ᐱᔪᒪᓂᐊᕋᓱᒋᔭᐅᔪᑦ ᐅᓇ ‘ᑭᖑᓪᓕᖅ ᐊᖏᔪᖅ ᓇᖕᒥᓂᖅ ᐃᒡᓗᖃᕐᓂᕐᒧᑦ ᐱᓕᕆᐊᒃᓴᖅ’

For the English version of this story, please see Many applicants expected for ‘next big homeownership program.’

ᓄᓇᕗᒥᑦ ᐃᒡᓗᓕᕆᔨᓄᑦ ᑎᒥᐅᔪᖅ ᐱᓇᓲᑎᒃᓴᓂ ᐅᓄᕐᓂᕐᓴᓂ ᐱᓂᐊᕋᓱᒋᔪᐃᑦ ᐅᕘᓇ ᓄᑖᒃᑯᑦ ᓄᓇᕗᒥᑦ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᓄᑦ ᐱᓕᕆᐊᒃᓴᕐᒧᑦ ᐊᖏᕈᓐᓇᖅᑕᖏᑦᑕ ᐅᖓᑖᓄᑦ, ᐅᖃᕐᑐᖅ ᐊᖓᔪᖅᑳᑉ ᑐᒡᓕᖓ ᐊᐅᓚᑦᑎᓂᕐᒧᑦ ᔨᒥ ᒪᐃᓐ.

ᐅᕘᓇ ᓄᑖᒃᑯ ᐱᓕᕆᐊᕆᔭᐅᓇᓱᒃᑐᒃᑯᑦ, ᓄᓇᕗᒻᒥᐅᑕᑦ ᑮᓇᐅᔭᑎᒍᑦ ᐃᑲᔫᑎᒃᓴᖅᑖᕐᓂᐊᖅᑐᑦ ᓂᐅᕕᕈᑎᒋᓂᐊᖅᑕᖏᓐᓂ ᐃᒡᓗᒃᓴᓂ, ᑖᒃᑯᐊᓗ ᓇᖕᒥᓂᖅ ᐃᒡᓗᓕᐅᕐᓂᐊᕐᓗᓂᔾᔪᑦ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ 10-ᓂ 15-ᓄ ᐱᓇᓱᒍᑎᓂ ᐱᓂᐊᕈᒪᔪᑦ ᑕᒪᑐᒪᓂ ᐊᕐᕌᒍᒥ, ᐅᓄᕐᓯᒋᐊᕋᔭᖅᖢᑎᒃ ᒪᐅᖓ 40 ᐊᒻᒪ 50 ᐊᑯᓐᓂᖓᓄᑦ ᐱᓇᓱᒍᑎᓂ ᐱᔪᒪᒃᑲᓐᓂᓕᖅᐸᑕ ᓯᕗᓂᑦᑎᓐᓂ, ᒪᐃᓐ ᐅᖃᓚᐅᕐᑐᖅ

“ᐃᓱᒪᔪᖓ ᐱᓇᓱᒃᑐᑦ ᐅᓄᕐᓂᕐᓴᐅᓂᐊᕋᓱᒋᓪᓗᒋᑦ ᐃᑲᔪᕈᓐᓇᕐᓂᐊᖅᑕᑦᑎᓐᓂ — ᑕᐃᒪᓐᓇᓗ ᓈᒻᒪᙱᓕᐅᕈᑎᑦᑎᐊᕙᐅᓪᓗᓂ,” ᐅᖃᕐᑐᖅ.

ᐱᓇᓱᒍᒪᔪᑦ ᐱᓇᓱᒍᓐᓇᕐᑐᑦ ᐅᒃᑑᐱᕆ 18 ᐊᓂᒍᓚᐅᖅᑎᓐᓇᒍ

ᐅᓇ ᓄᓇᕗᒥᑦ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᓄᑦ ᐱᓕᕆᐊᒃᓴᖅ ᓴᖅᑭᑎᑦᑎᒃᑲᓐᓂᕈᑎᐅᔪᖅ ᐊᔾᔨᐸᓗᐊᓂ ᐱᓕᕆᐊᖑᓚᐅᕐᓯᒪᔪᒥ 1980-ᖏᓐᓂ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᓄᑦ ᐱᓕᕆᐊᒃᓴᖅ ᐊᐅᓚᑕᐅᓂᑯ ᓄᓇᑦᓯᐊᕐᒥ ᒐᕙᒪᒃᑯᓐᓄᑦ. ᓄᓇᖃᖅᑐᑦ ᓂᕈᐊᕈᓐᓇᖅᑐᑦ ᖃᓄᐃᓕᖓᓂᐊᕐᓂᖓᓂ ᐃᒡᓗ ᑎᑭᓵᒃᓴᓂ, ᐃᒡᓗᒃᓴᓂᒡᓗ ᑎᑭᕝᕕᐅᓗᑎ ᐊᑭᖃᙱᑦᑐᓂᒃ ᐊᒻᒪᓗ ᓇᖕᒥᓂᖅ ᐃᒡᓗ ᓴᓇᓗᓂᔾᔪᒃ.

