ᐊᑯᓂᐊᓗᒃ ᐃᖏᕐᕋᓂᐅᔪᒥ ᑎᑎᕋᖅᑕᐅᓂᖓᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ – ᐃᓚᖓ 1

ᓇᖕᒥᓂᖅ ᐃᖅᑲᐅᒪᓂᕐᒥ

ᕌᐳᑦᔅ ᐃᓚᒌᑦ ᓴᓪᓗᓂ: ᖃᐅᔨᓴᐅᑎᑎᑐᑦ ᖁᓛᓂ ᑕᓕᖅᐱᖕᒥ: ᐹᑦ, ᐱᐊᕆ, ᒪᐃᑯᓪ, ᓯᑏᕙᓐ ᐊᒻᒪ ᑕᐃᕕᑦ. (ᐊᔾᔨᓕᐅᖅᑕᐅᔪᖅ ᑭᓕᐊᕐ ᕋᐃᑦᒧᑦ)

By ᒪᐃᑯᓪ ᕌᐳᑦᔅ, ᑎᑎᕋᖅᑎᐅᔪᖅ

For an English version of this article, please read: The long journey to publish Nunatsiaq News – Part 1

1961 ᓄᙳᐊᓂ, ᐊᐅᓪᓚᓚᐅᖅᐳᒍᑦ ᐋᑐᕚᒥ ᓴᒡᓚᒃᒧᑦ (ᒫᓐᓇ ᓴᓪᓗᐃᑦ) ᐊᑖᑕᒐ, ᐊ. ᐱᐊᕆ ᕌᐳᑦᔅ, ᐱᔭᕇᖅᓯᓚᐅᖅᐳᖅ ᑕᖅᑭᓂ 6−ᓂ ᐱᓕᒻᒪᒃᓴᓂᐅᔪᒥ ᐅᑭᐅᖅᑕᖅᑐᒥ ᐊᓪᓚᕝᕕᓕᕆᓂᐅᓂᕐᒧᑦ. ᐃᖏᕐᕋᓂᐅᔪᖅ, Austin Airways DC-3−ᖏᓐᓇᒐᓚᒃᑯᑦ, ᐱᓇᓱᕈᓯᕐᓂ ᐱᖓᓱᓂᐅᑲᓴᓚᐅᖅᐳᖅ. ᓇᓗᓇᐃᖅᓯᔾᔪᑎᖃᓚᐅᕐᓇᑎᒃ ᖃᖓᑕᑎᓪᓗᒋᑦ, ᓯᓚ ᑐᑭᖃᓚᐅᖅᐳᖅ ᓄᖅᑲᖓᑐᐃᓐᓇᕐᓂᕐᓂ.

ᖃᖓᑕᓂᐅᔪᒥ ᐳᕙᖕᓂᖅᑐᒥ ᐃᕗᔾᔨᕕᖕᒧᑦ, ᐃᓄᒃ ᐊᕐᓇᖅ ᓴᓂᓕᓐᓂ ᐋᐳᒥ ᐅᕙᓐᓄᑦ ᐊᑐᐃᓐᓇᐅᑎᑦᑎᓚᐅᖅᐳᖅ. ᖃᐅᔨᒪᓚᐅᙱᓚᖓ ᑕᐃᔅᓱᒪᓂ, ᑭᓯᐊᓂ ᑐᓐᓂᖅᑯᑎᕐᔪᐊᖑᓂᖓᓂ. ᓄᑖᑦ ᓰᕐᓇᖅᑐᑦ ᐱᕈᖅᑐᕕᓃᑦ ᑕᑯᔭᐅᒐᔪᓚᐅᙱᓚᑦ ᒪᓕᒃᑐᓄᑦ ᐊᕐᕌᒍᓄᑦ ᐱᖓᓱᓄᑦ.

9-ᓂ ᐅᑭᐅᖃᓚᐅᖅᐳᖓ.

