ᓄᓇᓕᖕᓂ ᐱᓕᕆᖃᑎᒌᒃᑐᑦ ᓈᒻᒪᒃᓴᙱᔾᔪᑎᓕᐅᕐᐳᑦ ᓛᒐ ᐹᕕᓐ ᓴᓇᔪᒪᔭᖓᓂᒃ

ᑕᒪᑐᒥᖓ ᐃᖅᑲᖅᑐᐃᕕᒃᑯᑦ ᐅᑯᓄᖓ ᐋᓐᑎᐅᕆᐅᒥ ᓄᓇᒥ ᑭᒡᓕᓯᓂᐊᖅᑎᒃᑯᓐᓄᑦ ᐱᓕᕆᐊᖑᓂᐊᕐᑐᑦ ᑎᓯᐱᕆ 14-ᒥ

ᐅᑯᐊ ᖁᑦᑎᖕᓂᕐᓴᑦ ᕼᐊᓐᑦ ᑲᓚᑉ ᓄᓇᓕᖕᓂ ᑲᑐᔾᔨᖃᑎᒌᑦ (Upper Hunt Club Community Association) ᓈᒻᒪᒃᓴᙱᔾᔪᑎᓂᒃ ᐅᑯᓂᖓ ᐋᑐᕚᒥ ᓄᓇᓕᐸᐅᔭᓄᑦ ᑲᑎᒪᔨᓄᑦ ᐃᓱᒪᓕᐊᕆᔭᐅᓂᑯᓂᒃ ᐊᖏᕈᑎᓂᒃ ᐱᓇᓱᒍᑎᓂᒃ ᐋᓐᓂᐊᕐᕕᓕᐊᕐᓯᒪᔪᓂᒃ ᑐᔪᕐᒥᕕᒃᓴᒥ ᓛᒐ ᐹᕕᓐᑯᑦ ᓴᓇᔪᒪᔭᖓᓂᒃ ᕼᐊᓐᑦ ᑲᓚᑉᒥ. ᐅᕙᓂ ᐊᔾᔨᙳᐊᖅ ᐃᒡᓗ ᖃᓄᐃᓕᖓᓇᔭᕐᓂᖓᓂᒃ. (ᐊᔾᔨᙳᐊᖅ ᐅᑯᓇᙵᑦ DTAH Architects)

By ᒫᑕᓕᓐ ᕼᐊᐅᕕᑦ

For English version, see Community group files appeal against Larga Baffin build

ᓄᑖᒥ ᓛᒐ ᐹᕕᓐ ᑐᔪᕐᒥᕕᒃᒥ ᓴᓇᔪᒪᓂᖅ ᓄᖅᑲᖅᑎᑦᑎᔾᔪᑎᖃᕐᐳᖅ.

ᐅᑯᐊ ᖁᑦᑎᖕᓂᕐᓴᑦ ᕼᐊᓐᑦ ᑲᓚᑉ ᓄᓇᓕᖕᓂ ᑲᑐᔾᔨᖃᑎᒌᑦ, ᓄᓇᖃᑎᒌᒃᑐᑦ ᑲᑐᔾᔨᖃᑎᒌᑦ, ᓈᒻᒪᙱᓕᐅᕈᑎᒥ ᑐᓂᓯᓚᐅᕐᑐᑦ ᐋᓐᑎᐅᕆᐅ ᓄᓇᒥ ᑭᒡᓕᓯᓂᐊᖅᑎᒃᑯᓐᓄᑦ ᓄᖅᑲᖅᑎᑦᑎᓇᓱᒃᖢᑎᒃ 6-ᓂ ᓇᑎᖃᖅᑐᒃᓴᒥᒃ ᐃᒡᓗᓕᐅᕐᓂᕐᒥᒃ, 220-ᓂ ᐃᒡᓗᓯᖃᕐᓗᓂ ᐅᕙᓂ ᕼᐊᓐᑦ ᑲᓚᑉ ᐊᖅᑯᑎᒥ ᐊᒻᒪᓗ ᐅᕙᓂ ᓰᕗᕈᐊᐃᑦ ᐋᕕᓂᐅᒥ.

ᐅᓇ ᐱᓕᕆᐊᖑᔪᒪᔪᖅ ᑐᔪᕐᒥᕕᒃᓴᖅ ᓄᓇᕗᒻᒥᐅᓂᒃ ᐱᔨᑦᑎᕋᕐᕕᒃᓴᖅ ᐋᓐᓂᐊᕕᖕᓂ ᑲᒪᒋᔭᐅᔭᖅᑐᖅᑐᓂᒃ ᐋᑐᕚᒥ, ᐃᓄᖃᕈᓐᓇᕋᔭᕐᑐᖅ ᒫᓂ ᑎᑭᓪᓗᒍ 350 ᐃᓄᖕᓂ.

