ᐅᐊᖕᓇᒧᑦ ᑎᑭᑉᐸᓪᓕᐊᔪᖅ: ᐃᓅᓯᖅ ᐊᐅᓱᐃᑦᑐᕐᒥ ᑲᓇᑕᒥ ᐸᓖᓯᒃᑯᓐᓂᑦ

For English version, see Due North: Life in the Grise Fiord RCMP

ᐊᐅᓱᐃᑦᑐᖅ ᐊᖏᕐᕋᕆᔭᐅᕗᖅ ᖃᔅᓯᒐᓚᖕᓄᑦ ᐅᐊᖕᓇᕐᒦᓚᖑᔪᓄᑦ.

ᓄᓇᕗᒻᒥ ᕼᐋᒻᓚᖓ 140−ᐸᓗᖕᓂ ᐃᓄᓕᖕᓂ, 1,500 ᑭᓛᒥᑐᐸᓗᖕᓂ ᓂᒋᖅᐸᓯᐊᓂ ᓄᓇᕐᔪᐊᑉ ᑲᔾᔨᖓᓂ, ᑲᓇᑕᐅᑉ ᐅᐊᖕᓇᖅᐸᓯᓛᖓᓂ ᓄᓇᓕᐅᕗᖅ. ᓱᕈᓰᑦ ᑕᐃᑲᓂ ᐃᓕᓐᓂᐊᓲᖑᕗᑦ ᐅᒥᒻᒪᒃ ᐃᓕᓐᓂᐊᕐᕕᖓᓂ ᑲᓇᑕᐅᑉ ᐅᐊᖕᓇᖅᐸᓯᓛᖓᓂ ᐃᓕᓐᓂᐊᕐᕕᐅᓪᓗᓂ.

ᐊᒻᒪᓗ ᑲᓇᑕᒥ ᐸᓖᓯᒃᑯᓐᓄᑦ, ᓄᓇᓕᖕᓂ ᒪᕐᕉᖕᓂ−ᐃᓚᖃᖅᑐᒥ ᑎᑎᕋᕐᕕᖓ ᐅᐊᖕᓇᖅᐸᓯᓛᖓᓂ ᐸᓖᓯᒃᑰᕗᖅ.

Const. ᑎᐊᑦ ᑑᕐᔨᓐ, ᐸᓖᓯᒃᑯᓐᓂ ᐊᖓᔪᖅᑳᕆᔭᐅᓚᐅᑲᒃᐳᖅ, ᐅᓂᒃᑳᕆᕗᖅ ᓄᓇᖃᖅᖢᓂ ᐊᐅᓱᐃᑦᑐᕐᒥ ᐱᐅᓪᓗᓂ, ᐊᒻᒪ ᐊᔾᔨᐅᙱᑦᑐᒥ ᐊᑐᕐᓂᑰᓂᖓᓂ.

ᓄᓇᕗᒧᐊᓚᐅᖅᐳᖅ ᓯᕗᓪᓕᖅᐹᑦᑎᐊᒥ ᔫᓂᐅᓚᐅᖅᑐᒥ, ᐊᕐᕌᒍᓄᑦ ᖁᓕᓂᑦ ᐸᓖᓯᐅᓪᓗᓂ ᐋᓪᐴᑕᒥ ᐊᒻᒪ ᐳᕆᑎᔅ ᑲᓚᒻᐱᐊᒥ.

“ᖃᐅᒪᓂᐅᓚᐅᖅᐳᖅ ᐊᕐᕌᒎᑉ ᐃᓚᖓᓐᓂ, ᑕᐃᒫᒃ ᑕᑯᔭᕆᐅᕈᓐᓇᖅᓯᓚᐅᖅᐳᒍᑦ ᐃᓄᖕᓂ ᐅᕙᓂ ᐊᐅᔭᒃᑯᑦ ᐊᒻᒪ ᑭᓇᐅᓂᑦᑎᓐᓂ ᑐᙵᓱᒃᑎᑕᐅᑦᑎᐊᖅᖢᑕ ᓄᓇᓕᖕᓄᑦ ᐊᒻᒪ ᐃᓄᖕᓄᑦ ᑕᒫᓂ,” ᑑᕐᔨᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ, ᐅᖃᓪᓚᒃᖢᓂ ᐊᕐᕌᒎᑉ ᐃᓚᖏᓐᓂ ᐃᓚᖃᖅᑐᒥ ᐱᓕᕆᓂᐅᔪᒥ ᐃᑲᕐᕋᓂ−24-ᓂ ᓯᕿᓐᓂᕐᓂᖓᓂ ᐃᑲᕐᕋᓂ 24−ᓂ ᑖᕐᓂᐅᔪᒥ.

