ᐊᖑᑎ ᖁᑭᖅᑕᐅᔪᖅ ᐅᐃᓂᐱᒡ ᐸᓖᓯᓄᑦ ᐃᓱᒪᒋᔭᐅᔪᖅ ᓄᓇᕗᒥᐅᑕᐅᔭᕆᐊᒃᓴᖓᓂ

For English version, see Man shot by Winnipeg police believed to be from Nunavut

ᐊᖑᑎ ᖁᑭᖅᑕᐅᔪᖅ ᐸᓖᓯᒧᑦ ᐅᐃᓂᐱᒡᒥ ᑲᐱᓯᑎᓪᓗᒍ ᐸᓖᓯᒥ ᐃᓱᒪᒋᔭᐅᔪᖅ ᑕᓗᕐᔪᐊᕐᒥᐅᑕᐅᓇᓱᒋᔭᐅᓪᓗᓂ, ᑭᓯᐊᓂᓕ ᐃᓚᖃᙱᒻᒪᑦ ᓄᓇᓕᐸᐅᔭᓂ ᓇᓗᓇᐃᕐᓯᔪᓐᓇᖅᑐᒥ ᑖᔅᓱᒥᖓ.

ᐅᓇ ᑕᐃᒪᐃᓕᐅᕈᑎᐅᓚᐅᕐᑐᖅ ᓄᕕᐱᕆ 24-ᒥ 5:09 ᐅᓐᓄᓴᒃᑯᑦ, ᐅᐃᓂᐱᒡᒥ ᐸᓖᓯᓕᕆᔨᒃᑯᑦ ᐅᖃᓚᐅᕐᑐᑦ ᑐᓴᒐᒃᓴᑎᒍᑦ.

ᐊᔾᔨᓕᐅᖅᑕᐅᓂᑯ ᓴᖅᑭᑎᑕᐅᓚᐅᕐᓯᒪᔪᖅ ᕙᐃᔅᐳᒃᑯᑦ.

“ᐸᓖᓯᑦ ᐅᖃᐅᓯᖃᓚᐅᕐᒪᑕ ᐸᓖᓯᒥ ᑲᐱᔭᐅᔪᒥ ᖁᖓᓯᐊᒍᑦ ᐊᒻᒪᓗ ᐸᓴᒋᔭᐅᔪᖅ ᖁᑭᖅᑕᐅᓪᓗᓂ,” ᑐᓴᒐᒃᓴᖅ ᐅᖃᕐᓯᒪᓪᓗᓂ.

ᐸᓴᒋᔭᐅᔪᖅ ᐃᓅᔪᓐᓃᓚᐅᕐᑐᖅ ᐋᓐᓂᐊᕕᖕᒥ ᑖᓐᓇᓕ ᐸᓖᓯ ᑲᒪᒋᔭᐅᓪᓗᓂ ᑲᐱᔭᐅᓯᒪᔭᖓᒍᑦ.

ᖃᐅᒃᐸᙳᖅᑎᓪᓗᒍ, ᓂᑭ ᑯᒪᒃᓯᐅᑎᒃᓴᖅ, ᐊᐅᓚᑦᑎᔨ ᐊᖓᔪᖅᑳᖅ ᑐᙵᓱᒋᑦ ᐃᓄᐃᑦ ᐅᐸᒡᕕᖓᓂ ᐅᐃᓂᐱᒡᒥ, ᐅᖄᓚᕝᕕᐅᓚᐅᕐᑐᖅ ᑕᕐᕆᔭᒐᓕᐅᖅᑎᓄᑦ ᐊᐃᐲᑎᐊᓐᑯᓐᓂ (APTN) ᐅᖃᐅᔾᔭᐅᓪᓗᓂ ᐃᓄᒃ ᖁᑭᖅᑕᐅᔪᖅ ᐅᓇᐅᓂᕋᖅᑕᐅᓪᓗᓂ 24-ᓂ ᐅᑭᐅᓕᒃ ᔪᐊᑕᓐ ᓵᓕ ᑕᓗᕐᔪᐊᕐᒥᐅᑕᖅ.

