ᐊᑯᓂᐊᓗᒃ ᐃᖏᕐᕋᓂᐅᔪᒥ ᑎᑎᕋᖅᑕᐅᓂᖓᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ – ᐃᓚᖓ 2

For an English version of this article, please read: The long journey to publish Nunatsiaq News – Part 2.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓂᐅᕕᐊᒃᓴᐅᓚᐅᖅᐳᖅ 1985−ᒥ. ᒫᓂᑲ ᑳᓇᓕ, ᓇᖕᒥᓂᖃᖅᑎᐅᔪᖅ ᐊᒻᒪ ᑎᑎᕋᖅᑎᐅᔪᖅ, ᓅᑦᑐᒪᓕᓚᐅᖅᐳᖅ ᐃᖃᓗᖕᓂ. ᑲᑎᒪᖃᑎᖃᓚᐅᖅᐳᒍᑦ ᐱᖁᑎᒋᔭᐅᔪᓂ ᓂᐅᕕᖅᐸᒃᑐᒥ ᓂᐅᕕᐊᒃᓴᖃᖅᐸᒃᑐᒥᓪᓗ ᐊᓯᖏᓐᓄᑦ ᒪᓐᑐᕆᐋᓪᒥ ᐊᒻᒪ ᓂᕆᑎᑕᐅᓚᐅᖅᐳᒍᑦ ᐅᓪᓗᕈᒻᒥᑕᑦᑎᐊᕚᓗᖕᒥ ᐳᔫᖅᑎᓯᒪᔪᒥ ᐃᖃᓗᖕᒥ ᐊᒻᒪ ᐊᓕᒍᕐᒥ ᓵᑎᓇᐃᒥ. ᑎᒎᑎᖃᑎᒌᓚᐅᖅᐳᒍᑦ ᐱᓕᕆᖃᑎᒌᖕᓂᕐᒧᑦ.

ᐊᓱᐃᓛᒃ ᐱᓕᕆᓂᖃᓚᐅᖅᐳᒍᑦ ᓄᓇᓯ ᑎᒥᖁᑕᐅᔪᓂ, 51 ᐳᓴᓐᑎᒥ ᓇᖕᒥᓂᖃᖅᑎᙳᓚᐅᖅᑐᒥ. ᑲᑎᒪᔨᖏᑦ ᐊᖏᓚᐅᖅᐳᑦ ᐸᒡᕕᓵᕆᓚᐅᖅᓯᒪᔾᔮᙱᓐᓂᖏᓐᓂ ᐋᖅᑭᒃᓱᐃᔨᐅᔪᒥ ᐃᓱᒪᓕᐊᖑᔪᓂ. ᑎᑎᕋᓚᐅᖅᐳᒍᑦ ᑕᒪᒃᑭᐅᒪᔪᒥ−ᒪᒃᐱᒐᕐᒥ ᒪᓂᓴᐃᓂᐅᔪᒥ ᐊᖏᖅᓯᒪᓂᖃᖅᑐᒥ ᐃᓱᒪᓕᐊᖑᓂᐅᔪᒧᑦ.

ᖃᖓᑕᓲᒃᑯᑦ ᐃᖃᓗᖕᓄᐊᓚᐅᖅᐳᖓ ᖃᐅᔨᓂᕐᒧᑦ ᐊᐅᓚᑕᐅᓂᐅᔪᖅ ᐱᐅᖏᓐᓂᖅᓴᒐᓚᐅᓚᐅᖅᐳᖅ ᐅᓪᓗᕈᒻᒥᑕᓚᐅᖅᑕᑦᑎᓐᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐃᒡᓗᖃᓚᐅᖅᐳᖅ ᓄᑕᐅᙱᑦᑐᒥ “ᑭᑉᐹᕆᒃᑐᑯᓗᖕᒥ” ᐃᒡᓗᒥ, 512 ᑭᑉᐹᕆᒃᑐᓂ ᐃᓯᒐᓪᓗᐊᓂ. ᓇᑉᐸᖓᓂ ᑎᑎᕋᕐᕕᖕᒥ ᑕᑕᓚᐅᖅᐳᖅ Gestetner ᑎᑎᕋᕈᑕᐅᔪᒥ, ᐊᓂᐊᑎᑦᑎᓚᐅᖅᑐᒥ ᒪᒪᙱᑦᑐᒥ ᐳᔪᕐᓗᖕᓂ ᑎᑎᕋᐅᑎᖓᓄᑦ ᐊᒻᒪ ᐅᖅᓱᒃᓴᒥ. ᐃᓂᐅᔪᒥ ᐅᖅᑰᓴᐅᑎᒥ ᐃᓚᒋᐊᖅᓯᓚᐅᖅᐳᖅ ᖃᓄᐃᓐᓂᖓᓂ. ᐊᓂᕐᓂᒃᓴᖓ ᑐᖑᔪᓚᐅᖅᐳᖅ ᓯᒡᒐᓕᐊᑉ ᐳᔪᖓᓂ. ᑎᕆᖅᑯᐊᓂ ᖁᕐᕕᒃ ᐊᓂᑕᐅᔭᕆᐊᖃᖅᐸᒃᑐᓂ ᒪᑐᓯᒪᓐᓇᔪᒃᖢᓂ ᐅᕕᓂᖕᓂᐊᕈᒻᒥ ᑕᓗᖓᓂ.