ᐊᑖᑕᒐ ᖁᕕᐊᓇᖅᑐᖅᓯᐅᑎᐅᓚᐅᖅᐳᖅ. ᒪᒃᑯᒃᖢᓂ ᑐᓴᒐᒃᓴᓕᐅᖅᑎᐅᓚᐅᖅᐳᖅ ᐃᖕᓚᓐᒥ Cannock Advertiser−ᑯᓐᓄᑦ ᒪᕐᕈᖓᓂ ᓄᓇᕐᔪᐊᒥ ᐅᓇᑕᕐᔪᐊᕐᓂᐅᔫᑉ ᑭᖑᓂᑦᑎᐊᖓᓂ. ᑕᑯᔭᕆᐅᓚᐅᖅᑎᓪᓗᒍ ᐊᓈᓇᓐᓂ ᓵᓚᖃᖅᑎᓪᓗᒋᑦ ᔫᐱᑉ ᐅᓪᓗᖓᓂ 1945−ᒥ ᑲᑎᑎᑕᐅᓚᐅᖅᐳᑦ, ᐅᕙᓐᓂ ᕿᑐᕐᙵᖅᑖᖅᖢᑎᒃ ᐊᒻᒪ ᐃᓱᒪᓕᐅᑲᐅᖅᑐᖅᖢᑎᒃ ᓅᓐᓂᖏᓐᓄᑦ ᑲᓇᑕᒧᑦ.

ᐃᖅᑲᓇᐃᔮᖅᑕᐅᓚᐅᖅᐳᖅ De Havilland−ᑯᓐᓂ. ᐊᖓᔪᖅᑳᖑᓪᓗᓂ ᐱᔭᕆᑐᔪᒥ ᑎᑎᕋᖅᑎᐅᓪᓗᓂ, ᓴᓇᓚᐅᖅᐳᖅ ᐊᐅᓚᑦᑎᓂᐅᔪᒥ ᒪᓕᒐᒃᓴᓂ Beaver ᐊᒻᒪ Otter ᖃᖓᑕᓲᕋᓛᓄᑦ. ᐊᓱᐃᓛᒃ ᑕᑯᓚᐅᖅᐳᖅ ᒪᓂᓴᕐᓂᐅᔪᒥ “ᐅᑭᐅᖅᑕᖅᑐᒥ ᐱᔨᑦᑎᕋᖅᑎᐅᔪᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.

ᑕᐃᒫᒃ, ᐃᓚᒌᑦ, ᓄᑲᒃᑲᓗ ᓯᑏᕙᓐ ᐊᒻᒪ ᑕᐃᕕᑦ, ᐅᑭᐅᖅᑕᖅᑐᒧᐊᓚᐅᖅᐳᑦ. ᐳᕙᖕᓂᖅᑐᒥ, ᑕᐃᑲᓃᓚᐅᖅᐳᒍᑦ ᐱᓇᓱᐊᕈᓯᓕᒫᒥ. ᐃᑲᔪᒃᑲᐅᔪᒥ ᐃᓕᓴᐃᔨᒥ, ᒥᒃ ᒫᓕᓐ, ᐸᕐᓇᐃᕙᓚᐅᖅᐳᖅ ᑎᑎᕋᖅᓯᒪᓂᐅᔪᓂ ᐃᓕᓐᓂᐊᒐᒃᓴᓂ ᐅᕙᓐᓄᑦ, ᖁᑦᑎᓛᖑᔪᒥ ᖁᑦᑎᖕᓂᓕᖕᒥ ᓴᓪᓗᓂᑦ ᑕᐃᔅᓱᒪᓂ ᖁᑦᑎᖕᓂᓕᒃ 2−ᖑᓚᐅᖅᐳᖅ.

