ᓛᒐ ᐹᕕᓐᒥ ᓈᒻᒪᒃᓴᙱᑦᑐᑦ ‘ᐊᓯᖏᓐᓂᒃ’ ᐃᓱᒪᒋᔭᖃᙱᓗᐊᕐᓂᕋᖅᑕᐅᓂᖏᓐᓂᒃ ᓱᖁᑎᒃᓴᙱᑦᑐᑦ

ᐋᑐᕚᒥ ᓄᓇᖃᑎᒌᒃᑐᑦ ᑲᑐᔾᔨᖃᑎᒌᖏᑦ ᓱᖁᑎᒃᓴᙱᑦᑐᑦ ᓈᒻᒪᒃᓴᙱᔾᔪᑎᖃᕐᓂᕋᖅᑕᐅᓂᖏᑦ ᓄᑖᒥ ᓛᒐ ᐹᕕᓐᓴᒥ ᒫᙶᕐᓂᕋᖅᑕᐅᑎᓪᓗᓂ “ᑭᓲᙱᑎᑦᑎᓂᕐᒥᒃ” ᐅᑯᐊ ᐋᓐᑎᐅᕆᐅᒥ ᓄᓇᒧ ᑭᒡᓕᓯᓂᐊᖅᑎᒃᑯᑦ ᐃᖅᑲᖅᑐᐃᕕᒃᑯᑦ ᐱᓕᕆᐊᖃᖅᑎᓪᓗᒋᑦ ᐃᒡᓗᓕᐊᕆᔭᐅᔪᒪᔪᒥᒃ ᐱᐊᓂᒃᑎᓪᓗᒍ ᐄᐳᕈᓪ 14ᒥ.

“ᐅᑯᐊ ᕼᐊᓐᑦ ᑲᓚᑉ ᑎᒫᓃᑦᑐᓄᑦ ᓄᓇᓖᑦ ᑲᑐᔾᔨᖃᑎᒌᖏ [Upper Hunt Club Community Association] ᓯᕗᓂᐊᓂ ᓱᓕᙱᓐᓂᕋᐃᓚᐅᕐᓯᒪᓪᓗᑎᒃ ᐅᖃᑦᑎᐊᑲᑕᙱᓐᓂᕋᖅᑕᐅᑲᑕᒃᑎᓪᓗᒋᑦ ᐊᔾᔨᒌᙱᓐᓂᕐᒧ ᐊᒻᒪ ᑭᓲᙱᑎᑦᑎᓇᓱᖕᓂᕐᒥ ᑕᐃᒪᐃᙱᓐᓂᕋᐃᓪᓗᑎᒃ,” ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᕆᔭᐅᓂᑯ ᑲᑐᔾᔨᖃᑎᒌᑦ ᐊᖓᔪᖅᑳᖓ ᓯᐊᕕ ᓖ ᐅᓪᓗᑦ ᑎᓴᒪᑦ ᐊᓂᒍᕐᓯᒪᓕᖅᑎᓪᓗᒍ ᓴᖅᑭᔮᖃᐅᑎᒋᓐᓇᖅᑐᒃᑯᑦ ᐃᖅᑲᖅᑐᐃᕕᓕᕆᓂᖅ.

ᓄᓇᓖᑦ ᑲᑐᔾᔨᖃᑎᒌᖏᑦ ᐋᑐᕚ ᓄᓇᓕᐸᐅᔭᐃᑦ ᑲᑎᒪᔨᖏ ᐊᖏᖅᑎᓪᓗᒋᑦ ᓛᒐ ᐹᕕᓐᑯᓐᓂᒃ ᓄᑖᒥ ᐃᒡᓗᓕᐅᕈᒪᑎᓪᓗᒋᑦ ᑖᒃᑯᐊ ᓄᓇᒋᔭᖓᑕ ᐃᓚᖓᓂᒃ ᒥᑦᑕᕐᕕᐅᑉ ᖃᓂᒋᐸᓗᒃᑕᖓᓂ ᓈᒻᒪᒃᓴᙱᓕᐅᕈᑎᓂ ᑐᓂᓯᓚᐅᕐᒪᑕ.