ᐅᓇ ᐊᖏᓂᕐᓴᖅ ᒫᓐᓇ 195-ᓂ ᐃᓄᖃᕈᓐᓇᖅᑐᒥ ᓛᒐ ᐹᕕᓐᒥ ᒫᓐᓇ ᐅᕆᑦᔅᒪᓐ ᐊᖅᑯᑎᒦᑦᑐᒥᒃ, ᑖᓐᓇᓗ ᑕᑕᓕᕇᖅᐸᒃᖢᓂ ᐊᒻᒪᓗ ᖃᓂᒋᔭᖓᓃᑦᑐᓄᑦ ᑐᔪᕐᒥᕕᖕᓄ ᐃᓄᖕᓂ ᐃᓂᑖᖅᑎᑦᑎᔾᔪᑎᐅᕙᒃᖢᓂ.

ᔪᓚᐃᒥ ᓴᓇᔨᐅᔪᑦ ᑐᓗᖅᑕᕈᑎᒥ ᐊᓂᒍᐃᔪᓐᓇᓚᐅᕐᓯᒪᔪᑦ ᐅᑯᐊ ᐋᑐᕚᒥ ᓄᓇᓕᐸᐅᔭᓄᑦ ᑲᑎᒪᔨᒃᑯᑦ ᐱᒋᐊᕈᓐᓇᖅᑎᑦᑎᑎᓪᓗᒋᑦ ᐱᓇᓱᒍᑎᓂᒃ ᐋᖅᑭᒋᐊᖅᓯᓪᓗᑎᒃ ᓄᓇᓕᐸᐅᔭᓄᑦ ᒪᓕᒐᕋᓛᒥ, ᑕᐃᒪᓐᓇᓗ ᐊᕐᕌᒍᒥ ᐸᕐᓇᐅᑎᖏᓐᓂᒃ ᐱᓕᕆᐊᖃᕈᓐᓇᕐᓯᑎᑕᐅᓪᓗᑎᒃ.

ᑭᓯᐊᓂᓕ ᐅᓇ ᓈᒻᒪᙱᓕᐅᕈᑎ, ᐋᒐᓯᒥ ᐃᖅᑲᖅᑐᐃᔨᓄᐊᖅᑕᐅᓂᑯ, ᑐᑭᖃᕐᑐᖅ ᐃᓂᒃᓴᒧᑦ ᐸᕐᓇᐅᑎᓂᒃ ᐊᖏᕐᑕᐅᑎᑦᑎᓂᖅ ᐱᒋᐊᕈᓐᓇᔾᔮᙱᑦᑐᖅ ᑭᓯᐊᓂ ᑭᒡᓕᓯᓂᐊᖅᑎᒃᑯᑦ ᐃᖅᑲᖅᑐᐃᕕᒃᑯᑦ ᐱᓕᕆᐊᖃᓚᐅᕐᓗᑎᒃ ᐊᒻᒪ ᐃᓱᒪᓕᐊᖏᓐᓂᒃ ᓴᖅᑭᑎᑦᑎᒃᐸᑕ, ᐅᖃᓚᐅᕐᑐᖅ ᓛᒐ ᐹᕕᓐᑯᓐᓄᑦ ᐅᖃᕐᑎᒋᔭᐅᔪᖅ ᐱᐊᓪ ᒪᒃᑰᑎ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᓇ ᑭᓯᐊᓂ ᐊᕐᕌᒍ ᐊᑐᓕᕐᓂᐊᕋᓱᒋᔭᐅᔪᖅ, ᐅᖃᕐᑐᖅ, ᐅᓇ ᓈᒻᒪᙱᓕᐅᕈᑎᒋᔭᐅᔪᖅ ᐊᑐᙱᑎᑕᐅᒃᐸᑦ.

ᐅᓇ ᓈᒻᒪᙱᓕᐅᕈᑎᒋᔭᐅᔪᖅ ᒪᒃᐱᒐᖃᕐᑐᖅ 31-ᓂ ᑎᑎᕋᐅᓯᖃᕈᑎᐅᔪᖅ ᓄᓇᓕᖕᓄᑦ ᑲᑐᔾᔨᖃᑎᒌᑦ ᐅᓄᕈᓘᔭᕐᑐᓂᒃ ᐃᓱᒫᓘᑎᖃᕐᓂᖏᓐᓂᒃ ᓛᒐ ᐹᕕᓐᑯᑦ ᐱᓇᓱᒍᑎᒋᔭᖓᓂᒃ.

ᐅᑯᐊ ᑎᑎᕋᕐᓯᒪᔪᑦ ᐃᓚᖃᕐᑐᖅ ᓄᓇᓯᐅᑎᑕᖃᐅᕐᓂᕐᓴᐅᓇᔭᕐᓂᖓᓂᒃ, ᐱᓕᕆᐊᖃᕐᓂᒃᑯᑦ ᓈᒻᒪᙱᓕᐅᕈᑎᖃᕐᓂᖓᓄᑦ ᑲᑎᒪᔨᓄᑦ ᐊᒻᒪ ᓴᓇᔨᐅᓂᐊᕐᑐᓄᑦ ᐊᒻᒪᓗ “ᐊᑐᓗᐊᙱᑦᑐᓂᒃ ᐃᓱᒪᓕᐅᕆᔾᔪᑎᐅᔪᑦ ᑲᑎᒪᔨᓄᑦ ᑕᐃᒪᓐᓇᓗ ᐃᓱᒪᓕᐅᕆᔾᔪᑎᐅᓪᓗᓂ ᐸᕐᓇᐅᓯᐅᕐᓂᐅᑉ ᒪᓕᒐᐃᑦ ᓯᓚᑖᒍᑦ.”