ᐹᓚᐳᖅᐸᒃᑲ ᔨᒻ ᐱᐅᓪ ᐊᒻᒪ ᐱᐅᓪ ᒪᑳᖕᑭ. ᑕᒪᒃᑭᑦ ᐃᖅᑲᓇᐃᔭᓚᐅᖅᐳᑦ ᑐᓴᒐᒃᓴᓕᕆᔨᒃᑯᓐᓄᑦ ᐊᕐᕌᒍᑦ 40−ᑲᓴᖕᓂ. ᐋᖅᑭᒃᓱᓚᐅᖅᐸᕋ ᑕᐅᑐᙳᐊᖅᑕᓐᓂ ᓯᕗᓂᒃᓴᒧᑦ. ᑲᒪᓂᖃᓚᐅᙱᓚᑦ. ᐊᒥᓱᓂ ᐊᕐᕌᒍᓂ ᖄᖏᖅᑐᓂ, ᐃᓕᑦᑎᓚᐅᖅᐳᖓ ᐊᑦᑎᖅᓯᓚᐅᕐᓂᖏᓐᓂ ᓄᑖᖑᔪᓂ ᓇᖕᒥᓂᖃᖅᑎᐅᔪᓂ Star Wars ᐃᓄᙳᐊᖏᓐᓂ. ᓘᒃ ᔅᑲᐃᐅᐊᑰᑎᑕᐅᓚᐅᖅᐳᖓ, ᐃᓱᒪᓕᐊᕆᕐᔪᐊᖅᓯᒪᔭᓐᓄᑦ. ᐅᖃᓘᑎᓄᑦ ᐱᓕᕆᔾᔪᓯᖃᓕᑕᐃᓐᓇᕋᑦᑕ, ᐱᐅᓪ ᓅᑎᑦᑎᕙᓚᐅᖅᐳᖅ ᐅᖃᓗᒡᕕᒋᔭᓐᓄᑦ ᔨᒻᒧᑦ ᐆᒥᖓ, “ᓘᒃ ᐅᖃᓗᒃᑐᖅ ᓇᐃᓴᐅᑎᓕᖕᒥ 1-ᒥ.”

ᓄᓇᓕᖕᓂ ᐃᖃᓗᖕᓂ ᑐᓴᒐᒃᓴᓕᕆᔪᑦ ᐅᖃᓕᒫᒐᕐᒥ ᑎᑎᕋᐃᕙᓚᐅᖅᐳᑦ 800−ᓂ ᐊᔾᔨᖏᓐᓂ ᐱᓇᓱᐊᕈᓯᑕᒫᒥ ᓇᕿᑦᑕᖅᑕᐅᓯᒪᔪᓂ ᖃᓪᓗᓈᑎᑐᑦ ᐊᒻᒪ ᐊᒡᒐᒧᑦ ᑎᑎᕋᖅᓯᒪᔪᓂ ᐃᓄᒃᑎᑐᑦ ᓇᐃᓐᓂᖅᓴᐅᔪᓂ ᐸᐃᑉᐹᓂ.

ᑮᓇᐅᔭᖃᖅᑎᑕᐅᓪᓗᑎᒃ ᑐᓂᕐᕈᑎᓂ ᐊᒻᒪ ᐊᑐᖅᑐᐊᒐᕐᓂ, ᓅᑎᕆᓚᐅᖅᐳᒍᑦ ᖃᕋᓴᐅᔭᑎᒍᑦ ᓇᕿᑦᑕᕐᓂᐅᔪᒧᑦ ᐱᓕᕆᔾᔪᑎᓂ ᐃᖃᓗᖕᓄᑦ ᐊᒻᒪ ᐃᒡᓗᖃᖅᑎᖦᖢᑎᒍᑦ ᐃᓘᒧᑦ ᑲᓕᒐᒃᓴᐅᔪᒥ, ᐅᐊᔭᑯᑖᖕᒥ ᑲᑉᐳᕝᕕᖕᒥ ᑎᑎᕋᕐᕕᕋᓛᑦᑎᓐᓂ. ᖃᓄᐃᓚᐅᙱᓚᖅ ᑭᓯᐊᓂ ᐅᐱᕐᙶᖑᕐᒪᑦ, ᐊᐅᒃᐸᓪᓕᐊᔪᖅ ᐊᐳᑎ ᐃᒡᓘᑉ ᖄᖓᓂ ᐃᒻᒪᒃᑎᑦᑎᒐᒥ ᐃᒡᓗᒥ ᑲᓕᒐᒃᓴᐅᔪᒥ ᐊᒻᒪ ᐱᓕᕆᔾᔪᑎᓂ.