“ᓄᓕᐊᕋ ᐅᕙᓂ ᓄᓇᓕᖕᒥ ᐃᖅᑲᓇᐃᔭᖅᐳᖅ ᐊᒻᒪ ᐊᓕᐊᓇᐃᒋᑦᑎᐊᖅᑕᕗᑦ ᐅᕙᓃᓐᓂᑦᑎᓐᓂ ᐊᒻᒪ ᑐᙵᓱᒃᑎᑕᐅᑦᑎᐊᖅᐳᒍᑦ ᓄᓇᓕᖕᓂ.”

ᐊᐅᓱᐃᑦᑐᕐᒥ ᐸᓖᓯᒃᑯᖏᑦ ᐱᕙᒃᐳᑦ “ᑕᐃᒪᐃᑦᑐᑦᑕᐃᓐᓇᓂ ᐅᖃᓗᖕᓂᐅᔪᓂ ᑕᐃᒪᐃᑉᐸᒃᑐᓂ ᓇᒥᓕᒫᖅ,” ᐅᖃᓚᐅᖅᐳᖅ, ᐃᓚᖃᖅᑐᒥ ᐅᓂᒃᑳᓕᐊᓂ ᐃᓚᖃᖅᑐᒥ ᐋᓐᓂᖅᓯᕆᓂᐅᔪᓂ ᐊᒻᒪ ᐃᓱᒫᓘᑕᐅᔪᓂ ᐅᓗᕆᐊᓇᖅᑐᒥ ᐊᖁᑎᐅᔪᓂ.

ᐃᓄᑭᑦᑐᒥ ᓄᓇᓕᖕᓃᖦᖢᓂ, ᑭᓯᐊᓂ, ᑕᐃᒃᑯᐊ ᐅᖃᓗᖕᓂᐅᔪᑦ ᐱᒐᔪᙱᓐᓂᖅᓴᐅᕗᑦ ᐊᓯᖏᓐᓂ ᐃᓂᐅᔪᓂ.

2024−ᒥ, ᐊᐅᓱᐃᑦᑐᕐᒥ ᑲᓇᑕᒥ ᐸᓖᓯᒃᑯᑦ ᑭᐅᓚᐅᖅᐳᑦ 100 ᐅᖓᑎᑦᑎᐊᖓᓂ ᐅᖃᓗᖕᓂᐅᔪᓂ ᓄᓇᓕᖕᓂ, ᑑᕐᔨᓐ ᐅᖃᓚᐅᖅᐳᖅ, ᑐᑭᖃᖅᑐᒥ ᐅᖃᓗᒃᑐᖃᖅᐸᒃᖢᓂ ᐊᑕᐅᓯᐊᖅᑐᒥ ᐅᓪᓗᓂ ᐱᖓᓱᑦ ᑎᓴᒪᓪᓘᓐᓃᑦ ᐊᓂᒍᕌᖓᑦ.

ᐸᓖᓯᒃᑯᑦ ᐊᐅᓚᑦᑎᓲᖑᕗᑦ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ 8 ᐅᓪᓛᒃᑯᑦ 4 ᐅᓐᓄᓴᒧᑦ, ᑭᓯᐊᓂ ᐸᓖᓯᐅᔪᑦ ᐅᖃᓗᒡᕕᐅᔪᓐᓇᖅᐳᑦ ᖃᖓᓕᒫᑦᑎᐊᖅ. ᐱᖓᓱᖓᓐᓂ−ᑎᓴᒪᓂ ᐅᖃᓗᖕᓂᐅᔪᓂ ᕿᑎᐊᓃᓲᖑᕗᑦ ᖁᓛᓂ ᐅᓐᓄᒃᑯᑦ ᐊᒻᒪ 4 ᐅᓪᓛᙳᕋᓱᐊᕐᓂᖓᓂ, ᑑᕐᔨᓐ ᐅᖃᓚᐅᖅᐳᖅ, ᐊᒻᒪ ᐸᓖᓰᑦ ᓂᕆᐅᒋᔭᐅᕗᑦ ᑭᐅᓂᕐᒥ ᐅᓄᙱᓐᓂᖅᓴᐅᔪᓂ 8 ᒥᓂᑦᓂ.

