ᑲᑎᒪᔩᑦ ᐊᖏᙱᑦᑐᑦ ᒪᓕᒋᐊᓖᑦ ᒥᒃᖠᕚᓪᓕᖅᑎᑕᐅᓂᖏᓐᓂ ᐃᓄᖕᓄᑦ ᐃᖅᑲᓇᐃᔭᓕᖅᑎᑕᐅᓇᔭᖅᑐᓄᑦ
ᐊᓯᔾᔨᖅᓯᓂᖅ ‘ᒪᕐᕈᐃᓕᖓᓕᖅᑎᑦᑎᓇᔭᖅᑐᑦ’ ᐸᓖᓯᓂᒃ, ᐅᖃᖅᑐᖅ ᓄᓇᕕᒃᒥ ᐸᓖᓯᓄᑦ ᐊᖓᔪᖅᑳᖅ
ᓄᓇᕕᒃᒥ ᐸᓖᓯᓄᑦ ᐊᖓᔪᖅᑳᖅ ᔮᓐ-ᕗᕌᓐᓱᐊ (ᔨᐊᕝ) ᐴᓂᐄ ᐊᔾᔨᖃᕐᑐᖅ ᐊᕕᒃᑐᖅᓯᒪᓂᒃᑯᑦ ᑲᑎᒪᑎᓪᓗᒋᑦ ᒪᐃᖑᑎᓪᓗᒍ. ᑭᒃᑯᓕᒫᓂ ᓴᐳᓐᓂᐊᕐᓂᕐᒧᑦ ᑲᑎᒪᔨᕋᓛᑦ, ᐴᓂᐄ ᐃᓚᒋᔭᐅᓪᓗᓂ, ᐅᖃᕐᑐᖅ ᐊᔾᔨᒌᙱᑦᑐᓂ ᐃᖅᑲᓇᐃᔮᖅᑖᕈᑎᖃᕐᓂᖅ ᓴᖅᑭᑎᑦᑎᔾᔪᑎᐅᓇᔭᕐᒪᑦ ᐊᔾᔨᒌᙱᑎᑦᑎᓂᕐᒥ ᐊᒻᒪ ᐲᕐᓯᕕᐅᒃᑲᓐᓂᕐᓗᑎᒃ ᐃᓄᐃᑦ ᐸᓖᓯᐅᔪᑦ. (ᐊᔾᔨᙳᐊᖁᑎᖓ ᑕᒥᓃᒃ ᔩᓂ)
For the English version of this story, please see Lowering hiring standards for Inuit would create ‘2 classes’ of officers.
ᓄᓇᕕᒃᒥ ᑭᒃᑯᓕᒫᓂ ᓴᐳᓐᓂᐊᕐᓂᕐᒧᑦ ᑲᑎᒪᔨᕋᓛᑦ ᒪᕐᕉᖕᓂ ᐃᓱᒪᓕᐊᕆᔭᐅᔪᓂᒃ ᓱᖁᑎᒃᓴᙱᑦᑐᑦ ᑐᕌᖓᔪᓂ ᐅᓄᕐᓯᕚᓪᓕᖅᑎᑦᑎᓇᓱᖕᓂᕐᒥ ᐃᓄᖕᓂ ᑭᒡᒐᖅᑐᐃᓇᔭᖅᑐᓂᒃ ᑕᒫᓂ ᐸᓖᓯᒃᑯᓐᓂ, ᐅᖃᖅᖢᑎᒃ ᓴᖅᑭᑎᑦᑎᓇᔭᕐᓂᖓᓂ ᐊᔾᔨᒌᙱᑎᑦᑎᓗᐊᕐᓇᒥ ᐃᖅᑲᓇᐃᔮᖅᑖᖅᑎᑦᑎᓇᓱᖕᓂᒃᑯᑦ.