ᓴᖑᑎᓚᐅᖅᐸᕗᑦ ᑐᓴᒐᒃᓴᓕᕆᕝᕕᖕᒥ ᒪᒃᐱᒐᖃᖅᑐᒥ ᓇᑉᐸᓪᓗᐊᖓᓂ ᐊᖏᓂᐅᔪᒥ ᖃᕋᓴᐅᔭᑎᒍᑦ ᓇᕿᑦᑕᕐᓂᐅᔪᒧᑦ ᖃᓪᓗᓈᑎᑐᑦ ᐊᒻᒪ ᐃᓄᒃᑎᑐᑦ, ᐊᒻᒪ ᑎᑎᕋᖅᐸᓪᓕᐊᖃᑦᑕᓕᓚᐅᖅᐳᒍᑦ ᐅᖃᓕᒫᒐᒃᓴᒥ ᖃᓪᓗᓈᑦ ᓄᓇᖓᓐᓂ. ᕘᔅᑎᐊ ᖃᖓᑕᑎᑦᑎᓕᓚᐅᖅᐳᑦ ᐊᒻᒪ ᖃᖓᑦᑕᐅᑎᓂ, ᕿᓚᒻᒥᐅᔪᒥ, ᑲᑕᓚᐅᖅᐳᖅ $99−ᒧᑦ ᐊᑕᐅᓯᕐᒧᑦ ᑎᑭᐅᑎᓂᖓᓄᑦ. ᐊᒥᓱᐃᖅᓱᖅᖢᓂ ᖃᖓᑕᓲᑦ ᐅᑕᖅᑭᑎᑕᐅᕙᓚᐅᖅᐳᑦ ᒥᕝᕕᖕᒥ, ᐅᑕᖅᑭᔪᓂ ᑐᓴᒐᒃᓴᐅᔪᒥ ᑎᑎᕋᐅᔭᒐᖏᓐᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓅᑉᐳᑦ ᒫᓐᓇᒨᓕᖓᔪᓄᑦ ᑎᑎᕋᕐᕕᖓᓐᓄᑦ ᐃᖃᓗᖕᓂ, ᖃᕋᓴᐅᔭᑎᒍᑦ ᓇᕿᑦᑕᕐᓂᐅᔪᒧᑦ ᐱᓕᕆᔾᔪᑎᓂ ᐊᒻᒪ ᑎᑎᕋᐅᔭᕐᓂᕐᒧᑦ ᑭᐳᒥ ᓴᖅᑭᑎᑦᑎᓂᕐᒧᑦ ᑐᓴᒐᒃᓴᓕᕆᓂᐅᑉ ᑎᑎᕋᐅᔭᒐᖏᓐᓂ. (ᐊᔾᔨᓕᐅᖅᑕᐅᔪᖅ ᓯᑏᕙᓐ ᕌᐳᑦᔅᒧᑦ)

ᕿᓚᒻᒥᐅᔪᒥ ᓯᕗᓪᓕᖅᐹᒥ ᑐᐊᕕᕐᓇᖅᑐᖃᓚᐅᖅᐳᒍᑦ. ᑐᙵᕕᒃᑯᑦ ᕿᒪᐃᓚᐅᖅᐳᑦ ᓄᓇᑖᕋᓱᐊᕐᓂᐅᔪᒥ ᐋᔩᖃᑎᒌᖕᓂᐅᔪᒥ ᒐᕙᒪᑐᖃᒃᑯᑦ ᐋᔩᖃᑎᖃᕈᒪᓚᐅᙱᒻᒪᑕ ᐅᑭᐅᖅᑕᖅᑐᒥ ᐊᕕᒃᓯᒪᓂᐅᔪᒥ ᓄᓇᕗᒻᒥ. ᓄᓇᓯ ᐃᑲᔪᖅᓯᖅᑕᐅᓚᐅᖅᐳᑦ ᓯᕗᓂᒃᓴᒥ ᓄᓇᑖᕋᓱᐊᕐᓂᐅᔪᓂ ᑮᓇᐅᔭᓂᑦ. ᐅᖃᐅᔾᔪᖅᑕᐅᓚᐅᖅᐳᑦ ᓄᖅᑲᖅᑎᑦᑎᓂᕐᒥ ᐱᔪᓐᓇᕐᓂᕆᔭᐅᔪᓂ ᑕᒪᒃᑭᓂ ᐱᒋᐊᕈᑎᒃᓴᐅᔪᓂ. ᓂᐅᕕᒃᑲᓐᓂᓚᐅᖅᐸᕗᑦ ᓇᖕᒥᓂᖃᖃᑕᐅᔪᓂ, ᐃᖅᑲᓇᐃᔭᖅᑎᓂ ᓄᖅᑲᖅᑎᑦᑎᓪᓗᑕ, ᐊᒻᒪ ᒥᒃᖠᒋᐊᖅᑎᑦᑎᓪᓗᑕ ᐸᕐᓇᐅᑎᓂ.

ᐅᓇ ᑭᖑᓪᓕᖅᐹᖑᓂᐊᓚᐅᙱᓚᖅ ᑮᓇᐅᔭᓕᕆᓂᕐᒧᑦ ᑐᐊᕕᕐᓇᕐᓂᐅᔪᒥ. ᒪᓕᓚᐅᖅᐳᑦ ᓱᖏᐅᓐᓇᖅᑐᒥ ᐊᑐᕐᓂᐅᔪᒥ ᐊᑭᓕᒐᒃᓴᐅᔪᓂ ᒥᒃᖠᒋᐊᖅᑎᑦᑎᓂᕐᒥ, ᐊᑐᖅᑐᐊᕐᓂᐅᔪᓂ ᓇᖕᒥᓂᖃᖃᑕᐅᔪᓂ, ᐊᒻᒪ ᓱᓕᓂᕋᐃᓂᐅᔪᒥ ᓇᖕᒥᓂᖅ ᐱᖁᑎᒋᔭᐅᔪᓂ ᐱᔪᓐᓇᖅᑎᑦᑎᓂᕐᒧᑦ ᑲᒻᐸᓂᐅᔪᒥ ᐆᒪᔪᓐᓇᕐᓂᖓᓄᑦ. ᑎᑎᕋᐃᕙᖕᓂᖅ ᑐᓴᒐᒃᓴᓂ ᐱᓇᓱᐊᖑᓪᓗᐊᙱᓚᑦ ᓴᙲᑦᑐᒥ ᐆᒻᒪᑎᖃᖅᑐᒥ.

