ᐃᖅᑲᖅᑐᐃᔨ ᐃᓱᒪᓕᐊᖓᓂ ᐅᖃᐅᓯᖃᙱᑦᑐᖅ ᐸᓖᓯ ᓈᒻᒪᙱᓕᐅᕈᑎᖃᕐᓂᖓᓄᑦ ᐃᖅᑲᖅᑐᖅᑕᐅᑎᓪᓗᒍ

For the English version of this story, please see Lawyers finish arguments in RCMP officer’s assault trial.

ᐸᓖᓯ ᐃᖅᑲᖅᑐᖅᑕᐅᔪᖅ ᐃᖃᓗᖕᓂ ᐅᑕᕿᒃᑲᓐᓂᕆᐊᖃᕐᓂᐊᓕᕐᑐᖅ ᐃᖅᑲᖅᑐᐃᔨ ᐃᓱᒪᓕᐊᕆᔭᖓᓂ ᓗᐊᐃᔭᒋᔭᐅᔪᑦ ᐅᖃᐅᓯᖃᑲᑖᓪᓚᓚᐅᕐᓗᑎᒃ ᐸᓯᔭᒃᓴᐅᔾᔪᑎᐅᑉ ᒥᒃᓵᓅᖓᔪᓂᒃ ᓄᕕᐱᕆ 21ᒥ.

ᐸᓖᓯ ᑳᓐᔅᑕᐳᓪ ᓘᒃ ᑖᒻᑭᓐᓴᓐ ᐸᓯᔭᒃᓴᐅᑎᑕᐅᔪᖅ ᐅᓗᕆᐊᖅᓵᑲᑕᖕᓂᕐᒥ ᓱᒋᐅᑎᖃᖅᖢᓂ ᐊᒻᒪ ᖃᓄᐃᓕᐅᕐᓂᐊᕐᓂᕋᑲᑕᖕᓂᕐᒧᑦ.

ᓴᐳᓐᓂᐊᖅᑎ ᓗᐊᐃᔭ ᑕᐃᕕᑦ ᐳᑦᓱ ᐊᒻᒪ ᐃᖅᑲᖅᑐᐃᕕᖕᓄᑦ ᓗᐊᐃᔭ ᔮᓂ ᕋᕼᐊᒥᒻ ᐅᖃᓪᓚᑲᑕᓚᐅᕐᑑᒃ ᐃᖅᑲᖅᑐᖅᑕᐅᔫᑉ ᒥᒃᓵᓄᑦ ᑖᓐᓇᓗ ᐃᖅᑲᖅᑐᖅᑕᐅᑲᑕᒃᖢᓂ ᐊᕐᕌᓂ ᐱᒋᐊᖅᑕᐅᓪᓗᓂ ᐊᒻᒪᓗ ᐅᖓᕙᕆᐊᖅᑕᐅᓯᒪᓪᓗᓂ ᑕᖅᑭᒐᓴᒻᒪᕆᖕᓂ ᑖᒃᑯᐊᒃ ᓗᐊᐃᔮᒃ ᑭᐅᓗᑲᑕᖕᓂᖏᓐᓂᒃ ᖃᓄᐃᓕᐅᕈᑎᕕᓂᕐᒧᑦ ᑖᒻᑭᓐᓴᓐ ᐅᓂᒃᑳᓕᐊᕕᓂᖏᑦ ᐃᖅᑲᖅᑐᐃᕕᒃᒥᑦ ᐊᑐᖅᑕᐅᔪᓐᓇᕋᔭᕆᐊᒃᓴᖏᓐᓂ.

ᑖᒻᑭᓐᓴᓐ ᐸᓯᔭᒃᓴᐅᔾᔪᑎᒋᔭᖏᑦ ᐱᒋᐊᕈᑎᖃᓚᐅᕐᑐᑦ ᕕᕝᕗᐊᕆ 15, 2020ᒥ ᑖᓐᓇ ᐃᓇᖏᖅᑎᐅᓪᓗᓂ ᖃᓄᐃᓕᐅᕈᑎᐅᔪᕕᓂᕐᓄᑦ ᐃᒃᐱᐊᕐᔪᒃᒥ.

