(JBNQA) ᐊᖏᖃᑎᒌᓐᓂᒧᑦ ᓭᓂᖃᑕᐅᔪᕕᓂᖅ ᓵᓕ ᒍᐊᑦ ᐃᕐᖃᐅᒪᒍᑎᖃᕐᓂᖓ ᐊᖏᖃᑎᒌᓐᓂᐅᑉ ᓴᓇᔭᐅᓂᕕᓂᖓᓂᒃ, ᖃᓄᐃᓕᖓᔪᑦᓴᐅᓂᖓᓂᓪᓗ ᓯᕗᓂᕆᔭᖓ ᓄᓇᕕᐅᑉ

For an English version of this article, please see: Looking back to see what comes next with Charlie Watt.

ᐱᒋᐊᕐᓂᖏᓐᓂᒃ 1970-ᓂᒃ, ᓵᓕ ᒍᐊᑦ ᔦᐱᑎ ᓄᖕᖓᓗ, ᒪᕐᕉᒃ ᐅᕕᒃᑲᐅᖏᓐᓈᓱᑎᒃ ᑌᑦᓱᒪᓂ, ᐁᓯᒪᔪᕕᓃᒃ ᐊᓪᓓᑦ ᑯᐯᒃᒥᐅᑦ ᑲᑐᑦᔨᖃᑎᒌᖏᑦᑕ ᑲᑎᒪᓂᖓᓂᒃ. ᑌᑲᓂ, ᐅᖃᓕᒪᖃᑎᒌᓯᔪᕕᓃᒃ ᖃᓄᖅ ᐊᓪᓓᑦ ᑯᐯᒃᑯᑦ ᑲᕙᒪᖓᓂ ᐊᑭᓴᕐᑐᕈᓐᓇᓂᕐᒪᖔᑕ, ᓴᓇᒐᓱᐊᕐᓕᕐᑐᕕᓂᐅᒻᒪᑕ ᐃᑯᒪᓕᐅᕐᓂᒧᑦ ᓯᒥᑦᑐᐃᓂᖃᕐᓱᑎᑦ ᐊᓪᓓᑦ ᓄᓇᖓᓂ.

“ᑐᖕᖓᓱᑦᑎᑕᐅᑦᓯᐊᖏᑦᓱᓄᑦ,” ᒍᐊᑦ ᐅᖃᓚᐅᔪᖅ ᐊᐱᕆᔭᐅᓂᕐᒥᓂᒃ. ᒍᐊᑦᓗ ᓄᖕᖓᓗ ᐃᓚᐅᔪᕕᓂᐅᑦᓱᑎᒃ ᑲᑎᒪᓂᕐᒥᒃ, ᐊᓪᓓᑦ ᑯᐯᒃᒥᑦ ᑲᑐᑦᔨᖃᑎᒌᓐᓂᖏᑦᑕ ᓴᐳᓐᓂᐊᑎᖏᑦ ᑭᐅᖃᑦᑕᓕᕐᑐᕕᓃᑦ ᖃᓄᐃᓘᒋᐊᖃᑦᑕᓯᑐᐊᕐᒪᓃᒃ. ᑕᒐ, ᐊᓂᖁᔭᐅᓯᔪᕕᓃᒃ.

ᑕᒐ ᒍᐊᑦ ᐊᓂᒋᐊᓯᑎᓪᓗᒍ, ᐱᓕ ᑌᒪᓐ ᓂᑯᕕᖓᐅᒐᕐᑐᕕᓂᖅ ᐅᒃᑯᐊᑉ ᐊᓂᕕᖓᓂᒃ. ᑎᒍᒥᐊᕐᓱᓂᒍ ᒍᐊᑦ ᑕᓕᕐᒥᒍᑦ ᐅᖃᕐᓱᓂᓗ, “ᐊᓂᑦᓴᓇᒃ. ᐊᖏᖃᑎᒋᖕᖏᓇᒃᑭᑦ ᑭᒡᒐᑐᒐᓱᐊᕐᓂᕆᔭᖏᑦᑕ IQA-ᑯᑦ ᖃᓄᐃᓘᕐᓂᕆᒐᓱᑦᑕᖏᓐᓂᑦ,” ᐅᖃᕐᒥᓱᓂᓗ ᓴᐳᓐᓂᐊᑏᑦ ᑲᔪᓯᒃᑫᓂᕃᑦᓱᓂ ᑲᑎᒪᓂᕐᒥᒃ.

