ᓂᕈᐊᕐᓂᕐᒧᑦ ᓵᓚᖃᖅᑐᑦ ᐃᓱᒫᓗᒃᐳᑦ ᐊᑦᑎᒃᑐᒥ ᓂᕈᐊᖅᑎᐅᔪᓂ ᐅᐸᒃᑐᓄᑦ

For an English version of this article, please visit Makivvik election winners both concerned by low voter turnout.

ᓂᕈᐊᒐᒃᓴᐃᑦ ᐊᖓᔪᖅᑳᑉ-ᑐᒡᓕᐊ ᐋᓐᑎ ᒧᐊᕼᐊᐅᔅ ᐊᒻᒪ ᑎᒥᖁᑕᐅᔪᒥ ᑎᑎᕋᖅᑎ ᐊᓖᓯᐊ ᐊᕋᒍᑕᖅ ᓂᕈᐊᖅᑕᐅᒃᑲᓐᓂᓚᐅᖅᐳᑦ ᐃᓂᖏᓐᓄᑦ ᒪᑭᕝᕕᖕᒧᑦ ᓂᕈᐊᕐᓂᕐᓂᐅᔪᒥ ᐱᓕᕆᐊᖑᔪᒥ ᓄᓇᕕᓕᒫᒥ ᕕᕗᐊᕆ 6−ᒥ ᑭᓯᐊᓂ ᑕᒪᒃᑭᑦ ᐅᖃᖅᐳᑦ ᐃᓱᒫᓘᑎᖃᕐᓂᖏᓐᓂ ᐊᑦᑎᒃᑐᓂ ᓂᕈᐊᖅᑎᐅᔪᓂ ᓴᖅᑭᑦᑐᓄᑦ.

ᒧᐊᕼᐊᐅᔅᒧᑦ, ᓵᓚᖃᕐᓂᖅ ᑐᑭᖃᖅᐳᖅ ᐱᖓᔪᖓᓐᓂ ᐊᕐᕌᒍᓄᑦ-ᐱᖓᓱᓄᑦ ᑲᑎᒪᔨᐅᓂᕐᒥ ᐊᖓᔪᖅᑳᑉ-ᑐᒡᓕᐊᓄᑦ ᐱᕙᓪᓕᐊᔪᓕᕆᓂᕐᒧᑦ. ᓯᕗᓪᓕᕐᒥ ᐱᔨᑦᑎᕋᓚᐅᖅᐳᖅ 2016−ᒥ 2019−ᒧᑦ, ᐊᒻᒪ ᓂᕈᐊᖅᑕᐅᒃᑲᓐᓂᓚᐅᖅᐳᖅ 2022−ᒥ.

10,141−ᖑᔪᓂ ᓂᕈᐊᕈᓐᓇᖅᑐᓂ 1,969−ᑐᐃᓐᓇᐃᑦ ᓴᖅᑭᓚᐅᖅᐳᑦ ᓂᕈᐊᕐᓂᕐᒧᑦ ᐅᓪᓗᖓᓂ, ᓂᕈᐊᖅᑎᓄᑦ ᓴᖅᑭᓐᓂᐅᔪᒥ 19.4 ᐳᓴᓐᑎᒥ, ᐅᖃᐅᓯᐅᓪᓗᓂ ᒪᑭᕝᕕᒃᑯᓐᓂ, ᑎᒥᖁᑕᐅᔪᑦ ᑲᒪᒋᔭᖃᖅᑐᓂ ᐱᔪᓐᓇᕐᓂᕆᔭᐅᔪᓄᑦ ᐃᓄᖕᓄᑦ ᓄᓇᕕᖕᒥ.

ᑕᐃᔅᓱᒧᖓ ᐱᔾᔪᑕᐅᔪᒥ, ᒧᐊᕼᐊᐅᔅ ᐅᖃᓚᐅᖅᐳᖅ, ᓵᓚᖃᕐᓂᖓ ᐃᓚᖃᖅᐳᖅ ᑲᑎᙵᓂᐅᔪᓂ ᐃᒃᐱᒍᓱᖕᓂᐅᔪᓂ.