ᐊ. ᐱᐊᕆ ᕌᐳᑦᔅ ᑭᐅᓚᐅᖅᐳᖅ ᐆᒥᖓ ᒪᓂᓴᐃᓂᐅᔪᒥ ᐱᑎᑦᑎᓚᐅᖅᑐᒥ ᓅᓐᓂᖓᓄᑦ ᓴᓪᓗᓄᑦ ᐃᓚᖏᓪᓗ. (ᒪᐃᑯᓪ ᕌᐳᑦᔅ ᐊᔾᔨᖁᑎᖓ)

ᓯᓂᒃᑕᖅᖢᑕ ᐃᕗᔾᔨᕕᖕᒥ, ᑕᕐᕋᔭᓚᐅᖅᐳᒍᑦ. ᑐᓄᐊᓂ ᐃᒃᓯᕚᓚᐅᖅᐳᒍᑦ ᐊᒻᒪ ᐃᓂᐅᔪᖅ ᐃᓐᓄᒃᐸᓪᓕᐊᑎᓪᓗᒍ, ᐃᒃᓯᕙᐅᑕᐃᑦ ᑐᓄᑎᑕᐅᓚᐅᖅᐳᑦ ᑕᕐᕆᔭᕐᕕᐅᔪᒥ ᐊᒻᒪ ᐅᕙᑦᑎᓐᓄᖔᖅᑕᐅᓪᓗᑎᒃ. ᐊᐱᕆᓚᐅᖅᐳᖓ ᐃᓄᖕᒥ ᓴᓂᓕᓐᓂ ᖃᓄᐃᒻᒪᑦ. ᑭᐅᓚᐅᖅᐳᖅ, “ᖃᐅᔨᒪᓚᐅᙱᓚᑦ ᖃᓪᓗᓈᑦ ᒥᑭᑦᑑᕙᖕᓂᖏᓐᓂ.”

ᐊᕐᕌᒍᓂ ᐱᖓᓱᓂ ᓴᓪᓗᓂᑦ ᐊᓯᐊᓂ ᐅᓂᒃᑳᖅᑐᐊᖑᕗᖅ. ᑭᓯᐊᓂ ᐱᖃᓐᓇᕆᔭᖃᐅᕐᔪᐊᓚᐅᖅᐳᖓ ᓲᕐᓗ ᓄᐊ ᖁᐱᖅᑯᐊᓗᒃ, ᐋᑕᒥ ᑲᓕᙳ, ᐊᒻᒪ ᐳᑐᓕᒃ ᐸᐱᖓᑑᓚᐅᖅᑐᖅ. ᓱᕈᓯᐅᓪᓗᖓ, ᖃᔅᓯᒐᓚᖕᓂ ᖁᕕᐊᓇᖅᑐᖅᓯᐊᖅᓯᒪᕗᖓ ᐃᒪᕐᒧᑦ ᑲᑕᖕᓂᕐᒥ ᐋᔪᕋᒃᑯᑦ ᐃᑳᕋᓱᐊᖅᖢᑕ ᑕᐅᓇᓂ ᑲᖏᖅᓱᖓᓂ ᐃᓄᑑᓪᓗᓂ ᐹᖅᓯᐅᓂᐅᔪᒥ ᓇᓄᕐᒥ. ᑳᓚᐅᙱᓚᖅ ᑕᐃᔅᓱᒪᓂ.

ᓴᓪᓗᓃᑎᓪᓗᑕ, ᐊᑖᑕᒐ ᑲᒪᒋᔭᖃᓚᐅᖅᐳᖅ ᓯᕗᓪᓕᖅᐸᐅᔪᒥ ᐊᖅᑯᒻᒥ ᐊᒻᒪᓇᑉᐸᖅᑎᕆᓂᕐᒥ ᓯᕗᓪᓕᖅᐸᐅᔪᓂ “ᑭᑉᐹᕆᒃᑐᑯᓗᖕᓂ” ᐃᒡᓗᓂᑦ.