ᓛᒐ ᐹᕕᓐ ᓄᑖᒥ ᐃᒡᓗᓕᐅᕈᒪᖕᒪᑕ 350ᓂ ᐃᒡᓕᖃᖅᓗᓂ ᑐᔪᕐᒥᕕᒃᓴᒥ ᓄᓇᕗᒻᒥᐅᓄᑦ ᐋᓐᓂᐊᕐᕕᖕᓄᙵᐊᔪᓄᑦ ᐋᑐᕚᒥ. ᒫᓐᓇᓕ ᐃᓂᒋᔭᖓ ᐅᕆᑦᔅᒪᓐ ᕉᑦᒥ, ᓛᒐ ᐹᕕᓐ 195ᓂ ᐃᓄᖃᕈᓐᓇᑐᐃᓐᓇᕐᒪᓐ.

ᔪᓚᐃᖑᓚᐅᕐᓯᒪᔪᒥᒃ ᐋᑐᕚᒥ ᓄᓇᓕᐸᐅᔭᐃᑦ ᑲᑎᒪᔨᖏ ᐊᖏᒪᐅᕐᓯᒪᖕᒪᑕ ᓛᒐ ᐹᕕᓐᑯ ᐱᑖᕋᓲᑎᖏᓐᓂ ᐃᒡᓗᓕᐅᕈᒪᔾᔪᑎᓂᒃ 6ᓂ ᓇᑎᓕᖕᒥ ᐃᒡᓗᒥ ᒫᓂ ᕼᐊᓐᑦ ᑲᓚᑉ ᑎᒫᓃᑦᑐᓂ, ᑖᓐᓇᓗ ᑐᔪᕐᒥᕕᒃᓴᖅ ᐋᑐᕚᒥ ᖃᖓᑕᓲᒃᑯᕕᖕᒧ ᖃᓂᕐᓂᕐᓴᒥ ᐊᒻᒪᓗ ᐊᖏᓂᕐᓴᐅᓗᓂ.

ᑭᓯᐊᓂᓕ ᐅᑯᐊ ᕼᐊᓐᑦ ᑲᓚᑉ ᑕᒫᓃᑦᑐᓄᑦ ᓄᓇᓕᖕᓂ ᑲᑐᔾᔨᖃᑎᒌᖏᑦ ᓈᒻᒪᒃᓴᙱᔾᔪᑎᓂ ᑲᑎᒪᔩᑦ ᐃᓱᒪᓕᐊᖓᓂ ᑐᓂᓯᓚᐅᕐᓯᒪᖕᒪᑕ, ᐅᖃᕐᓯᒪᓪᓗᑎᒃ ᐃᓱᒫᓘᑎᖃᕐᓂᖏᓐᓂᒃ ᐃᒡᓗ ᐊᖏᓂᖓᓂᒃ, ᓄᓇᓯᐅᑎᑕᖃᒃᑲᓐᓂᓕᒑᓂᖓᓂᒃ ᐊᒻᒪᓗ ᓄᓇᓯᐅᑎᓄᑦ ᓄᖃᖓᕝᕕᒃᓴᖃᔾᔮᙱᓐᓂᕐᒥᓪᓗ ᐊᒻᒪ ᐊᓯᖏᓐᓂᒃ ᓈᒻᒪᙱᓕᐅᕈᑎᓂᒃ.

ᐅᓇ ᓈᒻᒪᙱᓕᐅᕈᑎ ᐅᑯᓄᖓ ᑐᓂᔭᐅᓚᐅᕐᑐᑦ ᐋᓐᑎᐅᕆᐅᒥ ᓄᓇᒧᑦ ᑭᒡᓕᓯᓂᐊᖅᑎᒃᑯᓐᓄ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓂᐊᕐᓂᖓᓂᒃ ᐱᒋᐊᕐᓗᑎᒃ ᐄᐳᕈᓪ 11.

