ᐃᒡᓗᕐᔪᐊᒧᑦ ᖃᓄᐃᓕᖓᓂᐅᓂᐊᕐᑐᑦ ᐋᖅᑭᒃᓱᖅᑕᐅᕌᓂᒃᓯᒪᓪᓗᑎᒃ ᐊᒻᒪᓗ ᐃᑲᔫᑎᒃᓴᓕᕆᓂᕐᒥᒃ ᐱᓕᕆᐊᖃᓕᖅᖢᑎᒃ. ᒫᓐᓇᒧᓪᓗ ᑮᓇᐅᔭᓕᐅᕐᓯᒪᓕᕐᑐᖅ $900,000-ᓂ.

ᐃᓱᒪᔪᓪᓕ ᐅᓇ ᒪᑐᐃᕐᑕᐅᔪᓐᓇᓛᕐᓗᓂ 2026 ᐃᓱᐸᓗᐊᓂᒃ ᐅᕝᕙᓘᓐᓃᑦ 2027 ᐱᒋᐊᓕᓵᖅᑎᓪᓗᒍ.

“ᐃᑲᔫᑎᒃᓴᒃᑲᓐᓂᕐᓂ ᐱᓇᓱᒃᑲᑦᑕ ᓱᓕ, ᑭᓯᐊᓂᓕ ᓄᐊᑦᑎᕙᓪᓕᐊᔪᒍᑦ ᐅᖃᖃᑎᒌᒃᐸᓪᓕᐊᑎᓪᓗᑕ,” ᓯᓅᐹᓪ ᐅᖃᕐᑐᖅ.