“ᐅᓇ ᐃᓗᒻᒧᑦ ᐃᖢᐊᙱᑐᐊᓘᓚᐅᕐᑐᖅ,” ᐅᖃᕐᑐᖅ ᐊᐱᕐᓱᖅᑕᐅᓪᓗᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑐᙵᓱᒋᑦ ᐃᓄᐃᑦ ᐅᐸᒡᕕᖓ ᑮᓇᐅᔭᓕᐅᕋᓱᒐᑎ ᐃᓄᖕᓂ ᐃᑲᔪᖅᑐᐃᔨᐅᔪᑦ ᓄᓇᓕᕐᔪᐊᓂ ᓄᓇᖃᕈᓐᓇᑦᑎᐊᕐᓂᒥ. ᑯᒪᒃᓯᐅᑎᒃᓴᖅ ᐅᖃᓚᐅᕐᑐᖅ ᐱᓕᕆᖃᑎᖃᕐᓯᒪᓕᕐᓂᖏᓐᓂᒃ 1,200 ᐅᖓᑖᓂ ᐃᓄᖕᓂ, ᐃᓚᒋᔭᐅᓪᓗᓂ ᓵᓕ.

ᐅᖄᓚᕝᕕᐅᕌᓂᒃᑎᓪᓗᒍ ᑐᓴᒐᒃᓴᓕᐅᖅᑎᒥ, ᑯᒪᒃᓯᐅᑎᒃᓴᖅ ᖃᐅᔨᓴᖅᑎᓄᑦ ᖃᐅᔨᓇᓱᓕᓚᐅᕐᑐᖅ ᒫᓂᑑᐸᒧᑦ (Independent Investigation Unit),ᑖᒃᑯᐊᓗ ᖃᐅᔨᓴᖅᑕᐅᔪᒥ ᐅᐃᓂᐱᒡ ᐸᓖᓯᓄᑦ ᖃᐅᔨᓴᖔᓕᓚᐅᖅᖢᑎᒃ.

ᑕᐃᑲᓂ ᑭᒡᒐᖅᑐᐃᔨ ᓇᓗᓇᐃᕐᓯᓚᐅᕐᑐᖅ ᐊᐃᐲᑏᐊᓐᑯᓐᓄᑦ ᑐᓴᒐᒃᓴᓕᐅᖅᑎᐅᑉ ᐅᖃᐅᓯᕆᔭᖓᓂ, ᐅᖃᕐᑐᖅ.

ᐸᓖᓯᓄᑦ ᐅᖃᕐᑎᒋᔭᐅᔪᖅ ᐅᖃᓪᓚᒍᒪᓚᐅᙱᒻᒪᑦ ᐅᖃᕐᕕᐅᓇᓱᒃᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ ᑯᒪᒃᓯᐅᑎᒃᓴᖅ ᐅᖃᓚᐅᕐᑐᖅ ᑖᒃᑯᐊ ᐱᓕᕆᕝᕕᒋᔭᖏ “ᐅᒃᐱᕆᑐᐃᓐᓇᖅᖢᒋᑦ ᐅᖃᐅᓯᐅᔪᖅ” ᐸᓖᓯᓯᓄᑦ ᐊᒻᒪ ᑐᓴᒐᒃᓴᓕᐅᖅᑎᓄᑦ, ᓲᖃᐃᒻᒪ ᓵᓕᐅᑉ ᐃᓚᖏᑦ ᐅᐃᓂᐱᒡᒥᐅᑕᐅᙱᒻᒪᑕ ᑖᔅᓱᒥᖓ ᓇᓗᓇᐃᕐᓯᓇᔭᖅᑐᓂᒃ.

“ᖃᐅᔨᓇᓱᒃᑲᑦᑕ ᐅᑯᓄᖓ ᑐᖁᖓᔪᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᕗᑦ ᑖᔅᓱᒥᖓ ᐱᓕᕆᖃᑎᖃᖃᑦᑕᓚᐅᕐᑐᖅ ᓇᓗᓇᐃᕐᓯᔪᓐᓇᕋᔭᕆᐊᒃᓴᖓᓂᒃ,” ᑯᒪᒃᓯᐅᑎᒃᓴᖅ ᐅᖃᕐᑐᖅ.

ᓵᓕ ᑎᒍᔭᐅᖃᑦᑕᕐᓯᒪᔪᖅ ᐊᒻᒪ ᐊᓂᑎᑕᐅᕙᒃᖢᓂ ᐊᒥᓱᐃᒻᒪᕆᒃᖢᓂ ᐊᕐᕌᒍᓂ ᐊᓂᒍᕐᓯᒪᓕᕐᑐᓂᒃ.

ᐊᖏᕐᕋᖃᙱᖢᓂᓗ ᑕᐃᒪᙵᑦ 2023-ᖑᓚᐅᕐᑐᒥ ᐊᒻᒪᓗ ᐋᖓᔮᕐᓇᖅᑐᓂ ᐊᑐᓗᐊᕐᓯᒪᓪᓗᓂ, ᐅᖃᕐᑐᖅ.