ᑕᐃᔅᓱᒪᓂ ᐅᓪᓛᖓᓂ ᑖᓐᓇ ᐊᒻᒪ ᐸᓖᓯ ᑳᓐᔅᑎᐳᓪ ᔭᓯ ᐸᐃᔪ ᐅᖄᓚᕝᕕᐅᓪᓗᑎᒃ ᐊᕐᓇᒥ ᐃᑲᔪᖁᔭᐅᓪᓗᑎᒃ ᖃᐅᔨᒪᔪᓐᓃᓕᖅᑐᒥ ᐃᒡᓗᒋᔭᐅᔪᒥᒃ ᐊᓐᑐᕌ ᒪᒃᐸᒧᑦ. ᑕᐃᑯᙵᖅᑎᓪᓗᒋ ᑖᒃᑯᐊ ᑎᒍᓯᓕᓚᐅᕐᒥᔫᒃ ᐃᓄᖕᒥ ᑖᓐᓇᓗ ᐊᔾᔨᓕᐅᖅᑕᐅᓪᓗᓂ ᒪᒃᐸᐅᑉ ᐃᕐᓂᖓᓄᑦ.

ᑖᒻᑭᓐᓴᓐ ᐸᓯᔭᒃᓴᐅᑎᑕᐅᔪᖅ ᑐᕌᖅᑎᓚᐅᕐᓂᖓᓂ ᓱᑲᓐᓇᖅᑐᒥ ᖁᑭᐅᑎᖓᓂ, ᐊᒻᒪᓗ ᖃᓄᐃᓕᐅᕈᓘᔭᑲᑕᒃᑎᓪᓗᒋᑦ ᖃᓄᐃᓕᐅᕐᓂᐊᕐᓂᕋᑲᑕᒃᖢᓂ ᒪᒃᐸᒧᑦ, ᑖᓐᓇᓕ ᐃᒃᓯᕚᕐᑐᖅ 2 ᒦᑕᓂ ᐅᖓᓯᖕᓂᓕᖕᒥ ᑖᔅᓱᒧᖓ.

“ᐅᓇ ᑕᑯᓕᒪᓇᙱᑦᑐᖅ ᐱᓕᕆᐊᒃᓴᖅ,” ᐳᑦᓱ ᐅᖃᕐᑐᖅ, ᓲᖃᐃᒻᒪ ᐸᓯᔭᒃᓴᐅᔾᔪᑎᐅᑎᑕᐅᔪᖅ ᑖᒻᑭᓐᓴᓐ ᓱᑲᓐᓇᖅᑐᖅ ᖁᑭᐅᑎᒥᓂ ᑐᕌᖅᑎᕐᓂᕋᖅᑕᐅᓪᓗᓂ ᑭᓯᐊᓂᓕ ᖁᑭᕆᐊᙲᓐᓇᖅᖢᓂᐅᒃ.

ᐸᓖᓯ ᑳᓐᔅᑕᐳᓪ ᔭᓯ ᐸᐃᔪ, ᓴᐅᒥᐊᓂᒃ ᐊᒻᒪ ᑳᓐᔅᑕᐳᓪ ᓘᒃ ᑖᒻᑭᓐᓴᓐ ᑎᒍᓯᔫᒃ ᐊᐃᕙᓐ ᐆᔪᑯᓗᒃᒥ ᐃᒃᐱᐊᕐᔪᒃᒥ ᕕᕝᕗᐊᕆ 15, 2020ᒥ. ᐅᓇ ᐊᔾᔨᓕᐅᕐᓯᒪᔪᖅ ᓴᖅᑭᔮᖅᑐᒥ ᐊᔾᔨᓕᐅᒐᕐᒥ, ᑖᒻᑭᓐᓴᓐ ᑐᕌᖅᑎᖂᔨᔪᖅ ᓱᑲᓐᓇᖅᑐᒥ ᖁᑭᐅᑎᖓᓂ ᐋᓐᑐᕉ ᒪᒃᐸᒧᑦ, ᐃᒃᓯᕚᕐᑐᖅ ᓴᖅᑭᔮᖅᑐᒥ. (ᐊᔾᔨᓕᐅᕐᓯᒪᔪᒥ ᐊᔾᔨᙳᐊᖅ ᐅᕙᙶᖅᑐᖅ ᑕᕙᓐ ᒪᒃᐸᒥ/ᕙᐃᔅᐳᒃ)