ᓅᓚᐅᖅᐳᒍᑦ ᐊᖏᔪᓄᑦ ᒫᓐᓇᒨᓕᖓᔪᓄᑦ ᑎᑎᕋᕐᕕᑦᑎᓐᓄᑦ ᓵᙵᔪᒥ ᑲᖏᖅᓱᐊᓂ ᑕᐃᔅᓱᒪᓂ ᑕᐃᔭᐅᕙᓚᐅᖅᑐᒥ ᕈᐊᐃᔪᓪ ᐹᖕᒃ ᐃᒡᓗᖁᑎᖓᓐᓄᑦ. ᑖᖅᑐᒥ ᐃᒡᓗᕈᓯᖃᓚᐅᖅᐳᒍᑦ ᐊᔾᔨᖁᑎᓕᐅᕐᕕᖕᒥ, ᐱᓕᕆᔾᔪᑎᓂ, ᐅᖃᓘᑎᓂ, ᓱᒃᑲᔪᒃᑰᕈᑎᒥ ᐊᒻᒪ ᑕᒪᒃᑭᓂ ᒫᓐᓇᓕᓴᐅᔪᓄᑦ ᐃᓗᐊᕈᑕᐅᔪᓄᑦ.

1988−ᒥ, ᓄᑲᕋ ᓯᑏᕙᓐ ᐊᒻᒪ ᓄᓕᐊᖓ ᕋᐴᑕ, ᓅᓚᐅᖅᐳᑦ ᐃᖃᓗᖕᓄᑦ. ᐱᓕᕆᓕᓚᐅᖅᐳᖅ ᐱᓕᕆᐊᖑᔪᒥ ᑎᑎᕋᖅᑎᐅᓂᐅᔪᒥ ᐊᒻᒪ ᑲᒪᒋᔭᖃᖅᖢᓂ ᐃᖅᑲᓇᐃᔭᖅᑎᐅᔪᓂ ᑎᑭᐅᑎᓚᐅᖅᑐᒥ 17−ᓄᑦ: ᐋᖅᑭᒃᓱᐃᔨᐅᔪᑦ, ᒪᓂᓴᐃᓂᕐᒧᑦ ᓂᐅᕕᐊᒃᓴᖃᕐᓂᕐᒧᑦ, ᑐᓴᒐᒃᓴᓕᕆᔨᐅᔪᓂ, ᐃᓄᒃᑎᑑᓕᕆᔨᐅᔪᓂ, ᖃᕋᓴᐅᔭᑎᒍᑦ ᑎᑎᕋᕈᓐᓇᐅᑎᓕᕆᔩᑦ ᐊᒻᒪ ᓴᖅᑭᑎᑦᑎᔨᐅᔪᓂ ᐱᓕᕆᔨᐅᔪᓂ. ᐃᓚᒌᓪᓗ ᓄᓇᖃᓚᐅᖅᐳᖅ ᐃᖃᓗᖕᓂ ᐊᕐᕌᒍᓄᑦ 14−ᓄᑦ.

ᑕᐃᒃᑯᐊ ᐊᕐᕌᒎᔪᑦ ᐃᓚᖃᖅᑐᒥ ᖃᔅᓯᒐᓚᖕᓂ ᑎᑭᐅᑎᕐᔪᐊᕐᓂᐅᔪᓐᓇᓚᐅᖅᑐᓂ ᖃᓄᐃᓐᐅᓂᔪᓂ. ᓯᑏᕙᓐ ᓇᓂᓯᔨᐅᓚᐅᖅᐳᖅ ᕿᑭᖅᑖᓗᖕᒥ (ᒫᓐᓇ ᓄᓇᕗᑦ) ᐱᓕᕆᐊᖑᔪᓄᑦ ᑕᑯᒃᓴᐅᑎᑦᑎᓂᐅᔪᒥ, ᐃᓚᒋᔭᐅᓪᓗᓂ ᐃᖃᓗᐃᑦ ᐊᖓᒧᖅᑳᖃᕐᕕᐅᓂᖓᓄᑦ ᑲᑎᒪᒡᕋᓛᖑᔪᓂ, ᐊᒻᒪ ᑎᑎᕋᖅᑎᐅᓪᓗᓂ ᐊᓯᐊᒎᖅᑐᓂ ᑎᑎᕋᖅᑕᐅᓂᐅᔪᒥ ᓇᓗᓇᐃᖅᓯᓂᕐᒧᑦ ᓄᓇᕗᑖᕐᓂᕐᒧᑦ. ᕋᐴᑕ ᐃᓱᒪᑐᓂᐅᔪᒥ ᐱᓕᕆᓂᖃᓚᐅᖅᐳᖅ ᐃᓕᓐᓂᐊᕐᓂᓕᕆᓂᕐᒥ ᑎᑎᕋᖃᑦᑕᕐᓂᐅᔪᒥ.