ᐅᑯᐊ UHCCA ᐃᓱᒪᓕᐊᕆᔭᐅᔪᓂᒃ ᐅᑯᓄᖓ ᐋᓐᑎᐅᕆᐅᒥ ᓄᓇᒧ ᑭᒡᓕᓯᓂᐊᖅᑎᒃᑯᓐᓄᑦ ᒪᓕᒃᖢᑎᒃ ᓄᓇᒧᑦ ᐸᕐᓇᐅᑎᓕᕆᓂᕐᒧᑦ ᐃᓱᒫᓘᑎᒃᓴᓂᒃ,” ᐅᖃᓚᐅᕐᑐᖅ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ ᓯᐊᕕ ᓖ.

“ᑕᒪᓐᓇ ᐃᖅᑲᖅᑐᐃᕕᒃᑰᖓᓕᕐᓂᖓᓄᑦ ᑕᒪᑐᒧᖓ ᐅᖃᐅᓯᖃᒃᑲᓐᓂᕈᓐᓇᙱᓐᓇᑦᑕ.”

ᔫᓂᒥ, ᓖ ᐃᓱᒫᓘᑎᖏᓐᓂᒃ ᐅᖃᐅᓯᖃᓚᐅᕐᓯᒪᔪᖅ ᐋᑐᕚᒥ ᐸᕐᓇᐃᔨᒃᑯᑦ ᑲᑎᒪᔨᖏᓐᓄᑦ, ᐅᖃᐅᓯᖃᖅᖢᓂ ᑖᓐᓇ ᐃᒡᓗ “ᐊᖏᔪᐊᓘᓂᐊᕐᓂᖓᓂᒃ.”

ᑭᒡᓕᓯᓂᐊᖅᑎᒃᑯᑦ ᐋᖅᑭᒃᓯᓚᐅᕐᑐᑦ ᐅᓪᓗᖅ ᐊᑕᐅᓯᕐᒧᑦ ᐊᐅᓚᑦᑎᓂᕐᒥᒃ ᑲᑎᒪᓂᐊᕐᓗᑎᒃ ᑎᓯᐱᕆ 14-ᒥ, ᑕᕝᕙᓂᓕ ᐃᓱᒪᒋᔭᐅᔪᖅ ᓇᓗᓇᐃᕐᓯᓂᐊᕐᓂᖏᓐᓂᒃ ᓈᒻᒪᙱᓕᐅᕈᑎᒋᔭᐅᔪᓂᒃ ᐊᒻᒪᓗ ᐋᖅᑭᒃᓯᓗᑎᒃ ᑭᒃᑯᑦ ᐃᓚᐅᓂᐊᕐᒪᖔᑕ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓕᕐᐸᑦ.

ᓄᑖᒥ ᐃᒡᓗᓕᐅᕈᒪᓂᖏᑦ ᓛᒐ ᐹᕕᓐᑯ ᑕᒫᓂ ᐃᒡᓗᖃᖅᑐᓂᒃ ᓈᒻᒪᒋᔭᐅᑲᑕᙱᒻᒪᑦ. ᐄᐳᕈᒥ, ᑭᒃᑯᓕᒫᒥ ᑲᑎᒪᑎᑦᑎᓪᓗᑎᒃ ᐆᒪ ᓄᓇᓕᐸᐅᔭᓄᑦ ᑲᑎᒪᔨᒧᑦ ᑕᐃᐊᓐ ᑏᓐᔅᒧ ᐅᓄᕈᓘᔭᕐᑐᓄᑦ ᐅᐸᒃᑕᐅᓚᐅᕐᓯᒪᖕᒪᓐ ᐊᒻᒪ ᑭᐅᓗᒍᑎᐅᑲᑕᒃᖢᓂ.

ᐅᓄᕐᑐᑦ ᐃᓄᐃᑦ ᐃᓱᒫᓘᑎᖃᓚᐅᕐᒪᑕ ᓄᓇᓯᐅᑎᖃᐅᓗᐊᓕᕐᓂᐊᕐᓂᖓᓂᒃ ᐊᒻᒪᓗ ᐃᒡᓗ ᖁᑦᑎᓗᐊᕐᓂᖓ ᓈᒻᒪᒐᔭᙱᓐᓂᖓᓂᒃ ᖃᓂᒋᔭᖏᓐᓃᑦᑐᓄᑦ, ᑭᓯᐊᓂᓕ ᑕᒪᒃᑯᐊ ᐃᒡᓗᒥ ᐃᑲᔪᖅᑐᐃᔪᑦ ᐃᒪᐃᓕᕝᕕᐅᑐᐃᓐᓇᑲᑕᓚᐅᕐᒪᑕ ᖃᓂᒋᔭᑦᑎᓐᓂᐅᙱᑦᑐᖅ.

Share This Story

(0) Comments

Join the Conversation

Your email address will not be published. Required fields are marked *

*