ᐊᓂᒍᐃᑦᑎᐊᕐᓯᒪᒋᔭᐅᓪᓗᓂ, ᐅᓇ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᖅ ᑮᓇᐅᔭᖅᑐᓗᐊᕐᓇᙱᑦᑐᖅ ᐊᒻᒪᓗ ᐃᒡᓗᓕᕆᔨᒃᑯᓐᓂ ᐃᑲᔪᕈᑎᐅᓪᓗᓂ.

ᓄᑖᓕᓴᐅᓂᕐᓴᖅ ᐊᑎᖃᖅᑎᑕᐅᔪᖅ ᓄᓇᕗᒥᑦ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᖅ ᐊᒻᒪᓗ “ᑭᒃᑯᓕᒫᓄᑦ ᕿᒻᒥᖏᓐᓄᓪᓗ ᐱᔭᐅᔪᒪᓯᒪᔪᖅ,” ᒪᐃᓐ ᐅᖃᕐᑐᖅ.

ᖃᒪᓂᑦᑐᐊᕐᒥ ᒪᐃᔭᒋᔭᐅᔪᖅ ᑭᐊᕕᓐ ᐃᒃᓯᒃᑖᕐᔪᒃ ᐅᖃᓚᐅᕐᑐᖅ ᐅᖃᖃᑎᖃᕐᓯᒪᓂᕋᖅᖢᓂ ᐅᓄᕐᑐᓂ ᓄᓇᖃᖅᑐᓂ ᑖᔅᓱᒧᖓ ᐱᓇᓱᒍᒪᓂᕋᖅᑐᓂᒃ, ᑭᓯᐊᓂᓕ ᓱᓕ ᐱᓇᓱᓚᐅᙱᑦᑐᑦ.

“ᐃᓱᒪᔪᖓᓕ ᐃᓄᐃᑦ ᑖᔅᓱᒥᖓ ᐱᓇᓱᖁᓪᓗᒋᑦ ᐱᓕᕆᐊᒃᓴᒥ, ᓲᖃᐃᒻᒪ ᐱᓇᓱᒍᑎᒻᒪᕆᐅᖕᒪᑦ ᓇᖕᒥᓂᖅ ᐊᖏᕐᕋᖃᕈᓐᓇᕐᓂᕐᒧᑦ,” ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ.

ᐃᒃᓯᒃᑖᕐᔪᒃ, ᓇᖕᒥᓂᖅ ᐃᒡᓗᖃᕐᑐᖅ, ᓯᕗᓪᓕᖅᐹᒥ ᐃᒡᓗᑖᕋᓱᒃᑎᓪᓗᒍ 2020-ᒥ, ᐅᖃᓚᐅᕐᑐᖅ ᐱᓕᕆᑎᑕᐅᔪᖅ ᐊᑭᖃᕐᓂᕋᐃᓪᓗᓂ $1.2 ᒥᓕᐊᓐᓂ ᓄᑖᒥ 1,400 ᑭᑉᐹᕆᒃᑎᓯᒪᔪᓂ ᕗᑦᓂ ᓄᑖᒥ ᓴᓇᓂᐊᕐᓗᓂ. ᓄᓇᕗᒥᑦ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᖅ ᑖᔅᓱᒥᖓ ᐊᑭᓕᐅᑎᒥ ᐱᑕᖃᕈᓐᓃᖅᑎᑦᑎᓚᐅᕐᑐᑦ.

“ᐃᓄᐃᑦ ᐃᓱᒪᓚᐅᙱᑦᑐᑦ ᓇᖕᒥᓂᖅ ᐃᒡᓗᖃᕐᓂᕐᒥ ᒫᓐᓇ ᐃᓱᒪᖃᓕᕐᑐᑦ ᓇᖕᒥᓂᖃᕈᒪᓂᕐᒥᒃ,” ᐅᖃᕐᑐᖅ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᑐᖅᑎᑦᑎᓂᐊᕐᑐᑦ $250,000-ᓂ, ᐊᒻᒪ ᐊᑭᓕᒃᓴᐅᔪᓐᓃᕐᓗᓂ ᐊᕐᕌᒍᓂ ᖁᓕᓂ, ᓂᐅᕕᕈᑎᐅᓂᐊᖅᑐᒥ ᐃᒡᓗᒃᓴᒥ.

