ᓄᓇᕕᒻᒥ ᐃᓄᐃᑦ ᑎᒥᖁᑎᖓ ᐸᕐᓇᑐᖅ ‘ᐃᕐᖃᐅᒪᑦᓯᓛᕐᓂᒥᒃ’ ᐱᒍᓐᓇᓯᓯᒪᔪᓂᒃ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᑎᓕᐅᕐᑕᐅᓂᕆᓚᐅᕐᓯᒪᔭᖓᓂᓂᑦ ᐸᕐᓇᑐᑦ, ᓇᓪᓕᐅᓂᕐᓯᐅᕈᑎᒋᒍᓐᓀᓗᒍ

For an English version of this articles, please see ‘We just didn’t wait for handouts’: Makivvik president looks back on 50 years.

ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᐊᖏᖃᑎᒌᒐᓱᐊᕈᑎᐅᑎᓪᓗᒍ ᐊᕐᕌᒍᐃᑦ 50 ᐊᓂᒍᕐᑐᑦ, ᐱᑕ ᐋᑕᒥ ᐅᕕᒃᑲᐅᓚᐅᕐᓯᒪᔪᖅ. ᓇᒻᒥᓂᖅ ᐅᖃᕐᓱᓂ “ᓱᕈᓯᐅᑦᓱᖓ ᖃᐅᔨᒪᒍᒪᔪᐹᓘᒪᐅᕐᓯᒪᕗᖓ.”

ᑌᑲᓂ, ᐱᑕ ᐋᑕᒥ ᓱᕈᓯᐅᓗᐊᓚᐅᔪᖅ ᐊᖏᖃᑎᒌᒐᓱᐊᕐᑐᓄᑦ ᐃᓚᐅᒍᓐᓇᕋᓂ. ᑌᒣᒐᓗᐊᕐᑎᓗᒍ, ᖃᐅᔨᒪᒐᓱᐊᖏᓐᓇᖃᑦᑕᓯᒪᔪᖅ ᓈᓚᖃᑦᑕᓱᓂᓗ, ᐃᓄᐃᑦ ᓱᓇᑖᕋᓱᐊᓕᕐᒪᖔᑕ ᓱᓇᓂᒃ ᐊᑑᑎᒋᐊᓕᕐᒪᖔᑕ.

“ᓄᓇᓕᒻᒥ ᑲᑎᖕᖓᔪᓄᑦ ᐁᖃᑦᑕᓯᒪᕗᖓ, ᑐᓴᕐᑎᓯᒋᐊᕐᑐᓕᑐᐊᕐᒪᑕ,’ ᐱᑕ ᐋᑕᒥ ᐅᖃᕐᓱᓂ.

“ᐃᓚᐅᓯᒪᖕᖏᑲᓗᐊᕐᓱᖓ, ᑐᓵᖃᑦᑕᓯᒪᕗᖓ ᐅᖄᔪᓂᒃ, “ᓱᓇᑖᕈᑎᒋᓂᐊᕐᑕᕘᑦ ?”

ᐅᓪᓗᒥ, ᐋᑕᒥ ᐊᖓᔪᕐᖄᕆᔭᐅᔪᖅ ᒪᑭᕝᕕᒧᑦ – ᑖᓐᓇ ᑎᒥᐅᔪᖅ ᑎᒥᖕᖑᑎᑕᐅᓚᐅᕐᓯᒪᔪᖅ
1978-ᖑᑎᓪᓗᒍ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᐅᓂᖓᑕ ᑭᖑᓂᖓᒍᑦ ᓂᐱᖃᕐᑎᓯᔨᐅᓯᑦᓱᓂ ᐃᓄᑐᐃᓐᓇᓂᒃ ᓄᓇᕕᒻᒥᐅᓂᒃ.

ᑎᒥᐅᔪᖅ ᐱᓇᓱᐊᒐᖃᓲᖅ ᑐᓂᔭᐅᓂᕐᒥᒃ, ᐊᐅᓚᑦᓯᓂᕐᒥᒃ, ᑐᓂᐅᕐᙯᓂᕐᒥᒃ ᑮᓇᐅᔭᓕᐅᕋᓱᐊᕐᓂᒥᓪᓗ ᑮᓇᐅᔭᕐᑖᖑᓯᒪᔪᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ, ᐱᔭᐅᓯᒪᔪᓂᒃ ᔦᒥᓯ ᐯᑉ ᑯᐯᔾᓗ ᑕᕐᕋᖓᑕ ᐊᖏᖃᑎᒌᒐᓱᐊᕐᓂᖓᓂ.