“ᐱᓕᕆᓂᐅᕗᖅ ᐅᖃᐅᓯᖃᕐᓂᕐᒥ ᐃᓱᒪᒋᔭᕐᓂ ᐊᒻᒪ ᓇᓗᓇᐃᖅᓯᓂᕐᒥ ᓂᐱᖃᕐᓂᕐᓂ ᑲᑎᒪᔨᕐᔪᐊᖑᔪᓄᑦ ᐱᓕᕆᓂᐅᔪᒥ,” ᐅᖃᓚᐅᖅᐳᖅ ᓂᕈᐊᕐᓂᐅᔪᒥ ᕕᕗᐊᕆ 7−ᒥ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ. “ᐊᖏᖅᓯᒪᐃᓐᓇᕐᓂᐊᖅᐳᖓ ᐱᓕᕆᕙᓪᓕᐊᓂᕐᒥ ᐱᐅᓯᒋᐊᖅᑎᑦᑎᓂᐅᔪᒧᑦ ᓄᓇᕕᓕᒫᒧᑦ.”

2022−ᒥ, ᑭᖑᓪᓕᖅᐹᒥ ᒧᐊᕼᐊᐅᔅ ᐊᒻᒪ ᐊᕋᒍᑕᖅ ᓂᕈᐊᖅᑕᐅᑎᓪᓗᒋᑦ, ᓂᕈᐊᖅᑎᓄᑦ ᓴᖅᑭᑦᑐᓂ 29.4 ᐳᓴᓐᑎᐅᓚᐅᖅᐳᖅ.

“[ᓂᕈᐊᖅᑎᐅᔪᑦ] ᐅᒃᐱᕈᓱᓚᐅᖅᐳᑦ ᓂᕈᐊᒐᒃᓴᙳᕈᑎᒋᓇᓱᐊᖅᑕᓐᓄᑦ. ᓇᓗᓇᐃᖅᓯᓂᕐᒥ ᐱᕈᖅᓴᐃᓐᓇᕐᓂᑦᑎᓐᓂ ᐱᕙᓪᓕᐊᑎᑦᑎᓂᕐᒧᑦ ᑮᓇᐅᔾᔭᒃᓴᓂᕐᒥ ᑐᙵᕕᖃᑦᑎᐊᕐᓂᕐᒥ ᐊᕕᒃᑐᖅᓯᒪᓂᐅᔪᒥ ᐃᓗᐊᓂ, ᐊᒻᒪ ᐱᓕᕆᓂᑦᑎᓐᓂ ᐱᓂᕐᒥ ᐊᑐᐊᒐᐅᔪᒥ,” ᒧᐊᕼᐊᐅᔅ ᐅᖃᓚᐅᖅᐳᖅ.

ᐱᓂᕐᒥ ᐊᑐᐊᒐᖓ ᑐᕌᕋᓱᐊᖅᐳᖅ ᐊᔪᕐᓇᙱᑎᑦᑎᒃᑲᓐᓂᕐᓂᕐᒥ ᓄᓇᓕᖕᓂ ᓇᖕᒥᓂᕆᔭᐅᔪᓄᑦ ᐊᓐᓂᑭᑕᐅᑎᓂᕐᒥ ᑕᐃᒃᑯᓂᖓ ᖃᓪᓗᓈᑦ ᓄᓇᖓᓐᓂ ᑳᓐᑐᕌᖑᔪᓂ ᑐᓂᔭᐅᔪᓂ ᓄᓇᕕᖕᒥ.

ᐱᓚᐅᖅᐳᖅ 1,340 ᓂᕈᐊᖅᑕᐅᓂᐅᔪᓂ, ᐅᕝᕙᓘᓐᓃᑦ 68.1 ᐳᓴᓐᑎᒥ ᓂᕈᐊᖅᑕᐅᓂᐅᔪᓄᑦ. ᐱᓇᓱᐊᖃᑎᒋᓚᐅᖅᑕᖓ ᐃᔨᑦᑎᐊᖅ ᐸᐱᒐᑑᓚᐅᖅᐳᖅ, ᐱᓇᓱᐊᓚᐅᖅᑐᒥ ᐱᐅᓯᒋᐊᖅᑎᑦᑎᓂᕐᒥ ᐃᓅᓰᑦ ᒪᑭᒪᐅᑎᓪᓗ ᐱᕙᓪᓕᐊᑎᑕᐅᓂᖓᓂ ᓲᕐᓗ ᐃᓚᒌᓄᑦ ᐃᒡᓗᒃᓴᓂ ᐊᒻᒪ ᐃᓄᑐᖃᕐᓄᑦ ᐊᖏᕐᕋᐅᔪᓂ ᓄᓇᓕᖕᓂ.