ᑭᒃᑯᑐᐃᓐᓇᐃᑦ ᐱᓇᓱᒍᒪᔪᑦ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᑐᖁᔭᐅᔪᓂᒃ ᐊᑐᕈᓐᓇᕆᐊᖃᕐᓂᐊᖅᑐᑦ, ᐃᓚᖃᖅᖢᓂ ᐊᕐᕌᒍᖃᕆᐊᖃᕐᓂᕐᒥ 18-ᓂ ᐅᖓᑖᓄ ᐊᒻᒪᓗ ᓇᖕᒥᓂᖅ ᐃᒡᓗᖓᓂ ᐊᑭᓕᕐᓱᐃᔪᓐᓇᕐᓗᓂ. ᐊᑭᓕᒃᓴᖃᕆᐊᖃᙱᑦᑐᑦ ᐃᒡᓗᓕᕆᔨᒃᑯᓐᓄᑦ ᐅᕝᕙᓘᓐᓃᑦ ᐊᑭᓕᒃᓴᐃᔭᖅᐸᓪᓕᐊᔾᔪᑎᒃᓴᓂ ᐋᖅᑭᒃᓱᐃᖃᑎᖃᕐᓗᑎᒃ ᐃᒡᓗᖃᖅᑎᑦᑎᔨᐅᔪᓂ.

ᓄᓇᕗᒥᑦ ᐃᒡᓗᓕᕆᔨᒃᑯᑦ ᖃᐅᔨᓇᓱᖕᓂᐊᖅᑐᑦ ᐱᓇᓱᒃᑐᓂ ᓇᓗᓇᐃᒃᑯᑦᑎᕐᓱᐃᓂᒃᑯᑦ ᐃᒡᓗᓕᐅᕈᓐᓇᕆᐊᒃᓴᖏᓐᓂ; ᐊᑭᓕᒃᓴᓕᕆᓂᒃᑯᑦ; ᐊᒻᒪᓗ ᖃᓄᐃᑦᑑᓂᑦᑎᒍᑦ, ᓲᕐᓗ ᐃᓅᒋᐊᒃᓴᖏᓐᓂ ᐊᒻᒪᓗ ᖃᓄᖅ ᐊᑯᓂᐅᑎᒋᔪᖅ ᓄᓇᕗᒦᑦᑕᕆᐊᒃᓴᖏᓐᓂ.

ᒪᐃᓐ ᐅᖃᓚᐅᕐᑐᖅ ᒪᕐᕈᐃᓕᖓᓂᖓᓂᒃ ᐊᖏᖅᑕᐅᕙᓪᓕᐊᓇᓱᖕᓂᖅ. ᓯᕗᓪᓕᕐᒥ, ᐃᒡᓗᓕᕆᔨᒃᑯᑦ ᐱᓇᓱᒍᑎᓂ ᐊᖏᕐᐸᒡᓗᑎᒃ ᓇᓗᓇᐃᒃᑯᑎᕐᓱᐃᓂᒃᑰᖓᔪᓂ. ᑐᒡᓕᖓᓂᓪᓗ, ᑖᒃᑯᐊ ᐱᓇᓱᒃᑐᑦ ᓄᓇᒥ ᐊᑐᖅᑐᐊᕆᐊᖃᖅᖢᑎᒃ ᕼᐋᒻᒪᓚᒃᑯᓐᓂ, ᓗᐊᐃᔭᑖᕐᓗᑎᒃ ᐊᒻᒪᓗ ᐃᒡᓗᒧᑦ ᐊᑭᓕᕐᓱᐃᔾᔪᑎᑖᕐᓗᑎᒃ. ᑖᒃᑯᐊ ᐊᑐᖁᔭᐅᔪᑦ ᐱᐊᓂᒃᑕᐅᒃᐸᑕ, ᑎᑎᕋᕐᕕᐅᓇᔭᕐᑐᑦ ᐊᖏᖅᑕᐅᔾᔪᑎᒻᒪᕆᖕᒥ.

“ᐅᓇ ᐊᓂᒍᑦᑎᐊᖁᑦᑎᐊᖅᑕᕋ,” ᐅᖃᕐᑐᖅ.