ᐸᓖᓯᓂᕆᓂᐅᔪᒥ ᐅᖓᑖᓂ, ᑲᓇᑕᒥ ᐸᓖᓯᒃᑯᑦ ᐃᑲᔪᖅᓱᐃᓲᖑᕗᑦ ᓄᓇᓕᖕᓂ ᐸᖅᓴᐃᓂᐅᔪᓂ ᐊᒻᒪ ᓴᐳᔾᔨᓂᕐᒧᑦ ᐊᒃᓱᕈᕈᑕᐅᔪᓂ ᐊᒻᒪ ᐱᓕᕆᓲᖑᕗᑦ ᐊᑐᕐᓂᖃᐅᑎᒥᒃ ᐅᑭᐅᖅᑕᖅᑐᒥ ᒥᐊᓂᖅᓯᕆᓂᕐᒥ.

“ᑐᓴᐅᒪᖢᒍᑦ ᐃᒪᐅᑉ ᐊᑖᒎᓲᓂ ᐅᒥᐊᕐᓂ ᑲᖏᖅᖢᐊᓂ ᓄᓇᓕᐅᑉ ᓯᕗᓂᑦᑎᐊᖓᓂ ᐊᕐᕌᒍᒐᓴᓂ ᖄᖏᖅᓯᒪᔪᓂ,” ᑑᕐᔨᓐ ᐅᖃᓚᐅᖅᐳᖅ.

“ᐱᓗᐊᖅᑐᒥ ᖁᕝᕙᕆᐊᖅᓯᒪᔪᒥ ᑲᑎᒪᔨᕐᔪᐊᖑᔪᓄᑦ ᓱᑲᖓᓂᐅᔪᓂ ᒫᓐᓇᐅᔪᒥ, ᐅᔾᔨᕆᓯᒪᔭᕗᑦ ᐊᒻᒪ ᓇᐅᑦᑎᖅᓱᖅᐳᒍᑦ ᐱᔾᔪᑎᖃᖅᑐᒥ ᑲᓇᑕᒥ ᐊᑦᑕᓇᔾᔭᐃᖅᓯᓯᒪᓂᕐᒥ ᐊᒻᒪ ᑭᐅᓂᑦᑎᓐᓂ.”

ᑲᓇᑕᒥ ᐸᓖᓯᒃᑯᑦ ᐊᐅᓱᐃᑦᑐᕐᒥ ᐃᓂᒋᔭᖓ ᐅᐊᖕᓇᖅᐹᖑᓛᖑᕗᖅ ᐸᓖᓯᒃᑯᓐᓂ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)

ᐊᐅᓱᐃᑦᑐᕐᒥ ᐸᓖᓯᒃᑯᑦ ᐃᒡᓗᕐᔪᐊᖓ ᒪᑐᐃᓚᐅᖅᓯᒪᕗᖅ 2002−ᒥ. ᑭᓯᐊᓂ ᑲᓇᑕᒥ ᐸᓖᓯᒃᑯᑦ ᐱᑕᖃᕐᓂᖏᓐᓂ ᖁᑦᑎᒃᑐᒥ ᐅᑭᐅᖅᑕᖅᑐᒥ ᐊᕐᕌᒍᒐᓵᓗᖕᓅᖅᐳᖅ, ᐃᓚᖃᖅᑐᒥ ᐃᓚᐅᖃᑕᐅᓂᖏᓐᓂ ᖁᑦᑎᒃᑐᒥ ᐅᑭᐅᖅᑕᖅᑐᒥ ᓅᑎᑕᐅᓂᐅᓚᐅᖅᓯᒪᔪᓂ 1950−ᖏᓐᓂ ᐊᒻᒪ ᓯᕗᓂᐊᓂ.

ᑑᕐᔨᓐ ᐅᖃᓚᐅᖅᐳᖅ ᑐᓴᐅᒪᑦᑎᐊᖅᐳᖅ ᖃᓄᐃᑉᐸᓚᐅᖅᓯᒪᓂᖓᓂ ᓅᑕᐅᓚᐅᖅᓯᒪᔪᓂ, ᐊᒻᒪ ᐅᐸᒃᓯᓯᒪᓲᖑᕗᖅ ᐃᓄᑐᖃᕐᓂ ᓄᓇᓕᖕᓂ ᐅᓂᒃᑳᕆᑎᓪᓗᒋᑦ ᐅᓂᒃᑳᖅᑕᖏᓐᓂ.