ᐱᑕ ᐋᑕᒥ ᒪᑭᕝᕕᒦᓕᕐᑐᖅ 1987-ᒥᓂᑦ. ᑌᒪᖕᖓᓂᑦ, ᐊᒥᓱᒐᓚᓐᓂᒃ ᐃᓂᖃᖃᑦᑕᓯᒪᔪᖅ ᓯᕗᓕᕐᑎᐅᓱᓂ ᒪᑭᕝᕕᒥ ᑎᒥᐊᕈᖁᑎᖏᓐᓂᓗ. ᐊᖓᔪᕐᖄᕈᕆᐊᖕᖓᓯᒪᔪᖅ 1998-ᒥᑦ 2012-ᒧᑦ, ᓂᕈᐊᕐᑕᐅᒋᐊᓪᓚᒥᑦᓱᓂ 2021-ᒥ.

ᑭᖑᒧᑦ ᑕᑯᒋᐊᕐᓱᓂ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ, ᐱᑕ ᐋᑕᒥ ᐅᖃᕐᑐᖅ ᐊᖏᖃᑎᒌᒐᓱᐊᕐᑎᐅᓯᒪᔪᑦ “ᐊᔭᐅᕐᑕᐅᓯᒪᓂᖏᓐᓂᒃ” “ᐊᖏᕐᑎᑕᐅᑦᓱᑎᒃ ᐊᖕᖔᖏᒃᑲᓗᐊᕐᑎᓗᒋᑦ.”

ᓄᓇᓂᒃ ᐅᔭᕋᓐᓂᐊᕕᑦᓴᐅᓱᑎᒃ ᐱᖃᕐᓂᕋᕐᕕᐅᔪᓂᒃ “ᑎᓪᓕᑕᐅᓯᒪᓂᕃᔪᖅ” ᐊᖏᖃᑎᒌᒍᑎᒧᑦ ᐃᓚᐅᑦᓱᑎᒃ.

ᑌᒣᒐᓗᐊᕐᑎᓗᒍ $90 ᒥᓕᐊᓂᒃ ᒪᑭᕝᕕᒃ ᐱᑎᑕᐅᓯᒪᔪᖅ ᐊᖏᖃᑎᒌᒍᑎ ᐊᑎᓕᐅᕐᑕᐅᑎᓪᓗᒍ, ᑎᒥᐅᔪᖅ ᑖᒃᑯᓂᖓ ᐱᕈᕐᑎᓯᒍᓐᓇᓯᓯᒪᔪᖅ ᑭᓇᐅᔭᓕᐅᕋᓱᐊᕈᑎᑎᒍᑦ, ᑎᒥᐊᕈᖁᑎᓕᐅᕐᒥᑎᒍᑦ ᓄᓇᓕᓐᓄᓗ ᑐᓂᔨᖃᑦᑕᓱᑎᒃ ᐃᓪᓗᔪᐊᖃᕐᑎᓯᒍᑎᑎᒍᑦ ᐱᒍᑦᔨᒍᑎᑎᒍᓪᓗ.

“ᒪᑭᕝᕕᒃ ᑐᓂᔨᓯᒪᓕᕐᑐᖅ ᐱᓕᐊᓄᑦ ᑎᑭᑦᑐᓂᒃ ᐊᕐᕌᒍᓂ ᐊᓂᒍᕐᑐᓂ ᐃᓪᓗᔪᐊᖃᕐᑎᓯᒍᑎᑎᒍᑦ ᑲᕙᒪᓄᑦ ᐃᑲᔪᕐᑕᐅᒐᑎᒃ ᐊᒥᓱᕕᑦᓱᑎᒃ.” ᐱᑕ ᐋᑕᒥ ᐅᖃᕐᑐᖅ.

