ᒪᐃᐳᓪ ᓯᐅᕋᑉ ᑕᖅᑭᓕᐊᕐᓂᕐᒧᑦ? ᐄᑦᑎᐊᖅ

For English version, see Maple syrup on the way to the moon? Absolutely

ᑲᓇᑕᒥᐅᑕᖅ ᓯᓚᐃᓐᓇᕐᒧᙵᐅᓲᖅ ᔨᐊᕋᒥ ᕼᐋᓐᓯᓐ ᐅᖃᐅᔾᔨᓚᐅᖅᐳᖅ ᑲᑎᙵᓂᐅᔪᒥ ᓴᓂᑭᓗᐊᕐᒥ ᐃᓕᓐᓂᐊᖅᑎᓂ ᒪᒪᑕᓚᐅᕐᓂᖓᓂ ᐊᖏᕐᕋᒥᓂᑦ ᐊᐅᓪᓛᕐᓂᖓᓂ ᑕᖅᑭᒧᑦ.

“ᐅᕝᕙ ᒪᐃᐳᓪ ᓯᐅᕋᑉ ᒪᑐᐃᓚᐅᖅᑕᑦᑎᓐᓂ ᐅᓪᓗᕈᒻᒥᓴᕐᒥ ᐅᓪᓗᒥ,” ᕼᐋᓐᓯᓐ ᐅᖃᓚᐅᖅᐳᖅ, ᐴᖓᔪᒥ ᒪᐃᐳᓪ ᓯᐅᕋᑉ ᐳᒃᑕᓛᖅᑎᓪᓗᒍ ᓯᕗᓂᖓᓂ ᐅᖁᒪᐃᓐᓂᖃᙱᑦᑐᒥ ᐊᕙᑎᐅᔪᒥ ᐃᑭᒪᓪᓗᑎᒃ Orion ᓯᓚᐃᓐᓇᕐᒧᑦ ᖃᖓᑦᑕᖅᑎᑕᐅᓯᒪᔪᒥ. “ᑕᐃᒫᒃ ᐱᒐᓛᓚᐅᖅᐳᒍᑦ ᑲᓇᑕᒥ ᐃᑭᒪᓪᓗᑕ ᐅᓪᓗᒥ.”

ᑕᓪᓕᒪᓂ ᓴᓂᑭᓗᐊᕐᒥ ᐃᓕᓐᓂᐊᖅᑎᓂ ᐃᓚᐅᖃᑕᐅᓚᐅᖅᐳᑦ ᐊᐱᖅᓱᕐᓂᕐᒥ-ᐊᒻᒪ-ᑭᐅᓂᐅᔪᒥ ᓴᖅᑭᔮᑲᐅᑎᒋᔪᒥ ᖃᕋᓴᐅᔭᑎᒍᑦ ᕼᐋᓐᓯᓐᒥ ᐊᒻᒪ ᒪᕐᕉᖕᓂ ᐊᓯᖏᓐᓂ ᓯᓚᐃᓐᓇᕐᒧᙵᐅᓲᓂᑦ Artemis II ᐃᖏᕐᕋᓂᐅᔪᒥ ᑕᖅᑭᒧᑦ.

“ᖃᓄᐃᑦᑐᓂ ᓂᕿᓂᑦ ᓂᕆᓲᖑᕕᓯ ᓯᓚᐃᓐᓇᕐᒥ ᐊᒻᒪ ᖃᓄᖅ ᓂᖅᖠᐅᓲᖑᕕᓯᐅᒃ?” ᐊᐱᕆᓚᐅᖅᐳᖅ ᐃᓕᓴᐱ ᐊᕋᒍᑕᐃᓐᓇᖅ, ᓯᓐᑎ ᐊᓚᕆᐊᖅ, ᓗᐊᕇᓐ ᐃᑉᐸᒃ, ᑏᓇ ᓄᕗᓕᙵ ᐊᒻᒪ ᓘᒋᓐ ᐊᕋᒍᑕᐃᓐᓇᖅ ᑐᓄᐊᓂ ᓇᖏᖅᑎᓪᓗᒋᑦ.

