ᐱᔮᕆᓂᕐᒨᙱᑦᑐᖅ ᒥᑦᑎᒪᑕᓕᒃᒥᐅᑕᖅ ᐸᓯᔭᒃᓴᐅᑎᑕᐅᔪᖅ ᑐᖂᑦᑎᔪᕕᓂᐅᓂᖓᓂᒃ

For English version, see Manslaughter verdict for Pond Inlet man charged with murder

ᒥᑦᑎᒪᑕᓕᒃᒥᐅᑕᖅ ᐊᖑᑎ ᐃᖅᑲᖅᑐᖅᑕᐅᓚᐅᕐᓯᒪᔪᖅ ᑕᒪᑐᒪᓂ ᐊᕐᕌᒍᒥ ᑐᖂᑦᑎᓯᒪᓂᕐᒧ ᐱᔮᕆᓂᕐᒨᙱᑦᑐᖅ ᑐᖂᑦᑎᓂᕐᒥᒃ, ᓄᓇᕗᒥᑦ ᐃᖅᑲᓇᐃᔨ ᑕᐃᒪᐃᑎᑦᑎᓚᐅᕐᑐᖅ ᐅᒃᑑᐱᕆ 4-ᒥ.

ᕗᐄᓐ ᐸᓂᒃᐸᑯᑦᓱ, ᑕᐃᔅᓱᒪᓂ 19-ᖑᓚᐅᕐᓯᒪᔪᖅ, ᐸᓯᔭᒃᓴᙳᖅᑎᑕᐅᓚᐅᕐᓯᒪᖕᒪᓐ ᑐᖂᑦᑎᓂᖓᓂᒃ ᕼᐋᓇᔅ ᐳᕌᓐᒥ ᔫᓂ 30, 2019 ᐅᓪᓛᖓᓂ, ᐸᓖᓯᒃᑯᑦ ᖃᐅᖁᔭᐅᓚᐅᕐᓯᒪᔪᑦ ᐃᒡᓗᒧᑦ 2600-ᖏᓐᓃᑦᑐᓂᒃ ᐃᖃᓗᖕᓂ ᑕᕝᕙᓂᓗ ᐊᖑᑎᒥ ᐋᓐᓂᖅᓯᒪᔪᖅᑕᖃᖅᖢᓂ.

ᐸᓖᓯᑦ ᐃᖃᓗᖕᓂᑦ, ᓄᓇᕗᒥᓪᓗ ᐸᓖᓯᒃᑯᑦ ᐱᑦᑎᐊᙱᔾᔪᑎᐅᓗᐊᖅᑐᓄᑦ ᐱᓕᕆᐊᖃᖅᑐᑦ ᐊᒻᒪᓗ ᖃᓄᐃᓕᕐᔪᐊᑐᓄᑦ ᐱᓕᕆᔨᐅᔪᑦ ᕿᓂᓕᓚᐅᕐᓯᒪᔪᑦ ᐸᓂᒃᐸᑯᑦᓱᒥ, ᐃᓱᒪᒋᔭᐅᓪᓗᓂ ᕿᒫᔭᕆᐊᒃᓴᖓᓂᒃ ᐊᒻᒪᓗ ᓄᓇᓕᖕᓃᖢᓂ.

ᐸᓖᓯᒃᑯᑦ ᓇᓂᓯᓕᓚᐅᕐᓯᒪᔪᑦ ᐅᓪᓛᓱᖓᒃᑯᑦ ᕿᓂᖅᑕᐅᓕᖅᑎᓪᓗᒍ ᐊᒻᒪ ᑎᒍᔭᐅᓪᓗᓂ. ᐅᓇ ᐃᖃᓗᖕᓂ ᐊᓕᐊᓇᐃᑦ ᓴᓇᙳᐊᖅᑎᓂᒃ ᖁᕕᐊᓲᑎᖃᕐᓂᖅ ᓄᖅᑲᖅᑎᑕᐅᓚᐅᑲᒃᖢᓂ ᕿᓂᕐᓂᖏᓐᓂᒃ ᑖᔅᓱᒥᖓ.

ᐸᓂᒃᐸᑯᑦᓱ ᐱᓕᕆᐊᖑᓚᐅᕐᓯᒪᔪᖅ ᐃᖅᑲᖅᑐᐃᔨᑐᐊᒧᑦ ᐃᖃᓗᖕᓂ ᒫᔅᓯᐅᑎᓪᓗᒍ ᐆᒧᖓ ᐃᖅᑲᖅᑐᐃᔨ ᓲᓴᓐ ᓵᔅᕗᐊᑦ.