ᑎᑎᕋᐃᓚᐅᖅᐳᒍᑦ ᐅᑭᐅᖅᑕᖅᑑᑉ ᑭᒡᓕᙳᐊᖓᓂ ᐅᖃᓕᒫᒐᖓᓐᓂ, ᓴᖅᑭᑎᑦᑎᓪᓗᑕ ᓄᓇᕗᒻᒥ ᐊᑐᑎᒐᐅᔪᒥ, ᐊᖏᒡᓕᒋᐊᖅᓯᓪᓗᑕ ᐃᓕᓐᓂᐊᕐᓂᐅᔪᒥ ᑎᑎᕋᕐᓂᐅᔪᒥ ᑲᓇᑕᓕᒫᒥ, ᐊᒻᒪ ᐋᖅᑭᒃᓯᓚᐅᖅᐳᒍᑦ ᐊᔮᔮ ᐋᔩᖃᑎᒌᖕᓂᐅᔪᒥ ᐊᒻᒪ ᓂᐅᕕᐊᒃᓴᖃᕆᐊᖅᑐᖅᑐᓂ ᐃᓄᖕᓂ ᓇᖕᒥᓂᖃᖃᑕᐅᔪᓂ 2002−ᒥ.

ᐋᑐᕚᒥ, ᓄᑲᖅᖠᖅᐹᖑᔪᒥ ᓄᑲᓐᓂ ᑕᐃᕕᑦ ᑲᑎᑎᑕᐅᓚᐅᖅᐳᖅ ᕕᐅᕋ ᐸᓇᒃᑕᐅᓚᐅᖅᓯᒪᔪᒥ, ᐃᖃᓗᒃᑑᑦᑎᐊᕐᒥᐅᑕᖅ. ᒪᕐᕉᖕᓂ ᐃᕐᓂᖃᓚᐅᖅᐳᑦ, ᔭᐃᓴᓐ ᐊᒻᒪ ᑯᕆᔅ, ᑕᒪᒃᑭᑦ ᐊᔮᔮᒥ ᓇᖕᒥᓂᖃᖃᑕᐅᔪᓂ. ᔭᐃᓴᓐ ᓅᓚᐅᖅᐳᖅ ᐃᖃᓗᖕᓄᑦ ᐊᔮᔮ ᓴᖅᑭᑎᑕᐅᓚᐅᖅᑎᓪᓗᒍ ᐊᒻᒪ ᑕᐃᑲᓂ ᐃᖅᑲᓇᐃᔭᓚᐅᖅᐳᖅ ᐊᕐᕌᒍᓄᑦ 12−ᓄᑦ. ᓯᑏᕙᓐ ᐃᕐᓂᖓ, ᑕᐃᓗᕐ ᕌᐳᑦᔅ, ᒫᓐᓇ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᒪᓂᓴᐃᓂᐅᔪᒥ ᓂᐅᕕᐊᒃᓴᖃᕐᓂᕐᒥ ᐊᐅᓚᑦᑎᔨᐅᕗᖅ. ᐸᓂᒐ, ᔫᓕᐊ, ᐃᖅᑲᓇᐃᔭᖅᐳᖅ ᑲᓐᐸᓂᐅᔪᓄᑦ ᐃᖃᓗᖕᓂ ᒫᓐᓇᐅᔪᒥ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓱᒃᑲᐃᑦᑐᒥ ᐊᖏᒡᓕᒋᐊᖅᓯᓚᐅᖅᐳᖅ ᓇᒧᙵᖅᑕᐅᕙᖕᓂᖓᓂ ᐊᒻᒪ ᐋᖅᑭᒃᑐᓱᐃᔨᐅᔪᒥ ᑎᑎᕋᕐᓂᕆᔭᖓᓐᓂ, ᓯᕗᓪᓕᕐᒥ ᐊᓯᖏᓐᓄᑦ ᕿᑭᖅᑖᓗᖕᒥ ᓄᓇᓕᐅᔪᓄᑦ, ᐊᓱᐃᓛᒃ ᑭᕙᓪᓕᕐᒧᑦ ᐊᒻᒪ ᕿᑎᕐᒥᐅᓄᑦ ᐊᕕᒃᓯᒪᓂᐅᔪᓄᑦ, ᐊᒻᒪ ᐊᓱᐃᓛᒃ ᓄᓇᕕᖕᒧᑦ.