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒍ ᓅᓚᐅᖅᓯᒪᕗᒍᑦ Fort Chimo−ᒧᑦ (ᒫᓐᓇ ᑰᔾᔪᐊᖅ) ᓅᓚᐅᖅᑳᕐᓇᑕ ᖃᓪᓗᓈᑦ ᓄᓇᖓᓐᓄᑦ ᐃᓕᓐᓂᐊᕆᐊᖅᖢᑕ. ᑕᐃᑲᓂ, ᐱᖃᓐᓇᕆᓛᕋ ᒫᒃ ᒍᐊᑕᐅᓚᐅᖅᐳᖅ, ᐃᓅᔪᓐᓃᓚᐅᖅᓯᒪᔪᒥ ᐅᑭᐅᖃᖅᖢᓂ 20−ᖏᓐᓂ ᐊᖓᔪᖅᑳᖑᓪᓗᓂ ᐋᔩᖃᑎᒋᔭᐅᔪᓂ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ. ᐱᖃᓐᓇᕆᔭᒃᑲ ᑯᓂᐊᒃ, ᒪᐃ, ᐅᐊᑦ ᐊᒻᒪ ᒍᐊᑕᒃᑯᓐᓂ ᐃᓚᒌᖑᔪᓂ ᓯᕗᓕᐅᖅᑎᙳᓚᐅᖅᐳᑦ: ᒪᐃᔭᐅᓪᓗᑎᒃ, ᐊᖓᔪᖅᑳᑦ, ᑲᓇᑕᒥ ᒪᓕᒐᓕᐊᕆᔭᐅᔪᓂ ᖃᐅᔨᓴᖅᑎᓄᑦ ᐊᒻᒪᓗᓐᓃᑦ ᑯᐃᑉ ᑭᒡᒐᖅᑐᖅᑎᖓᓂ ᑲᓇᑕᒥ.

ᕿᒪᒃᓯᓚᐅᖅᑎᓪᓗᖓ ᐅᑭᐅᖅᑕᖅᑐᒥ ᐊᒻᒪ ᐊᑦᑎᖅᑕᐅᓪᓗᖓ “ᓇᓄᕐᒥ” ᖁᑦᑎᒃᑐᒥ ᐃᓕᓐᓂᐊᕐᕕᖕᒥ, ᑐᙵᓇᙱᑦᑐᒥ. ᐱᓕᕆᓂᖃᓚᐅᖅᐳᖓ ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂ ᑭᖕᔅᑎᓐ, ᐋᓐᑎᐊᕆᐅᒥ. ᕿᒫᔪᒪᓚᐅᖅᐳᖓ ᐱᐅᙱᑦᑐᓂ 1970−ᖏᓐᓂ ᐃᓅᓯᕆᓚᐅᖅᑕᓐᓂ ᓂᕈᐊᕐᓂᑯᓐᓂ ᐊᒻᒪ ᐊᑖᑕᒐ ᐅᕙᓐᓂ ᐊᑐᐃᓐᓇᖃᖅᑎᑦᑎᓚᐅᖅᐳᖅ ᐃᖅᑲᓇᐃᔮᒃᓴᒥ ᐃᒪᐅᔪᓐᓇᖅᓯᑎᑕᐅᓂᕐᒥ ᓄᓇᒥ ᐱᓕᕆᔨᐅᔪᒧᑦ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ. ᐅᑎᕋᔭᖅᐳᖓ ᓴᓪᓗᓄᑦ ᐊᒻᒪ ᑰᔾᔪᐊᕐᒧᑦ.

ᓴᓪᓗᓂᑦ, ᓱᕈᓰᑦ ᒪᓕᒃᐸᓚᐅᖅᐳᑦ ᐊᖅᑯᑎᒃᑯᑦ, ᑕᐃᓯᓪᓗᑎᒃ “ᒥᑯᐊᓗᖕᒥ!” ᐊᑦᑎᖅᑕᐅᓚᐅᖅᑎᓪᓗᖓ ᐱᕈᕐᔪᐊᕐᓂᖃᓚᐅᖅᑎᓪᓗᖓ ᓯᕗᓂᐊᓂ ᐊᕐᕌᒎᔪᓂ.