ᐊᐱᖅᑯᑎᖓ ᓂᐱᓕᐅᖅᑕᐅᓚᐅᖅᐳᖅ ᐊᒻᒪ ᓂᓪᓕᐊᑎᑕᐅᓪᓗᓂ ᕼᐋᓐᓯᓐᒧᑦ ᓈᑦᑎᖑᔭᒥ ᐅᓪᓛᕐᔪᐊᖓᓂ ᓴᖅᑭᔮᑲᐅᑎᒋᔪᒥ ᖃᕋᓴᐅᔭᑎᒍᑦ ᑲᓇᑕᒥ ᓯᓚᐃᓐᓇᕐᒧᑦ ᑐᑦᑕᕐᕕᖓᓂ YouTube ᐱᓕᕆᕝᕕᖓᓂ.

“ᓂᕆᑐᐃᓐᓇᖅᓯᒪᕗᖓ ᓯᓚᐃᓐᓇᕐᒧᑦ ᓂᕿᓂᑦ ᖃᔅᓯᐊᕐᔪᖕᓄᑦ ᐅᓪᓗᓄᑦ, ᑭᓯᐊᓂ ᑯᕆᔅᑏᓇ [ᑯᒃ], ᓄᓇᖃᖅᓯᒪᕗᖅ ᓯᓚᐃᓐᓇᕐᒧᑦ ᖃᓂᒋᐸᓗᖕᑕᖓᓂ ᐊᕐᕌᒍᓕᒫᒧᑦ. ᓂᕆᓯᒪᕐᔪᐊᖅᐳᖅ ᓯᓚᐃᓐᓇᕐᒧᑦ ᓂᕿᓂᑦ,” ᕼᐋᓐᓯᓐ ᐅᖃᓚᐅᖅᐳᖅ, ᒥᑕᓗᒃᖢᓂ ᑐᓂᓯᓪᓗᓂ ᐊᐱᖅᑯᑕᐅᔪᒥ ᓯᓚᐃᓐᓇᕐᒧᙵᐅᓲᖑᖃᑎᖓᓄᑦ.

ᑯᒃ ᓴᖅᑭᑎᑦᑎᓚᐅᖅᐳᖅ ᖃᔅᓯᒐᓚᖕᓂ ᐴᖑᔪᓂ ᐸᓂᖅᑎᑕᐅᓯᒪᔪᓂ ᐴᕐᓂ ᓂᕿᓂᑦ. ᐃᓚᖏᑦ ᐳᒃᑕᓛᖅᖢᑎᒃ ᓯᕗᓂᐊᓂ ᓯᓚᐃᓐᓇᕐᒧᙵᐅᓲᓄᑦ ᐅᖁᒪᐃᓐᓂᖃᙱᒻᒪᑦ ᓯᓚᐃᓐᓇᕐᒥ.

“ᐅᓇ ᔨᐊᕋᒥᐅᑉ ᓂᕆᓂᐊᖅᑕᖓ,” ᐅᖃᓚᐅᖅᐳᖅ, ᑎᒍᒥᐊᖅᖢᓂ ᑕᑯᒃᓴᐅᔪᒥ ᒥᓪᓗᐊᕈᒻᒧᑦ-ᒪᑐᓯᒪᓂᐅᔪᒥ ᐴᖑᔪᒥ ᑭᓱᒥᒃᑭᐊᖅ ᐊᐅᐸᔮᖓᔪᒥ ᐃᓗᐊᓃᑦᑐᒥ. “ᓯᓚᐃᓐᓇᕐᒥ ᓂᕆᔭᕆᐊᖃᖅᐳᑎᑦ ᑕᒪᒃᑭᓂ ᓂᕿᓂᑦ ᐴᖑᔪᓂᑦ.”