ᑌᒪᓐ ᓯᕗᓕᕐᑎᕈᓯᓐᓂᒥᔪᖅ ᐊᓪᓚᓂᒃ ᐊᖏᖃᑎᒌᒐᓱᐊᕐᓂᖏᓐᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ.

ᐅᑎᕐᑐᕕᓂᐅᓕᕐᓱᑎᒃ ᐊᓂᕐᕋᒥᓄᑦ, ᖑᐊᑦ ᐊᒻᒪᓗ ᓄᖕᖓᖅ ᑲᑎᓯᒋᐊᑦᓯᐊᓯᔪᕕᓃᒃ ᓄᓇᕕᒻᒥᐅᑦ ᐃᓄᑐᖃᖏᓐᓂᒃ, ᑐᑭᑖᕐᕕᕕᓂᕐᒥᓂᒃ ᐱᒋᐊᕆᐊᖃᓕᕐᓂᒥᓂᒃ ᓇᒻᒥᓂᒃ ᐃᓂᓪᓚᑎᕆᔪᑦᓴᐅᓕᕆᐊᕐᒥᓂᒃ. ᑌᑲᓂ, ᐃᓱᒪᒋᔭᐅᓯᓐᓂᒥᔪᖅ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓ ᓄᐃᒋᐊᖕᖓᓯᔪᕕᓂᖅ.

ᑌᒣᒐᓗᐊᕐᑎᓗᒍ ᒍᐊᑦ, ᒫᓐᓇ 81-ᓂᒃ ᐅᑭᐅᖃᓕᕐᑐᖅ, ᐅᖃᓚᐅᕐᑐᖅ ᑭᖕᖒᒪᓇᕐᓂᖓ ᓄᓇᕕᒻᒥᐅᑦ ᓴᐳᑦᔨᒐᓱᑦᑐᓴᐅᒋᐊᕐᒥᓂᒃ ᐱᔪᓐᓇᐅᑎᒥᓂᒃ ᐱᒋᐊᕐᑕᕕᓂᑐᖃᐅᒌᒐᓗᐊᕐᑎᓗᒋᑦ 60 ᐅᑭᐅᑦ ᐅᖓᑖᓅᕐᑐᓂᒃ ᐱᒋᐊᒍᑕᐅᓚᐅᕐᑎᓇᒍ ᐊᖏᖃᑎᒌᓐᓂᕕᓂᖅ (JBNQA).

ᐊᕐᕌᒍᖓᓂ 1912, ᑯᐯᒃ ᑭᓪᓕᓕᐅᕆᓂᕐᒧᑦ ᐊᖏᓕᒋᐊᕐᓯᓂᕐᒧᑦ ᐱᖁᔭᖅ ᐊᖏᓕᒋᐊᕐᓯᓯᒪᓂᖓᓄᑦ ᑯᐯᒃᑯᑦ ᑭᓪᓕᓕᐊᖑᓯᒪᔪᒥᒃ ᑕᕐᕋᑎᓐᓅᑐᒥᒃ, ᐁᑦᑑᑎᒋᔭᐅᑦᓱᓂ ᑌᔭᐅᒍᑎᒋᓯᒪᔭᖓ ᑌᔭᐅᑦᓱᓂ (Rupert’s Land) ᐅᔫᐳᑦᔅ ᓄᓇᖓ, ᑭᓯᐊᓂ ᒫᓐᓇ ᓄᓇᕕᐅᓕᕐᑐᖅ.

ᐊᖏᓂᕐᓴᖑᐊᖑᓂᖏᑦ ᑲᓇᑕᐅᑉ ᐅᑭᐅᕐᑕᑐᖓᓃᑦᑐᑦ ᑌᔭᐅᓐᓂᒪᑕ ᐅᔫᐳᑦᔅ ᓄᓇᖓ, ᐊᒻᒪᓗ 200-ᓂᒃ ᐊᕐᕌᒍᕐᓂᒃ, ᖃᑦᓴᓐ ᐯ ᑲᒻᐸᓂᒃᑯᑦ ᑌᒃᑯᑑᑦᓱᑎᑦ ᓂᐅᕕᐊᑦᓴᖃᕐᓂᑯᑦ ᓇᒻᒥᓂᖃᕐᓂᒪᑕ ᓄᓇᒥ.