ᑐᓴᒐᒃᓴᓕᕆᓂᕐᒧᑦ ᑎᑎᕋᕐᓂᐅᔪᒥ ᐱᐅᓯᒋᐊᓚᐅᖅᐳᖅ, ᐱᓗᐊᖅᑐᒥ ᐱᓕᕆᓂᐅᔪᓄᑦ ᔨᒻ ᐱᐅᓪᒧᑦ, ᑭᓯᐊᓂᑦᑕᐅᖅ ᖃᔅᓯᒐᓚᖕᓂ ᐊᓯᖏᓐᓂ ᐋᖅᑭᒃᓱᐃᔨᐅᔪᓂ ᐃᓚᖃᖅᑐᒥ ᑲᓕ ᑰᕕᓐ, ᒫᑎᐅ ᔅᐸᓐᔅ, ᑖᑦ ᕕᖠᑉᔅ ᐊᒻᒪ ᒍᕋᒡ ᑰᓪᒥᓐ. ᒫᓐᓇᓕᓴᕐᓂᐅᓂᖅᓴᒥ ᐊᕐᕌᒎᔪᓂ, ᑭᓯᐊᓂ ᐃᓅᔪᓐᓃᕋᒥ 2021−ᒥ, ᔨᒻ ᐱᓕᕆᓚᐅᖅᐳᖅ ᐃᑲᔪᖅᓱᐃᓪᓗᓂ ᐋᖅᑭᒃᓱᐃᔨᐅᓪᓗᓂ ᓖᓴ ᒋᕈᕆᒍᐊᒥ, ᐹᑐᕆᓯᐊ ᓚᐃᑦᕗᑦ ᐊᒻᒪ ᑯᐊᕆ ᓚᕌᒃᒥ.

ᐊᒥᓱᓂ ᐊᔪᙱᑦᑐᐊᓗᖕᓂ ᑐᓴᒐᒃᓴᓕᕆᔨᖃᓚᐅᖅᐳᒍᑦ, ᓲᕐᓗ ᓯᐊᕋ ᕌᑦᔪᔅ, ᔭᐃᓐ ᔪᐊᔾ ᐊᒻᒪ ᐊᒥᓱᒃᑲᓐᓂᐊᓗᖕᓂ. ᐊᒥᓱᓂ ᒪᒃᑯᒃᑐᓂ ᑐᓴᒐᒃᓴᓕᕆᔨᐅᔪᓂ ᑎᑎᕋᖅᑎᓂ ᓇᓗᓇᐃᖅᓯᓯᒪᕗᑦ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ. ᐊᖅᓵᖅᑕᐅᒐᔪᓚᐅᖅᐳᑦ ᒐᕙᒪᐅᔪᓂ, ᐅᐸᒃᑎᑕᐅᓪᓗᑎᒃ ᖁᑦᑎᖕᓂᖅᓴᐅᔪᒥ ᑮᓇᐅᔾᔭᒃᓴᓂᐅᔪᓂ ᐊᒻᒪ ᐃᑦᑐᖅᓯᐅᑎᓂ/ᓂᖏᐅᖅᓯᐅᑎᓂ ᓄᖅᑲᕈᑎᒃᓴᐅᔪᓄᑦ. ᐊᑕᐊᓯᐊᖅᑐᒥ, ᑎᑎᕋᕈᒪᓚᐅᖅᐳᖓ “CBCᕝᑯᓐᓄᑦ ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᕝᕕᖓᓂ” ᓇᓗᓇᐃᒃᑯᑕᐅᔪᒥ ᑎᑎᕋᕐᕕᑦᑕ ᓯᓚᑖᓂ.

ᐱᓕᕆᓂᖃᕐᔪᐊᖅᓯᒪᕗᒍᑦ ᓴᙱᔪᒥ ᐊᑐᕐᓂᐅᔪᒥ ᑎᑎᕋᐃᓂᕐᒥ ᐃᓄᒃᑎᑐᑦ, ᐊᒥᓱᓂ ᐊᔪᙱᕐᔪᐊᖅᑐᓂ ᑐᑭᓕᐅᕆᔨᐅᔪᓂ ᐊᒻᒪ ᐃᓄᒃᑎᑐᑦ ᖃᐅᔨᒪᕐᔪᐊᖅᑐᓂ, ᓲᕐᓗ ᐊᑯᓂᐅᔪᒥ ᑐᑭᓕᐅᕆᔨᐅᔪᒥ ᐸᐃᓱᓪ ᑭᑉᓚᑰᑦ, ᐊᒻᒪ ᐃᓄᒃᑎᑐᑦ ᐋᖅᑭᒃᓱᐃᔨᐅᔪᓂ ᕇᐱᑲ ᐊᕙ, ᐊᐃᑏ ᐋᑲᕚᒃ ᐊᒻᒪ ᑭᓕᐊᕋ ᑰᓕᑦ.

ᐊᒻᒪ ᑲᒪᓇᖅᑐᓂ ᑐᓴᒐᒃᓴᓂ ᑎᑎᕋᖅᑎᖃᖅᓯᒪᕗᒍᑦ, ᓲᕐᓗ ᔮᓐ ᐊᒪᕈᐊᓕᒃ (ᑎᕆᖅᑯᑯᓗᒐ ᑲᓇᑕᒥ), ᑭᐊᓐ ᕼᐋᐳᕐ (ᑕᐃᔅᓱᒪᓂ), ᐊᒻᒪ ᕋᐃᑦᔪᓪ ᕿᑦᓱᐊᓕᒃ-ᑎᓐᔅᓕ. ᐊᒻᒪ ᓲᖃᐃᒻᒪ, ᓯᕗᓪᓕᖅᐸᐅᔪᒥ ᐃᓅᓪᓗᓂ ᑎᑎᕋᐅᔭᖅᑎᐅᓪᓗᓂ ᐊᕐᓗᒃᑐᒃ ᐊᐃᐱᓕ, ᐊᒻᒪ ᐊᐃᓚ ᕿᓪᓚᖅ ᒪᓕᒃᑐᒥ ᑐᒥᖏᓐᓂ ᐅᓪᓗᒥᐅᔪᒥ.