ᐸᓖᓯᒃᑯᑦ ᐊᖓᔪᖅᑳᖓ ᔮᓐ-ᕗᕌᓐᔪᐊ (ᔨᐊᕝ) ᐴᓂᐄ ᑐᓴᖅᑎᑦᑎᓚᐅᕐᑐᖅ ᐊᕕᒃᑐᖅᓯᒪᓂᒃᑯᑦ ᑲᑎᒪᔨᓄᑦ ᓯᑎᐱᕆ 15-ᖑᑎᓪᓗᒍ ᑲᑎᒪᔨᕋᓛᑦ ᖃᓄᐃᓕᓂᖏᓐᓂ ᐃᓱᒪᓕᐊᕆᔭᐅᓂᑯᓂ ᐸᓖᓯᒃᑯᑦ ᐱᔨᑦᑎᕋᐅᑎᖏᑦ ᐋᖅᑭᒋᐊᖅᑕᐅᔪᒪᓂᖏᑦᑎᒍᑦ ᐊᒻᒪᓗ ᐅᒃᐱᕈᓱᓕᖅᑎᑦᑎᒃᑲᓐᓂᕋᓱᒡᓗᑎᒃ ᑭᒃᑯᓕᒫᓂ ᐸᓖᓯᒃᑯᓐᓂ.
ᐅᑯᐊ ᐱᒋᐊᖅᑐᕕᓃᑦ ᐊᑐᖅᑕᐅᔪᕕᓂᕐᓄᑦ ᖃᐅᔨᓴᖅᑎᓪᓗᒋᑦ ᔪᓚᐃ 2025-ᒥ ᐸᓖᓯᓕᕆᓂᕐᒥ ᓄᓇᕕᒃᒥ ᑖᒃᑯᐊ ᐸᓖᓯᒃᑯᑦ ᐱᖓᓱᐃᖅᖢᑎᒃ ᑐᖂᑎᓚᐅᖅᑎᓪᓗᒋ ᑕᒫᓂ ᑕᖅᑭᑦ 8 ᐃᓗᐊᓂ. ᑎᓴᒪᒋᔭᐅᔪᖅ – 6-ᓂ ᐊᕐᕌᒍᓕ ᐊᕐᓇᖅ – ᐃᓅᔪᓐᓃᓚᐅᕐᓯᒪᔪᖅ ᐸᓖᓯᒃᑯᑦ ᖃᐅᔨᓴᖅᑕᐅᓂᖏᑦ ᐋᖅᑭᒃᓱᖅᑕᐅᕙᓪᓕᐊᓕᖅᑎᓪᓗᒋᑦ.
ᒪᐃᒥ ᑕᑯᔭᐅᔪᓐᓇᕐᓯᑎᑕᐅᓂᑰᓪᓗᑎᒃ ᐅᓇ ᖃᐅᔨᓴᖅᓯᓂᖅ ᐃᓚᖃᓚᐅᕐᑐᖅ 35-ᓂ ᐃᓱᒪᓕᐊᕆᔭᐅᓯᒪᔪᓂᒃ. 21 ᑖᒃᑯᓇᙵᑦ ᐃᑲᔪᖅᑐᖅᑕᐅᓯᒪᓪᓗᑎᒃ ᑲᑎᒪᔨᕋᓛᓄᑦ, 8 ᐃᑲᔪᖅᑐᖅᑕᐅᓪᓗᑎᒃ ᒪᓕᒋᐊᖃᕐᓂᖃᖅᑐᓂᒃ, ᑕᓪᓕᒪᑦ ᐃᑲᔪᖅᑐᖅᑕᐅᙱᖢᑎᒃ ᐊᒻᒪ ᐊᑕᐅᓯᖅ ᐃᓱᒪᓕᐅᕈᑎᒋᔭᐅᙱᖢᓂ.