“ᐃᓂᒃᓴᖃᖅᐳᖅ ᐃᓅᓰᑦ ᒪᑭᒪᐅᑎᓪᓗ ᐱᕙᓪᓕᐊᑎᑕᐅᓂᖓᓂ, ᑭᓯᐊᓂ ᐊᑕᐅᑦᑎᒃᑯᑦ ᐱᔭᕆᐊᖃᖅᐳᒍᑦ ᓈᒻᒪᒃᑐᓂ ᐱᕙᓪᓕᐊᔪᓕᕆᓂᕐᒥ,” ᒧᐊᕼᐊᐅᔅ ᐅᖃᓚᐅᖅᐳᖅ.

ᐅᒃᐱᕈᓱᒃᐳᖅ ᓇᖕᒥᓂᖃᖅᑎᐅᔪᑦ ᓴᖅᑭᑎᑦᑎᓲᖑᓂᖏᓐᓂ ᐊᒃᖢᙱᓐᓂᐅᔪᒥ, ᐊᒻᒪ ᐃᓅᓰᑦ ᒪᑭᒪᐅᑎᓪᓗ ᐱᒋᐊᕈᑕᐅᔪᑦ ᐱᐅᔪᒥ ᐃᑲᔪᖅᓱᐃᔪᒥ ᐃᑲᔪᖅᓱᐃᔪᓄᑦ ᑮᓇᐅᔾᔭᒃᓴᓂᐅᔪᒥ ᐊᒻᒪ ᒪᑭᕝᕕᒃ ᐃᑲᔪᖅᓱᐃᕙᖓᑦ, ᐅᖃᓚᐅᖅᐳᖅ.

ᐊᕋᒍᑕᖅ, ᓂᕈᐊᖅᑕᐅᒃᑲᓐᓂᖅᑐᒥ ᑎᒥᖁᑕᐅᔪᒥ ᑎᑎᕋᖅᑎᐅᓂᖓᓄᑦ ᒪᕐᕈᖓᓂ ᑲᑎᒪᔨᐅᓂᖓᓄᑦ, ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ, “ᖁᕕᐊᓇᖅᐳᖅ, ᒥᑭᒡᓕᑎᓐᓇᖅᑐᖅ ᐊᒻᒪ ᐆᒻᒪᕆᒃᑎᒃᑲᓐᓂᖅᑐᖅ ᐅᕙᓐᓂ ᓯᕗᒻᒧᑦ ᐊᔭᐅᕆᓂᕐᒥ.”

ᐅᖃᓚᐅᖅᐳᖅ ᐃᒻᒥᓂᒃᑕᐅᖅ ᐃᓱᒫᓗᒃᐳᖅ ᐅᓄᙱᑦᑐᑯᓗᖕᓂ ᓂᕈᐊᖅᑎᐅᔪᓂ ᓂᕈᐊᓚᐅᖅᑐᓂ.

“ᑕᐃᒪᐃᓯᒪᕗᖅ ᐊᕐᕌᒍᒐᓴᓄᑦ, ᑕᐃᒫᒃ ᓇᓂᓯᔭᕆᐊᖃᖅᐳᒍᑦ ᐱᓕᕆᓂᐅᔪᓂ ᐱᓇᓱᐊᕐᓂᕐᒧᑦ ᐊᒻᒪ ᐱᓗᑕ ᐃᓄᖕᓂ ᑐᓴᖅᑕᐅᓂᕐᒧᑦ, ᑕᑯᓗᑕ ᖃᓄᒃᑲᓐᓂᖅ ᐱᓕᕆᔪᓐᓇᕐᓂᑦᑎᓐᓂ ᓂᕈᐊᖅᑎᑦᑎᓂᕐᒧᑦ,” ᐅᖃᓚᐅᖅᐳᖅ.

