ᓕᐳᕈᒃᑯᑦ ᐃᑲᔫᑎᒃᓴᖓ ᐅᑯᓄᖓ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅ ᐃᓚᒋᐊᖅᑕᐅᕗᖅ ᐊᕐᕌᒍᒥᑦ

For English version, see Liberals extend Inuit Child First Initiative for one year, again

ᒐᕙᒪᑐᖃᒃᑯᑦ ᑐᓴᖅᑎᑦᑎᕗᑦ $115 ᒥᓕᐊᓐ ᑖᓚᓂ ᐃᓚᒋᐊᖅᑎᑦᑎᓂᖏᓐᓂᒃ ᐆᒧᖓ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅᒧᑦ, ᐱᓇᓱᐊᕈᓯᕐᓂ 6-ᓂ ᓯᕗᓂᐊᒍᑦ ᑖᓐᓇ ᐱᓕᕆᐊᒃᓴᖅ ᐃᓱᓕᓚᐅᙱᓐᓂᖓᓂᒃ.

“ᓱᕈᓰᑦ ᖃᓄᐃᙱᓐᓂᒋᑦ ᐱᒻᒪᕆᐊᓘᖃᑕᐅᒻᒪᑦ ᒥᓂᔅᑕᐅᓪᓗᒐ,” ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᓂᕐᒧᑦ ᒥᓂᔅᑕ ᒫᓐᓇ ᒑᓪ-ᒫᔅᑎ ᐅᖃᓚᐅᕐᑐᖅ ᕕᕝᕗᐊᕆ 19-ᒥ ᑰᔾᔪᐊᖅᒥᑦ. “ᐃᓚᒌᑦ, ᓯᕗᓕᐅᕐᑎᑦ, ᐊᒻᒪ ᓱᕈᓰᑦ ᓇᓗᓇᐃᕐᓯᑲᑕᖕᒪᑕ ᖃᓄᖅ ᐃᑲᔫᑎᖃᖅᑎᒋᖕᒪᑖ ᐅᓇ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅ.”

ᐅᓇ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅ ᐱᓕᕆᐊᒃᓴᕆᔭᐅᔪᖅ ᐃᑲᔫᑎᖃᖅᖢᓂ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᓄᑦ ᑲᓇᑕᒥ ᑖᓐᓇᓗ ᐃᓕᓐᓂᐊᕈᑎᓄᑦ ᐊᒻᒪ ᐃᓅᖃᑎᒌᖕᓂᕐᒧᑦ ᐃᑲᔪᕈᑎᐅᓪᓗᓂ ᐃᓄᐃᑦ ᓱᕈᓯᖏᓐᓂᒃ ᐊᒻᒪ ᐃᓅᓱᒃᑐᓂᒃ.

ᐃᓚᒋᔭᐅᓚᐅᕐᑐᕐᓕ ᐃᒃᐱᒋᔭᐅᓂᖓ ᓄᓇᕗᓕᒫᒥ ᐅᓇ ᐃᑲᔫᑎ ᓂᕿᑖᕈᓐᓇᐅᑎᒧᑦ ᐊᒻᒪᓗ ᑐᓐᓂᖅᑯᓯᐊᖅᑖᖅᐸᒃᖢᑎᒃ $500-ᓂ ᓱᕈᓯᕐᒧᑦ ᐊᑕᐅᓯᕐᒧᑦ ᑕᖅᑭᑕᒫᑦ ᓂᕿᑖᕈᑎᒃᓴᓄᑦ. ᕕᕝᕗᐊᕆ 2025-ᒥ ᒐᕙᒪᒃᑯᑦ ᑖᔅᓱᒥᖓ ᓄᖅᑲᖅᑎᑦᑎᓕᓚᐅᕐᑐᑦ ᐅᓇ ᐊᑐᕐᑕᐅᖔᕋᓱᓕᖅᖢᓂ ᐱᔭᕆᐊᖃᕐᓂᕐᒧᑦ ᑭᓯᐊᓂ ᐃᑲᔫᑎᑖᖅᑎᑦᑎᕙᒡᓗᑎᒃ ᓂᕿᑖᕈᓐᓇᐅᑎᒃᓴᓂᒃ.