ᖄᒃᑲᓐᓂᐊᒍᑦ ᑖᔅᓱᒧᖓ ᑲᓇᑕᒥ ᐸᓖᓯᒃᑯᑦ ᐅᑎᖅᑎᕆᓲᖑᕗᑦ ᓄᓇᓕᖕᓄᑦ ᖃᔅᓯᒐᓚᖕᓂ ᐱᓕᕆᓂᐅᔪᓂ.

ᓲᕐᓗ, ᑑᕐᔨᓐ ᐅᖃᓚᐅᖅᐳᖅ, ᓂᖅᖠᐅᓲᖑᕗᑦ ᐱᓇᓱᐊᕈᓯᑕᒫᒥ ᐃᓕᓐᓂᐊᕐᕕᖕᒥ ᐅᓪᓛᕈᒻᒥᑕᕐᒥ, ᑏᑐᖃᑎᖃᓲᖑᕗᑦ ᐃᓄᑐᖃᕐᓂ, ᐅᖃᓕᒫᖅᖢᑎᒃ ᐅᖃᓕᒫᒐᕐᓂ ᓱᕈᓯᕐᓄᑦ ᐊᒻᒪ ᐃᓚᐅᖃᑕᐅᓪᓗᑎᒃ ᖃᓄᐃᓐᓂᐅᔪᓂ ᓲᕐᓗ ᑲᓇᑕᐅᑉ ᓇᓪᓕᐅᓐᓂᖅᓯᐅᕐᓂᖓᓂ, ᓄᓇᕗᒻᒥ ᓇᓪᓕᐅᓐᓂᖅᓯᐅᕐᓂᖓᓂ ᐊᒻᒪ ᒪᑭᕝᕕᐊᓂ ᐱᙳᐊᕐᓂᐅᔪᓂ.

ᐱᓕᕆᖃᑎᒋᓯᒪᔭᑦᑎᓐᓂ ᓴᓇᓯᒪᔭᑦᑎᓐᓂ ᐅᖓᓯᒃᑐᒨᖅᓯᒪᕗᖅ, ᐅᖃᓚᐅᖅᐳᖅ.

“ᐃᓱᒪᕗᖓ ᐃᓚᒋᔭᐅᖃᑕᐅᓪᓗᓂ ᓄᓇᓕᖕᓂ ᐊᒻᒪ ᐃᓚᒋᔭᐅᖃᑕᐅᓪᓗᓂ ᓄᓇᓕᖕᓂ ᖃᓄᐃᓐᓂᐅᔪᓂ ᐱᓪᓚᕆᐅᕗᖅ, ᑕᒪᒃᑭᓂ ᐃᓅᓪᓗᓂ ᓄᓇᖃᖅᑐᓂ ᐅᕙᓂ ᓄᓇᓕᐅᔪᒥ ᐊᒻᒪ ᑲᓇᑕᒥ ᐸᓖᓯᒃᑯᓐᓄᑦ ᐸᓖᓯᐅᓪᓗᓂ ᐅᕙᓂ ᐃᖅᑲᓇᐃᔭᖅᖢᑎᒃ,” ᑑᕐᔨᓐ ᐅᖃᓚᐅᖅᐳᖅ.

“ᓄᓇᓕᖕᓂ ᐸᓖᓯᓕᕆᓂᕐᒥ ᐱᓕᕆᖃᑎᒌᖕᓂᐅᔪᒥ−ᑐᙵᕕᖃᖅᑐᒥ ᐸᓖᓯᓕᕆᓂᐅᕗᖅ, ᐊᒻᒪ ᐃᓄᑭᑦᑐᓂ ᓄᓇᓕᐅᔪᓂ — ᓄᓇᕗᒻᒦᑉᐸᖅ ᐊᓯᐊᓂᓪᓘᓐᓃᑦ — ᐱᓕᕆᖃᑎᖃᕐᓂᐅᕗᑦ ᐃᑲᔪᕐᓂᐊᖅᑐᒥ ᑭᓱᑐᐃᓐᓇᓂ ᐃᖏᕐᕋᓂᖃᑦᑎᐊᕐᓂᖏᓐᓂ ᐱᔪᓐᓇᕐᓂᖓᓂ”.