ᒪᑭᕝᕕᒃ ᓴᖅᑭᑎᑦᑎᕗᖅ ᐸᕐᓇᐅᑎᓂ ᓱᖏᐅᔾᔨᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ

For English version, see Makivvik reveals plan for adapting to climate change

ᒪᑭᕝᕕᒃ ᓴᖅᑭᑎᑦᑎᕗᖅ ᓄᓇᕕᖕᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᓱᖏᐅᔾᔨᓂᕐᒥ ᐸᕐᓇᒍᑎᖓᓐᓂ, ᑲᑐᔾᔭᐅᓪᓗᓂ ᐊᒃᓱᕈᕈᑕᐅᔪᒥ ᓯᒡᔭᖅᐸᓯᖕᒥ−ᓯᒡᔭᖅᐸᓯᖕᒧᑦ ᐊᕐᕌᒍᓂ ᑕᓪᓕᒪᓂ ᐱᓕᕆᐊᖑᔪᒥ.

ᐊᒃᓱᕈᕐᓂᐅᔪᖅ ᐱᒋᐊᓚᐅᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐃᓕᓐᓂᐊᕐᓂᐅᔪᒥ ᑰᔾᔪᐊᕐᒥ ᑕᐅᕙᓂ 2019−ᒥ, 24−ᓂ ᖃᐅᔨᒪᓂᕐᒥ ᑎᒍᒥᐊᖅᑎᐅᔪᓂ ᐱᒋᐊᖅᑎᑦᑎᓚᐅᖅᐳᑦ. ᐊᓱᐃᓛᒃ, ᐅᓄᕐᓂᖅᓴᐅᔪᓂ 150−ᓂ ᐃᓄᖕᓂ ᐃᓚᐅᖃᑕᐅᓕᓚᐅᖅᐳᑦ ᐱᓕᕆᐊᒃᓴᐅᔪᒥ.

ᑎᑎᖅᑲᖁᑕᐅᔪᖅ ᓇᓗᓇᐃᖅᓯᕗᖅ “ᐱᒻᒪᕆᐅᓪᓗᓂ ᐱᓕᕆᓂᐅᕗᖅ ᑲᑐᔾᔨᓪᓗᑕ ᐊᖏᖅᓯᒪᓂᑦᑎᓐᓂ ᓴᐳᔾᔨᓯᒪᓂᕐᒥ ᓄᓇᕕᖕᒥ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪ ᐃᓅᓯᕆᔭᐅᓂᐅᕙᒃᑐᓂ ᑐᙵᕕᖃᕐᔪᐊᖅᑐᓂ ᓯᓚᒥ ᐊᕙᑎᖓᓐᓂ,” ᐅᖃᓚᐅᖅᐳᖅ ᐋᑕᒥ ᑎᓚᐃᔪᓪ ᐊᓚᑯ, ᐊᖓᔪᖅᑳᑉ−ᑐᖓᓕᖓ ᑲᒪᒋᔭᖃᖅᑐᒥ ᒪᑭᕝᕕᐅᑉ ᐆᒪᔪᓕᕆᓂᕐᒧᑦ, ᐊᕙᑎᒧᑦ ᐊᒻᒪ ᖃᐅᔨᓴᕐᓂᕐᒧᑦ, ᑐᓴᒐᒃᓴᓕᐊᖑᔪᒥ.

ᒪᑭᕝᕕᒃ ᐃᓄᖕᓄᑦ ᑎᒥᖁᑕᐅᕗᖅ ᓴᖅᑭᑎᑕᐅᔪᒥ 1978−ᒥ ᓴᖅᑭᑎᑦᑎᓂᕐᒧᑦ ᐃᖅᑲᓇᐃᔮᒃᓴᓂ, ᐱᐅᓯᒋᐊᖅᑎᑦᑎᓂᕐᒥ ᐃᒡᓗᓂ ᖃᓄᐃᓕᖓᓂᖏᓐᓂ ᐊᒻᒪ ᓴᐳᔾᔨᓯᒪᓗᓂ ᐃᓄᐃᑦ ᐅᖃᐅᓯᖓᓐᓂ ᐊᒻᒪ ᐃᓕᖅᑯᓯᖓᓐᓂ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐸᕐᓇᒍᑎᖓ ᐊᑐᖅᑕᐅᓂᐊᖅᐳᖅ ᐊᐅᓚᑦᑎᓂᕐᒥ ᐊᒃᓱᕈᕈᑕᐅᔪᓂ ᒐᕙᒪᐅᔪᓂ ᐊᒻᒪ ᐊᕕᒃᑐᖅᓯᒪᓂᐅᔪᓂ ᓇᖕᒥᓂᕆᔭᐅᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ, ᐊᒻᒪᓗ ᑐᕌᖅᑎᑦᑎᓂᕐᒥ ᑮᓇᐅᔭᖃᖅᑎᑕᐅᓂᐅᔪᒥ ᓄᓇᕕᖕᒥ ᑭᐅᓂᕐᒧᑦ ᐊᕕᒃᑐᖅᓯᒪᓂᐅᑉ ᐱᔭᕆᐊᓕᖏᓐᓂ ᐊᒻᒪ ᓯᕗᓪᓕᐅᔾᔭᐅᖁᔭᐅᔪᓂ ᓱᖏᐅᔾᔨᓂᕐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᐸᕐᓇᒍᑎ ᓴᖅᑭᑎᑕᐅᓚᐅᖅᐳᖅ ᒪᑭᕝᕕᒃᑯᑦ ᐊᕐᕌᒍᑕᒫᒥ ᑲᑎᒪᓂᖓᓂ ᐱᓇᓱᐊᕈᓯᐅᓚᐅᖅᑐᒥ ᖁᐊᖅᑕᕐᒥ, ᐊᒻᒪ ᓇᓗᓇᐃᖅᓯᕗᖅ ᐱᓕᕆᐊᕆᔭᐅᓇᓱᐊᖅᑐᓂ ᐱᔭᕇᖅᑕᐅᔭᕆᐊᓕᖕᓂ ᒪᓕᒃᑐᓄᑦ ᐊᕐᕌᒍᓄᑦ 10−ᓄᑦ.