ᑖᒻᑭᓐᓴᓐ ᖃᓄᐃᓕᐅᕐᓂᖓ ᐱᔾᔪᑎᖃᑦᑎᐊᕐᓂᕐᒨᕐᓂᕋᖅᑕᐅᓚᐅᕐᑐᖅ ᐊᒻᒪᓗ ᒪᓕᒃᓯᒪᓪᓗᓂ ᐸᓖᓯᒃᑯᑦ ᐊᔪᕈᓐᓃᖅᓴᐅᑎᒋᕙᒃᑕᖏᓐᓂᒃ, ᐳᑦᓱ ᑭᐅᓗᓚᐅᕐᑐᖅ.

ᐅᖃᓚᐅᕐᑐᖅ ᒪᒃᐸ ᐅᓗᕆᐊᕐᓵᕆᓚᐅᕐᓂᖓᓂᒃ ᑖᒻᑭᓐᓴᓐᒥ ᐊᒻᒪᓗ ᐃᒃᓯᕙᐅᑖᓗᖕᒥ ᓇᖏᕐᓯᓂᐊᕐᓂᕋᖅᖢᓂ ᐊᒻᒪ ᑎᒍᔭᐅᓇᓱᒃᑐᒥ ᓄᖅᑲᖅᑎᑦᑎᓂᐊᕐᓂᕋᖅᖢᓂ.

ᓱᑲᓐᓇᕐᑐᖅ ᖁᑭᐅᑎᖓ ᓴᖅᑭᑎᓯᒪᓂᖓᓄᑦ ᐊᒻᒪᓗ ᐅᖃᕐᓂᕐᓘᑎᓂ ᐅᖃᑲᑕᒃᖢᓂ, ᑖᒻᑭᓐᓴᓐ ᖃᓄᐃᓕᐅᕈᓘᔭᕈᑎᒥ ᓄᖃᖅᑎᑦᑎᓯᒪᓚᐅᕐᑐᖅ ᐊᒻᒪ ᐊᕐᓇᖅ ᐃᑲᔪᖅᖢᓂᐅᒃ ᖃᐅᔨᒪᔪᓐᓃᓕᖅᑎᓪᓗᒍ, ᐳᑦᓱ ᐅᖃᕐᑐᖅ.

ᐳᑦᓱ ᒪᒃᐸᐅᑉ ᐅᖃᐅᓯᖏᓐᓂ ᖃᐅᔨᓇᓱᒍᑎᖃᒻᒪᕆᓚᐅᕐᒥᔪᖅ, ᐅᓇ ᐱᔾᔪᑎᒋᓪᓗᓂᐅᒃ ᐅᖃᓚᐅᕐᓯᒪᓂᖓᓂ ᐸᓖᓯᓂ ᖃᓄᐃᓕᐅᓚᐅᕐᓯᒪᓂᖓᓂ ᐊᒻᒪᓗ ᐅᖃᐅᓯᕆᔭᖏ ᐊᔾᔨᒌᑲᑕᙱᓗᐊᕐᓂᕋᖅᖢᓂᒋᑦ ᒪᒃᐸᐅᑉ ᐃᖅᑲᐅᒪᔭᖓᒍᑦ ᖃᓄᐃᓕᐅᕈᑎᕕᓂᕐᓄᑦ.