“ᐅᓇ ᑭᖑᒃᐸᐅᓪᓗᓂ ᓂᕆᔭᒃᓴᐅᕗᖅ,” ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᕼᐋᓐᓯᓐ ᐳᒃᑕᓛᖅᑐᒥ ᐴᖑᔪᒥ ᓂᕆᓂᐊᖅᑕᖓᓂ.

ᐅᓇ ᑲᓇᑕᒥ ᓯᓚᐃᓐᓇᕐᒧᑦ ᑐᑦᑕᕐᕕᒃ ᐊᔾᔨᙳᐊᖅ ᑕᑯᒃᓴᐅᑎᑦᑎᕗᖅ ᐅᖓᓯᖕᓂᖓᓂ ᓯᕙᑖᕐᕕᖕᒥ ᐊᒻᒪ ᓇᒧᙵᐅᕙᓪᓕᐊᓂᕆᔭᐅᔪᖅ Orion ᓯᓚᐃᓐᓇᕐᒧᑦ ᖃᖓᑦᑕᖅᑎᑕᐅᓯᒪᔪᒥ, ᓂᕆᐅᒋᔭᐅᔪᒥ ᐅᐃᔾᔮᕐᓂᐊᕐᓂᖓᓂ ᑕᖅᑭᒥᑦ ᐅᑎᓚᐅᙱᓐᓂᖓᓂ ᓄᓇᕐᔪᐊᒧᑦ. (ᐊᔾᔨᓕᐅᖅᑕᐅᔪᖅ ᑲᓇᑕᒥ ᓯᓚᐃᓐᓇᕐᒧᑦ ᑐᑦᑕᕐᕕᖕᒥᑦ)

ᕼᐋᓐᓯᓐ ᐊᒻᒪ ᑯᒃ ᑎᓴᒪᐅᔪᓂ ᓯᓚᐃᓐᓇᕐᒧᙵᐅᓲᓂᑦ ᔫᓇᐃᑎᑦ ᔅᑕᐃᑦᔅᓂ.-ᐊᐅᓚᑕᐅᔪᒥ Artemis II lunar ᐃᖏᕐᕋᓂᕆᔭᖓᓂ, ᐃᓚᖃᕐᒥᔪᒥ ᕇᑦ ᐅᐊᐃᔅᒪᓐ ᐊᒻᒪ ᕕᒃᑐᕐ ᒐᓚᕗᕐ.

ᕼᐋᓐᓯᓐ ᓯᕗᓪᓕᖅᐸᐅᓪᓗᓂ ᑲᓇᑕᒥᐅᑕᐅᔪᒥ ᑕᖅᑭᓕᐊᕐᓂᑯᒥ.

ᐃᓕᓐᓂᐊᖅᑏᑦ ᐃᓚᒋᔭᐅᓚᐅᖅᐳᑦ ᑲᑎᙵᓂᐅᔪᓂ ᒪᒃᑯᒃᑐᓂ ᑲᓇᑕᒥᐅᑕᓂ ᐊᐱᖅᓱᓚᐅᖅᑐᓂ ᓯᓚᐃᓐᓇᕐᒧᐊᖅᓯᒪᔪᓂ ᐊᐱᖅᑯᑕᐅᔪᓂ ᑎᓴᒪᖓᓂ ᐅᓪᓗᖓᓂ ᐅᓪᓗᓂ−10-ᓂ ᐃᖏᕐᕋᓂᐅᔪᒥ. ᓯᓚᐃᓐᓇᕐᒧᙵᐅᓲᑦ 300,000 ᑭᓛᒥᑐᐸᓗᖕᓂ ᓄᓇᕐᔪᐊᒥ ᐅᖓᓯᒃᑎᒋᓚᐅᖅᐳᑦ ᐅᕝᕙᓘᓐᓃᑦ ᐱᖓᓱᓂ-ᑎᓴᒪᓄᑦ ᑕᖅᑭᓕᐊᕐᓂᕐᒧᑦ ᓈᑦᑎᖑᔭᒥ ᐅᓪᓛᕐᔪᐊᖓᓂ 12:10 ᐅᓐᓄᐊᒃᑯᑦ ᑲᓇᖕᓇᕐᒥ ᓯᕿᙳᔭᖓᓂ.