“$90 ᒥᓕᐊᑐᐃᓐᓇᓂᒃ ᐱᑎᑕᐅᓯᒪᒐᓗᐊᕐᓱᑎᒃ, ᑮᓇᐅᔭᒥᓂᒃ ᐱᕈᕐᑎᓯᒍᓐᓇᓯᓯᒪᔪᑦ, ᓯᓚᑐᔫᑦᓱᑎᒃ ᑮᓇᐅᔭᓕᐅᕋᓱᐊᕐᓂᑯᑦ ᑎᒥᖁᑎᑖᖃᑦᑕᓱᑎᒃ ᐃᓚᐅᑎᓪᓗᒍ ᐃᓄᐃᑦ ᖃᖓᑦᑕᔫᖏᑦ.”

ᐅᖃᕐᒥᓱᓂᓗ “ᐅᑕᕐᕿᑐᐃᓐᓇᓚᐅᔪᖕᖏᓚᒍᑦ ᐱᔭᒃᑯᓯᐊᑦᓴᑎᓐᓂᒃ.”

ᐱᑕ ᐋᑕᒥ ᒪᑭᕝᕕᒥᒃ ᓯᐊᕐᕆᔭᕐᕕᓕᐅᕐᓯᒪᓂᕃᔪᖅ, ᐱᖕᖑᐊᕕᓐᓂᒃ ᑐᓴᐅᑎᕐᕕᓂᓪᓗ ᓄᓇᓕᓐᓂ ᓄᓇᕕᒻᒥᐅᓄᑦ ᑐᓂᓯᒪᔭᖏᑦ ᒪᑭᕝᕕᐅᑉ 1 ᐱᓕᐊᓐᓂᒃ ᐊᑭᖃᕐᑎᓗᒋᑦ.

ᒪᑭᕝᕕᐅᑉ ᑎᒥᐊᕈᖁᑎᖏᑦ ᑲᔪᓯᑦᓯᐊᓯᒪᔪᑦ, ᐱᑕ ᐋᑕᒥ ᐅᖃᓚᐅᔪᖅ, ᑎᒥᐊᕈᖁᑏᑦ ᐃᓄᐃᑦ ᖃᖓᑦᑕᔫᖏᑦ ᐊᒻᒪᓗ ᑲᐅᑕᖅ ᓴᓇᔩᑦ ᐊᒥᓱᓂᒃ ᐱᓇᓱᒐᑦᓴᑖᕈᑎᐅᓯᒪᔫᒃ ᐃᓚᐅᑎᓪᓗᒋᑦ ᐃᓄᐃᑦ ᖃᖓᑦᑕᔫᕐᑏᑦ.

ᑭᒡᒐᑐᕐᓱᓂ ᓄᓇᕕᒻᒥᐅᓂᒃ ᐃᓄᓐᓂᒃ, ᒪᑭᕝᕕᒃ ᐃᑦᓯᕙᐅᑕᖃᖃᑎᐅᔪᖅ ᐃᓄᐃ ᐱᓇᓱᐊᖃᑎᖃᕐᓂᖓᓂᒃ ᑲᕙᒪᒥᒃ ᑲᑎᖕᖓᔨᐅᖃᑎᐅᑦᓱᓂᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓂ.

ᑖᒃᑯᓂᖓ ᐃᓂᖃᕐᓱᓂ, ᐱᓇᓱᐊᖃᑎᖃᕐᓱᓂᓗ ᑯᐯᑉ ᑲᕙᒪᖓᓂᒃ, ᒪᑭᕝᕕᒃ ᐅᖄᕕᖃᕈᓐᓇᓲᖅ ᑲᓇᑕᐅᑉ ᑲᕙᒪᖓᓂᒃ ᑯᐯᓪᓗ ᑲᕙᒪᖓᓂᒃ ᐱᓇᓱᐊᕐᑕᐅᒐᓱᐊᕐᑐᑦ ᓄᓇᕕᒻᒥ ᑮᓇᐅᔭᖃᕐᑎᑕᐅᒍᑎᑦᓴᖏᓐᓂᒃ, ᐱᓇᓱᐊᕐᐸᒥᑦᓱᓂᓪᓗ ᐃᓪᓗᐃᓂᐊᕐᓂᒥᒃ ᐃᓅᒐᓱᐊᕐᓂᐅᓗ ᐊᑭᖓᓂ ᐅᑭᐅᕐᑕᑐᒥ.