ᕋᕼᐊᒥᒻ ᑕᒪᑐᒥᖓ ᑭᐅᓘᑎᖃᓚᐅᕐᒥᔪᖅ ᐅᓇ ᑖᒻᑭᓐᓴᓐ “ᓂᙵᓚᐅᕐᓯᒪᓂᖓᓂ.”

“ᐅᓇ ᐅᖃᑦᑎᐊᙱᔾᔪᑎᐅᓂᑯᓂᒃ ᐱᑦᑎᐊᙱᔾᔪᑎᖃᕐᓂᐅᓗᐊᕐᑐᖅ,” ᐃᖅᑲᖅᑐᐃᕕᖕᒧᑦ ᓗᐊᐃᔭ ᐅᖃᕐᑐᖅ, ᐅᖃᐅᓯᖃᖅᖢᓂ ᒪᒃᐸ ᐸᓖᓯᓂ ᓈᒻᒪᙱᓗᐊᖅᑐᓂ ᐊᑎᖃᕐᓂᕋᖅᖢᓂᒋᑦ ᑖᒻᑭᓐᓴᓐ ᖁᑭᐅᑎᒥᓂ ᑎᒍᓯᓚᐅᖅᑎᓐᓇᒍ.

ᕋᕼᐊᒥᒻ ᐅᖃᓚᐅᕐᑐᖅ ᑖᒻᑭᓐᓴᓐ ᐅᖃᐅᓯᕆᓯᒪᔭᖏᑦ ᐅᒃᐱᕐᓇᓗᐊᙱᓐᓂᕋᖅᖢᓂᒋ ᐅᖃᐅᓯᖃᖅᖢᓂ ᐅᖃᓪᓚᒃᖢᓂ ᐅᖃᐅᓯᖏᑦ ᐊᒻᒪ ᑎᑎᕋᕐᓯᒪᔭᕕᓂᖏᑦ ᐊᔾᔨᒌᙱᓐᓂᖃᕐᓂᖏᓐᓂ ᐅᓂᒃᑳᓕᐊᕕᓂᖏᓐᓂ ᐊᕐᕌᒍᑦ ᑎᓴᒪᑦ ᓯᕗᓂᐊᓂ.

ᓲᕐᓗ ᐃᒪᓐᓇ, ᕋᕼᐊᒥᒻ ᐅᖃᕐᑐᖅ, ᑖᒻᑭᓐᓴᓐ ᐃᖅᑲᐅᒪᑦᑎᐊᙱᓐᓂᕋᖅᖢᓂ ᓇᒧᑦ ᒪᒃᐸᐅᑉ ᑎᒥᐊᓄᑦ ᑐᕌᖅᑎᓚᐅᕐᓂᖓᓂ ᓱᑲᓐᓇᕐᑐᖅ ᖁᑭᐅᑎᖓᓂ, ᐊᒻᒪᓗ ᖃᖓᒃᑯᑦ ᐊᒻᒪ ᖃᔅᓰᕐᓱᕐᓂᖓᓂ ᒪᒃᐸ ᐅᖃᑲᑕᖕᓂᖓ “ᑐᖁᓐᓂᐊᖅᑕᒋᑦ.”

ᕋᕼᐊᒥᒻ ᑭᐅᓗᓚᐅᕐᒥᔪᖅ ᑖᒻᑭᓐᓴᓐ ᖃᓄᐃᓕᐅᕈᓯᖏᓐᓄᑦ, ᐱᓗᐊᖅᑐᒥ ᐅᖃᕐᓂᕐᓘᑎᓂ ᐅᖃᑲᑕᖕᓂᖓᓂ ᖃᓗᐃᓕᐅᕐᓂᐊᕐᓂᕋᑲᑕᒃᖢᓂ ᒪᒃᐸᒧᑦ, ᑕᒪᒃᑯᐊᓗ ᒪᓕᒃᓯᒪᙱᓐᓂᕋᖅᖢᓂᒋᑦ ᐸᓖᓯᓄᑦ ᐊᔪᕈᓐᓃᖅᓴᕈᑎᓂᒃ ᐊᒻᒪ ᐊᑐᐊᒐᕐᓂ.