ᑲᑎᙵᑎᑦᑎᓂᖃᖅᑐᒥ ᐅᐊᖕᓇᒥ, ᐃᓕᑦᑎᓂᐅᔪᒥ ᐃᑲᔪᕈᑎᒃᓴᖅ ᑲᑐᔾᔨᖃᑎᒌᖑᔪᒥ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ, ᐋᖅᑭᒃᓱᐃᓚᐅᖅᐳᑦ ᑲᑎᖃᑎᖃᕐᓂᐅᔪᒥ ᓄᓇᕗᒻᒥ ᐊᒻᒪ ᑲᓇᑕᒥ ᓯᓚᐃᓐᓇᕐᒧᑦ ᑐᑦᑕᕐᕕᖓᓄᑦ.

Artemis II ᐃᖏᕐᕋᓂᐅᔪᒥ ᐱᒋᐊᓚᐅᖅᐳᖅ ᐊᐃᑉᕆᓕ 1−ᒥ. ᐱᓕᕆᓚᐅᖅᑎᓪᓗᒋᑦ ᖃᔅᓯᐊᕐᔪᖕᓂ ᐅᐃᔾᔮᕐᓂᐅᔪᓂ ᓄᓇᕐᔪᐊᒥ ᓱᒃᑲᒃᑎᒋᐊᕐᓂᕐᒧᑦ, ᓯᓚᐃᓐᓇᕐᒧᙵᐅᓲᑦ ᐃᖏᕐᕋᓯᓚᐅᖅᐳᑦ ᑕᖅᑭᒧᑦ. ᐃᖏᕐᕋᓂᐅᔪᖅ ᓇᓗᓇᐃᖅᓯᕗᖅ ᓯᕗᓪᓕᖅᐹᖑᔪᒥ ᐃᓄᐃᑦ ᑕᖅᑭᓕᐊᖅᓯᒪᓂᖏᓐᓂ ᑕᐃᒪᙵᓂ 1972−ᒥ. ᐃᖏᕐᕋᓂᐅᔪᖅ ᐃᖏᕐᕋᑎᑦᑎᓂᐊᖅᐳᖅ ᑕᑭᔪᒥ ᐴᒍᑕᐅᔨᖓᔪᒥ ᑲᐃᕙᑎᑕᐅᔪᒥ ᑕᖅᑭᒥᑦ — ᓄᓇᕐᔪᐊᑉ ᖃᖓᑦᑕᖅᑎᑕᐅᓯᒪᓪᓚᕆᒃᑐᒥ. ᐃᖏᕐᕋᑎᑦᑎᓂᐊᖅᐳᖅ ᐅᖓᓯᖕᓂᖅᓴᐅᔪᒧᑦ ᓯᓚᐃᓐᓇᕐᒧᑦ ᐃᓄᖕᒥ ᐅᐸᒃᑕᐅᓚᐅᖅᓯᒪᔪᒥ.

Armetis II ᐃᖏᕐᕋᓂᐅᔪᒥ ᐃᓚᒋᔭᐅᕗᖅ NASA−ᑯᑦ ᐊᑯᓂᐅᔪᒃᑯᑦ ᐸᕐᓇᐅᑎᖓᓂ ᓴᖅᑭᑎᑦᑎᓂᕐᒥ ᓯᕗᓪᓕᖅᐸᐅᔪᒥ ᑐᙵᕕᐅᔪᒥ ᑕᖅᑭᒥᑦ.

ᖁᕕᐊᕐᔪᐊᕐᓂᖃᓚᐅᖅᐳᖅ YouTube ᐅᖃᖃᑎᒌᖕᓂᐅᔪᒥ ᑕᐃᑲᓂ ᓴᖅᑭᔮᑲᐅᑎᒋᔪᒥ ᖃᕋᓴᐅᔭᑎᒍᑦ.