“ᑯᐯᒻᒥ ᑲᓇᑕᒥᓗ ᑌᒣᑦᑐᓄᑦ ᐱᓇᓱᐊᕐᓂᐅᔪᓄᑦ ᐃᑲᔪᕐᑕᐅᖃᑦᑕᖁᔨᔪᖅ… ᑲᓇᑕᐅᑉ ᓯᕿᓂᖓᓂᒥᐅᓂᒃ ᐱᒍᑦᔨᒍᑎᖃᕈᓐᓇᕈᑎᒃ, ᓱᒧᑦ ᓄᓇᑦᑎᓂ ᑌᒣᓘᖃᑦᑕᖏᒻᒥᔪᑦ ?” ᐱᑕ ᐋᑕᒥ ᐅᖃᕐᓱᓂ.

“ᑖᒃᓰᔭᕐᑎᐅᒋᕗᒍᑦ. ᓱᒧᑦ ᐊᑦᔨᖓᓂᒃ ᐱᐅᓯᖃᕐᑎᑕᐅᖕᖏᓚᒍᑦ ? ᐊᒥᓱᕕᑦᓱᑕ, ᐃᓱᕐᕉᑎᖃᕐᐸᖏᑦᑐᒍᑦ ᖃᓪᓗᓈᓃᑦᑐᑦ ᐊᑦᔨᖏᓐᓂᒃ ᑲᓇᑕᐅᑉ ᓯᕿᓂᖓᓂ.”

ᐊᒥᓱᓂᒃ ᓯᕗᓂᕐᒥ ᒪᑭᕝᕕᒃ ᐅᖄᒍᑎᑦᓴᖃᕐᑐᖅ. ᐱᓗᐊᕐᑐᒥᒃ, ᐊᖏᖃᑎᒌᒐᓱᐊᕈᑎᖃᕐᓂᒥᒃ ᓇᒻᒥᓂᖅ ᐊᐅᓚᓂᐊᕐᑕᑎᓐᓂᒃ ᑲᕙᒫᑕᕐᓂᒧᑦ ᑯᐯᑉ ᑲᕙᒪᖓᓂᒃ.

ᓅᕕᒻᐱᕆ 11-ᒥ, ᒪᑭᕝᕕᒃ ᐸᕐᓇᑐᖅ ᓇᓗᓀᕐᓯᓛᕐᓂᒥᓂᒃ 50 ᐊᕐᕌᒍᐃᑦ ᐊᓂᒍᕐᑐᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑎᓕᐅᕐᑕᐅᓚᐅᕐᓯᒪᑎᓪᓗᒍ.

ᑌᒣᒐᓗᐊᕐᑎᓗᒍ, ᓇᓪᓕᐅᓂᕐᓯᐅᓇᐅᓛᖕᖏᑐᖅ.

“ᐃᕐᖃᐅᒪᑦᓯᓇᐅᓛᕐᑐᖅ ᐃᓱᒪᒋᔭᕋᒍᓪᓕ, ᐅᐱᒍᓲᑎᒋᒍᒪᖕᖏᓇᒃᑯ,” ᐱᑕ ᐋᑕᒥ ᐅᖃᕐᓱᓂ.

ᓄᓇᓖᑦ ᐱᖓᓱᑦ – ᐳᕕᕐᓂᑐᖅ, ᐃᕗᔨᕕᒃ ᓴᓪᓗᐃᓗ – ᐊᖏᖃᑎᐅᓯᒪᖕᖏᑐᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓂᒃ, ᑖᒃᑯᐊᓗ ᐊᖏᕐᓂᖏᑦᑐᑦ ‘ᐋᓐᓂᑕᐅᓯᒪᔪᑦ.”

“ᑖᑦᓱᒥᖓ ᐊᖏᖃᑎᒌᒍᑎᒥᒃ ᐊᑎᓕᐅᕐᓯᒪᒐᔭᖕᖏᓚᖓ. ᓇᒻᒥᓂᖅ ᑕᒪᓐᓇ ᐃᓱᒪᒋᔭᕋ, ᑐᑭᓯᒐᓗᐊᕐᓱᖓ ᐊᖏᖃᑎᒌᒐᓱᐊᕐᑐᕕᓂᕐᓂᒃ ᐊᑎᓕᐅᕐᓱᑎᒃ ᐊᖏᖃᑎᒌᒍᑎᒥᒃ, ᐊᔭᐅᕐᑕᕕᓂᐅᔮᕐᒪᑕ.’ ᐱᑕ ᐋᑕᒥ ᐅᖃᕐᓱᓂ.

This project has been made possible in part by the Government of Canada.