ᐃᑲᔪᕐᓂᐊᖅᐳᖅ ᑲᑐᔾᔨᖃᑎᒌᖑᔪᓂ ᓲᕐᓗ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓂ ᓄᓇᓕᖕᓂ ᐱᔪᓐᓇᕐᓂᖅᓴᐅᓂᖏᓐᓂ “ᐱᐅᓯᒋᐊᖅᑎᑦᑎᓂᕐᒥ ᓴᙱᓂᐅᔪᒥ ᓯᕗᓂᒃᓴᒥ ᐊᒻᒪ ᐱᑕᖄᓂᒃᑐᓂ ᐊᖏᕐᕋᐅᔪᓂ ᐊᒻᒪ ᓄᓇᓕᖕᓂ ᐊᑐᖅᑕᐅᕙᒃᑐᓂ ᐊᐅᓚᔪᓐᓇᖁᓪᓗᒋᑦ,” ᐅᖃᐅᓯᐅᓪᓗᓂ ᑐᓴᒐᒃᓴᓕᐊᖑᔪᒥ.

ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᑦ ᐃᒃᓯᕙᐅᑕᖓ ᕼᐃᐅᓐᑕ ᔅᓅᐹᓪ ᐅᖃᓚᐅᖅᐳᖅ, “ᐱᔪᓐᓇᕐᓂᑦᑎᓐᓂ ᐊᑐᓕᖅᑎᑦᑎᓂᕐᒥ ᒪᑭᒪᔾᔪᑕᐅᔪᓐᓇᖅᑐᓂ, ᐊᒃᑐᐃᓂᐅᔪᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᓱᖏᐅᔾᔨᓂᐅᔪᒥ ᒪᓕᖕᓂᖃᖅᐳᖅ ᑲᑐᔾᔨᖃᑎᒌᖕᓂᐅᔪᒥ ᐊᒻᒪ ᐊᖏᖅᓯᒪᓂᖏᓐᓂ ᑕᒪᒃᑭᓂ ᐱᓕᕆᖃᑎᒌᒃᑐᓂ, ᐃᓚᖃᖅᑐᒥ ᒐᕙᒪᓂ ᑯᐸᐃᖕᒥ ᐊᒻᒪ ᑲᓇᑕᒥ.”

ᐸᕐᓇᒍᑎ ᐊᕕᒃᑐᖅᓯᒪᓂᖃᖅᐳᖅ ᑎᓴᒪᓄᑦ ᐃᑲᔪᖅᓱᐃᓂᐅᔪᓄᑦ:

• ᐅᖓᕙᕆᐊᖅᓯᓂᕐᒥ ᓄᓇᕕᖕᒥ ᓇᖕᒥᓂᖅᓱᕈᓐᓇᕐᓂᕐᒧᑦ;
• ᓴᐳᔾᔨᓯᒪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᖃᓄᐃᙱᑦᑎᐊᕐᓂᖏᓐᓂ ᐊᒻᒪ ᐃᓕᖅᑯᓯᖓᓐᓂ ᓄᓇᕕᖕᒥᐅᓂ;
• ᐋᖅᑭᐅᒪᑎᑦᑎᓗᓂ ᐊᒻᒪ ᓴᐳᔾᔨᓯᒪᓗᓂ ᒫᓐᓇᐅᔪᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᓄᓇᓕᖕᓂ, ᐊᒻᒪ;
• ᐋᖅᑭᐅᒪᑎᑦᑎᓗᓂ ᑐᓂᓯᓂᐅᔪᒥ ᐱᓪᓚᕆᐅᔪᓂ ᐱᔨᑦᑎᕋᕐᓂᐅᔪᓂ.

ᑎᑎᖅᑲᖁᑕᐅᔪᖅ ᑎᑎᕋᖅᓯᒪᓂᖃᖅᐳᖅ ᐊᑯᓂᐅᔪᒥ ᑐᕌᒐᒃᓴᕆᔭᐅᔪᓂ ᓱᖏᐅᔾᔨᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐊᒻᒪ ᐱᓕᕆᓂᐅᔪᓂ ᐱᓕᕆᐊᖑᔪᓐᓇᖅᑐᓂ ᕿᑎᖅᐸᓯᐊᓂ ᐊᒻᒪ ᕿᓚᒻᒥᐅᔪᒥ.