ᑎᑎᕋᖅᑕᐅᔪᓂᒃ ᐋᑐᕚ ᓄᓇᓕᐸᐅᔭᖏᓐᓄᑦ ᐅᑯᐊ ᓛᒐ ᐹᕕᓐ ᓗᐊᐃᔭᖓ ᒪᐃᑯᓪ ᐳᓗᕕᓐ ᑐᓂᓯᓚᐅᕐᓯᒪᖕᒪ ᑕᑯᔭᐅᔪᒃᓴᓂᒃ, ᓈᒻᒪᒃᓴᙱᑦᑐ ᓄᑖᒥ ᐃᒡᓗᒥ ᐅᖃᐅᓯᖃᐅᓚᐅᕐᑐᑦ ᐃᓱᒫᓘᑎᖏᓐᓂᒃ ᒪᑯᓂᖓ ᑕᒫᓃᑐᐃᓐᓇᖅᑐᓂ ᐱᑕᖃᕐᓂᕐᓴᐅᓂᐊᓕᕐᓂᖓᓂᒃ, “ᐊᖏᕐᕋᖃᙱᑦᑐᓄᑦ ᐊᑐᕐᑕᐅᓗᓂ” ᐅᓇ ᓯᕗᕈᐊᐃᑦ ᒥᕐᖑᐃᕐᓯᕕᒃ ᐊᒻᒪᓗ “ᓈᒻᒪᙱᑦᑐᓂ” ᖃᓄᐃᓕᐅᕐᕕᐅᓕᕐᓗᓂ ᐅᓇ ᓛᒐ ᐹᕕᓐ ᑕᒫᓃᓐᓂᐊᖅᐸᑦ.

ᐳᓗᕕᓐ ᓂᓪᓕᕈᑎᖃᑲᑕᓚᐅᕐᑐᖅ ᒪᑯᓂᖓ “ᑭᓲᙱᑎᑦᑎᓂᖏᓐᓂᒃ” ᑕᐃᒪᓐᓇᓗ ᑕᑯᓚᐅᕐᓯᒪᙱᑦᑎᐊᕐᓂᕋᖅᖢᓂ ᐊᕐᕌᒍ 40 ᖃᓂᒋᔭᖓᓂᒃ ᓗᐊᐃᔭᐅᓯᒪᓕᕋᓗᐊᕋᒥ.

ᑭᓯᐊᓂᓕ, ᕼᐊᓐᑦ ᑲᓚᑉ ᑕᒫᓃᑦᑐᓄᑦ ᓄᓇᓕᖕᓂ ᑲᑐᔾᔨᖃᑎᒌᖏᓐᓄ ᐃᓚᒋᔭᐅᔪᑦ ᖃᓄᐃᓕᐅᓂᕋᐃᔾᔪᑏᑦ ᐊᒻᒪ ᐅᖃᐅᓯᐅᓯᒪᔪᑦ “ᑐᑭᖏᑦᑎᒍᑦ ᐅᖃᖅᑕᐅᑲᑕᓚᐅᙱᒻᒪᑕ ᐊᒻᒪ ᑕᒻᒪᕐᓯᒪᑲᑕᒃᖢᑎᒃ.”

“ᐅᑯᐊ ᐅᖃᐅᓰᑦ, ᐃᓚᖃᖅᖢᑎᒃ ᑭᓲᙱᑎᑦᑎᑲᑕᖕᓂᕐᒧᑦ ᐅᖃᐅᓰᑦ ᑕᐃᒪᐃᓕᐅᕈᑎᐅᓚᐅᕐᑐᑦ ᐱᓕᕆᐊᕆᔭᐅᔪᒪᔫᑉ ᐊᓯᐊᒍᑦ ᐅᖃᐅᓯᖃᖅᑎᑦᑎᓇᓱᒃᖢᑎᒃ,” ᓖ ᐅᖃᕐᑐᖅ.

“ᓈᒻᒪᙱᓕᐅᕈᑎᒋᔭᐅᔪᑦ ᑐᙵᕕᖃᓚᐅᕐᑐᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᒃ, ᐃᖏᕐᕋᔾᔪᑎᓕᕆᓂᕐᒥᒃ ᐊᒻᒪᓗ ᓄᓇᓯᐅᑎᓄᑦ ᐅᓗᕆᐊᓇᙱᔾᔪᑎᐅᓇᔭᕐᑐᓂᒃ,” ᐅᖃᕐᑐᖅ.

ᐅᓇ ᓈᒻᒪᙱᓕᐅᕈᑎᖃᕐᓂᕐᒧᑦ ᐃᖅᑲᖅᑐᐃᕕᒃᑰᕈᑎᐅᓚᐅᕐᑐᖅ ᐅᓪᓗᓂ ᑕᓪᓕᒪᓂ ᑭᓯᐊᓂᓕ ᓇᐃᓐᓂᕐᓴᐅᓚᐅᕐᑐᖅ ᐅᓪᓗᑦ ᑎᓴᒪ ᐱᐊᓂᒃᑎᓪᓗᒍ ᐃᓱᓕᑎᑕᐅᓪᓗᓂ.