ᓛᒐ ᕿᑭᖅᑖᓗᖕᒥ ᐋᑐᕚᒥ ᐊᖏᒡᓕᒋᐊᖅᑕᐅᓂᖓ ᓄᖅᑲᖓᑎᑕᐅᓚᐅᑲᒃᐳᖅ ᓄᓇᕗᒻᒥ ᒐᕙᒪᒃᑯᑦ ᑳᓐᑐᕌᖓᓂ ᓇᓗᓇᕐᓂᖓᓄᑦ

For the English version of this story, please see Larga Baffin expansion on hold amid GN contract uncertainty.

ᑐᒃᓯᕋᖅᑕᐅᔪᒥ ᓄᑖᖑᔪᒥ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᐅᔪᒥ ᐃᓄᖕᓄᑦ ᐋᓐᓂᐊᕕᓕᐊᖅᑐᓄᑦ ᐋᑐᕚᒥ ᓄᖅᑲᖓᑎᑕᐅᓚᐅᑲᒃᐳᑦ ᓛᒐ ᕿᑭᖅᑖᓗᖕᒥ ᓕᒥᑎᑦ ᐅᑕᖅᑭᑎᓪᓗᒋᑦ ᐊᑯᓂᐅᔪᒥ ᐱᔨᑦᑎᕋᕐᓂᕐᒧᑦ ᑳᓐᑐᕌᖑᔪᒥ ᓄᓇᕗᒻᒥ ᒐᕙᒪᒃᑯᓐᓂ, ᑲᑐᔾᔨᖃᑎᒌᖑᔪᖅ ᐅᖃᓚᐅᖅᐳᖅ ᐅᖃᐅᓯᒃᓴᓕᐊᖑᔪᒥ.

ᓛᒐ ᕿᑭᖅᑖᓗᖕᒥ, ᑐᓂᓯᕙᒃᑐᒥ ᑐᔪᕐᒥᕕᒃᓴᒥ ᓄᓇᕗᒻᒥᐅᓄᑦ ᐊᐅᓪᓛᖅᑐᓄᑦ ᐋᑐᕚᒧᑦ ᐋᓐᓂᐊᕕᓕᐊᖅᑐᓄᑦ ᐸᖅᑭᔭᐅᓂᖏᓐᓂ ᐸᕐᓇᒃᓯᒪᓚᐅᖅᐳᑦ ᓴᓇᓂᕐᒥ 6−ᓂ-ᓇᑎᓕᖕᓂ, 220-ᐃᒡᓗᕈᓯᓕᖕᓂ ᑐᔪᕐᒥᕕᒃᓴᒥ Hunt Club Road ᐊᒻᒪ Sieveright Avenue−ᒥ.

ᑲᒻᐸᓂᐅᔪᖅ ᓂᐅᕕᓚᐅᖅᐳᖅ ᐃᓂᒋᔭᖓᓂ 2020−ᒥ.

ᑐᒃᓯᕋᖅᑕᐅᔪᖅ ᐃᒡᓗᕐᔪᐊᖅ ᑐᔪᕐᒥᑎᑦᑎᔪᓐᓇᕋᔭᖅᐳᖅ 350−ᓂ ᐋᓐᓂᐊᕕᓕᐊᖅᑐᓂ, ᒪᕐᕈᐃᓪᓗᐊᖅᑐᒥ ᐃᓄᖃᕈᓐᓇᕐᓂᖓᓂ ᒫᓐᓇᐅᔪᒥ ᐃᓂᒋᔭᖓᓂ Richmond Road−ᒥ ᐃᓄᖃᕈᓐᓇᖅᑐᒥ 195−ᓂ ᐊᒻᒪᓗ ᓛᒐ ᕿᑭᖅᑖᓗᖕᒥ ᐱᖓᔪᖓᓐᓂ ᐃᓂᒋᔭᐅᕗᖅ ᒪᑐᐃᓚᐅᖅᓯᒪᓂᖓᓂ 2000−ᒥ.