ᐊᑕᐅᓯᖅ ᐃᓱᒪᓕᐊᕆᔭᐅᔪᖅ ᐊᓯᔾᔩᖁᔨᓯᒪᓪᓗᓂ ᑯᐸᐃᒃᒥ ᐸᓖᓯᒃᑯᑦ ᒪᓕᒐᖓᓂ ᐅᑯᐊ ᐊᕕᒃᑐᖅᓯᒪᓂᒃᑯᑦ ᒐᕙᒪᐅᔪᑦ ᐊᐅᓚᑦᑎᒃᑲᓐᓂᕈᓐᓇᕐᓯᓯᒪᓗᑎᒃ ᐸᓖᓯᓂ ᐃᖅᑲᓇᐃᔭᓕᖅᑎᑦᑎᓂᕐᒧᑦ ᒪᓕᒐᐅᓂᐊᖅᑐᓂᒃ. ᐊᓯᐊᓕ ᐃᓱᒪᓕᐊᕆᔭᐅᓂᑯ ᐃᓄᐃᑦ ᐃᖅᑲᓇᐃᔮᖅᑖᕋᓱᒃᑐ ᐸᓖᓯᓕᕆᓂᑰᒍᑎᒃ ᑖᒃᑯᐊ ᐊᑐᖁᔭᐅᙱᖢᑎᒃ ᐃᖅᑲᓇᐃᔮᖅᑖᕋᓱᓕᕈᑎᒃ ᐸᓖᓯᒃᑯᑦ ᐱᔨᑦᑎᕋᐅᑎᖏᓐᓂ.
“ᒪᕐᕈᐃᓂ ᐊᔾᔨᒌᙱᑦᑐᓂ ᐊᑐᓕᖁᔨᙱᓐᓇᑦᑕ ᐸᓖᓯᒃᑯᓐᓂ. ᐃᓄᖕᓂ ᐸᓖᓯᖃᕈᒪᒐᑦᑕ ᐃᑲᔫᑎᑖᕆᔭᐅᕙᒃᑐᓂ ᐱᖃᑦᑕᕐᒥᓗᑎᒃ, ᐱᓇᓱᐊᒐᖏᑦ ᐊᔾᔨᒌᒡᓗᑎᒃ ᐊᒻᒪ ᐱᓕᕆᐊᕆᔭᖏᑦ ᐊᔾᔨᒌᒡᓗᑎᒃ,” ᐴᓂᐄ ᐅᖃᓚᐅᕐᑐᖅ ᑲᑎᒪᔨᓄᑦ ᐊᕕᒃᑐᖅᓯᒪᓂᒃᑯᑦ ᒐᕙᒪᐃᑦ ᑲᑎᒪᑎᓪᓗᒋ ᐃᓄᒃᔪᐊᒃᒥᑦ.
ᐴᓂᐄ, ᓄᓇᕕᒃᒥ ᐸᓖᓯᒃᑯᑦ ᐱᔨᑦᑎᕋᐅᑎᖏᓐᓂ ᐊᐅᓚᑦᑎᔨᐅᔪᖅ ᐊᒻᒪᓗ ᑲᑎᕕᒃᒥ ᓄᓇᓕᓕᒫᑦ ᒐᕙᒪᖏᓐᓂ ᐅᕘᓇ ᑲᑎᒪᔨᕋᓛᑎᒍᑦ, ᑖᓐᓇᓗ ᐊᐅᓚᑕᐅᓪᓗᓂ ᐅᑯᓇᙵᑦ ᑲᑎᕕᒃᒥ ᓄᓇᓕᓕᒫᑦ ᒐᕙᒪᑯᖏᓐᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴᓐᑯᓐᓄᑦ.
ᑲᑎᒪᔨᕋᓛᑦ ᐃᑲᔪᖅᑐᐃᓯᒪᔪᑦ ᖃᐅᔨᓴᕈᑎᑎᒍᑦ ᐃᓱᒪᒋᔭᐅᔪᓂ ᑭᒃᑯᓕᒫᓂ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒥ ᐅᑯᑎᒎᓇᖅ ᑲᑎᕕᒃᒥ ᓄᓇᓕᓕᒫᑦ ᒐᕙᒪᖓᓄᑦ ᐊᒻᒪᓗ ᒪᑭᕝᕕᒃᑯᑦ, ᐃᓄᒃᑎᑐᑦ-ᐅᐃᕖᑐᑦ-ᖃᓪᓗᓈᑐᓪᓗ ᑐᑭᓕᐅᕆᔾᔪᓯᖏᓐᓂᒃ ᐊᒻᒪᓗ ᐱᓇᓱᐊᕈᓯᕐᓂ ᑎᓴᒪᓂᒃ ᐃᓄᖕᓄᑦ ᐊᐅᓚᑕᐅᔪᒥ ᐃᓕᖅᑯᓯᓕᕆᓂᕐᒥ ᖃᐅᔨᕚᓪᓕᖅᑎᑦᑎᓂᕐᒥᒃ ᐸᓖᓯᓂ ᑎᑭᓵᓂᑯᓂᒃ.