ᐊᑕᐅᓯᖅ ᐊᖓᔪᖅᑳᖑᔪᖅ ᖁᙱᐊᖅᑐᒥ ᓴᖅᑭᔮᑲᐅᑎᒋᔪᒥ ᖃᕋᓴᐅᔭᑎᒍᑦ ᓯᑦᓂ, ᐋᔅᑐᕋᐃᓕᐊᒥ, ᑕᓪᓕᒪᓂ-ᐅᑭᐅᓕᒃ ᐸᓂᖓ ᐅᖃᓚᐅᖅᐳᖅ, “ᐅᕙᓐᓄᑦ ᐅᖃᓚᐅᖅᐳᖅ ᑕᖅᑭᓕᐊᓛᕈᒪᓂᖓᓂ ᐃᓐᓇᐅᓂᖅᓴᐅᓕᕈᓂ.”

ᐊᓯᖏᓐᓂ ᐅᖃᐅᓯᒃᓴᓕᐊᖑᔪᓂ YouTube ᐅᖃᖃᑎᒌᖕᓂᐅᔪᒥ ᐃᔪᕐᓇᖅᑐᓕᐅᓚᐅᖅᐳᑦ ᑲᓇᑕᒥ ᓂᕿᖏᓐᓂᑦ, ᐊᑕᐅᓯᖅ ᐅᖃᓚᐅᖅᐳᖅ ᐊᐃᑦᑖᖑᒐᓗᐊᖅ ᕼᐋᓐᓯᓐ ᐱᔪᓐᓇᙱᓐᓂᖓᓂ ᐸᓂᖅᑎᑕᐅᓯᒪᔪᓂ ᐳᑏᓐᒥ ᓯᓚᐃᓐᓇᕐᒧᑦ ᖃᖓᑕᓂᐅᔪᒥ. ᐊᓯᖓᓂ ᐃᓱᒪᓚᐅᖅᐳᖅ ᖃᓄᖅ ᕼᐋᓐᓯᓐ ᐆᒪᔪᓐᓇᕐᓂᖓᓂ ᑎᒻ ᕼᐅᐊᑎᓐᔅᖃᕐᓇᓂ.

ᕼᐋᓐᓯᓐ ᐃᓱᓕᑎᑦᑎᓚᐅᖅᐳᖅ ᓴᖅᑭᔮᑲᐅᑎᒋᔪᒥ ᖃᕋᓴᐅᔭᒃᑰᕐᓂᕐᒥ ᓯᓚᐃᓐᓇᕐᒥ ᐃᓕᓴᖅᓯᓂᕐᒥ ᐱᒻᒪᕆᐅᓂᖓᓂ ᒪᒃᑯᒃᑐᓂ ᓯᕗᓂᒃᓴᖓᓄᑦ ᑲᓇᑕᐅᑉ ᓯᓚᐃᓐᓇᕐᒧᑦ ᐱᓕᕆᐊᖑᔪᒥ.

“ᑲᓇᑕᐅᑉ ᓯᕗᓂᒃᓴᖓ ᓯᓚᐃᓐᓇᕐᒧᑦ ᖃᐅᒪᕗᖅ ᐃᓕᔅᓯᓐᓂᓕᒫᖅ ᐱᔾᔪᑎᖃᖅᑐᒥ.”

ᓴᖅᑭᔮᑲᐅᑎᒋᔪᒥ ᑐᓴᐅᒪᔾᔪᑎᒃᓴᓂ ᐱᔾᔪᑎᖃᖅᑐᒥ Artemis II ᐃᖏᕐᕋᓂᖓᓂ ᓇᓂᔭᐅᔪᓐᓇᖅᐳᖅ NASA−ᒥ ᐊᖏᕐᕋᒥ ᒪᒃᐱᒐᖓᓐᓂ YouTube ᐱᓕᕆᕝᕕᓪᓚᕆᖓᓂ.