ᐅᐸᒡᕕᒃᓴᖃᓚᐅᖅᐳᖓ ᓄᓇᓕᖕᓂ ᑲᑎᒪᔨᐅᔪᓂ ᑕᐃᑲᓂᑦᑕᐃᓐᓇᖅ ᐃᒡᓗᕐᔪᐊᒥ ᐊᑖᑕᒐ ᐊᖓᔪᖅᑳᖑᓂᖓᓂ ᐊᓪᓚᕝᕕᓕᕆᔨᐅᓂᕐᒥ. ᑲᑎᒪᔨᓗᒃᑖᑦ ᐃᑦᑐᐊᓚᐅᖅᐳᑦ ᐃᒐᓛᒃᑯᑦ ᑎᑭᓐᓇᒥ ᐊᑐᖅᑐᐊᒐᒥ ᓯᑭᑑᒥ. ᐊᐃᑦᑖᖑᒐᓗᐊᖅ, ᐳᐃᒍᕐᓂᕋᒪ ᖃᒥᑦᑕᕆᐊᒃᓴᖅ ᓂᐅᓚᐅᖅᑎᓪᓗᖓ ᑕᐃᒫᒃ ᐅᕙᓐᓂ ᖁᙱᐊᓚᐅᖅᐳᑦ ᐃᖏᕐᕋᔪᒥ ᒪᓕᒃᓴᖅᑎᓪᓗᒐ.

1978−ᒥ, ᐊᑖᑕᒐ ᓄᖅᑲᕈᒪᓕᓚᐅᖅᐳᖅ ᑳᓐᑐᕌᒋᔭᖓᓂ ᐱᓕᕆᐊᖓᓐᓂ, ᐊᒻᒪ ᓯᑏᕙᓐ ᐅᕙᖓᓗ ᐋᖅᑭᒃᓯᓚᐅᖅᐳᒍᑦ ᐱᓕᕆᓕᒪᙱᑦᑐᒥ ᑲᒻᐸᓂᐅᔪᒥ ᑕᐃᔭᐅᔪᒥ Nortext−ᒥ. ᑕᐃᕕᑦ ᕿᓚᒻᒥᐅᔪᒥ ᐃᓚᐅᖃᑕᐅᓕᓚᐅᖅᐳᖅ

ᑮᓇᐅᔭᖃᓚᐅᙱᓚᒍᑦ ᑭᓯᐊᓂ ᑳᓐᑐᕌᒃᑖᓚᐅᖅᐳᒍᑦ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᑎᑎᕋᕐᓂᕐᒧᑦ ᖃᓪᓗᓈᑎᑐᑦ/ᐃᓄᒃᑎᑐᑦ ᑐᓴᒐᒃᓴᓕᐊᓄᑦ ᑎᑎᕋᖅᓯᒪᓂᐅᔪᒥ ᑕᐃᔭᐅᔪᒥ “ᐃᒐᓛᕐᒥ” ᐱᓕᒻᒪᒃᓴᓂᕐᒧᑦ ᐊᒻᒪ ᐃᓕᓐᓂᐊᕐᓂᐅᔪᒥ.

ᖃᔅᓯᒐᓚᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᓕᒻᒪᒃᓴᔪᓄᑦ ᐱᓕᕆᑦᑎᐊᕐᓂᖅᐹᖑᔪᒥ ᕇᑕ ᓄᕙᓕᙵᐅᓚᐅᖅᐳᖅ, ᐋᖅᑭᒃᓱᐃᔨᙳᓚᐅᖅᑐᒥ. ᑲᔪᓯᓚᐅᕆᕗᖅ ᑲᒪᒋᔭᖃᕐᓂᕐᒥ ᑯᐊᐸᒃᑯᓐᓂ, ᑲᑎᕕᒃ ᐃᓕᓐᓂᐊᕐᕕᖕᒥ ᑲᑎᒪᔨᓄᑦ, ᐊᒻᒪ ᓂᕈᐊᖅᑕᐅᓚᐅᖅᐳᖅ ᑎᑎᕋᖅᑎᐅᓂᕐᒥ ᑮᓴᐅᔭᓕᕆᔨᐅᓂᕐᒥ ᒪᑭᕕᒃᑯᓐᓄᑦ. ᓂᕈᐊᕐᓂᐅᔪᒥ ᐅᓐᓄᖓᓂ, ᐅᖃᓘᑎᕋᓛᒃᑯᑦ ᑎᑎᕋᕐᕕᐅᓚᐅᖅᐳᖓ, “ᖃᓄᐃᓗᐊᙱᑦᑐᐊᓗᒃ ᐱᓕᒻᒪᒃᓴᐃᔨᒋᓚᐅᖅᑕᕐᓂ!”