ᑭᓯᐊᓗᑦᑕᐅᖅ 1936-ᖑᑎᓪᓗᒍ, ᑯᐯᒃ ᑲᕙᒪᖓ ᑲᕙᒪᑐᖃᒃᑯᓂᑦ ᐃᕐᖃᑐᐃᕕᓕᐊᕈᑦᔨᓂᕐᒪᑦ, ᐁᕙᒍᑎᖃᕐᓱᑎᑦ ᓄᓇᖃᕐᖄᓯᒪᔪᐃᑦ ᐊᑖᒎᒋᐊᖏᓐᓂᒃ ᓄᑭᖃᕐᕕᒋᔭᖏᑦᑕ ᑲᕙᒪᑐᖃᒃᑯᑦ.

“ᑯᐯᒃ ᐃᑉᐱᒋᔭᖃᓚᐅᕐᒪᑦ ᑲᒪᒋᔭᖃᕐᑐᓴᐅᖕᖏᒋᐊᕐᒥᓂᒃ ᐊᑐᐃᓐᓇᕈᐃᓯᒪᓂᕐᒥᒃ ᑭᖕᖒᒪᒋᔭᖏᓐᓂᒃ ᓄᓇᖃᕐᖄᓯᒪᔪᐃᑦ ᐃᓄᐃᑦ, ᓂᓪᓕᕈᑎᖃᕐᓂᐅᔭᓚᐅᔪᒐᑎᑦ ᖃᓄᕐᓘᓃᑦ ᐊᖏᕈᑎᖃᕐᓱᑎᑦ ᓄᓇᑖᕐᑎᑕᐅᒍᑎᒋᒋᐊᓪᓚᑕᒥᓂᒃ ᐁᑦᑑᓯᐊᕐᑕᐅᓱᑎᑦ, ‘’ᒍᐊᑦ ᐅᖃᓚᐅᕐᑐᖅ.

ᐱᒍᑦᔨᐅᑏᑦ ᐃᓕᓐᓂᐊᓂᓕᕆᓂᕐᒨᓕᖓᔪᑦ, ᐃᓗᓯᓕᕆᓂᕐᒧᑦ, ᐊᒻᒪᓗ ᐃᓄᓐᓂᒃ ᐃᑲᔪᕐᓯᐅᑏᑦ ᐊᑐᐃᓐᓇᕈᕐᑕᐅᖃᑦᑕᑐᕕᓂᐅᑦᓱᑎᑦ ᑲᕙᒪᑐᖃᒃᑯᓄᑦ, ᑭᓯᐊᓂ ᐱᒍᒪᓂᖏᑦ ᓇᒻᒥᓂᕐᑖᕈᒪᓂᕐᒥᒃ ᑖᒃᑯᓂᖓ ᐃᑲᔪᕐᓯᐅᑎᒋᔭᐅᔪᓂᒃ ᐱᕈᕐᐸᓕᐊᓯᔪᕕᓂᖅ ᓄᓇᕕᒻᒥ.

ᐅᓪᓗᒥ, “ᐊᐅᓚᑦᓯᒪᕆᓐᓂᒥᒃ ᑲᒪᒋᔭᑦᓴᑕᓕᒃ, ‘’ᐅᖃᕐᓱᓂ. ᐊᐱᕆᐅᑎᒃ ᐊᓯᐅᒍᓐᓇᖏᒻᒪᑦ ᐃᓘᓐᓇᓯᐊᖏᓐᓂᒃ ᐱᓂᐊᕐᓂᓕᕆᐅᑎᓕᒫᓂᒃ ᓄᓇᑕᕆᔭᖓᓂᒃ: ‘’ᑭᓇᒃᑰᑦ ᐱᔪᓐᓇᐅᑎᖃᕐᖃᑦ ᑐᑭᑖᕆᒍᓐᓇᕆᐊᒥᒃ ᑭᖑᓪᓕᐹᖓᓂᒃ?”