ᒑᓪ-ᒫᔅᑎ ᓄᑖᓂ ᐃᑲᔫᑎᒃᓴᓂ ᑐᓴᖅᑎᑦᑎᓕᓚᐅᕐᓯᒪᔪᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᑕᖅᑭᑦ ᐱᖓᓱᒃ ᐊᓂᒍᖅᑐᓄᑦ ᐅᓂᒃᑳᑲᑕᒃᑎᓪᓗᒋᑦ ᑰᔾᔪᐊᖅᒥᑦ ᑲᑎᒪᓂᕐᒥᒃ.

ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᐊᑐᕐᓂᐊᖅᑐᑦ ᒫᓂ $115 ᒥᓕᐊᓐ ᑖᓚᓂ ᐊᕐᕌᒎᓂᐊᖅᑐᒧᑦ, ᑖᓐᓇᓗ ᐱᒋᐊᕐᕕᖃᖅᖢᓂ ᐊᐃᕆᓕ 1-ᒥ, ᒑᓪ-ᒫᔅᑎ ᐅᖃᕐᑐᖅ.

ᐅᓇ $7 ᒥᓕᐊᓐ ᑖᓚᓂ ᒥᒃᖠᕚᓪᓕᕈᑎᐅᔪᖅ ᐅᕙᙵᑦ $122 ᒥᓕᐊᓐᑖᓚᓂ ᓕᐳᕈᓪ ᒐᕙᒪᒃᑯᑦ ᐋᖅᑭᓚᐅᕐᓯᒪᔭᖓᓂ ᑕᒪᑐᒧᖓ ᐊᕐᕌᒍᒧᑦ ᐃᓱᓕᓕᕐᐸᑦ ᒫᔅᓯ 31-ᒥ.

ᐅᓇ ᐊᑐᕐᑕᐅᑲᐃᓐᓇᖅᑐᖅ ᐊᕐᕌᒎᖕᓄᑦ ᒪᕐᕉᖕᓂᑦ ᑮᓇᐅᔭᓂ ᓄᖑᕈᑎᒍᑎᐅᓚᐅᕐᓯᒪᖕᒪᑦ 2025-ᒥ ᑭᓯᐊᓂᓕ ᐅᖓᕙᕆᐊᖅᑕᐅᓪᓗᓂ ᐊᕐᕌᒍᓕᒫᒥᑦ. ᒐᕙᒪᑐᖃᒃᑯᑦ ᐱᓕᕆᓂᐊᕐᓂᕋᕐᓯᒪᔪᑦ ᐊᕐᕌᓂᐅᓚᐅᕐᑐᒥᑦ ᑖᓐᓇ ᐃᓚᒋᐊᖅᑕᐅᔪᒪᓪᓗᓂ ᐊᒻᒪᓗ ᐋᖅᑭᒃᓯᓗᑎᒃ ᐊᑐᖅᑕᐅᖃᑦᑕᐃᓐᓇᕈᓐᓇᕐᓂᐊᖅᑐᒥᓐ ᐱᓕᕆᐊᒃᓴᒥ.

ᓄᕕᐱᕆᒥ, ᒑᓪ-ᒫᔅᑎ ᐅᖃᒃᑲᓐᓂᓚᐅᕐᑐᖅ ᒐᕙᒪᒃᑯᑦ ᐱᓂᐊᕐᓂᕋᖅᓯᒪᔭᖏᓐᓂᒃ ᐊᑐᖅᑕᐅᖏᓐᓇᕋᔭᖅᑐᒥᒃ ᐱᓕᕆᐊᒥ, ᐅᖃᖅᖢᓂ ᐱᓕᕆᖃᑎᖃᕐᓯᒪᓂᖓᓂ ᐃᓄᖕᓂ ᐊᖓᔪᖅᑳᐅᑎᓂᒃ.

ᒐᕙᒪᑐᖃᒃᑯᑦ ᓕᐳᕈᓪ ᒐᕙᒪᒃᑯᖏᑦ ᓴᖅᑭᑎᑦᑎᓪᓗᑎᒃ 2025-26-ᒥ ᐊᐅᓚᑦᑎᔾᔪᑎᒃᓴᓂ ᓄᕕᐱᕆᒥ, ᐃᓚᖃᖅᑎᑦᑎᓚᐅᕐᑐᑦ ᐃᑲᔫᑎᒃᓴᓂ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅᒧᑦ ᐊᕐᕌᒍᒧᑦ 2025-26, ᑭᓯᐊᓂᓕ ᐅᖓᑖᒍᑦ ᐃᑲᔫᑎᒃᓴᖅᑕᖃᙱᑦᑐᖅ.