Nortext−ᒥ, ᐊᑐᕆᐊᖅᓯᓚᐅᖅᐳᒍᑦ ᖃᕋᓴᐅᔭᓂᑦ, ᑎᑎᕋᕐᓂᕐᒥ IBM Selectric ᓇᕿᑦᑕᐅᑎᒥᒃ “ᐃᓄᒃᑎᑐᑦ ᐊᖅᓴᖃᖅᑐᒥ” ᐱᐅᓪᓚᕆᓚᐅᙱᓚᖅ. ᑲᑎᖅᓱᖅᓯᓚᐅᖅᐳᒍᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓪᓗᑎᒃ Compugraphic ᖃᕋᓴᐅᔭᑎᒍᑦ ᓇᕿᑦᑕᕐᓂᐅᔪᒧᑦ ᐱᓕᕆᕝᕕᓂᑦ ᐊᒻᒪ ᓱᖏᐅᔾᔨᓚᐅᖅᐳᒍᑦ ᐃᓄᒃᑎᑐᑦ ᑎᑎᕋᕈᓐᓇᐅᒻᒥ ᓴᓇᔭᐅᔪᒥ ᓄᓇᑦᓯᐊᕐᒥ ᒐᕙᒪᒃᑯᓐᓂ ᐱᔪᓐᓇᖅᑐᒥ ᖃᕋᓴᐅᔭᑎᒍᑦ ᓇᕿᑦᑕᕈᓐᓇᕐᓂᐅᔪᒥ ᐱᓕᕆᔾᔪᓯᐅᔪᒥ ᐊᓱᐃᓛᒃ ᐃᓄᒃᑎᑐᑦ.

ᖃᔅᓯᐊᕐᔪᖕᓂ ᐊᕐᕌᒍᓂ ᐊᓂᒍᖅᑎᓪᓗᒍ ᐱᕙᓪᓕᐊᑎᑦᑎᔪᒪᓕᓚᐅᖅᐳᒍᑦ ᓇᖕᒥᓂᑦᑎᓐᓂ ᑎᑎᕋᕈᓐᓇᐅᒻᒥ. ᐱᓕᕆᖃᑎᖃᓚᐅᖅᐳᒍᑦ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᐅᔪᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ. ᑎᑎᕋᐅᔭᓚᐅᖅᐳᒍᑦ ᑎᑎᖅᑲᖏᓐᓂ ᐃᓯᒐᓪᓗᐊᒥ ᑭᑉᐹᕆᖅᑐᓄᑦ ᕿᔪᖕᓂ ᐊᒻᒪ ᖃᕋᓴᐅᔭᒃᑰᖅᑎᑕᐅᑎᖦᖢᑎᒍᑦ ᐹᔅᑎᓐᒥ.

ᐅᑭᐅᖅᑕᖅᑐᒥ ᐊᐅᓪᓛᕐᓂᕐᒥ ᖁᕕᐊᓇᐃᓐᓇᐅᔭᖅᐳᖅ. ᐅᓇ Austin Airways DC-3 ᑲᑕᒃᖢᓂ-ᑐᕐᔪᐊᓚᐅᖅᐳᖅ ᓴᓪᓗᐃᑦ ᓯᑯᒥ ᒥᕝᕕᖓᓄᑦ, ᓯᖁᑦᑎᕆᓪᓗᓂ ᒥᔾᔪᑎᖏᓐᓂ ᐊᒻᒪ ᓱᕋᐃᓪᓗᓂ ᐸᐅᕋᐅᔭᒥᒃ. (ᐊᔾᔨᓕᐅᖅᑕᐅᔪᖅ A. ᐱᐊᕆ ᕌᐳᑦᔅ)