ᐅᒃᑑᐱᕆ 4-ᒥ ᐃᖅᑲᖅᑐᐃᔨ ᓵᔅᕗᐊᑦ ᐅᐸᒍᑎᔪᓐᓇᓚᐅᙱᓐᓂᖓᓄᑦ ᐅᓇ ᐃᖅᑲᖅᑐᐃᔨ ᕙᐃᑐᓪ ᐅᓕᑦ ᐅᖃᓕᒫᓚᐅᕐᑐᖅ ᓵᔅᕗᐊᑦ ᐃᓱᒪᓕᐊᕆᓂᑯᖏᓐᓂᒃ ᐃᖃᓗᖕᓂ ᐃᖅᑲᖅᑐᐃᕕᒃᒥ.

ᓵᔅᕗᐊᑦ ᐅᖃᓚᐅᕐᑐᖅ ᐸᓂᒃᐸᑯᑦᓱ ᖁᑭᕆᐊᕐᓂᕋᓚᐅᕐᓯᒪᖕᒪᓐ ᐊᑕᐅᓰᖅᖢᓂ ᐳᕌᓐᒥ ᑖᔅᓱᒪ ᐊᑦᑕᖓᑕ ᐃᒡᓗᖓᓂ 7:25 ᐅᓪᓛᒃᑯᑦ ᔫᓂ 30, 2019-ᖑᑎᓪᓗᒍ.

ᑖᓐᓇ ᖁᑭᖅᑕᐅᓚᐅᕐᓴᖅ ᓴᐅᒥᐊᒍᑦ ᑲᓈᖓᓂᒃ ᐊᒻᒪ ᐃᒡᓗᐊᓅᖅᖢᓂ ᑲᓈᖓᑕ, ᑖᓐᓇᓗ ᐊᐅᓗᐊᕐᓂᖓᓄᑦ ᐃᓅᔪᓐᓃᓚᐅᕐᑐᖅ ᑭᖑᓂᑦᑎᐊᖓᒍᑦ.

ᐃᖅᑲᖅᑐᖅᑕᐅᑎᓪᓗᒍ ᐸᓂᒃᐸᑯᑦᓲᑉ ᓗᐊᐃᔭᖏᑦ ᐃᒻᒥᓂ ᓴᐳᑎᓯᒪᓚᐅᕐᓯᒪᓂᖓᓂᒃ ᐊᒻᒪ ᐃᓚᖓᓂᒃ ᐳᕌᓐᒥ ᐅᓪᓛᖓᓂ ᖁᑭᖅᓴᖅᑐᖃᖅᑎᓪᓗᒍ.

ᑭᐅᓗᒍᑎᖃᓚᐅᕐᒥᔪᑦ ᐸᓂᒃᐸᑯᑦᓱᒃ ᑕᐃᒪᐃᓕᐅᓕᓚᐅᕐᓯᒪᓂᖓᓂᒃ ᐸᒡᕕᓵᕆᔭᐅᓂᖓᓄᑦ ᑕᐃᔅᓱᒪᓂ, ᐊᒻᒪᓗ ᐋᖓᔮᕐᓂᖓᓄᑦ ᐸᓂᒃᐸᑯᑦᓱ ᑐᖁᑎᑦᑎᓇᓱᓚᐅᙱᑦᑐᖅ ᐳᕌᓐᒥ.

ᐃᖅᑲᖅᑐᐃᔨᑦ ᑭᐅᓗᓚᐅᕐᒪᑕ ᐸᓂᒃᐸᑯᑦᓱ – ᐃᖃᓗᖕᓄᑦ ᓄᒃᑎᓵᖅᑐᕕᓂᖅ – ᐸᓯᔭᒃᓴᐅᓂᕋᖅᖢᒍ ᑐᖁᑎᑦᑎᓇᓱᖕᓂᖓᓂᒃ ᐊᒻᒪᓗ ᑐᖂᑦᑎᓇᓱᓚᐅᕐᓂᖓᓂᒃ ᐳᕌᓐᒥ.

ᐃᖅᑲᖅᑐᖅᑕᐅᑎᓪᓗᒍ, ᐅᖃᐅᓯᖃᓚᐅᕐᒪᑕ ᑐᓴᐅᒪᔾᔪᑎᓕᕆᕝᕕᒃᑯᑦ ᑎᑎᕋᕐᓯᒪᓂᖓᓂᒃ ᖁᑭᕐᓯᓂᐊᕐᓂᕋᖅᖢᓂ ᐳᕌᓐᒥ.

ᑎᑎᕋᖅᑕᐅᓯᒪᔪᑎᒍᑦ ᐊᖏᕈᑎᐅᔪᓂᒃ ᖃᓄᐃᓕᐅᕐᓂᕐᒧᑦ, ᐸᓂᒃᐸᑯᑦᓱ ᐃᓱᒫᓘᑎᖃᒻᒪᕆᓚᐅᕐᑐᖅ ᐸᓖᓯᓄᑦ ᑎᒍᔭᐅᑎᓪᓗᒍ.