ᑲᑎᒪᔨᕋᓛᑦ ᐱᓕᕆᕙᓪᓕᐊᔪᑦ ᐃᖅᑲᓇᐃᔭᖅᕕᖕᒥ ᐊᔪᕈᓐᓃᖅᓴᖅᑎᑦᑎᖃᑦᑕᕐᓂᕐᒥᒃ ᖃᐅᔨᕚᓕᕈᑎᒃᓴᓂᒃ ᐸᓖᓯᓕᕆᓂᕐᒥ ᐅᑭᐅᕐᑕᖅᑐᕐᒥ, ᓲᕐᓗ ᒪᑯᓂᖓ ᐊᔪᕈᓐᓃᕐᓴᖅᑎᑕᐅᓗᑎᒃ ᐊᒃᓱᕈᓗᐊᕐᓇᒥ ᐊᑐᕆᐊᖃᕐᓂᕐᒥᒃ, ᐴᓂᐄ ᐅᖃᕐᑐᖅ.
ᐊᕐᕌᒍᑦ ᒪᕐᕉᒃ ᑐᖏᑦᑎᐊᖓᓂ ᑎᓴᒪᑦ ᐃᓄᐃᑦ ᐃᓅᔪᓐᓃᕐᓯᒪᓕᕐᒪᑕ ᓄᓇᕕᒃᒥ ᐸᓖᓯᓄᑦ ᐱᓕᕆᐊᖑᓪᓗᑎᒃ.
ᓄᕕᐱᕆ 2024-ᒥ, ᔮᓱᐊ ᐸᐱᒐᑐᒃ ᐃᓅᔪᓐᓃᓚᐅᕐᓯᒪᒻᒪ ᐊᒻᒪ ᒪᕐᕈᓕᐊᖑᖃᑎᖓ ᒑᓇᑦ ᐋᓐᓂᖅᑕᐅᒻᒪᕆᓚᐅᕐᓯᒪᔪᖅ ᐸᓖᓯᓄᑦ ᖁᑭᖅᓴᖅᑕᐅᓪᓗᑎᒃ.
ᒪᐃ 2025-ᒥ, ᒫᒃ ᐊᓐᓇᓈᒃ ᐃᓅᔪᓐᓃᓚᐅᕐᓯᒪᔪᖅ ᑲᖏᖅᓱᐊᓗᔾᔪᐊᖅᒥ ᐸᓖᓯᓄᑦ ᐅᐸᒃᑕᐅᑎᓪᓗᒍ. ᔪᓚᐃ 2025-ᒥ ᔭᐃᒥᓯ ᑲᕕᒃ ᐃᓄᒃᔪᐊᒃᒥ ᐃᓅᔪᓐᓃᓚᐅᕐᓯᒪᔪᖅ ᐸᓖᓯᓄᑦ ᐱᓕᕆᐊᖑᑎᓪᓗᒍ.
ᐊᒻᒪᓗ ᑎᓯᐱᕆᒥ 6-ᓂ ᐊᕐᕌᒍᓕᒃ ᐃᓅᔪᓐᓃᓚᐅᕐᓯᒪᓪᓗᓂ ᐊᒻᒪ ᐊᑖᑕᖓ ᐋᓐᑐᕉ ᓇᓗᒃᑐᒃ ᐋᓐᓂᖅᑕᐅᓪᓗᓂ ᐸᓖᓯᒃᑯᑦ ᖁᑭᖅᓴᖅᑎᓪᓗᒋᑦ ᐃᓄᒃᔪᐊᒃᒥ.