ᐅᖃᓚᐅᕐᑐᖅ ᐊᒥᓱᐃᑦ ‘’ᐱᕈᕐᐸᓕᐊᔪᑦ’’ ᐋᓐᓂᐊᑦ ᓄᓇᓕᓕᒫᑦ ᐃᑉᐱᒋᔭᖏᑦ ᐱᓯᒪᒋᐊᖏᓐᓂᒃ ᒪᓕᒐᕐᒥᒃ 2.1 ᐊᖏᖃᑎᒌᓐᓂᒥᒃ, ᐃᓄᐃᑦ ᐱᖃᕐᓂᕋᐅᑎᖏᑦ ᓄᓇᕕᐅᑉ ᓄᓇᖓᓂᒃ ᓴᐱᓕᕈᑕᐅᓯᒪᓂᕋᕐᓱᒋᑦ ᓄᖑᑎᕐᑕᐅᓯᒪᓂᕋᕐᓱᒋᓪᓗ.

ᐃᓓᓚᐅᕐᒥᔪᖅ ᓭᓂᕐᑐᕕᓂᐅᒋᐊᕐᒥᓂᒃ ᐊᖏᖃᑎᒌᓐᓂᒥᒃ (JBNQA) ᓭᓂᕐᑕᐅᒋᓪᓚᓛᕐᑐᕆᑦᓯᓱᓂ ᐊᖏᖃᑎᒌᒍᑎᐅᒋᐊᓪᓛᔪᑦᓴᓂᒃ ᓯᕗᓂᑦᑎᓂᒃ, ᑭᓯᐊᓂ ᓄᐃᓚᐅᕐᓯᒪᓐᓂᖏᑦᑐᑦ.

“ᑕᒪᓐᓇ ᐃᓅᓂᕋᓂᒃ ᐃᓗᒐᓃᖏᓐᓇᓚᖓᔪᖅ, ‘’ ᒍᐊᑦ ᐅᖃᓚᐅᕐᑐᖅ. ᐅᖃᓯᓚᐅᕐᒥᔪᖅ ᐊᖓᔪᕐᖃᐅᕕᐅᒋᐊᖃᕐᓂᖏᑦ ᑐᑭᑖᕈᑎᐅᒋᐊᓖᑦ ᐊᖏᑎᒌᒐᓱᐊᕆᐊᓪᓚᑐᑦᓴᐅᒋᐊᖏᓐᓂᒃ, ᑕᒪᓐᓇ ᐊᑦᓱᕈᕐᓇᑑᓚᖓᒐᓗᐊᕐᐸᑦ ᐱᓇᓱᐊᕐᑕᐅᓂᖓ ᐱᒐᓱᐊᕐᓗᒍ.

“ᐅᖃᖏᓐᓇᓕᒫᓲᖑᔪᖓ, ᐱᓀᓗᑕᖃᑐᐊᕐᐸᑦ, ᑌᒪᖕᖓᑦ ᐱᕕᑦᓴᙯᓐᓇᓕᒫᓚᖓᔪᖅ.”

ᐊᕕᑦᑐᓯᒪᔪᒥ 35-ᒥ ᑲᓇᑕᐅᑉ ᐱᖁᔭᕐᔪᐊᖏᓐᓂ, ᐅᑎᕐᑎᑕᐅᓯᒪᔪᖅ 1982-ᖑᑎᓪᓗᒍ, ᑌᓯᒻᒪᑕ ᐃᓕᑕᕆᔭᐅᓂᖏᓐᓂᒃ ᓱᓪᓕᑕᐅᓯᒪᑦᓱᑎᓪᓗ ᓄᐃᑕᔪᑐᖃᐅᓂᖏᑦ ᓄᓇᖃᕐᖃᓯᒪᔪᑦ ᐊᒻᒪᓗ ᐱᔪᓐᓇᐅᑏᑦ ᓄᐃᑕᐅᓯᒪᔪᑦ ᐊᖏᖃᑎᒌᒍᑎᒃᑯᑦ ᓄᓇᖃᕐᖄᓯᒪᔪᓄᑦ ᐃᓄᓐᓄᑦ ᑲᓇᑕᒥ.

ᒍᐊᑦ ᐅᖃᓚᐅᕐᑐᖅ ᐅᐱᕆᔭᖃᕐᓂᒥᓂᒃ ᖃᓄᐃᓘᕐᑕᐅᒍᑎᐅᒍᓐᓇᕆᐊᖓᓂᒃ ᑌᓐᓇ ᐊᕕᑦᑐᓯᒪᔪᖅ ᐅᒃᑯᐃᓯᒍᓐᓇᓯᑎᑦᓯᓂᒃᑯᑦ ᐊᖏᖃᑎᒌᓐᓂᒥᒃ (JBNQA) ᐋᕐᕿᒋᐊᕆᒍᓐᓇᓯᓂᒃᑯᑦ.