ᔨᒻ ᐃᓕᑦᑎᓚᐅᖅᐳᖅ HTML−ᒥ — ᐱᓕᕆᔾᔪᑕᐅᔪᒥ ᐅᖃᐅᓯᕐᒥ ᐊᐅᓚᑦᑎᕙᒃᑐᒥ ᐃᑭᐊᖅᑭᕕᖕᓂ — ᓴᖕᒥᓂᖅ ᐊᒻᒪ ᐱᒋᐊᖅᑎᑦᑎᓚᐅᖅᐳᖅ ᓯᕗᓪᓕᖅᐹᑦᑎᓐᓂ ᐃᑭᐊᖅᑭᕕᑦᑎᓐᓂ 1993−ᒥ. ᐅᓪᓗᒥ, ᓵᓚᖃᕋᓱᐊᕐᓂᐅᔪᒥ ᓵᓚᖃᖅᑎᐅᕗᖅ ᐃᑭᐊᖅᑭᕕᐅᓪᓗᓂ ᑕᑖᖅᑐᒥ ᐱᓕᕆᑦᑎᐊᖅᓯᒪᕐᔪᐊᖅᑐᓂ ᑐᓴᒐᒃᓴᓕᐊᖑᔪᓂ ᑎᑎᕋᕐᓂᐅᔪᓂ ᓵᓚᖃᒐᔪᒃᑐᓂ ᖁᕕᐊᓱᒍᑕᐅᔪᓂ. ᕿᑎᐊᓂ ᒪᕐᕉᖕᓂ ᐊᒻᒪ ᐱᖓᓱᓂ ᐱᓕᐊᓐᓂ ᐃᓄᖕᓂ ᐳᓚᕋᖃᑦᑕᖅᐳᑦ ᐃᑭᐊᖅᑭᕕᑦᑎᓐᓂ ᐊᕐᕌᒍᑕᒫᑦ.

ᐊᕐᕌᒍᒐᓴᓂ, ᓄᓇᓕᐅᔪᖅ ᓱᒃᑲᐃᑦᑐᒥ ᓱᖏᐅᑎᓚᐅᖅᐳᑦ ᐊᑐᕐᓂᑦᑎᓐᓂ. ᐱᓪᓚᕆᐅᔪᒥ ᐊᑭᑦᑐᕋᐅᑎᓂᖃᙱᓐᓂᕐᒥ, ᐊᑭᑦᑐᕋᐅᑎᓕᓚᐅᖅᐳᒍᑦ ᐃᓱᒪᒋᔭᑦᑎᓐᓂ. ᓯᕗᓕᐅᖅᑎᐅᔪᓂ ᑲᒪᒋᔭᖃᖅᑎᓚᐅᖅᐸᕗᑦ. ᒥᓂᔅᑕᐃᑦ ᐊᒻᒪ ᓯᕗᓕᐅᖅᑏᑦ ᓄᖅᑲᖅᓯᒪᓕᖅᐳᑦ. ᑐᒃᓯᕋᕐᕕᐅᓯᒪᕗᒍᑦ ᖃᖓᑕᓲᒃᑰᖅᑎᑦᑎᓂᕐᒥ ᑐᓴᒐᒃᓴᓕᕆᔨᐅᔪᓂ ᓄᓇᓕᖕᓂ ᐱᔾᔪᑎᖃᖅᑐᒥ ᑲᑉᐱᐊᓵᕆᓂᐅᔪᓂ ᐋᓐᓂᖅᓯᕆᓂᐊᕐᓂᕋᐃᓪᓗᑎᒃ. ᒪᓕᒐᑎᒍᑦ ᑎᑎᖅᑲᓂ ᐊᐅᓪᓚᖅᑎᑦᑎᒐᔪᓚᐅᖅᐳᑦ. ᒐᕙᒪᒃᑯᓐᓂ ᒥᓂᔅᑕᐅᔪᓂ ᐅᕙᓐᓄᑦ ᐅᖃᓗᖃᑦᑕᖅᓯᒪᕗᑦ ᑲᑉᐱᐊᓵᕆᓇᓱᐊᖅᖢᑎᒃ ᑮᓇᐅᔭᖃᕈᓐᓃᖅᑎᑦᑎᓂᐊᕐᓂᖏᓐᓂ.

ᑭᓯᐊᓂ ᐊᕐᕌᒍᒐᓴᓄᑦ ᐅᒃᐱᕈᓱᒃᐳᖓ ᐱᓛᖑᔪᒥ, ᑭᓯᐊᓂ ᑕᐃᒃᑯᐊ ᐅᖓᕙᕆᐊᖅᓯᒪᙱᓛᑦ, ᑐᑭᓯᐅᒪᕗᑦ ᑐᓴᒐᒃᓴᓕᐅᕐᓂᕐᒥ ᑎᑎᕋᕐᓂᐅᔪᒥ ᑐᙵᕕᐅᕗᖅ ᐊᔪᖏᓐᓂᖃᖅᑎᑕᐅᓂᖏᓐᓄᑦ ᐊᒻᒪ ᐱᐅᔪᒥ ᒐᕙᒪᐅᔪᒥ. ᓄᓇᕗᒻᒥᔾᓘᓐᓃᑦ. ᓄᓇᕕᖕᒥᓪᓘᓐᓃᑦ .

