‘ᓕᐊᒍᑎᑐᑦ’: ᓴᓇᔨᐅᔪᑦ ᐋᖅᑭᒃᓱᐃᕗᑦ ᐅᑭᐅᖅᑕᖅᑐᒥ-ᐸᕐᓇᒃᓯᒪᔪᒥ ᑰᔾᔪᐊᕐᒥ ᐊᖏᕐᕋᒥᒃ

For English version, see ‘Like Lego’: Startup assembles Arctic-ready home in Kuujjuaq

ᐅᓪᓗᓂ 10−ᑐᐃᓐᓇᓂ, ᑲᑎᙵᓂᐅᔪᓂ ᓴᓇᔨᐅᔪᓂ ᐋᖅᑭᒃᓱᐃᓚᐅᖅᐳᑦ ᐊᖏᕐᕋᐅᔪᒥ ᑰᔾᔪᐊᕐᒥ ᐊᒃᓱᕈᕈᑕᐅᔪᒥ ᐃᑲᔪᕐᓂᕐᒧᑦ ᐅᓇᑕᕐᓂᕐᒥ ᐃᒡᓗᖃᖅᑎᑦᑎᓂᕐᓂ ᐊᒃᓱᕈᕈᑕᐅᔪᓂ ᐅᖓᓯᒃᑐᓂ ᐅᑭᐅᖅᑕᖅᑐᒥ ᓄᓇᓕᐅᔪᓂ.

Tinybox Systems, ᑲᓇᑕᒥ ᐃᒡᓗᓕᐅᕐᓂᕐᒧᑦ ᐱᓕᕆᓂᐅᔪᒥ ᐱᒋᐊᖅᑎᑕᐅᓂᐅᔪᒥ, ᐅᖃᓪᓚᖃᑎᖃᖅᐸᓪᓕᐊᓕᓚᐅᖅᐳᑦ ᑲᑎᕕᒃ ᐊᕕᒃᑐᖅᓯᒪᔪᓂ ᒐᕙᒪᐅᔪᓂ 2024 ᓄᙳᐊᓂ ᐱᔾᔪᑎᖃᖅᑐᒥ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᒥ ᐊᑦᑎᒃᓯᒋᐊᖅᓯᓇᓱᐊᕐᓂᕐᒥ ᐊᑭᖓᓂ ᐊᒻᒪ ᒥᒃᖠᒋᐊᖅᑎᑦᑎᓂᕐᒥ ᐊᔪᕐᓇᕐᓂᐅᔪᒥ ᐃᒡᓗᓕᐅᕐᓂᕐᒥ ᐅᑭᐅᖅᑕᖅᑐᒥ, ᐅᖃᓚᐅᖅᐳᖅ ᓇᓂᓯᔨᐅᖃᑕᐅᔪᖅ ᓵᓕ ᕗᕋᐃᔅ.

ᐃᒡᓗᓕᐅᕐᓂᕐᒥ ᐅᑭᐅᖅᑕᖅᑐᒥ ᑲᓇᑕᒥ ᐊᑭᑐᔪᐊᓘᕗᖅ ᐱᔾᔪᑎᖃᖅᑐᒥ ᐱᔾᔪᑕᐅᔪᓂ ᓲᕐᓗ ᐱᔭᕆᐊᖃᕐᓂᐅᔪᒥ ᑎᑭᑎᑦᑎᓂᕐᒥ ᐊᔪᙱᓐᓂᓕᖕᓂ ᓴᓇᔨᐅᔪᓂ ᐊᒻᒪ ᑭᒡᓕᖃᖅᑐᒥ ᓇᑉᐸᖅᑎᕆᓂᕐᒧᑦ ᐊᕐᕌᒎᑉ ᐃᓚᖓᓐᓂ ᓯᓚ ᓂᒡᓚᓱᕐᔪᐊᕐᓂᖓᓄᑦ.