ᓱᓕ ᐃᓱᒫᓘᑎᒋᔭᐅᔪᓂ ᐋᖅᑭᒃᓱᐃᒃᑲᓐᓂᕆᐊᖃᕐᑐᑦ. ᐊᖏᓂᕐᐹᕐᓕ ᑎᑭᓵᒃᓴᖅ ᐱᐊᓂᒃᑕᐅᓇᓱᖕᓂᖓ.

ᐃᒡᓗᓕᕆᔨᕐᔪᐊᒃᑯᑦ ᐱᓕᕆᖃᑎᖃᒪᐅᕐᑐᑦ ᐅᐃᓂᐱᒡᒥ ᐃᒡᓗᓕᐅᕐᓂᕐᒧᑦ ᐱᓕᕆᐊᖃᕐᑐᓂ ᐋᖅᑭᒃᓱᐃᓇᓱᒃᖢᑎᒃ “ᐃᒡᓗᓴᐃᑦ ᖃᓄᐃᓕᖓᓂᒃᓴᖏᓐᓂᒃ,” ᒪᐃᓐ ᐅᖃᕐᑐᖅ. ᑖᒃᑯᐊ ᓄᑖᑦ ᐃᒡᓗᐃᑦ ᐃᑭᐊᕐᒥᖃᖅᑐᓂ ᐊᑭᓐᓇᖃᕈᓐᓇᕐᑐᑦ, ᓲᕐᓗ ᑕᐃᒪᓐᓇ ᓄᓇᕗᒻᒥᐅᓄᑦ ᐊᔪᕐᓇᙱᓐᓂᕐᓴᐅᓇᔭᕐᑐᖅ ᐃᒡᓗᓕᐅᕆᐊᒃᓴᖅ ᐱᓕᕆᓕᒪᓗᐊᙱᒃᑲᓗᐊᕈᑎ.

ᑎᑭᓵᒃᓴᖅ ᐱᐊᓂᒃᑕᐅᓂᐊᕋᓱᒋᔭᐅᔪᖅ ᑎᓯᐱᕆᒥ, ᐅᑯᓇ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐱᓇᓱᒃᑐᓂ ᑐᓴᖅᑕᐅᑎᑦᑎᓕᕈᑎᒃ, ᐅᖃᕐᑐᖅ.

ᐃᓱᒪᔪᖅ ᓄᓇᕗᒥᑦ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᓄᑦ ᐱᓕᕆᐊᒃᓴᖅ ᖃᓄᐃᓕᐅᕆᐊᖃᕈᓘᔭᕐᓇᕐᓂᐊᖅᑐᖅ, ᓲᕐᓗ ᑕᒪᒃᑯᐊ ᓇᖕᒥᓂᖅᑖᕋᓱᒃᑐᑦ ᓇᖕᒥᓂᖅ ᓴᓇᓗᑎᒃ ᐃᒡᓗᒃᓴᒥ — ᓈᒻᒪᙱᓕᐅᕈᑎᕕᓂᕐᓕ ᓇᖕᒥᓂᖅ ᐃᒡᓗᒃᓴᓂ ᐃᑲᔫᑎᒃᓴᓄᑦ ᐱᓕᕆᐊᖑᓚᐅᕐᓯᒪᔪᒥ.

ᑭᓯᐊᓂᓕ ᑕᒪᐃᓐᓂ ᑕᑯᓪᓗᒍ ᐃᓱᒪᔪᖅ ᐅᓇ “ᑭᖑᓪᓕᕐᒥ ᐊᖏᔪᖅ ᓇᖕᒥᓂᖅ ᐃᒡᓗᒃᓴᓂ ᐱᓕᕆᐊᒃᓴᐅᓂᐊᕐᑐᖅ.”

“ᐊᓯᖏᓪᓕ 10 ᐅᕝᕙᓘᓐᓃᑦ 13 — ᐅᕝᕙᓘᓐᓃᑦ ᖃᓄᑐᐃᓐᓇ ᐋᖅᑭᒍᓐᓇᕐᓂᒃᑯᑦ — ᐊᓂᒍᐃᑦᑎᐊᖅᐸᑕ ᐱᐅᓇᔭᕐᑐᖅ, ᓲᖃᐃᒻᒪ ᒐᕙᒪᒃᑯᑦ ᓄᑖᒥ ᐊᖏᕐᕋᕆᔭᐅᔪᒃᓴᓂ ᐋᖅᑭᒃᓱᐃᓂᐊᕐᒪᑕ $250,000-ᓄᑦ,” ᐅᖃᕐᑐᖅ, “ᐃᒪᓐᓇᐅᙱᖔᖅᑐᖅ $750,000-ᓂ ᐊᑭᓕᐅᑎᐅᕙᒃᑐᓂ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᒃ.”