ᑕᐃᑲᓂ ᓴᓇᔭᐅᓂᖓᓂ ᐱᓕᕆᓂᐅᔪᒥ, ᐊᒥᓱᓂ ᐃᓱᒪᓕᐅᕆᓂᖃᓚᐅᖅᐳᒍᑦ. ᐊᑕᐅᓯᐅᔪᖅ ᐱᒻᒪᕆᐅᓛᖑᓚᐅᖅᐳᖅ ᓴᖅᑭᑎᑦᑎᓂᕐᒥ ᕿᑎᐊᓂ ᑐᑭᓕᐊᕐᓂᐅᔪᒥ ᐃᓄᒃᑎᑐᑦ ᑎᑎᕋᖅᓯᒪᓂᐅᔪᓂ, ᖃᓗᐃᔭᖅᐸᐃᓂ ᑎᑎᕋᖅᓯᒪᓂᐅᔪᒥ, ᐅᖃᓕᒫᕐᓂᖅ ᓱᒃᑲᓂᖅᓴᐅᑎᑦᑎᓂᕐᒧᑦ ᐊᒻᒪ ᐊᔪᕐᓇᙱᓐᓂᖅᓴᐅᓂᖓᓂ.

ᑎᑎᕋᕈᓐᓇᐅᑎᕗᑦ ᐊᓱᐃᓛᒃ ᓴᖑᑎᑕᐅᓚᐅᖅᐳᖅ ᓯᕗᓪᓕᖅᐸᐅᔪᒥ ᐃᓄᒃᑎᑐᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑎᑎᕋᕈᓐᓇᐅᒻᒥ, nunacom−ᒥ. ᐅᓇ ᐱᓕᕆᓂᐅᔪᖅ ᐊᔭᐅᕆᓯᒪᕗᖅ ᐃᓄᒃᑎᑐᑦ ᖃᓄᐃᑦᑑᓂᖓᓂ ᑎᑎᕋᕐᓂᐅᔪᒥ ᒫᓐᓇᒧᑦ ᑎᑭᖦᖢᒍ ᐃᓄᒃᑎᑐᒻᒥ, ᑯᕇ ᐊᒻᒪ ᐊᓯᖏᓐᓂ ᐃᓄᒃᑎᑑᖅᑐᓂ ᑎᑎᕋᕐᓂᕐᒧᑦ ᐱᓕᕆᔾᔪᓯᐅᔪᓄᑦ.

1983−ᒥ, ᐃᓚᐅᖃᑕᐅᓚᐅᖅᐳᖓ ᐃᓄᐃᑦ ᐅᑭᐅᖅᑕᖅᑐᕐᒥᐅᖃᑎᒌᑦ ᑲᑎᒪᔨᖏᓐᓂ ᑲᑎᒪᓂᐅᔪᒥ ᐃᖃᓗᖕᓂ. ᐅᖃᓗᒡᕕᐅᓚᐅᖅᐳᖓ ᑕᒑᖅ ᑰᓕᒥ. ᐅᖃᓚᐅᖅᐳᖅ, “ᐃᓄᖕᒥ ᑕᑯᔭᕆᐅᖁᔭᒋᑦ.” ᔮᓐ ᕼᐃᒃᔅ−ᖑᓚᐅᖅᐳᖅ, ᑎᒃᑯᐊᖅᑕᐅᓵᕐᓂᑰᓪᓗᓂ ᐊᖓᔪᖅᑳᖑᓂᖓᓄᑦ ᓄᓇᓯ ᑎᒥᖁᑕᐅᔪᓄᑦ. ᐅᓪᓗᕈᒻᒥᑕᓚᐅᖅᐳᒍᑦ ᕗᕉᐱᓴ ᐃᓐᒥ.