“ᐱᔪᒥᓇᖅᐳᖅ ᐋᖅᑭᒍᑎᒃᓴᑦᑎᓐᓂ ᑭᓱᓕᒫᑦ ᑎᑭᓲᖑᕗᑦ ᐋᖅᑭᒃᓱᑐᐃᓐᓇᕆᐊᓕᖕᓂ,” ᕗᕋᐃᔅ ᐅᖃᓚᐅᖅᐳᖅ. “ᓲᕐᓗ ᓕᐊᒎᑎᑐᑦ ᐅᕝᕙᓘᓐᓃᑦ ᐊᐃᑮᐊ ᐃᒡᓗᒥᐅᑕᓄᑦ.”

ᐃᒡᓗᑭᒃᓴᓗᐊᕐᓂᐅᔪᓂ ᓄᓇᕕᖕᒥ ᑐᐊᕕᕐᓇᖅᐳᖅ. ᐅᓂᒃᑳᓕᐊᖑᔪᒥ ᓴᖅᑭᑎᑕᐅᓚᐅᖅᑐᒥ ᐊᕐᕌᓂ ᓇᓂᓯᓚᐅᖅᐳᖅ ᐊᕕᒃᑐᖅᓯᒪᓂᐅᔪᖅ ᐊᒥᒐᓗᐊᖅᐳᖅ ᐱᔭᕆᐊᓕᖏᓐᓂ 1,000−ᓂ ᐊᖏᕐᕋᓂᑦ.

ᓄᓇᕕᐅᑉ ᐃᓄᒋᐊᖕᓂᖓ, 14,045−ᖑᓚᐅᖅᑐᒥ 2021−ᒥ, ᓇᓚᐅᑦᑖᕆᔭᐅᕗᖅ ᐱᕈᖅᐸᓪᓕᐊᓂᐊᕐᓂᖓᓂ 1 ᐳᓴᓐᑎᒥ ᐊᕐᕌᒍᑕᒫᒥ ᑭᓯᐊᓂ 2041−ᒧᑦ. ᐅᓇ ᐃᓚᒋᐊᖅᓯᓂᐊᖅᐳᖅ ᐊᒃᓱᕈᕐᓂᐅᔪᒥ ᐃᒡᓗᒃᓴᓕᐅᕐᓂᕐᒧᑦ ᒫᓐᓇᐅᔪᒥ ᑐᐊᕕᕐᓇᖅᑐᒦᑉᐸᒋᐊᖅᑐᒥ.

ᐊᕐᕌᒍᑦ ᒪᕐᕉᒃ ᐊᓂᒍᑐᐊᕌᖓᑦ, ᐅᖃᐅᔾᔨᔨᐅᔪᓂ ᐱᓕᕆᕝᕕᒃ ᕋᐃᒪᓐ ᓴᐹᑦ ᒍᕌᓐᑦ ᑐᐊᓐᑕᓐ, ᐱᓕᕆᖃᑎᖃᖅᖢᑎᒃ ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᓐᓂ, ᖃᐅᔨᓴᖅᐳᑦ ᓄᓇᕕᖕᒥ ᐊᖏᕐᕋᕆᔭᐅᔪᓂ ᖃᐅᔨᓇᓱᖕᓂᕐᒧᑦ ᖃᔅᓯᓂ ᐃᓄᖕᓂ ᐃᒡᓗᖃᕐᓂᖏᓐᓂ ᐊᒻᒪ ᖃᔅᓯᓂ ᐃᒡᓗᕈᓯᖃᕐᓂᖏᓐᓂ ᐊᑐᓂ ᐃᒡᓗ ᐱᖃᕐᓂᖓᓂ.

3,738−ᓂ ᐊᖏᕐᕋᕆᔭᐅᔪᓂ ᐱᔭᕇᖅᓯᓚᐅᖅᑐᓂ ᐊᕐᕌᓂᐅᓚᐅᖅᑐᒥ ᖃᐅᔨᓴᖅᑕᐅᓂᖓᓂ, ᐅᓄᕐᓂᖅᓴᐅᔪᓂ 25 ᐳᓴᓐᑎᒥ ᑕᓪᓕᒪᓪᓗᐊᓂ ᐃᓄᖃᖅᐳᑦ ᑕᒪᒃᑭᒐᓚᐃᑦ ᐊᖏᕐᕋᐅᔪᑦ ᐱᖓᓱᓂ ᐃᒡᓗᕈᓯᖃᖅᖢᑎᒃ ᐅᓄᙱᓐᓂᖅᓴᐅᔪᓂᓪᓘᓐᓃᑦ.