ᕋᕼᐊᒥᒻ ᐅᖃᓚᐅᕐᑐᖅ ᑖᒃᑭᓐᓴᓐ ᒪᒃᐸᒥ ᐃᒃᓯᕚᖁᔨᑐᐃᓐᓇᓪᓗᐊᓚᐅᕐᓂᖓᓂ ᐊᒻᒪ ᖃᓄᐃᓕᐅᕐᑐᓂ ᓱᖁᑎᒃᓴᙱᓪᓗᓂ. ᑭᓯᐊᓂᓕ, ᐅᖃᕐᑐᖅ, ᐸᓖᓯ ᐅᖃᕐᓂᕐᖢᓂ “ᖃᓄᐃᓕᓂᐊᖅᑕᒋᑦ (ᐅᖃᑦᑎᐊᙱᖢᓂ) ᑮᓇᒃᑯᑦ,” ᖁᑭᐅᑎᒥᓂ ᑐᕌᖅᑎᕐᓯᒪᓪᓗᓂ ᒪᒃᐸᒧᑦ.

ᐳᑦᓱ ᓇᐃᑦᑐᒥ ᑭᐅᔾᔪᑎᖃᓚᐅᕐᑐᖅ ᐅᖃᖅᖢᓂ ᕋᕼᐊᒥᒻ “ᐱᙳᐊᕈᑎᖃᑐᐃᓐᓇᕐᒪᑦ ᖃᓄᐃᓕᐅᕈᑎᕕᓂᕐᓂᒃ” ᐆᒥᖓ ᖃᓄᖅ ᑖᒻᑭᓐᓴ ᐱᓕᕆᐊᖃᓪᓗᐊᓚᐅᕐᓂᖓᓂ ᐅᓗᕆᐊᕐᓵᕈᑎᒋᔭᐅᔪᕕᓂᕐᒥ.

“ᑕᒪᑐᒥᖓ ᐱᓕᕆᐊᖃᑦᑎᐊᖅᑐᐃᓐᓇᐅᖓᔅᓯ,” ᐃᖅᑲᖅᑐᐃᒡ ᑯᕆᔅᑎᐊᓐ ᓚᐃᐊᓐᔅ ᐅᖃᕐᑐᖅ ᑕᒪᐃᓐᓄᑦ ᓗᐊᐃᔮᖕᓄᑦ.

ᓚᐃᐊᓐᔅ ᐅᖃᓚᐅᕐᑐᖅ ᐃᓱᒪᒃᓴᖅᓯᐅᕈᑎᒃᓴᖃᐅᕐᓂᖓᓂ ᐃᓱᒪᓕᐅᕆᓚᐅᙱᓐᓂᖓᓂ ᑭᓯᐊᓂᓕ ᐅᖃᖅᖢᓂ ᑕᒪᓐᓇ ᐃᖅᑲᖅᑐᖅᑕᐅᔾᔪᑎ ᐱᓕᕆᐊᕆᔭᐅᕌᓂᒋᐊᖃᕐᓂᕋᖅᖢᓂᐅᒃ.

ᐃᓱᒪᓕᐅᕈᑎᖓ, ᐅᖃᕐᑐᖅ, “ᖁᕕᐊᓱᒡᕕᐅᑉ ᓯᕗᓂᐊᒍᑦ ᐅᖃᐅᓯᕆᓂᐊᖅᑕᖓ ᑖᒃᑯᐊ ᑲᔪᓯᔪᓐᓇᕐᓂᐊᕐᒪᑕ ᐃᓅᓯᖏᑦ.”