ᑭᓯᐊᓂ, ᐱᖁᔭᖅ 2.1 ᓄᐃᑕᖏᓐᓈᑐᖅ, ᓈᓕᕋᓗᐊᕐᑎᓗᒋᑦ 50 ᐊᕐᕌᒍᐃᑦ.

“ᖃᖓᓂᒃᑯᐊ ᑲᕙᒪᑐᖃᒃᑯᑦ ᑲᓇᑕᒥ ᐃᓕᑕᕐᓯᓛᕐᑐᑦ ᐊᑐᓕᕐᑎᓯᓗᑎᓗ ᐊᕕᑦᑐᓯᒪᔪᒥᒃ 35-ᒥ?’’ ᒍᐊᑦ ᐊᐱᕆᓚᐅᕐᑐᖅ.

“ᖃᐅᔨᓴᕈᓚᐅᕐᓯᒪᖕᖏᑐᑦ ᒫᓐᓇᒧᑦ ᐃᑦᓯᕙᒍᑎᖃᓛᕆᐊᕐᒥᓂᒃ ᕿᒥᕐᕈᓗᒋᑦ ᐱᖁᔭᒻᒪᕇᑦ ᐃᓗᓕᖏᑦ, ᐋᕐᕿᒋᐊᕆᓗᑎᓗ,” ᐃᓓᓚᐅᕐᑐᖅ.

ᐅᖃᓚᐅᕐᑐᖅ 35-ᓂᒃ ᐊᕐᕌᒍᕐᓂᒃ ᓯᐊᓇᑑᓚᐅᔪᑦᓱᓂ, ᒍᐊᑦ ᑕᑯᓚᐅᕐᓯᒪᓚᐅᖕᖏᑐᖅ ᓴᑯᑦᓯᔪᓂᒃ ‘’ᐃᒻᒪᖃᐅᑎᓕᐊᕕᓂᕐᒥᓂᒃ.’’

“ᐊᑕᐅᓯᕐᒥᒃ ᐊᖓᔪᑦᓯᒥᒃ ᐊᕐᓇᖃᓚᐅᔪᒻᒥᔪᖅ ᑐᓵᓚᐅᔪᔭᕋᓂᒃ ᖃᖓᐅᓚᐅᔪᑎᓪᓗᒍ, ᐅᖃᕐᓱᓂ ᑐᓴᒐᑦᓴᓂᐊᕐᓂᑎᒍᑦ, ‘’ᑮᓇᐅᔭᓕᐅᕐᓯᒪᒐᒪ, ᓭᒻᒪᖃᑎᖃᕈᒪᓂᖃᕐᑐᖓ ᓄᓇᖃᕐᖄᓯᒪᔪᕕᓂᕐᓂᒃ,’’ ᐃᓚᑦᓱᒍ ‘’ᖃᐅᔨᒪᔪᖓ ᓱᓕᒋᐊᖓᓂᒃ ᑲᕙᒪᒃᑯᑦ ᐊᑦᑐᐃᑌᓕᒋᐊᖏᓐᓂᒃ ᑖᒃᑯᓂᖓ ᐱᑦᔪᑎᒋᑦᓱᒋᑦ ᐃᒻᒪᖃᐅᑎᓕᐊᕕᓃᑦ.’’

ᐱᖁᔦᑦ ᐊᑦᔨᖏᑦ ᓄᖑᑎᕆᓂᕐᒥᒃ ᐊᓪᓚᑕᐅᓯᒪᔪᕐᑕᓖᑦ ᐊᖏᖃᑎᒌᓐᓂᒥᒃ ᓇᕝᕚᑕᐅᒍᓐᓇᑐᑦ ᓄᓇᖃᕐᖄᓯᒪᔪᑦ ᐱᔪᓐᓇᐅᑎᖃᕈᑎᖏᓐᓂᒃ ᓭᓂᕐᑕᐅᓯᒪᔪᓕᒫᓂᒃ ᑲᓇᑕᒥ, ᔭᐅᖕᖏᑐᑐᐊᖃᕐᑎᓇᒍ. ᒍᐊᑦ ᐁᕙᒍᑎᖃᕐᑐᖅ ᐲᕐᑕᐅᑐᐊᕐᐸᑦ ᐊᓪᓚᑕᐅᓯᒪᔪᑦ ᓇᓪᓕᑐᐃᓐᓇᖏᓐᓂᒃ ᐃᓘᓐᓇᓕᒫᖏᓐᓂᒃ ᐊᖏᖃᑎᒌᒍᑕᐅᒋᐊᓪᓛᓚᕿᒋᐊᖃᕋᔭᕐᓂᖏᓐᓂᒃ.