ᖃᖓᑦᑎᐊᓵᕐᓕ ᓄᕕᐱᕆ 19-ᖑᑎᓪᓗᒍ ᓵᓕ ᐊᓂᑎᑕᐅᓚᐅᕐᑐᖅ ᑎᒍᔭᐅᓯᒪᓚᐅᖅᖢᓂ ᐸᓯᒧ ᓄᖃᕐᕕᒃᒥ ᔪᓂᓯᑎ ᓂᐅᕕᕐᕕᐊᓗᒃ ᖃᓂᒋᔭᖓᓂ, ᐅᖃᕐᑐᖅ. ᐊᓂᑎᑕᐅᕝᕕᒋᓚᐅᕐᑕᖓᓂ ᐅᓪᓗ ᑕᓪᓕᒪᑦ ᓯᕗᓂᐊᓂ ᖁᑭᖅᑕᐅᓚᐅᕐᓂᕋᖅᖢᓂᐅᒃ.

ᑯᒪᒃᓯᐅᑎᒃᓴᖅ ᐅᖃᓚᐅᕐᑐᖅ ᓵᓕᐅᑉ ᐃᓚᖏᓐᓂ ᐅᖃᖃᑎᖃᕐᓯᒪᓕᕐᓂᖓᓂ.

ᖃᐅᔨᓴᖅᑕᐅᕌᓂᒃᐸᑦ ᐊᒻᒪᓗ ᓇᓗᓇᐃᖅᑕᐅᕌᓂᒃᐸᑦ ᑖᒻᓇ, ᐅᖃᓚᐅᕐᑐᖅ ᑐᙵᓱᒋᑦ ᓄᓇᕗᒥᑦ ᐃᓗᕕᖅᑕᐅᑎᑦᑎᓇᓱᖕᓂᐊᕐᓂᕋᖅᖢᑎᒃ.

ᐊᒥᓱᑦ ᐃᓄᐃᑦ ᖃᓪᓗᓈᓄᑦ ᓅᑦᑐᑦ ᓱᖏᐅᑎᒍᓐᓇᖃᑦᑕᙱᒻᒪᑕ ᐃᓄᒋᐊᓂ, ᑯᒪᒃᓯᐅᑎᒃᓴᖅ ᐅᖃᕐᑐᖅ — ᐊᖏᕐᕋᖃᕈᓐᓃᖅᐸᒃᖢᑎᒃ, ᐋᖓᔮᕐᓇᖅᑐᓂᒡᓗ ᐊᑐᓗᐊᓕᖅᐸᒃᖢᑎᒃ ᐊᒻᒪᓗ “ᐃᖕᒥᖕᓂ ᖃᓄᖅ ᐃᓅᓇᓱᒋᐊᒃᓴᖅ ᐱᓇᓱᑐᐃᓐᓇᓕᖅᖢᑎᒃ.”

ᑖᓐᓇᓕ ᓵᓕᐅᒍᓂ ᑕᐃᒪᓕ ᑕᒪᒃᑯᓄᖓᑦᑕᐅᖅ ᓈᒻᒪᙱᓕᐅᕈᑎᖃᕐᓯᒪᖕᒪᑦ, ᐅᖃᕐᑐᖅ.

ᐱᑕᖃᕐᓂᕐᓴᐅᔭᕆᐊᖃᕐᒪᑦ “ᐱᓕᕆᐊᖃᕈᓐᓇᕐᓂᕐᓴᐅᓗᑎᒃ” ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑕᒪᒃᑯᐊ ᐃᓄᐃᑦ ᖃᓪᓗᓈᓄᐊᕐᑐᑦ ᐃᑲᔪᖅᑕᐅᓂᕐᓴᐅᔪᓐᓇᕐᓗᑎᒃ ᐊᒻᒪ ᑲᒪᒋᔭᐅᓂᕐᓴᐅᔪᓐᓇᕐᓗᑎᒃ, ᑯᒪᒃᓯᐅᑎᒃᓴᖅ ᐅᖃᕐᑐᖅ.

“ᖃᓪᓗᓈᓄᑦ ᓅᓕᖃᑦᑕᕐᒪᑕ ᐱᔪᒪᓂᕐᒨᙱᑦᑐᖅ, ᑭᓯᐊᓂᓕ ᐊᓯᐊᒎᕐᕕᖃᖃᑦᑕᙱᒻᒪᑕ,” ᐅᖃᕐᑐᖅ.