ᐅᑯᐊ Bureau des enquêtes indépendantes, ᖃᐅᔨᓴᖃᑦᑕᖅᑐᑦ ᐃᓄᖕᓂ ᐋᓐᓂᖅᑐᖃᕐᓂᕌᖓᑦ ᐅᕝᕙᓘᓐᓃᑦ ᑐᖁᑕᐅᔪᖃᕐᓂᕌᖓᑦ ᐸᓖᓯᓄᑦ ᐱᓕᕆᐊᖑᑎᓪᓗᒋᑦ ᐅᓂᒃᑳᓕᐊᓂ ᑖᒃᑯᓄᖓ ᑎᓴᒪᓄ ᑐᓂᓯᓚᐅᕐᑐᑦ ᑯᐸᐃᒃᒥ ᐱᕋᔭᒃᑐᓂ ᐊᒻᒪ ᒪᓕᒐᕐᓂ ᓱᕋᐃᓂᑯᓄᑦ ᐃᖅᑲᖅᑐᐃᕕᒃᑰᖅᑎᑦᑎᔨᓄᑦ.
ᐋᒐᓯᐅᑎᓪᓗᒍ ᑯᐸᐃᒃᒥ ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᓯᒪᔪᑦ ᐸᓖᓯᓂ ᑐᖂᑦᑎᔪᕕᓂᕐᓂ ᐸᓯᔭᒃᓴᙳᖅᑎᑦᑎᔾᔮᙱᓐᓂᕋᖅᖢᑎᒃ ᐅᕙᓂ 2025-ᒥ ᐃᓄᒃᔪᐊᒃᒥ ᖁᑭᖅᓴᖅᑐᕕᓂᕐᓂ, ᖃᐅᔨᒐᒥ ᑭᓯᐊᓂ ᑕᐃᒪᓐᓇᐅᔭᕆᐊᖃᓕᓚᐅᕐᓂᖓᓂ.
ᑐᓴᖅᑎᑦᑎᓚᐅᙱᑦᑐᑦ ᐸᓯᔭᒃᓴᙳᖅᑎᑦᑎᓂᐊᕐᒪᖔᑕ ᐊᓯᖏᓐᓂ ᐱᖓᓱᓂ ᖃᓄᐃᓕᐅᕈᑎᕕᓂᕐᓂᒃ. ᑲᑎᒪᔩᑦ ᑲᑎᒪᑎᓪᓗᒋᑦ ᐱᓇᓱᐊᕈᓯᐅᓚᐅᕐᑐᒥ, ᓴᓪᓗᐃᑦᓄᑦ ᑲᑎᒪᔨ ᓯᑏᕙᓐ ᒍᕌᓱ ᐊᐱᕆᓚᐅᕐᑐᖅ ᐴᓂᐄᒥ ᑐᓴᖅᑎᑕᐅᔪᒪᓪᓗᓂ ᖃᓄᐃᓕᖓᓕᕐᒪᖓᑦ ᐃᓅᔪᓐᓃᓚᐅᕐᑑ ᐸᐱᒐᑦᑐᒃ ᒥᒃᓴᓄᑦ.
“ᐅᓇ ᓱᓕ ᐃᓱᒫᓘᑎᒋᔭᐅᔪᖅ ᐅᕙᓂ ᓴᓪᓗᐃᑦᓂ,” ᒍᕌᓱ ᐅᖃᕐᑐᖅ..
ᐴᓂᐄ ᑭᐅᓚᐅᕐᑐᕐᓕ ᐊᖓᔪᖅᑲᐅᑎᑦ ᐅᑕᕿᓂᖏᓐᓂ ᐃᓱᒪᓕᐊᕆᔭᐅᔪᓂᒃ ᑯᐸᐃᒃ ᒐᕙᒪᖏᓐᓄᑦ ᑭᓯᐊᓂᑦᑕᐅᖅ ᐃᓱᒫᓘᑎᖃᕐᓂᕋᖅᑐᖅ ᐊᑯᓂᕈᓗ ᐱᓕᕆᐊᖑᓂᖓᓂ.
ᐴᓂᐄ ᐅᖃᓚᐅᕐᑐᖅ ᑲᑎᒪᔨᕋᓛᑦ ᐱᓕᕆᐊᖃᕐᓂᐊᕐᓂᕋᖅᖢᓂᒋᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐊᒻᒪ ᐋᖅᑭᒃᑕᖓ ᐊᕕᒃᑐᖅᓯᒪᓂᒃᑯᑦ ᑲᑎᒪᔨᓄᑦ ᑐᓴᖅᑕᐅᑎᑕᐅᓂᐊᖅᖢᓂ.
(0) Comments