ᑎᑭᓴᐃᓚᐅᖅᐳᒍᑦ ᐅᓪᓗᕈᒻᒥᑕᕈᒪᔭᑦᑎᓐᓂ ᐊᒻᒪ ᐅᑕᖅᑭᓚᐅᖅᐳᒍᑦ ᐃᑲᕐᕋᑦ ᒪᕐᕈᑲᓴᖕᓂ ᐱᔨᑦᑎᕋᖅᑕᐅᓂᕐᒧᑦ. ᐅᖃᓪᓚᒐᓛᓚᐅᖅᖢᑕ ᐊᒻᒪ ᐅᖃᐅᓯᖃᖅᖢᑕ ᐱᓕᕆᐊᖃᕐᓂᕐᒧᑦ ᐸᕐᓇᐅᑎᓂᑦ, ᐅᖃᓪᓚᓕᓚᐅᖅᐳᒍᑦ ᓯᕗᓂᒃᓴᒥ. ᓄᓇᑖᕋᓱᐊᕐᓂᐅᔪᒥ ᕿᓚᒻᒥᐅᔪᒥ ᐊᑎᓕᐅᖅᑕᐅᓂᐊᓚᐅᖅᐳᖅ. ᐱᔭᕆᐊᖃᕐᓂᖃᓛᖅᐳᖅ ᐋᔩᖃᑎᒌᖕᓂᐅᔪᒥ. ᐃᓄᐃᑦ ᐱᓕᕆᖃᑕᐅᔭᕆᐊᖃᖅᐳᑦ.

ᐃᓱᒪᓕᐅᕆᓚᐅᖅᐳᒍᑦ ᑕᒪᒃᑭᒐᓚᖕᓂ ᐃᓄᖕᓂ−ᓇᖕᒥᓂᕆᔭᐅᔪᓂ ᑎᑎᕋᕐᓂᐅᔪᒥ ᑲᒻᐸᓂᐅᔪᒥ, ᑐᙵᕕᖃᖅᑐᒥ ᐃᖃᓗᖕᓂ ᐊᒻᒪ ᐱᔨᑦᑎᕋᖅᑐᒥ ᐅᑭᐅᖅᑕᖅᑐᒥ. ᐃᖅᑲᓇᐃᔭᖅᑎᑦᑎᓇᔭᖅᐳᖅ ᐊᒻᒪ ᐱᓕᒻᒪᒃᓴᐃᓗᓂ ᐃᓄᖕᓂ ᑎᑎᕋᕐᓂᐅᔪᒥ ᐊᒻᒪ ᐋᔩᖃᑎᒌᖕᓂᐅᔪᒥ.

ᑕᖅᑭᑦ 6 ᐊᓂᒍᖅᑎᓪᓗᒍ ᐋᖅᑭᒃᓯᓚᐅᖅᐳᒍᑦ Nunatext ᑎᑎᕋᕐᓂᐅᔪᒥ ᑎᒥᖁᑕᐅᔪᓂ, 51 ᐳᓴᓐᑎᒥ ᓇᖕᒥᓂᕆᔭᐅᓪᓗᓂ ᓄᓇᓯᒃᑯᓐᓂ ᐊᒻᒪ 49 ᐳᓴᓐᑎᒥ ᓴᖕᒥᓂᕆᔭᐅᓪᓗᓂ Nortext−ᑯᓐᓂ, ᓱᓕ ᓇᖕᒥᓂᕆᔭᐅᔪᒥ ᕌᐳᑦᔅ ᐃᓚᒌᖑᔪᓂ.

ᖃᔅᓯᐊᕐᔪᖕᓂ ᑕᖅᑭᓂ ᐊᓂᒍᖅᑎᓪᓗᒍ, ᐅᖃᓗᒡᕕᐅᓚᐅᖅᐳᖓ. ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓂᐅᕕᐊᒃᓴᐅᓕᕐᓂᖓᓂ.

(ᐅᓇ ᓯᕗᓪᓕᐅᕗᖅ ᒪᕐᕈᐃᓕᖓᔪᒥ−ᐃᓚᖃᖅᑐᒥ ᖃᔅᓯᐊᕐᔪᖕᓂ ᐊᑐᖅᑕᐅ>ᓚᐅᖅᑐᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᓇᓗᓇᐃᖅᓯᔪᒥᒃ 50−ᖓᓂ ᓇᓪᓕᐅᓐᓂᖅᓯᐅᕐᓂᖓᓂ 2023−ᒥ. ᑲᔪᓯᓂᐊᖅᑐᖅ ᐃᓚᖓᓂ 2−ᒥ.)

ᒪᐃᑯᓪ ᕌᐳᑦᔅ ᑎᑎᕋᖅᑎᐅᕗᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

Share This Story

(0) Comments