“ᖃᓄᐃᑦᓴᑲᓵᕋᔭᖕᖏᑐᖓ ᐊᑕᐅᓯᐊᕐᓗᖓᓘᓐᓃᑦ ᐃᓘᓐᓇᖓ ᐊᖏᖃᑎᒌᒍᑎᒃ (JBNQA) ᐃᕐᖃᑐᐃᕕᕐᔪᐊᓕᐊᕐᑎᒐᔭᕆᐊᖓ ᑲᓇᑕᒥ ᑲᔪᓯᐅᒐᕐᑎᓯᓗᒍᓗ ᑌᑲᖕᖓᑦ, ᐊᒥᓱᑐᓛᕋᓗᐊᕐᐸᑦ ᐅᑭᐅᓂᒃ,’’ ᐃᓚᑦᓱᒋᓪᓗ, ᐅᖃᕐᓱᓂ ᕿᒥᕐᕈᓂᖃᕆᐊᕐᒥᓂᒃ ᑕᒪᑦᓱᒥᖓ.

ᐅᖃᐅᑦᔨᓱᒋᓪᓗ ᑭᖑᕚᕆᔭᐅᓚᖓᔪᑦ ᐊᖏᖃᑎᒌᒐᓱᐊᕐᓂᐅᔪᓂᒃ ᓄᓇᕕᒻᒥᐅᓄᑦ ᐃᓱᒪᖁᔨᑦᓱᓂ ᐃᒪᒃ ‘’ᑲᒪᒋᔭᐅᓕᕋᒥᑦ ᑲᕙᒣᑦ, ᕿᒣᓂᐅᔭᖕᖏᒋᐊᖏᓐᓂᒃ ᒪᓕᒐᖁᑎᒥᓂᒃ ᐱᖁᔭᕐᒥᓂᓪᓗ, ᓴᖑᑎᑕᐅᑲᓪᓚᖃᔭᕋᑎᓪᓗ.’’

ᐅᖃᕐᑕᖏᑦ ᒪᓕᑦᓱᒋᑦ ᒍᐊᑦ, ᑲᕙᒪᐅᔪᑦ ᐃᒻᒥᓂᒃ ᑕᑯᓐᓇᓂᖃᕈᓐᓇᕆᐊᖏᓐᓂᒃ ᓄᓀᕐᓯᓯᒪᒋᐊᕐᒥᓂᒃ ᐱᑦᔪᑎᒋᑦᓱᒍ ᑌᒣᓕᖓᔪᒥᒃ ᐱᕙᓪᓕᐊᒍᑎᖃᓯᓐᓂᒪᑕ. ‘’ᑌᒫᑐᐃᓐᓇᓚᖓᖕᖏᑐᖅ ᐃᓗᐊᓅᕐᕕᒋᒐᓱᒋᐊᖓ ᐊᑐᕐᓂᖃᕐᑐᑎᒍᑦ,’’ ᐃᓚᒋᐊᕆᑦᓱᓂ.

ᑖᓐᓇ ᐊᓪᓚᓯᒪᔪᖅ ᐃᓚᒋᔭᖓ ᓄᓇᑦᓯᐊᖅ ᑐᓴᒐᑦᓴᖏᒍᑦ ᐃᕐᖃᐅᒪᒍᑎᒋᒋᐊᖏᑦ 50-ᓂᒃ ᓇᓪᓕᐅᓂᕐᓯᐅᓂᖃᓕᕐᑎᓗᒋᑦ ᓭᓂᕐᑕᐅᓂᕕᓂᖓᓄᑦ ᔦᒥᓯ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᕕᓂᖓᓂᒃ ᐊᕐᕌᒍᖓᓂᒃ 1975.

This project has been made possible in part by the Government of Canada.