ᑕᐃᑲᓂ ᓄᕙᒡᔪᐊᕐᓇᖅ-19−ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᐸᐃᑉᐹᓂ ᑐᓴᒐᒃᓴᓂ ᑎᑎᕋᖁᓐᓃᓚᐅᖅᐳᒍᑦ. ᓴᖅᑭᑎᑦᑎᓂᐅᔪᒥ ᐱᐅᐸᓗᒃᑐᒥ ᖃᕋᓴᐅᔭᒃᑰᕋᑕᐅᔪᓂ ᐅᑭᐅᖅᑕᖅᑐᒥ ᑐᑭᖃᓚᐅᖅᐳᖅ ᑐᓂᓯᑲᐅᑎᒋᔪᓐᓇᖅᓯᑎᑦᑎᓂᓐᓂ ᐅᖃᓕᒫᒐᒃᓴᓂ ᑐᓴᒐᒃᓴᓕᕆᓂᕐᒧᑦ ᐃᕐᙲᓇᑲᐅᑎᒋ. ᐱᔪᒪᓂᐅᔪᒥ ᐱᓇᓱᐊᕈᓯᐅᔪᒥ ᓄᑕᐅᙱᓐᓂᐅᔪᓂ ᑐᓴᒐᒃᓴᓂ ᐸᐃᑉᐹᒥ, ᑕᐅᑐᒃᖢᒍ ᐊᑯᓂᐅᓂᖓᓂ ᓴᖅᑭᑎᑦᑎᓂᐅᔪᒥ, ᑎᑎᕋᐃᓂᕐᒥ ᐊᒻᒪ ᖃᖓᑕᓲᒃᑯᑦ ᐅᓯᔭᐅᓂᖓᓐᓂ, ᐊᓯᐅᕙᓪᓕᐊᕗᖅ.

ᓯᕗᓂᒃᓴᖅ ᑭᓱᒥᒃ ᓇᒃᓴᕐᓂᐊᖅᐸ? ᕙᐃᔅᐳᒃ ᐊᒻᒪ ᒎᒍᓪ ᐅᐸᒃᑎᑦᑎᕙᓪᓕᐊᕗᑦ ᒪᓂᓴᐃᓂᐅᔪᓂ ᑮᓇᐅᔭᓂ ᕿᒪᐃᑎᑦᑎᓪᓗᑎᒃ ᓄᓇᓕᖕᓂ ᑐᓴᒐᒃᓴᓂ ᑎᑎᕋᖅᓯᒪᓂᐅᔪᓂ. ᐊᓯᖏᓐᓂ ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᐅᔪᓂ ᑎᑎᕋᖅᐸᒃᑐᓂ, ᓵᙵᓪᓗᑎᒃ ᐱᓕᕆᑦᑎᐊᙱᓐᓂᖏᓐᓂ, ᐃᔅᓴᒃᑕᐅᓯᒪᕗᑦ ᑐᓴᒐᒃᓴᓕᕆᓂᕐᒧᑦ ᑎᑎᕋᖅᐸᒃᑐᓂ ᑲᑎᙵᓂᐅᔪᓂ, ᐃᒻᒥᒃᑰᖅᑐᓂ ᑐᓴᒐᒃᓴᓕᕆᓂᕐᒧᑦ ᑎᑎᕋᖅᓯᒪᔪᓂ ᐊᓯᐅᕙᓪᓕᐊᕗᑦ ᑲᓇᑕᓕᒫᒥ.

ᓂᕆᐅᖕᓂᖃᕆᐊᖃᖅᐳᖓ. ᑎᑎᕋᖅᓯᒪᕗᒍᑦ ᐊᕐᕌᒍᓄᑦ 50−ᓄᑦ — ᑲᒪᓇᖅᑐᒥ ᑎᑭᐅᑎᕐᔪᐊᖅᓯᒪᓂᐅᔪᒥ.

ᓄᓇᕗᖅ ᐊᒻᒪ ᓄᓇᕕᒃ ᐱᔪᓐᓇᕋᔭᙱᓚᑦ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᙱᓪᓗᑎᒃ. ᐃᑲᔪᖅᓱᐃᓂᖃᖅᖢᑕ ᓄᓇᓕᖕᓂ, ᐃᒻᒪᖄ ᑕᑯᒃᑲᓐᓂᕈᓐᓇᖅᐳᒍᑦ ᐊᕐᕌᒍᒃᑲᓐᓂᒃᓂ 50−ᓂ.

ᐅᓇ ᒪᕐᕈᒋᔭᐅᕗᖅ ᒪᕐᕈᐃᓕᖓᔪᒥ−ᐃᓚᖃᖅᑐᒥ ᖃᔅᓯᐊᕐᔪᖕᓂ ᐊᑐᖅᑕᐅ>ᓚᐅᖅᑐᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᓇᓗᓇᐃᖅᓯᔪᒥᒃ 50−ᖓᓂ ᓇᓪᓕᐅᓐᓂᖅᓯᐅᕐᓂᖓᓂ 2023−ᒥ.

ᒪᐃᑯᓪ ᕌᐳᑦᔅ ᑎᑎᕋᖅᑎᐅᕗᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.