“ᒥᔅᑕ ᐸᓂᒃᐸᑯᑦᓱ ᕿᐊᓯᓚᐅᕐᓯᒪᔪᖅ: ‘ᐆ, ᑐᖁᖕᒫ?!’ ᐊᒻᒪ, ‘ᓂᐅᖓᓄ ᑐᕌᖅᑎᓚᐅᕋᓗᐊᖅᑐᖓ ᑐᖁᔾᔮᙱᒻᒪ. ᐊᐃᑦᑖ, ᒪᒥᐊᓇᖅ…’” ᓵᔅᕗᐊᑦ ᑎᑎᕋᕐᓯᒪᓚᐅᕐᑐᖅ.

ᑭᖑᓂᐊᒍᓪᓕ ᐃᖅᑲᖅᑐᐃᔨ ᓵᔅᕗᐊᑦ ᐅᓇ ᐃᒻᒥᓂᒃ ᓴᐳᑎᓯᒪᓂᕐᒨᓂᕋᖅᑕᐅᓂᖓ ᓱᖁᑎᒋᓚᐅᙱᑕᖓ, ᑭᓯᐊᓂᓕ ᐅᖃᓚᐅᕐᑐᖅ ᐸᓂᒃᐸᑯᑦᓱ ᑐᖁᑎᑦᑎᒋᐊᓚᐅᙱᓐᓂᕋᖅᖢᓂᐅᒃ ᐳᕌᓐᒥ.

“ᐃᓱᒪᓕᐅᕆᓂᖅ ᐆᒥᖓ ᑐᑭᖃᙱᑦᑐᒥᒃ ᐅᖃᐅᓯᐅᔪᓐᓇᙱᓚᖅ ᓈᒻᒪᓕᖅᑎᑕᐅᔪᓐᓇᙱᓚᕐᓘᓐᓃᑦ. ᑭᓯᐊᓂᓕ ᐊᑐᖅᑕᐅᔪᓐᓇᖅᑐᖅ ᑭᓱᒥ ᐱᔾᔪᑎᖃᕐᒪᖔᑦ ᒥᔅᑕ ᐸᓂᒃᐸᑯᑦᓱ ᖁᑭᖅᓯᑎᓪᓗᒍ ᒥᔅᑕ ᐳᕌᓐᒥ,” ᑎᑎᕋᕐᑐᖅ.

ᐃᖅᑲᖅᑐᖅᑕᐅᑎᓪᓗᒍ, ᖃᓄᐃᓕᔾᔪᑎᓂᒃ ᖃᐅᔨᓴᖅᑎ ᐊᐱᖅᓱᖅᑕᐅᓚᐅᕐᒥᖕᒪᓐ ᐅᖃᖅᖢᓂ ᑲᓈᖓᒍᑦ ᖁᑭᖅᑕᐅᔪᑦ ᑐᖁᓐᓇᕋᓱᒋᙱᖢᓂᐅᒃ.

“ᐅᓇ ᒥᔅᑕ ᐸᓂᒃᐸᑯᑦᓱ ᑐᕌᖅᑎᓚᐅᕐᓂᖓ ᒥᔅᑕ ᐳᕌᓐᓂ ᓂᐅᖏᓐᓄ ᐃᓱᒪᓇᕐᑐᖅ ᐋᓐᓂᕐᓯᓇᓱᑐᐃᓐᓇᓚᐅᕐᓂᖓᓂᒃ, ᑭᓯᐊᓂᓕ ᓂᐅᖓ ᓴᙱᔪᐊᓗᒃᒥ ᖁᑭᖅᑕᐅᓯᒪᒍᓂ,” ᓵᔅᕗᐊᑦ ᑎᑎᕋᖅᑐᖅ.

ᐸᓂᒃᐸᑯᑦᓱ ᐸᓖᓯᓄ ᑎᒍᔭᐅᓕᕋᒥ ᑲᒪᓚᐅᕐᓯᒪᓂᖓ ᓇᓗᓇᓚᐅᙱᓚᖅ ᑐᖁᑎᑦᑎᓇᓱᓚᐅᙱᓐᓂᖓᓂᒃ, ᓵᔅᕗᐊᑦ ᑎᑎᕋᖅᑐᖅ.

ᐸᓂᒃᐸᑯᑦᓱ ᐃᖅᑲᖅᑐᖅᑕᐅᕌᓂᖕᓂᐊᖅᑐᖅ ᓄᕕᐱᕆ 4-ᒥ 9:30 ᐅᓪᓛᒃᑯᑦ.