ᑭᓯᐊᓂ ᐱᓕᕆᐊᒃᓴᒧᑦ, ᐊᕐᕌᒍᒐᓴᓂ ᓴᓇᔭᐅᓂᖓᓂ, ᓄᖅᑲᖅᑎᑦᑎᓚᐅᑲᒃᓯᒪᕗᖅ ᐃᓱᒪᒋᓇᒍ ᖄᖏᐅᑎᓂᖏᓐᓂ ᐊᖏᐸᓗᒃᑐᒥ ᐱᖁᔭᑎᒍᑦ ᐊᕖᐊᕈᑕᐅᔪᓂ ᐃᓚᖃᖅᑐᒥ ᓴᓂᓕᐊᓂ ᐊᔪᐃᓐᓇᕆᐊᒃᑲᓐᓂᕐᓂᕐᒥ ᐋᓐᑎᐊᕆᐅ ᓄᓇᒥ ᐃᖅᑲᖅᑐᐃᕕᖓ ᖁᔭᓈᖅᑕᐅᓚᐅᖅᓯᒪᔪᒥ  2023−ᒥ.

“ᓛᒐ ᕿᑭᖅᑖᓗᖕᒥ ᓕᒥᑎᑦ ᐸᕐᓇᒃᓯᒪᓕᖅᐳᑦ ᑲᑎᖅᓱᖅᐸᓪᓕᐊᓂᕐᒥ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᓂᕐᒥ ᐊᑭᑐᔫᑎᓂᒃ ᐊᒻᒪ ᐊᑐᐃᓐᓇᖃᕐᓂᕐᒥ ᐊᑯᓂᐅᔪᒥ ᐊᑭᓕᒃᓴᓄᑦ ᑮᓴᐅᔭᖃᖅᑎᑦᑎᓂᕐᒥ ᐃᑲᔪᖅᓱᐃᓂᕐᒥ ᐱᓂᖏᓐᓂ ᓄᑖᖑᔪᒥ ᐃᒡᓗᕐᔪᐊᒥᒃ ᑭᐅᒪᔪᒥ ᓄᓇᕗᒻᒥ ᒐᕙᒪᒃᑯᑦ ᓇᓗᓇᐃᖅᓯᓯᒪᓂᖏᓐᓂ,” ᐅᖃᓚᐅᖅᐳᖅ ᐋᓐ ᑰᓕ, ᐃᒃᓯᕙᐅᑕᕆᔭᐅᔪᖅ ᓛᒐ ᕿᑭᖅᑖᓗᖕᒥ ᓕᒥᑎᑦᑯᓐᓂ, ᑎᑎᕋᖅᓯᒪᔪᒥ ᐅᖃᐅᓯᒃᓴᓕᐊᖑᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

“ᐅᓇ ᐊᔪᕐᓇᔾᔮᙱᓚᖅ ᑭᓯᐊᓂ ᐊᑯᓂᐅᔪᒥ ᑳᓐᑐᕌᖑᔪᒥ ᐱᓯᒪᓗᑎᒃ. ᑭᓯᐊᓂ ᐅᓇ ᐋᖅᑭᒃᑕᐅᒍᓂ, ᐊᒻᒪ ᑳᓐᑐᕌᖕᒥ ᑐᓂᔭᐅᓗᓂ, ᑕᒪᒃᑭᑦ ᐸᕐᓇᐅᑎᓂ ᓄᑖᒥ ᐃᒡᓗᕐᔪᐊᒥ ᐋᑐᕚᒥ, ᐃᓱᒪᒋᓇᒍ ᐃᓂᖓᓂ, ᓄᖅᑲᖓᑎᑕᐅᕗᑦ.”

ᑰᓕ ᐅᖃᓚᐅᖅᐳᖅ ᑭᖑᕙᕆᐊᖅᑎᑕᐅᓂᖓ ᐅᕙᙶᖅᐳᖅ ᑲᔪᓯᔪᒥ ᐋᔩᖃᑎᒌᖕᓂᐅᔪᓂ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᓄᓇᖃᖅᑳᖅᓯᒪᔪᓂ ᐱᔨᑦᑎᕋᕐᓂᐅᔪᒥ ᑲᓇᑕᒥ ᐱᔾᔪᑎᖃᖅᑐᒥ ᑮᓇᐅᔭᖃᖅᑎᑦᑎᓂᕐᒥ ᐅᕘᓇ ᓇᓪᓕᐅᒃᑯᒫᖃᙱᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᕚᓪᓕᕈᑕᐅᔪᒥ ᐱᓕᕆᐊᖑᔪᒥ.