ᕗᕋᐃᔅ, ᐃᓕᓐᓂᐊᖅᓯᒪᔪᒥ ᐃᒡᓗᐃᑦ ᓴᓇᒪᓂᖏᓐᓂ ᐊᒻᒪ ᑎᑎᕋᐅᔭᕐᓂᐅᔪᒥ, ᓴᓇᓚᐅᖅᐳᖅ ᐊᖏᕐᕋᓂ ᐱᖅᑯᓯᑐᖃᖅᑎᒍᑦ ᐱᓕᕆᓂᐅᔪᒥ ᐃᓚᐅᓕᓚᐅᙱᓐᓂᖓᓂ ᐋᓕᕗᕐ ᓵᖕ ᐊᒻᒪ ᐴᔭ ᓴᐱᐅᕆᒥ 2022−ᒥ ᐱᒋᐊᖅᑎᑦᑎᓂᕐᒥ ᑐᕌᓐᑐᒥ-ᑐᙵᕕᓕᖕᒥ Tinybox Systems−ᒥ.

“ᓇᓂᓯᔪᒪᓚᐅᖅᐳᖓ ᐱᓕᕆᓂᐅᔪᒥ ᐊᖏᕐᕋᓂ ᐊᑭᑭᓐᓂᖅᓴᐅᓂᖏᓐᓂ,” ᕗᕋᐃᔅ ᐅᖃᓚᐅᖅᐳᖅ.

ᑰᔾᔪᐊᕐᒥ, ᒪᕐᕉᖕᓂ-ᐃᓄᖕᓂ ᓄᓇᓕᖕᓂ ᓴᓇᔨᐅᔪᓂ ᐋᖅᑭᒃᓱᐃᓚᐅᖅᐳᑦ ᐃᒡᓗᒃᓴᒥ ᕿᑎᐊᓂ ᓯᑎᐱᕆᐅᑉ ᓄᙳᐊᓂ ᐊᒻᒪ ᐅᒃᑐᐱᕆ ᐱᒋᐊᕐᓂᖓᓄᑦ, ᐱᓕᒻᒪᒃᓴᐃᓪᓗᑎᒃ ᐊᒻᒪ ᑲᒪᒋᔭᐅᓪᓗᑎᒃ Tinybox ᖃᐅᔨᒪᔨᕐᔪᐊᖑᔪᓂ. ᐅᓇ ᓯᕗᓪᓕᖅᐹᖑᓪᓗᓂ ᑲᒻᐸᓂᐅᑉ ᐃᒻᒥᒃᑰᖓᔪᒥ ᐃᒡᓗᓕᐅᕐᓂᕐᒥ ᐱᓕᕆᔾᔪᓯᖓ ᐋᖅᑭᒃᓱᖅᑕᐅᓯᒪᓂᖓᓂ ᓯᓚᑖᓂ ᑲᑎᙵᓂᐅᔪᒥ, ᕗᕋᐃᔅ ᐅᖃᓚᐅᖅᐳᖅ.

ᐊᖏᕐᕋᖅ ᐃᒡᓗᕈᓯᖃᙱᖦᖢᓂ ᐃᓂᐅᕗᖅ ᓂᕿᓕᐅᕐᕕᕋᓛᖃᖅᖢᓂ, ᐃᒡᓕᕐᒥ ᓴᓇᓯᒪᔪᒥ ᓴᓂᕋᖓᓄᑦ ᐃᓕᓯᒪᓪᓗᓂ, ᐊᒻᒪ ᐊᓇᕐᕕᓕᖕᒥ. ᐊᐅᓚᐅᓯᕆᓂᕐᒧᑦ ᐃᒡᓗᕈᓯᖅ ᐃᒪᕐᒧᑦ, ᐅᖅᑰᓴᕐᓂᕐᒧᑦ ᐊᒻᒪ ᐅᐊᔭᖏᓐᓄᑦ ᐱᓕᕆᔾᔪᓯᐅᔪᓂ ᐊᓯᐊᓂ ᐃᒡᓗᒥᑦ ᓴᓂᓕᐊᓂ ᐃᒡᓗᒧᑦ.