ᑎᒥᖁᑕᐅᔪᒥ ᑎᑎᕋᖅᑎᐅᓪᓗᓂ, ᐊᕋᒍᑕᖅ ᑲᒪᒋᔭᖃᖅᐳᖅ ᐊᖏᔪᒥ ᐱᓕᕆᕝᕕᖕᒥ ᐸᖅᑭᕙᒃᑐᒥ ᑕᒪᒃᑭᓂ ᐊᓪᓚᕝᕕᓕᕆᓂᕐᓂ ᐱᓕᕆᐊᒃᓴᓂ ᑎᒥᖁᑕᐅᑉ ᐃᓗᐊᓂ. ᓯᕗᓪᓕᐅᑎᑕᐅᖁᔭᖓ ᐊᕕᒃᑐᖅᓯᒪᓂᐅᔪᓂ ᐱᔭᒃᓴᓂ ᓅᑎᕆᓂᕐᒥ ᑲᑐᔾᔨᖃᑎᒌᖑᔪᒥ ᑰᔾᔪᐊᑉ ᐊᓯᐊᓄᑦ ᐊᒻᒪ ᓴᓇᓗᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑕᒪᒃᑭᓂ ᓄᓇᕕᖕᒥ ᓄᓇᓕᐅᔪᓂ.

ᒫᓐᓇ 8−ᓂ ᑎᑎᕋᕐᕕᒃᑕᓕᒃ, ᐊᒻᒪ ᐅᖃᓚᐅᖅᐳᖅ ᑐᕌᕋᓱᐊᕐᓂᐊᖅᐳᖅ ᓴᖅᑭᑎᑦᑎᓂᕐᒥ ᐊᖏᓂᖅᓴᐅᔪᒥ ᐃᓄᒃᔪᐊᕐᒥ ᐊᖏᒡᓕᒋᐊᖅᑎᑦᑎᓂᕐᒧᑦ ᒪᑭᕝᕕᐅᑉ ᕿᑭᖅᑖᓘᑉ ᑯᐸᐃᒡᓗ ᑕᕐᕋᖓᑕ ᓯᒡᔭᖅᐸᓯᖓᓐᓂ

ᐊᕋᒍᑕᖅ ᐱᓚᐅᖅᐳᖅ 1,212 ᓂᕈᐊᖅᑕᐅᓂᐅᔪᓂ, ᐅᕝᕙᓘᓐᓃᑦ 61.6 ᐳᓴᓐᑎᒥ ᓂᕈᐊᖅᑕᐅᓂᐅᔪᓂ; ᐱᓇᓱᐊᖃᑎᖓ ᔮᓇᑕᓐ ᐃᐴᓚᐅᖅᐳᖅ.

“ᓇᐅᑦᑎᖅᓱᑦᑎᐊᓚᐅᖅᐸᕋ ᓂᕈᐊᒃᓴᐅᑎᑕᐅᓂᖓᓂ; ᐅᓂᒃᑳᕆᓂᖅᓴᐅᔪᓐᓇᓚᐅᖅᐳᖅ ᑲᑐᔾᔨᖃᑎᒌᖑᔪᓂ ᐊᑲᐅᙱᓕᐅᕈᑕᐅᔪᓂ ᐃᓗᐊᓂ ᐊᔾᔨᒌᙱᑦᑐᓂ ᑲᑐᔾᔨᖃᑎᒌᖑᔪᓂ,” ᐅᖃᓚᐅᖅᐳᖅ. “ᐅᑯᐊ ᐊᑲᐅᙱᓕᐅᕈᑕᐅᕗᑦ ᐊᔭᐅᕆᓇᓱᐊᖏᓐᓇᕐᓂᐊᖅᐸᕗᑦ ᐊᒻᒪ ᐅᖃᓪᓚᖕᓂᖃᖅᑎᑦᑎᓇᓱᐊᕐᓗᑕ.”

ᒪᑭᕝᕕᐅᑉ ᒪᓕᒃᑐᒥ ᓂᕈᐊᕐᓂᐅᔪᒥ 2026−ᒥᐅᓂᐊᖅᐳᖅ ᐃᓂᒃᓴᐅᔪᓄᑦ ᐊᖓᔪᖅᑳᑉ-ᑐᒡᓕᐊᓂ ᐊᕙᑎᓕᕆᓂᕐᒥ, ᐆᒪᔪᓕᕆᓂᕐᒥ ᐊᒻᒪ ᖃᐅᔨᓴᕐᓂᕐᒥ, ᐊᒻᒪ ᑮᓇᐅᔭᓕᕆᔨᒧᑦ. ᑕᒪᒃᑭᑦ ᐊᕐᕌᒍᓄᑦ−ᐱᖓᓱᓄᑦ ᑲᑎᒪᐅᔨᐊᕆᕗᑦ.