ᐊᑕᐅᓯᖅ ᐊᑯᓂᐅᔪᒥ ᑐᕌᒐᒃᓴᐅᔪᒥ ᐊᑐᕐᓂᕐᒥ “ᓴᙱᒃᑎᒋᐊᖅᓯᒪᔪᒥ ᐊᑐᕐᓂᐅᔪᒥ ᐃᓄᐃᑦ ᖃᐅᔨᒪᔭᖏᓐᓂ ᐅᖃᐅᔾᔨᓂᕐᒧᑦ ᐊᒻᒪ ᑐᕌᖅᑎᑦᑎᓂᕐᒧᑦ ᓱᖏᐅᔾᔨᓂᐅᔪᒥ ᐸᕐᓇᐃᓂᕐᒥ.”

ᕿᓚᒻᒥᐅᓂᖅᓴᒥ ᐱᓕᕆᐊᕆᔭᐅᓂᖓᓂ ᐃᓚᖃᖅᐳᖅ ᐱᐅᓯᒋᐊᖅᑎᑦᑎᓂᕐᒥ ᐱᔪᓐᓇᕐᓂᐅᔪᒥ ᑎᑎᕋᖅᑕᐅᓂᖏᓐᓂ ᐊᒃᑐᐃᓂᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑕᑯᔭᐅᓂᖏᓐᓂ ᐃᓄᖕᓂ, ᐃᓄᖕᓄᑦ.

“ᓄᓇᕕᖕᒥ ᐃᓄᐃᑦ ᑐᙵᕕᖃᖅᑐᒥ ᐱᔪᓐᓇᕐᓂᖃᖅᐳᑦ ᐃᓱᒪᓕᐅᕆᓂᕐᒥ ᓯᕗᓂᒃᓴᖓᓂ ᐃᓅᖃᑎᒌᑦᑎᓐᓂ ᐊᒻᒪ ᓄᓇᖁᑎᑦᑎᓐᓂ, ᐃᓚᖃᖅᑐᒥ ᐱᔾᔪᑎᖃᖅᑐᒥ ᖃᓄᖅ ᓱᖏᐅᔾᔨᕙᖕᓂᑦᑎᓐᓂ ᓯᓚᒧᑦ ᐊᓯᔾᔨᖅᐸᓪᓕᐅᓂᐅᔪᓄᑦ,” ᑎᑎᖅᑲᖁᑕᐅᔪᖅ ᐅᖃᓚᐅᖅᐳᖅ.

ᐸᕐᓇᒍᑎ ᓇᓗᓇᐃᖅᓯᕗᖅ ᑲᑎᒪᔨᕐᔪᐊᓂ, ᐃᓅᖃᑎᒌᖑᔪᓂ, ᑮᓇᐅᔾᔭᒃᓴᓂᕐᒥ ᐊᒻᒪ ᐊᕙᑎᒥ ᐊᓯᔾᔨᕐᓂᐅᔪᓂ ᐱᔪᓐᓇᕐᓂᖓᓂ ᐊᑯᓂᐅᔪᒃᑯᑦ. ᐊᕕᒃᑐᖅᓯᒪᓂᐅᔪᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᑎᒪᔨᕋᓛᖑᔪᓂ ᐋᖅᑭᒃᑕᐅᔪᖃᓚᐅᖅᐳᖅ ᓇᓗᓇᐃᖅᓯᓂᕐᒥ ᐸᕐᓇᒍᑎᐅᑉ ᑐᕌᒐᕆᔭᖓ ᓱᖏᐅᔾᔭᐅᓂᖓᓂ ᒫᓐᓇᐅᔪᒥ ᓱᓕᓂᐅᔪᓄᑦ

“ᐅᒃᐱᕈᓱᒃᐳᒍᑦ ᒪᓕᒃᑯᑦᑕ ᐆᒥᖓ ᐊᖅᑯᑕᐅᔪᒥ ᓴᖅᑭᑎᓯᒪᔭᑦᑎᓐᓂ ᑲᑎᙵᓪᓗᑕ, ᓄᓇᓕᕗᑦ ᐊᑦᑕᓇᔾᔭᐃᖅᓯᒪᓂᐊᖅᐸᕗᑦ ᐊᒻᒪ ᐱᕈᑦᑎᐊᖏᓐᓇᕐᓂᖏᓐᓂ ᓯᕗᓂᒃᓴᒧᑦ ᐃᓕᖅᑯᓯᖃᑎᒌᖑᔪᓄᑦ,” ᐅᖃᐅᓯᐅᓪᓗᓂ ᐸᕐᓇᒍᑎᒧᑦ.

ᐅᓂᒃᑳᓕᐊᖅ ᐊᑐᐃᓐᓇᐅᕗᖅ ᒪᑭᕝᕕᒃᑯᑦ ᐃᑭᐊᖅᑭᕕᖓᓐᓂ.