ᓴᓇᓯᒪᓂᖓᓂ ᐊᑐᓲᖑᕗᖅ ᐊᓯᐊᒎᖅᑐᒥ ᐃᑭᐊᕐᒥᒃᓴᖃᖅᖢᓂ ᐃᑲᔪᕐᓂᕐᒧᑦ ᑲᒪᒋᔭᖃᕈᓐᓇᕐᓂᖓᓂ ᓂᒡᓚᓱᕐᔪᐊᕐᓂᐅᔪᓂ ᓯᓚᒥ, ᑕᐅᓄᖓ -50 C−ᒧᑦ.

ᐊᖏᕐᕋᖅ ᓴᓇᔭᐅᓯᒪᒋᕗᖅ ᐊᕙᓗᓕᖕᒥ ᓇᖏᕈᓐᓇᖅᑐᒥ ᐊᐳᑎᖃᕐᔪᐊᕐᓂᐅᔪᒥ ᐊᒻᒪ ᖃᐅᔨᓴᕈᑎᖃᖅᐳᖅ ᖃᐅᔨᓴᕐᓂᕐᒥ ᖃᓄᖅ ᐃᒡᓗ ᒪᑭᑕᑦᑎᐊᕐᓂᖓᓂ ᑕᐃᒪᐃᑦᑐᓂ ᓂᒡᓚᓱᖕᓂᕐᔪᐊᖑᔪᓂ ᓯᓚᒥ ᐊᑯᓂᐅᔪᒃᑯᑦ.

ᕗᕋᐃᔅ ᐅᖃᓚᐅᖅᐳᖅ Tinybox ᓇᐅᑦᑎᖅᓱᕐᓂᐊᖅᐳᖅ ᐃᒡᓗᒥᒃ ᖃᐅᔨᓇᓱᖕᓂᕐᒧᑦ ᖃᓄᖅ ᐱᓕᕆᑦᑎᐊᕐᓂᖓᓂ ᐅᑭᐅᖅᑕᖅᑐᒥ ᐊᕐᕌᒍᒐᓴᓄᑦ.

ᑲᒻᐸᓂᐅᔪᖅ ᐱᓕᕆᐊᒃᓴᖃᖅᑎᑕᐅᓚᐅᖅᐳᑦ ᐃᒡᓗᒧᑐᐊᖅ ᐊᒻᒪ ᐋᖅᑭᒃᓱᖅᑕᐅᓂᖓᓂ, ᐊᑭᖃᖅᑐᒥ $90,000−ᐸᓗᖕᓂ. ᓱᓪᓗᐊᓗᖏᑦ ᐊᒻᒪ ᐅᐊᔭᓕᕆᓂᕐᒧᑦ ᐱᓕᕆᓂᐅᔪᑦ ᐱᓕᕆᐊᖑᓂᐊᖅᐳᑦ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂ, ᕗᕋᐃᔅ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᑕᐃᒪᑐᖅ Tinybox−ᑯᑦ ᐱᓕᕆᓂᖓ ᓄᓇᕕᖕᒥ ᐱᔭᕇᙱᓚᖅ.

“ᓂᕆᐅᒃᐳᒍᑦ ᐱᒋᐊᓕᑐᐃᓐᓇᕐᓂᑦᑎᓐᓂ, ᐅᓇ ᑕᑯᒃᓴᐅᑎᑦᑎᖕᒪᑦ ᓴᓇᔪᓇᕐᓂᑦᑎᓐᓂ ᐊᑭᑭᓐᓂᖅᓴᓂ ᐊᖏᕐᕋᓂ ᓱᒃᑲᓂᖅᓴᐅᔪᒥ ᐊᑐᕐᓗᑕ ᓄᓇᓕᖕᓂ ᐃᖅᑲᓇᐃᔭᖅᑎᓂᑦ,” ᐅᖃᓚᐅᖅᐳᖅ.