“ᓇᐃᓈᒃᓯᒪᔪᑦᑯᑦ, ᐱᓇᓱᐊᒐᖃᕋᑦᑕ ᐱᐅᓯᕚᓕᖅᑎᑦᑎᓇᓱᖕᓂᕐᒥᒃ ᑐᓂᐅᖃᐃᓂᕐᒥᒃ ᐊᒻᒪ ᒥᒃᖠᕚᓪᓕᖅᑎᓪᓗᓂ ᐊᐅᓚᑦᑎᓂᒃᑯᑦ ᑐᓚᒃᑕᕐᕕᐅᔭᑦᑐᓂᒃ,” ᒑᓪ-ᒫᔅᑎ ᐅᖃᕐᑐᖅ.

ᑰᔾᔪᐊᖅᒦᑎᓪᓗᒍ ᑐᓴᖅᑎᑦᑎᓚᐅᕐᒥᔪᖅ ᐊᑕᐅᓯᕐᒥ $30 ᒥᓕᐊᓐ ᑖᓚᓂ “ᐃᓚᒋᐊᕈᑎᒃᓴᒥᒃ” ᓂᕿᑦᑎᐊᕙᓕᕆᓂᕐᒧᑦ ᐅᑭᐅᕐᑕᖅᑐᕐᒧᑦ ᐃᑲᔫᑎᓂᒃ, ᒐᕙᒪᑐᖃᒃᑯᑦ ᐱᓕᕆᐊᖓ ᐊᑭᒃᖠᒋᐊᕈᑎᐅᓇᓱᒃᖢᓂ ᓂᕿᑦᑎᐊᕙᖕᓂ ᓂᐅᕕᕐᕕᖕᓂ ᓄᓇᓕᖕᓂ ᐅᑭᐅᕐᑕᖅᑐᕐᒥ.

“ᐅᓇ ᐃᑲᔫᑎᒃᓴᖅ ᐊᑭᒃᖠᒋᐊᕈᑎᐅᓂᐊᕐᑐᖅ ᓂᕿᓄᑦ ᐊᒻᒪ ᐊᑐᖅᑕᐅᔭᕆᐊᖃᖅᐸᒃᑐᓄᑦ ᐃᓚᒌᓄᑦ.”

ᓄᓇᕗᒥᑦ ᒪᓕᒐᓕᐅᕐᑎ ᓘᕆ ᐃᓪᓚᐅᖅ ᓈᒻᒪᒃᓴᓚᐅᙱᑦᑐᖅ ᓕᐳᕈᓪᑯᓐᓄᑦ ᒥᓂᔅᑕᐅᑉ ᐃᑲᔫᑎᒃᓴᑦ ᐅᖃᐅᓯᕆᑎᓪᓗᓂᒋᑦ.

“ᐅᑯᐊ ᐅᖃᐅᓯᑦ ᓱᕋᒃᓯᒍᑎᐅᑐᐃᓐᓇᕐᓂᐊᕐᒥᔪᖅ,” ᐃᓪᓚᐅᖅ ᐅᖃᕐᑐᖅ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᕕᕝᕗᐊᕆ 19-ᖑᑎᓪᓗᒍ. “ᐊᑐᐃᓐᓇᕋᔭᖅᑐᓂᒃ ᒪᓂᒻᒪᐃᓯᒪᙱᒻᒪᑕ.”

ᐃᓪᓚᐅᖅ ᐅᖃᓚᐅᕐᑐᖅ ᓈᒻᒪᒃᓴᙱᓐᓂᕋᖅᖢᓂ ᖃᓄᖅ ᐊᑯᓂᐅᑎᒋᔪᖅ ᐋᖅᑭᒃᓱᐃᓚᐅᕐᓂᖏᑦ ᓕᐳᕈᓪ ᒐᕙᒪᒃᑯᑦ ᐆᒥᖓ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕᑦ ᐱᓇᓱᐊᒐᖅᒥ, ᑕᒪᒃᑯᐊ ᐃᓄᐃᑦ ᓱᕈᓯᖏᑦ ᐃᓅᓱᒃᑐᖏᓪᓗᑦ ᐱᔭᕆᐊᖃᒻᒪᕆᒃᑎᓪᓗᒍᑦ. ᐅᖃᕐᑐᖅ ᐅᓇ ᐅᖃᐅᓯᐅᓂᑯ “ᒪᑦᑐᑎᑐᐃᓐᓇᐅᖕᒪᑦ.”