“ᑐᑭᓯᐅᒪᓂᖅᐳᑦ ᓄᓇᕗᒻᒥ ᒐᕙᒪᒃᑯᑦ ᑐᓂᓯᔪᓐᓇᙱᓚᖅ ᑳᓐᑐᕌᖕᒥ ᐃᓱᓕᑦᑎᓯᒪᙱᒻᒪᑕ ᐋᔩᖃᑎᒌᖕᓂᐅᔪᓂ ᓄᓇᖃᖅᑳᖅᓯᒪᔪᓂ ᐱᔨᑦᑎᕋᕐᓂᕐᒥ ᑲᓇᑕᒥ,” ᐅᖃᓚᐅᖅᐳᖅ.

ᐊᖏᖃᑎᒌᖕᓂᐅᔪᓂ ᑎᑭᐅᑎᔭᐅᓯᒪᙱᓚᑦ ᓛᒐ ᕿᑭᖅᑖᓗᖕᒥ ᐱᔨᑦᑎᕋᕐᓂᕐᒧᑦ ᐅᖓᑖᓂ ᒫᔾᔨ 2028−ᒧᑦ, ᐅᖃᓚᐅᖅᐳᖅ ᓵᒪᐃᓐ ᑎᐅᒍᕌᓯᐊᔅ, ᐋᔩᑲᓯᒌᖕᓂᕐᒧᑦ ᐊᐅᓚᑦᑎᔨ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᐅᖃᓪᓚᖕᓂᖃᐃᓐᓇᖅᑎᓪᓗᒋᑦ, ᓄᓇᕗᒻᒥ ᒐᕙᒪᒃᑯᑦ ᒫᓐᓇᐅᔪᒥ ᐃᓚᐅᖃᑕᐅᙱᓚᑦ ᓇᑉᐸᖅᑎᕆᓂᕐᒥ ᓛᒐ ᕿᑭᖅᑖᓗᖕᒥ ᑐᒃᓯᕋᖅᑕᐅᔪᒥ ᐋᑐᕚᒥ ᐃᒡᓗᕐᔪᐊᒃᓴᖓᓄᑦ,” ᑎᐅᒍᕌᓯᐊᔅ ᐅᖃᓚᐅᖅᐳᖅ.

ᓛᒐ ᕿᑭᖅᑖᓗᖕᒥ ᑐᓂᓯᓚᐅᖅᐳᑦ ᐃᒡᓗᕐᔪᐊᒧᑦ ᐱᔪᓐᓇᐅᑎᖓᓂ ᑐᒃᓯᕋᐅᒻᒥ ᓄᓇᓕᐸᐅᔭᕐᒧᑦ ᐋᑐᕚᒥ ᐊᐃᑉᕆᓕᒥ.

ᑰᓕ ᐅᖃᓚᐅᖅᐳᖅ ᐱᓕᕆᐊᒃᓴᖅ ᐱᓪᓚᕆᐅᕗᖅ ᓇᓗᓇᐃᖅᓯᓂᕐᒥ ᑲᔪᓰᓐᓇᖅᑐᒥ ᖁᑦᑎᒃᑐᒥ−ᐱᐅᓂᖓᓂ ᐸᖅᑭᓂᐅᔪᒥ ᐋᓐᓂᐊᕕᓕᐊᖅᑐᓄᑦ ᓄᓇᕗᒻᒥ.

“ᓄᑖᖑᔪᒥ ᐃᒡᓗᕐᔪᐊᒥ ᑭᒡᒐᖅᑐᐃᕗᖅ ᐱᓐᓚᕆᐅᔪᒥ ᑲᑎᖅᓱᖅᑕᐅᕙᓪᓕᐅᔪᓂ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᓂᕐᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᖃᖅᑐᒥ ᑐᓂᓰᓐᓇᕈᓐᓇᕐᓂᕐᒥ ᐱᐅᔪᒥ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᒃᓴᖓᓂ ᐱᔨᑦᑎᕋᕐᓂᕐᒥ ᓯᕗᓂᒃᓴᒧᑦ,” ᐅᖃᓚᐅᖅᐳᖅ.